Kapitlu 100
It-Tixbieha tal-Miniet
ĠESÙ forsi għadu fid-dar taʼ Żakkew, fejn hu waqaf fi triqtu lejn Ġerusalemm. Id-dixxipli tiegħu jemmnu li meta jaslu Ġerusalemm, hu se jiddikjara li hu l-Messija u jwaqqaf is-Saltna tiegħu. Biex jikkorreġi din l-ideja u biex juri li s-Saltna għadha ’l bogħod ħafna, Ġesù jagħti tixbieha.
“Ċertu raġel taʼ twelid nobbli,” jirrakkonta hu, “vvjaġġa lejn art imbiegħda biex jassigura qawwa taʼ sultan għalih innifsu u biex jiġi lura.” Ġesù huwa r-“raġel taʼ twelid nobbli,” u s-sema huwa l-“art imbiegħda.” Meta Ġesù jasal hemm, Missieru se jagħtih qawwa taʼ sultan.
Qabel ma jitlaq, madankollu, ir-raġel taʼ twelid nobbli jsejjaħ għaxar irsiera u jagħti lil kull wieħed minnhom mina tal-fidda, billi jgħid: “Agħmlu negozju sakemm niġi.” Il-għaxar irsiera fit-twettieq inizzjali jirrappreżentaw lid-dixxipli bikrin taʼ Ġesù. F’applikar iktar kbir, huma jagħtu stampa taʼ dawk kollha li huma werrieta prospettivi miegħu fis-Saltna tas-sema.
Il-miniet tal-fidda huma biċċiet tal-flus taʼ valur, u kull waħda minnhom tammonta għal madwar paga taʼ tliet xhur għal wieħed li jaħdem fir-rabaʼ. Imma l-miniet x’jirrappreżentaw? U l-irsiera liema xorta taʼ negozju jridu jagħmlu bihom?
Il-miniet jirrappreżentaw assi li dixxipli mnisslin mill-ispirtu setgħu jużawhom biex jipproduċu iktar werrieta tas-Saltna tas-sema sakemm Ġesù jiġi bħala Sultan fis-Saltna mwiegħda. Wara l-irxoxt u d-dehra tiegħu lid-dixxipli tiegħu, hu tahom il-miniet simboliċi biex jagħmlu iktar dixxipli u b’hekk iżidu mal-klassi tas-Saltna tas-sema.
“Imma,” jkompli Ġesù, “ċ-ċittadini tiegħu bagħduh [lir-raġel taʼ twelid nobbli] u bagħtu ġemgħa taʼ ambaxxaturi warajh, biex igħidu, ‘Ma rridux li dan ir-raġel isir sultan fuqna.’” Iċ-ċittadini huma Iżraeliti, jew Lhud, u ma jinkludux lid-dixxipli tiegħu. Wara t-tluq taʼ Ġesù lejn is-sema, dawn il-Lhud, billi ppersegwitaw lid-dixxipli tiegħu, għamlu magħruf li huma ma riduhx ikun is-sultan tagħhom. B’dan il-mod huma kienu qed jaġixxu bħaċ-ċittadini li bagħtu lill-ġemgħa taʼ ambaxxaturi.
Il-għaxar irsiera kif jużawhom il-miniet tagħhom? Ġesù jispjega: “Eventwalment meta ġie lura wara li assigura l-qawwa taʼ sultan, hu kkmanda li jiġu msejħin quddiemu dawn l-irsiera li lilhom kien ta l-flus tal-fidda, sabiex jaċċerta x’kienu qalgħu huma bl-attività taʼ negozju. Imbagħad l-ewwel wieħed ippreżenta lilu nnifsu, igħid, ‘Mulej, il-mina tiegħek qalgħet għaxar miniet.’ Mela hu qallu, ‘Prosit, irsir tajjeb! Minħabba li fi kwistjoni żgħira ħafna int urejt li int lejali, żomm awtorità fuq għaxart ibliet.’ Issa ġie t-tieni wieħed, igħid, ‘Il-mina tiegħek, Mulej, għamlet ħames miniet.’ Hu qal lil dan il-wieħed ukoll, ‘Int, ukoll, kun inkarigat minn ħamest ibliet.’”
L-irsir b’għaxar miniet jagħti stampa taʼ klassi, jew grupp, taʼ dixxipli minn Pentekoste tas-sena 33 E.K. sa issa li jinkludu lill-appostli. L-irsir li kiseb ħames miniet ukoll jirrappreżenta lil grupp matul l-istess perijodu taʼ żmien li, skond l-opportunitajiet u l-abbiltajiet tagħhom, iżidu l-assi tas-sultan tagħhom fuq l-art. Iż-żewġ gruppi b’mod żeluż jippridkaw l-aħbar tajba, u bħala riżultat, bosta wħud taʼ qalb tajba jsiru Kristjani. Disgħa mill-irsiera rnexxew fin-negozju u żiedu l-ġid li kellhom.
“Imma,” jissokta Ġesù, “ġie wieħed differenti, igħid, ‘Mulej, hawn hi l-mina tiegħek, li jien żammejt merfugħa f’ċarruta. Qed tara, kont beżgħan minnek, għaliex inti raġel aħrax; tieħu dak li int ma ddepożitajtx u taħsad dak li ma żrajtx.’ Hu qallu, ‘Minn fommok stess niġġudikak, irsir mill-agħar. Kont taf, hux hekk, li jien raġel aħrax, li nieħu dak li ma ddepożitajtx u li naħsad dak li ma żrajtx? B’hekk għala ma poġġejtx il-flus tal-fidda tiegħi f’bank? Imbagħad mal-wasla tiegħi jien kont niġborhom bl-interessi.’ Minnufih hu qal lil dawk li kienu bil-wieqfa ħdejh, ‘Ħudulu l-mina u agħtuha lil dak li għandu l-għaxar miniet.’”
Għall-irsir mill-agħar, it-telf tal-mina simbolika jfisser it-telf taʼ post fis-Saltna tas-sema. Iva, hu jitlef il-privileġġ taʼ li jaħkem, bħal li kieku, fuq għaxart ibliet jew ħamest ibliet. Innota, ukoll, li l-irsir ma jiġix ippronunzjat mill-agħar għal xi ħażen li għamel imma, minflok, għax naqas li jaħdem biex iżid il-ġid tas-saltna taʼ sidu.
Meta l-mina tal-irsir mill-agħar tingħata lill-ewwel irsir, titqajjem l-oġġezzjoni: “Mulej, għandu għaxar miniet!” Iżda, Ġesù jwieġeb: “Lil kulmin għandu, iktar se jingħatalu; imma mingħand il-wieħed li m’għandux, saħansitra dak li għandu se jitteħidlu. Barra minn hekk, lil dawn l-egħdewwa tiegħi li ma ridunix insir sultan fuqhom ġibuhom hawn u biċċruhom quddiemi.” Luqa 19:11-27; Mattew 28:19, 20.
▪ Liema ħaġa tqanqal it-tixbieha taʼ Ġesù dwar il-miniet?
▪ Min hu r-raġel taʼ twelid nobbli, u x’inhi l-art li jmur lejha?
▪ Min huma l-irsiera, u x’inhu rrappreżentat mill-miniet?
▪ Min huma ċ-ċittadini, u kif juru l-mibgħeda tagħhom?
▪ Irsir wieħed għala jissejjaħ mill-agħar, u t-telf tal-mina tiegħu x’ifisser?