Kapitlu 80

L-​Imqajjel tan-​Ngħaġ u r-​Ragħaj

ĠESÙ qiegħed f’Ġerusalemm fi żmien il-​Festa tad-​Dedikazzjoni, jew Hannukkah, festa li tiċċelebra d-​dedikazzjoni mill-​ġdid tat-​tempju lil Jehovah. Fis-​sena 168 Q.E.K., madwar 200 sena qabel, Antijoku IV Epifanes ħataf taħt idejh lil Ġerusalemm u pprofana t-​tempju u l-​artal tiegħu. Madankollu, tliet snin wara, Ġerusalemm kienet maħtufa mill-​ġdid u t-​tempju kien ġie ddedikat mill-​ġdid. Wara dan, bdiet issir ċelebrazzjoni kull sena biex tfakkar id-​dedikazzjoni mill-​ġdid.

Din il-​Festa tad-​Dedikazzjoni sseħħ nhar il-​25 taʼ Ċislev, ix-​xahar Lhudi li jikkorrispondi mal-​aħħar parti taʼ Novembru u l-​ewwel parti taʼ Diċembru fil-​kalendarju modern tagħna. B’hekk, jibqaʼ biss ftit iktar minn mitt jum għall-​Qbiż importanti ferm tas-​sena 33 E.K. Peress li huwa staġun taʼ klima kiesħa, l-​appostlu Ġwanni jsejjaħlu “żmien xitwi.”

Ġesù issa juża tixbieha li fiha hu jsemmi tliet imqajjel tan-​ngħaġ u r-​rwol tiegħu bħala r-​Ragħaj mill-​Aħjar. L-​ewwel maqjel tan-​ngħaġ li hu jitkellem dwaru huwa identifikat mal-​arranġament tal-​patt tal-​Liġi taʼ Mosè. Il-​Liġi serviet bħala ċint, li fired lil-​Lhud mill-​prattiċi korrotti taʼ dawk in-​nies li ma kinux f’dan il-​patt speċjali maʼ Alla. Ġesù jispjega: “Verissmu ngħidilkom, Dak li ma jidħolx ġol-​maqjel tan-​ngħaġ mill-​bieb imma jixxabbat minn x’imkien ieħor, dak hu ħalliel u wieħed li jisraq. Imma dak li jidħol mill-​bieb hu ragħaj in-​ngħaġ.”

Oħrajn kienu ġew u qalu li kienu l-​Messija, jew Kristu, imma ma kinux il-​veru ragħaj li dwaru Ġesù jissokta jitkellem: “Il-​bewwieb jiftaħlu lil dan, u n-​ngħaġ jisimgħu leħnu, u hu jsejjaħ lin-​ngħaġ tiegħu stess bl-​isem u jmexxihom ’il barra. . . . Lil wieħed barrani b’ebda mod ma se jsegwuh imma se jaħarbu minnu, għaliex huma ma jafux leħen il-​barranin.”

Il-“bewwieb” tal-​ewwel maqjel tan-​ngħaġ kien Ġwanni l-​Għammied. Bħala l-​bewwieb, Ġwanni lil Ġesù ‘fetaħlu’ billi identifikah lil dawn in-​ngħaġ simboliċi li lilhom hu kellu joħroġ ’il barra lejn il-​mergħa. Dawn in-​ngħaġ, li Ġesù jsejħilhom b’isimhom u joħroġhom ’il barra, jiġu eventwalment imdaħħlin ġo maqjel tan-​ngħaġ ieħor, bħalma jispjega hu: “Verissmu ngħidilkom, Jien hu l-​bieb tan-​ngħaġ,” jiġifieri, il-​bieb taʼ maqjel tan-​ngħaġ ġdid. Meta Ġesù jistabbilixxi l-​patt ġdid mad-​dixxipli tiegħu u mis-​sema jsawwab spirtu qaddis fuqhom nhar Pentekoste taʼ wara, huma jiġu mdaħħlin f’dan il-​maqjel tan-​ngħaġ ġdid.

Billi jispjega iktar ir-​rwol tiegħu, Ġesù jgħid: “Jien hu l-​bieb; kulmin jidħol minni se jkun salvat, u se jidħol u joħroġ u jsib mergħa. . . . Jien ġejt biex huma jistgħu jkollhom il-​ħajja u jistgħu jkollhom lilha bl-​abbundanza. . . . Jien hu r-​ragħaj mill-​aħjar, u naf lin-​ngħaġ tiegħi u n-​ngħaġ tiegħi jafu lili, sewwa sew bħalma l-​Missier jaf lili u jien naf lill-​Missier; u jien inċedi ruħi għan-​ngħaġ.”

Dan l-​aħħar, Ġesù kien farraġ lis-​segwaċi tiegħu, billi qal: “Tibżgħux, merħla ċkejkna, għaliex Missierkom approva li jagħtikom is-​saltna.” Din il-​merħla ċkejkna, li eventwalment tgħodd 144,000, tidħol ġo dan il-​maqjel tan-​ngħaġ ġdid, jew it-​tieni wieħed. Imma Ġesù jissokta josserva: “Għandi ngħaġ oħra, li m’humiex taʼ dan il-​maqjel; dawk ukoll irrid inġib, u se jisimgħu minn leħni, u se jsiru merħla waħda, ragħaj wieħed.”

Ladarba n-​“ngħaġ oħra” “m’humiex taʼ dan il-​maqjel,” bil-​fors li huma taʼ maqjel ieħor, it-​tielet wieħed. Dawn l-​aħħar żewġ imqajjel tan-​ngħaġ għandhom destini differenti. Il-​“merħla ċkejkna” f’maqjel wieħed se jaħkmu maʼ Kristu fis-​sema, u n-​“ngħaġ oħra” fil-​maqjel l-​ieħor se jgħixu fil-​Ġenna tal-​art. Madankollu, minkejja li qegħdin f’żewġ imqajjel, in-​ngħaġ m’għandhomx għira, lanqas ma jħossuhom iżolati minn xulxin, għax bħalma jgħid Ġesù, huma “jsiru merħla waħda” taħt “ragħaj wieħed.”

Ir-Ragħaj mill-​Aħjar, Ġesù Kristu, minn jeddu jagħti ħajtu għaż-​żewġ imqajjel tan-​ngħaġ. “Jiena nċediha minn jeddi,” hu jgħid. “Jien għandi awtorità li nċediha, u għandi awtorità li nerġaʼ nirċeviha. Il-​kmandament fuq dan jien irċevejtu mingħand Missieri.” Meta Ġesù jgħid dan, tirriżulta firda fost il-​Lhud.

Ħafna mill-​folla jgħidu: “Għandu demonju u huwa miġnun. Għala tisimgħuh?” Imma oħrajn iwieġbu: “Dan mhux il-​kliem taʼ raġel indemonjat.” Imbagħad, billi jirreferu għal meta xahrejn qabel hu fejjaq lil raġel imwieled agħma, huma jżidu: “Demonju ma jistax jiftaħ il-​għajnejn taʼ nies għomja, hux hekk?” Ġwann 10:​1-22; 9:​1-7; Luqa 12:32; Rivelazzjoni 14:​1, 3; 21:3, 4; Salm 37:29.

▪ X’inhi l-​Festa tad-​Dedikazzjoni, u meta tiġi ċċelebrata?

▪ X’inhu l-​ewwel maqjel tan-​ngħaġ, u min hu l-​bewwieb tiegħu?

▪ Il-​bewwieb kif jiftaħlu lir-​Ragħaj, u n-​ngħaġ fejn jiġu mdaħħlin wara dan?

▪ Min jifforma ż-​żewġ imqajjel tar-​Ragħaj mill-​Aħjar, u kemm-il merħla jsiru?