Kapitlu 96

Ġesù u Ħakkiem Żagħżugħ u Għani

HEKK kif Ġesù jkompli għaddej minn ġod-​distrett tal-​​Perea lejn Ġerusalemm, wieħed raġel żagħżugħ jiġi jiġri u jinżel għar-​rkobbtejh quddiemu. Ir-​raġel huwa msejjaħ ħakkiem, li x’aktarx ifisser li hu għandu pożizzjoni prominenti f’sinagoga lokali jew saħansitra li huwa membru tas-​Sinedriju. Ukoll, huwa għani ferm. “Għalliem tajjeb,” hu jistaqsi, “x’irrid nagħmel biex niret il-​ħajja taʼ dejjem?”

“Għala ssejjaħli tajjeb?” iwieġeb Ġesù. “Ħadd m’hu tajjeb, ħlief wieħed, Alla.” X’aktarx li r-​raġel żagħżugħ juża l-​kelma “tajjeb” bħala titlu, u għalhekk Ġesù jgħidlu li titlu bħal dan jappartjeni biss lil Alla.

“Jekk, iżda,” jkompli Ġesù, “trid tidħol fil-​ħajja, osserva l-​kmandamenti kontinwament.”

“Liema minnhom?” jistaqsi r-​raġel.

Billi jirreferi għal ħamsa mill-​Għaxar Kmandamenti, Ġesù jwieġeb: “Sewwa, Ma tridx toqtol, Ma tridx tikkommetti adulterju, Ma tridx tisraq, Ma tridx tagħti xiehda falza, Onora lil missierek u lil ommok.” U billi jżid kmandament saħansitra iktar importanti, Ġesù jgħid: “Trid tħobb lil ġarek bħalek innifsek.”

“Dawn l-​affarijiet kollha ħaristhom minn żgħożiti ’l quddiem,” iwieġeb ir-​raġel bis-​sinċerità kollha. “X’għad jonqosni?”

Billi jismaʼ t-​talba ħerqana u mill-​qalb taʼ dan ir-​raġel, Ġesù jitqanqal mill-​imħabba lejh. Imma Ġesù jinduna bir-​rabta li hu għandu mal-​ġid materjali, u għalhekk jindikalu l-​ħtieġa tiegħu: “Ħaġa waħda jonqsok int: Mur, bigħ l-​affarijiet li għandek u agħti lill-​foqra, u se jkollok teżor fis-​sema, u ejja kun segwaċi tiegħi.”

Ġesù jibqaʼ jħares, bla dubju bil-​ħniena, hekk kif ir-​raġel iqum u jitlaq lil hemm imnikket ħafna. Il-​ġid li għandu ma jħallihx jara l-​valur tal-​veru teżor. “Kemm se tkun ħaġa diffiċli,” jilmenta Ġesù, “għal dawk li għandhom il-​flus biex jidħlu fis-​saltna t’Alla!”

Il-kliem taʼ Ġesù jbellah lid-​dixxipli. Imma huma jinħasdu saħansitra iktar meta hu jissokta jistqarr regola ġenerali: “Huwa iktar faċli, fil-​fatt, għal ġemel li jgħaddi minn għajn taʼ labra tal-​ħjata milli għal raġel għani li jidħol fis-​saltna t’Alla.”

“Min, fil-​fatt, jistaʼ jiġi salvat?” iridu jkunu jafu d-​dixxipli.

Billi jħares dritt lejhom, Ġesù jwieġeb: “Mal-​bnedmin huwa impossibbli, imma mhux hekk m’Alla, għax l-​affarijiet kollha huma possibbli maʼ Alla.”

Billi jinnota li huma għamlu għażla ferm differenti minn dik tal-​ħakkiem żagħżugħ u għani, Pietru jgħid: “Ħares! Aħna tlaqna l-​affarijiet kollha u segwejniek.” Mela hu jistaqsi: “X’se jkun hemm attwalment għalina?”

“Fil-​ħolqien mill-​ġdid,” iwiegħed Ġesù, “meta Bin il-​bniedem joqgħod bil-​qiegħda fuq it-​tron glorjuż tiegħu, intom li segwejtuni se toqogħdu wkoll bil-​qiegħda fuq tnax-il tron, tiġġudikaw lit-​tnax-il tribù taʼ Iżrael.” Iva, Ġesù qed juri li se jkun hemm ħolqien mill-​ġdid taʼ kundizzjonijiet fuq l-​art sabiex l-​affarijiet ikunu kif kienu fil-​ġnien taʼ Għeden. U Pietru u d-​dixxipli l-​oħra se jirċievu l-​premju taʼ li jaħkmu maʼ Kristu fuq din il-​Ġenna mal-​art kollha. Ċertament, premju grandjuż bħal dan jixraqlu kull sagrifiċċju!

Madankollu, saħansitra issa hemm xi premji, bħalma Ġesù jistqarr b’mod sod: “Ħadd ma telaq dar jew aħwa subien jew bniet jew omm jew missier jew tfal jew egħlieqi minħabba fija li mhux se jieħu mitt darba iktar issa f’dan il-​perijodu taʼ żmien, djar u aħwa subien u bniet u ommijiet u tfal u egħlieqi, b’persekuzzjonijiet, u fis-​sistema taʼ affarijiet li ġejja ħajja taʼ dejjem.”

Bħalma jwiegħed Ġesù, imorru fejn imorru fid-​dinja d-​dixxipli tiegħu, huma jgawdu relazzjoni maʼ sħabhom Kristjani li hi iktar mill-​qrib u iktar prezzjuża minn dik gawduta maʼ membri naturali tal-​familja. Il-​ħakkiem żagħżugħ u għani mid-​dehra jitlef kemm dan il-​premju u kemm dak taʼ ħajja taʼ dejjem fis-​Saltna tas-​sema t’Alla.

Wara dan, Ġesù jżid: “Madankollu, ħafna li huma l-​ewwel se jkunu l-​aħħar, u tal-​aħħar l-​ewwel.” X’irid ifisser?

Irid ifisser li ħafna nies li huma “l-​ewwel” f’li jgawdu privileġġi reliġjużi, bħall-​ħakkiem żagħżugħ u għani, m’humiex se jidħlu fis-​Saltna. Se jkunu “l-​aħħar.” Imma ħafna, inklużi d-​dixxipli umlin taʼ Ġesù, li l-​Fariżej, li jqisu lilhom infushom bħala twajbin, imaqdruhom bħala li huma “tal-​aħħar”​—bħala li huma nies tal-​art, jew ‛am ha·’aʹrets​—se jsiru “l-​ewwel.” Li jsiru “l-​ewwel” ifisser li se jirċievu l-​privileġġ taʼ li jsiru ħakkiema sħab maʼ Kristu fis-​Saltna. Mark 10:​17-31; Mattew 19:​16-30; Luqa 18:​18-30.

▪ B’mod evidenti, ir-​raġel żagħżugħ u għani liema xorta taʼ ħakkiem hu?

▪ Ġesù għala joġġezzjona għal li jiġi msejjaħ tajjeb?

▪ L-​esperjenza tal-​ħakkiem żagħżugħ kif turi l-​periklu taʼ li wieħed ikun għani?

▪ Ġesù jwiegħed liema premji għas-​segwaċi tiegħu?

▪ L-​ewwel kif isiru l-​aħħar, u tal-​aħħar l-​ewwel?