Kapitlu 81

Iktar Attentatibiex Joqtlu lil Ġesù

LADARBA qegħdin fix-​xitwa, Ġesù qiegħed jimxi fl-​inħawi mkennija magħrufin bħala l-​kolonni taʼ Salamun. Dawn qegħdin maġenb it-​tempju. Hawnhekk xi Lhud iduru miegħu u jibdew igħidu: “Kemm se ddum iżżommna taqlagħalna ruħna? Jekk int il-​Kristu, għidilna ċar u tond.”

“Għidtilkom,” iwieġeb Ġesù, “u madankollu intom ma temmnux.” Ġesù ma kienx qalilhom direttament li hu kien il-​Kristu, bħalma kien qal lill-​mara Samaritana ħdejn il-​bir. Madankollu hu kien, fil-​fatt, irrivela l-​identità tiegħu meta hu spjegalhom li hu kien mill-​oqsma taʼ fuq u kien eżista qabel Abraham.

Ġesù, madankollu, jrid li n-​nies jaslu għal konklużjoni huma stess li hu l-​Kristu billi jqabblu l-​attivitajiet tiegħu maʼ dak li l-​Bibbja bassret li l-​Kristu kellu jwettaq. Għalhekk iktar kmieni hu ordna lid-​dixxipli tiegħu biex ma jgħidu lil ħadd li hu kien il-​Kristu. U għalhekk hu issa jissokta jgħid lil dawn il-​Lhud ostili: “Ix-​xogħlijiet li qed nagħmel f’isem Missieri, dawn jagħtu xiehda dwari. Imma intom ma temmnux.”

Għala ma jemmnux huma? Minħabba nuqqas taʼ evidenza li Ġesù huwa l-​Kristu? Le, imma għar-​raġuni li Ġesù jagħti meta jgħidilhom: “Ħadd minnkom m’hu min-​ngħaġ tiegħi. In-​ngħaġ tiegħi jisimgħu minn leħni, u jien nafhom, u huma jsegwuni. U jien nagħtihom il-​ħajja taʼ dejjem, u huma b’ebda mod ma qatt se jinqerdu, u ħadd ma se jaħtafhomli minn idi. Dak li tani Missieri hu xi ħaġa akbar mill-​affarijiet l-​oħra kollha, u ħadd ma jistaʼ jaħtafhom minn id il-​Missier.”

Ġesù mbagħad jiddeskrivi r-​relazzjoni mill-​qrib tiegħu maʼ Missieru, billi jispjega: “Jien u l-​Missier aħna ħaġa waħda.” Ladarba Ġesù qiegħed fuq l-​art u Missieru qiegħed fis-​sema, biċ-​ċar hu mhux qed igħid li hu u Missieru huma litteralment, jew fiżikament, wieħed. Minflok, hu jrid ifisser li huma ħaġa waħda fl-​iskop, li huma f’għaqda.

Irrabjati bil-​kliem taʼ Ġesù, il-​Lhud jaqbdu l-​ġebel biex iħaġġruh, saħansitra bħalma kienu għamlu qabel, matul il-​Festa tat-​Tabernakli, jew tal-​Egħrejjex. Billi jiffaċċja b’kuraġġ lil dawk li riedu joqtluh, Ġesù jgħid: “Urejtkom ħafna xogħlijiet mill-​aħjar mingħand il-​Missier. Għal liema minn dawk ix-​xogħlijiet qegħdin tħaġġruni?”

“Aħna qed inħaġġruk, mhux għal xogħol mill-​aħjar,” huma jwieġbu, “imma għad-​dagħa, saħansitra għaliex int, għalkemm inti bniedem, tagħmel lilek innifsek wieħed alla.” Ladarba Ġesù qatt ma qal li kien xi alla, il-​Lhud għala jgħidu dan?

Evidentement għaliex Ġesù jattribwixxi għalih innifsu qawwiet li huma jemmnu li huma esklussivament taʼ Alla biss. Per eżempju, għadu kif qal dwar in-​“ngħaġ,” “Jien nagħtihom il-​ħajja taʼ dejjem,” li hi xi ħaġa li ebda bniedem ma jistaʼ jagħmel. Il-​Lhud, madankollu, jinsew il-​fatt li Ġesù jirrikonoxxi li hu rċieva l-​awtorità mingħand Missieru.

Li Ġesù jgħid li hu inqas minn Alla, hu mbagħad jurih billi jistaqsi: “M’huwiex miktub fil-​Liġi tagħkom [f’​Salm 82:​6], ‘Jien għedt: “Intom allat”’? Jekk hu sejjaħ ‘allat’ lil dawk li kontra tagħhom ġiet il-​kelma t’Alla, . . . tgħidu intom lili li ġejt imqaddes mill-​Missier u mibgħut fid-​dinja, ‘Inti tidgħi,’ għaliex jien għedt, Jien l-​Iben t’Alla?”

Ladarba l-​Iskrittura ssejjaħ saħansitra lil imħallfin umani u nġusti “allat,” xi ħtija jistgħu dawn il-​Lhud isibu f’Ġesù talli qal, “Jien l-​Iben t’Alla”? Ġesù jżid: “Jekk m’iniex qed nagħmel ix-​xogħlijiet taʼ Missieri, temmnunix. Imma jekk qed nagħmilhom, saħansitra jekk intom ma temmnunix, emmnu x-​xogħlijiet, sabiex intom tistgħu ssiru tafu u tistgħu tkomplu tkunu tafu li l-​Missier huwa f’għaqda miegħi u jien f’għaqda mal-​Missier.”

Meta Ġesù jgħid dan, il-​Lhud jippruvaw jaħtfuh taħt idejhom. Imma hu jaħrab, bħalma għamel qabel fil-​Festa tal-​Egħrejjex. Hu jitlaq minn Ġerusalemm u jivvjaġġa minn naħa għall-​oħra tax-​Xmara Ġordan lejn fejn Ġwanni beda jgħammed kważi erbaʼ snin qabel. Dan il-​post mid-​dehra mhux ’il bogħod mix-​xatt tan-​Nofs in-​Nhar tal-​Baħar tal-​Galilija, vjaġġ taʼ bejn wieħed u ieħor jumejn minn Ġerusalemm.

Ħafna nies jiġu għand Ġesù f’dan il-​post u jibdew igħidu: “Ġwanni, tabilħaqq, ma wettaqx sinjal wieħed, imma l-​affarijiet kollha li Ġwanni qal dwar dan ir-​raġel kollha kienu veri.” B’hekk ħafna poġġew fidi f’Ġesù hawnhekk. Ġwann 10:​22-42; 4:26; 8:​23, 58; Mattew 16:20.

▪ Ġesù b’liema mod irid li n-​nies jidentifikawh bħala l-​Kristu?

▪ Ġesù u Missieru kif inhuma ħaġa waħda?

▪ Il-​Lhud għala, evidentement, igħidu li Ġesù qed jagħmel lilu nnifsu wieħed alla?

▪ Il-​kliem li Ġesù kkwota mis-​Salmi kif juri li hu mhux qed igħid li hu daqs Alla?