Kapitlu 103

Iżur it-​Tempju Mill-​Ġdid

ĠESÙ u d-​dixxipli tiegħu għadhom kif qattgħu t-​tielet lejl tagħhom f’Betanja mindu waslu minn Ġeriko. Issa d-​dawl taʼ kmieni fil-​għodu tat-​Tnejn, 10 taʼ Nisan, isibhom diġà fit-​triq lejn Ġerusalemm. Ġesù għandu l-​ġuħ. Mela meta jilmaħ siġra tat-​tin bil-​weraq, hu jersaq lejha biex jara jekk jistax ikun fiha xi ftit tin.

Il-weraq tas-​siġra ħarġu kmieni fuqha barra mill-​istaġun, ladarba l-​istaġun tat-​tin ma jiġix qabel Ġunju, u issa qegħdin biss fl-​aħħar taʼ Marzu. Madankollu, Ġesù b’mod evidenti jħoss li ladarba l-​weraq huma bikrin, it-​tin jistaʼ wkoll ikun bikri. Imma jiddiżappunta ruħu. Il-​weraq taw lis-​siġra dehra qarrieqa. Ġesù mbagħad jisħet lis-​siġra, billi jgħid: “Ħalli ħadd ma jiekol frott minnek iżjed għal dejjem.” Il-​konsegwenzi tal-​azzjoni taʼ Ġesù u s-​sinjifikat tagħha jsiru magħrufin il-​għada fil-​għodu.

Billi jibqgħu sejrin, Ġesù u d-​dixxipli tiegħu malajr jaslu Ġerusalemm. Hu jmur fit-​tempju, li hu kien spezzjona n-​nofs taʼ nhar taʼ qabel. Illum, madankollu, hu jaġixxi, sewwa sew bħalma kien għamel tliet snin qabel meta ġie għall-​festa tal-​Qbiż fis-​sena 30 E.K. Ġesù jixħet ’il barra lil dawk li qed ibigħu u jixtru fit-​tempju u jaqleb l-​imwejjed tas-​sarrafa tal-​flus u l-​bankijiet taʼ dawk li qed ibigħu l-​ħamiem. Hu ma jippermettix saħansitra li xi ħadd iġorr xi għodda fit-​tempju.

Billi jikkundanna lil dawk li qed isarrfu l-​flus u jbigħu l-​annimali fit-​tempju, hu jgħid: “M’huwiex miktub, ‘Dari se tissejjaħ dar taʼ talb għall-​ġnus kollha’? Imma intom għamiltuha għar tal-​ħallelin.” Huma ħallelin għaliex jitolbu prezzijiet eċċessivi mingħand dawk li m’għandhomx alternattiva ħlief li jixtru mingħandhom l-​annimali meħtieġa għas-​sagrifiċċju. Mela Ġesù jħares lejn dan in-​negozju bħala forma taʼ ħtif jew serq.

Meta l-​qassisin ewlenin, l-​iskribi, u l-​uħud prinċipali tan-​nies jisimgħu x’għamel Ġesù, huma jerġgħu jfittxu mod kif jistgħu joqtluh. Huma b’hekk juru li m’humiex nies li jirriformaw ruħhom. Iżda, huma ma jafux kif jeqirdu lil Ġesù, ladarba n-​nies kollha jibqgħu jduru miegħu biex jisimgħuh.

Minbarra l-​Lhud naturali, xi Ġentili wkoll ġew għall-​festa tal-​Qbiż. Dawn huma prożeliti, li jfisser li huma kkonvertew għar-​reliġjon tal-​Lhud. Ċerti Griegi, b’mod evidenti prożeliti, issa javviċinaw lil Filippu u jitolbu biex jaraw lil Ġesù. Filippu jmur għand Indrì, forsi biex jistaqsi jekk laqgħa bħal din tkunx xierqa. Ġesù mid-​dehra għadu fit-​tempju, fejn il-​Griegi jistgħu jarawh.

Ġesù jaf li għad baqagħlu biss ftit jiem taʼ ħajja, u għalhekk bi ħlewwa hu jagħti stampa tas-​sitwazzjoni tiegħu: “Is-​siegħa ġiet biex Bin il-​bniedem jiġi gglorifikat. Verissmu ngħidilkom, Jekk żerriegħa tal-​qamħ ma taqax fl-​art u tmut, tibqaʼ biss żerriegħa waħda; imma jekk tmut, imbagħad tagħti ħafna frott.”

Żerriegħa waħda tal-​qamħ għandha valur żgħir. Iżda, x’jiġri jekk titpoġġa fil-​ħamrija u “tmut,” tispiċċa l-​ħajja tagħha bħala żerriegħa? Hi mbagħad tinbet u maż-​żmien tikber f’zokk li jipproduċi bosta u bosta żrieragħ tal-​qamħ. Bl-​istess mod, Ġesù huwa biss raġel wieħed perfett. Imma jekk imut fidil lejn Alla, hu jsir il-​mezz li bih tingħata ħajja taʼ dejjem lil dawk lejali li għandhom l-​istess spirtu li hu għandu taʼ li jissagrifikaw lilhom infushom. B’hekk, Ġesù jgħid: “Dak li jgħożż lil ruħu jeqridha, imma dak li jobgħod lil ruħu f’din id-​dinja se jissalvagwardjaha għall-​ħajja taʼ dejjem.”

Ġesù ovvjament mhux qed jaħseb biss dwaru nnifsu, għax hu mbagħad jispjega: “Jekk xi ħadd irid jimministrali, ħallih isegwini, u fejn inkun jien hemm ukoll se jkun il-​ministru tiegħi. Jekk xi ħadd irid jimministrali, il-​Missier se jonorah.” Xi premju meraviljuż għal min isegwi lil Ġesù u jimministralu! Huwa l-​premju taʼ li tiġi onorat mill-​Missier biex tissieħeb maʼ Kristu fis-​Saltna.

Billi jaħseb dwar it-​tbatija kbira u l-​mewt agonizzanti li tistennieh, Ġesù jkompli: “Issa ruħi nkwetata, u x’se ngħid? Missier, salvani minn din is-​siegħa.” Imqar dak li hemm jistennieh setaʼ jiġi evitat! Imma, le, bħalma jgħid hu: “Għalhekk ġejt għal din is-​siegħa.” Ġesù huwa fi qbil mal-​arranġament kollu t’Alla, inkluża l-​mewt b’sagrifiċċju tiegħu stess. Mattew 21:​12, 13, 18, 19; Mark 11:​12-18; Luqa 19:​45-48; Ġwann 12:​20-27.

▪ Ġesù għala jistenna li jsib it-​tin għalkemm m’huwiex l-​istaġun tagħhom?

▪ Ġesù lil dawk li qed ibigħu fit-​tempju għala jsejħilhom “ħallelin”?

▪ Ġesù b’liema mod hu bħal żerriegħa tal-​qamħ li tmut?

▪ Ġesù kif iħossu dwar it-​tbatija u l-​mewt li qed jistennewh?