Kapitlu 98

Id-​Dixxipli Jargumentaw Hekk Kif Toqrob il-​Mewt taʼ Ġesù

ĠESÙ u d-​dixxipli tiegħu qegħdin qrib ix-​Xmara Ġordan, fejn huma jaqsmu mid-​distrett tal-​Perea għal ġol-​Ġudea. Ħafna oħrajn qed jivvjaġġaw magħhom biex jiċċelebraw il-​festa tal-​Qbiż tas-​sena 33 E.K., li hija bejn wieħed u ieħor ġimgħa ’l bogħod.

Ġesù qed jimxi qabel id-​dixxipli, u huma jiskantaw bid-​determinazzjoni qalbiena tiegħu. Ftakar li ftit ġimgħat qabel, meta Lażżru miet u Ġesù kien wasal biex imur minn Perea għall-​Ġudea, Tumas inkuraġġixxa lill-​oħrajn: “Ejjew immorru aħna wkoll, biex inkunu nistgħu mmutu miegħu.” Ftakar ukoll li wara li Ġesù rxoxta lil Lażżru, is-​Sinedriju għamlu pjanijiet biex joqtlu lil Ġesù. Mhux taʼ b’xejn li biżaʼ jaħkem lid-​dixxipli huma u deħlin fil-​Ġudea mill-​ġdid.

Biex iħejjihom għal dak li ġej, Ġesù jieħu lit-​12 fil-​ġenb privatament u jgħidilhom: “Hawn aħna, navvanzaw ’il fuq lejn Ġerusalemm, u Bin il-​bniedem se jingħata f’idejn il-​qassisin ewlenin u l-​iskribi, u se jikkundannawh għall-​mewt u se jagħtuh f’idejn irġiel tal-​ġnus, u se jiddieħqu bih u se jobżqu fuqu u jifflaġellawh u joqtluh, imma tlett ijiem wara hu se jqum.”

Din hi t-​tielet darba f’dawn l-​aħħar xhur li Ġesù kellem lid-​dixxipli tiegħu dwar il-​mewt u l-​irxoxt tiegħu. U għalkemm huma jisimgħuh, ma jifhmux. Forsi dan jiġri għaliex huma jemmnu li s-​saltna taʼ Iżrael se tiġi restawrata fuq l-​art, u huma qed iħarsu ’l quddiem lejn li jgawdu glorja u unur f’saltna tal-​art maʼ Kristu.

Fost dawk li qed jivvjaġġaw lejn il-​festa tal-​Qbiż hemm Salomè, omm l-​appostli Ġakbu u Ġwanni. Ġesù lil dawn l-​irġiel sejħilhom “Ulied ir-​Ragħad,” bla dubju minħabba fid-​dispożizzjonijiet ferventi tagħhom. Għal xi żmien dawn it-​tnejn ħaddnu l-​ambizzjoni taʼ li jkunu prominenti fis-​Saltna taʼ Kristu, u x-​xewqat tagħhom għarrfuhom lil ommhom. Hi issa tersaq lejn Ġesù għan-​nom tagħhom, tmil quddiemu, u titlob favur.

“Xi trid?” jistaqsi Ġesù.

Hi twieġeb: “Agħtini kelma li dawn iż-​żewġ uliedi jistgħu jpoġġu bil-​qiegħda, wieħed fuq il-​leminija tiegħek u wieħed fuq ix-​xellug tiegħek, fis-​saltna tiegħek.”

Billi jirrealizza minfejn ġejja t-​talba, Ġesù jgħid lil Ġakbu u lil Ġwanni: “Intom ma tafux x’qegħdin titolbu. Tistgħu intom tixorbu l-​kies li dalwaqt nixrob jien?”

“Nistgħu,” jwieġbu huma. Saħansitra għalkemm Ġesù għadu kif qalilhom li hu qed jiffaċċja persekuzzjoni terribbli u finalment il-​mewt, huma mid-​dehra ma jifhmux li hu dan ried ifisser bil-​“kies” li dalwaqt se jixrob.

Madankollu, Ġesù jgħidilhom: “Intom tabilħaqq se tixorbu l-​kies tiegħi, imma dan li tpoġġu bil-​qiegħda fuq il-​leminija tiegħi u fuq ix-​xellug tiegħi mhux tiegħi biex nagħtih, imma jappartjeni lil dawk li għalihom ġie mħejji minn Missieri.”

Maż-żmien il-​għaxar appostli l-​oħra jsiru jafu x’talbu Ġakbu u Ġwanni, u jirrabjaw. Forsi Ġakbu u Ġwanni kienu prominenti fl-​argument li qam qabel fost l-​appostli dwar min hu l-​akbar. It-​talba preżenti tagħhom tirrivela li huma m’applikawx il-​parir li Ġesù ta dwar din il-​kwistjoni. B’dispjaċir, ix-​xewqa tagħhom għal prominenza għadha qawwija.

Mela biex jittratta maʼ din l-​aħħar kontroversja u r-​rieda ħażina li ħolqot, Ġesù jsejjaħ lit-​12 flimkien. Billi jagħtihom parir bl-​imħabba, hu jgħid: “Intom tafu li l-​ħakkiema tal-​ġnus jagħmluha taʼ mulejiet fuqhom u n-​nies il-​kbar jaħkmu b’awtorità fuqhom. Dan mhux il-​mod fostkom; imma kulmin irid isir kbir fostkom irid ikun il-​ministru tagħkom, u kulmin irid ikun l-​ewwel fostkom irid ikun l-​irsir tagħkom.”

Ġesù poġġa l-​eżempju li għandhom jimitaw, bħalma jispjega: “Sewwa sew bħalma Bin il-​bniedem ġie, mhux biex ikun imministrat, imma biex jimministra u biex jagħti ruħu bħala rahan bi bdil għal ħafna.” Ġesù mhux biss imministra għan-​nom taʼ oħrajn imma se jagħmel hekk sal-​punt taʼ li jmut għall-​umanità! Id-​dixxipli għandhom bżonn dik l-​istess dispożizzjoni bħal taʼ Kristu taʼ li jixtiequ li jaqdu minflok li jiġu moqdijin u li jkunu wieħed inqas minflok li jkunu f’pożizzjoni taʼ prominenza. Mattew 20:​17-28; Mark 3:17; 9:​33-37; 10:32-45; Luqa 18:​31-34; Ġwann 11:16.

▪ Il-​biżaʼ għala issa jaħkem lid-​dixxipli?

▪ Ġesù kif iħejji lid-​dixxipli tiegħu għal dak li ġej?

▪ Liema talba ssir lil Ġesù, u l-​appostli l-​oħra kif jiġu effettwati?

▪ Ġesù kif jittratta mal-​problema fost l-​appostli tiegħu?