Kapitlu 79
Ġens Mitluf, Imma Mhux Kollu
FTIT wara li Ġesù ddiskuta maʼ dawk li kienu nġabru barra d-dar taʼ wieħed Fariżew, ċerti wħud igħidulu “dwar il-Galilej li d-demm tagħhom [il-gvernatur Ruman Ponzju] Pilatu kien ħalltu mas-sagrifiċċji tagħhom.” Dawn il-Galilej huma forsi dawk li kienu maqtulin meta eluf taʼ Lhud ipprotestaw kontra l-fatt li Pilatu uża xi flus mit-teżor tat-tempju biex jibni akkwidott biex iġib l-ilma ġo Ġerusalemm. Dawk li qed jirrakkontaw din il-kwistjoni lil Ġesù jistgħu qed jissuġġerixxu li l-Galilej batew dan il-gwaj minħabba fl-egħmejjel mill-agħar tagħhom stess.
Ġesù, madankollu, jikkorreġihom, billi jistaqsi: “Timmaġinaw intom li dawn il-Galilej ġew ippruvati li huma midinbin agħar mill-Galilej l-oħra kollha għaliex sofrew dawn l-affarijiet? Le, tabilħaqq,” iwieġeb Ġesù. Imbagħad hu juża l-inċident biex iwissi lil-Lhud; “Jekk ma tindmux, intom ilkoll b’mod simili se tinqerdu.”
Billi jkompli, Ġesù jfakkar traġedja lokali oħra, forsi assoċjata wkoll mal-bini tal-akkwidott. Hu jistaqsi: “Jew dawk it-tmintax li fuqhom waqaʼ t-torri f’Silogħam, u b’hekk qatilhom, timmaġinaw intom li huma ġew ippruvati li kienu midjunin akbar mill-bnedmin l-oħra kollha li jabitaw f’Ġerusalemm?” Le, ma kienx minħabba l-ħażen taʼ dawn il-persuni li huma mietu, igħid Ġesù. Minflok, “iż-żmien u l-ġrajja mhix mistennija” huma ġeneralment responsabbli għal traġedji bħal dawn. Ġesù, madankollu, għal darb’oħra juża l-okkażjoni biex iwissi: “Imma, jekk ma tindmux, intom ilkoll se tinqerdu bl-istess mod.”
Ġesù mbagħad jissokta jagħti tixbieha li tixraq, billi jispjega: “Ċertu raġel kellu siġra tat-tin imħawla fil-għalqa tad-dwieli tiegħu, u ġie jfittex il-frott fuqha, imma ma sab xejn. Imbagħad hu qal lil dak li kien jieħu ħsieb id-dwieli, ‘Ili tliet snin niġi hawn infittex il-frott fuq din is-siġra tat-tin, imma ma sibt xejn. Qaċċatha! Għala tassew għandha żżomm l-art ma tiswa għalxejn?’ Bi tweġiba hu qallu, ‘Mgħallem, ħalliha waħedha wkoll din is-sena, sakemm inħaffer madwarha u nitfaʼ d-demel; u jekk imbagħad tipproduċi l-frott fil-futur, sewwa u tajjeb; imma jekk le, int se tqaċċatha.’”
Ġesù ipprova għal iktar minn tliet snin jikkultiva l-fidi fost il-ġens Lhudi. Imma l-frott tax-xogħol tiegħu kien igħodd biss xi ftit mijiet taʼ dixxipli. Issa, matul din ir-rabaʼ sena tal-ministeru tiegħu, hu qed iżid l-isforzi tiegħu, billi b’mod simboliku jħaffer u jitfaʼ d-demel madwar is-siġra tat-tin Lhudija billi jippriedka u jgħallem b’mod żeluż fil-Ġudea u fil-Perea. Imma kollu għalxejn! Il-ġens ma jindimx u għalhekk huwa lest għall-qerda. Fdal biss mill-ġens iwieġbu.
Ftit wara dan, Ġesù qed igħallem f’sinagoga f’jum is-Sibt. Hemmhekk hu jara mara li, minħabba li kellha demonju jaħqarha, ilha milwija tnejn għal 18-il sena. Bi ħniena, Ġesù jindirizzaha: “Mara, inti meħlusa mid-djufija tiegħek.” Minnufih hu jpoġġi jdejh fuqha, u mill-ewwel hi tiddritta u tibda tigglorifika lil Alla.
L-uffiċjal li jippresiedi tas-sinagoga, madankollu, huwa rrabjat. “Hemm sitt ijiem li fihom ix-xogħol għandu jsir,” hu jipprotesta. “Fihom, għalhekk, ejjew u tfejqu, u mhux f’jum is-sibt.” L-uffiċjal b’hekk jirrikonoxxi l-qawwa taʼ Ġesù biex ifejjaq imma jikkundanna lin-nies talli jiġu biex jitfejqu f’jum is-Sibt!
“Ipokriti,” jwieġeb Ġesù, “ma jħollx kull wieħed minnkom f’jum is-sibt il-barri tiegħu jew il-ħmar tiegħu mill-istalla u jmexxih ’il hemm biex jagħtih jixrob? Ma wasalx iż-żmien, allura, għal din il-mara li hi bint Abraham, u li lilha Satana żammha marbuta, ħares! tmintax-il sena, biex tiġi maħlula minn dan l-irbit nhar jum is-sibt?”
Sewwa, malli jisimgħu dan, dawk li qed jopponu lil Ġesù jibdew jistħu. Il-folla, madankollu, tifraħ bl-affarijiet glorjużi kollha li jaraw lil Ġesù jagħmel. Bi tweġiba Ġesù jirrepeti żewġ tixbihat profetiċi rigward is-Saltna t’Alla, tixbihat li hu rrakkonta minn fuq dgħajsa fil-Baħar tal-Galilija xi sena qabel. Luqa 13:1-21; Ekkleżjasti 9:11; Mattew 13:31-33.
▪ Liema traġedji huma msemmija hawnhekk, u Ġesù x’lezzjoni jiġbed minnhom?
▪ X’applikazzjoni tistaʼ ssir rigward is-siġra tat-tin li ma tagħmilx frott, kif ukoll l-attentati biex jagħmluha produttiva?
▪ L-uffiċjal li jippresiedi kif jirrikonoxxi l-ħila taʼ Ġesù f’li jfejjaq lin-nies, iżda Ġesù kif jikxef l-ipokrezija tar-raġel?