Kapitlu 105

Il-​Bidu taʼ Jum Kruċjali

META Ġesù jitlaq minn Ġerusalemm it-​Tnejn fil-​għaxija, hu jmur lura lejn Betanja min-​niżla tal-​Lvant tal-​Muntanja taż-​Żebbuġ. Jumejn mill-​ministeru finali tiegħu f’Ġerusalemm għaddew. Ġesù bla dubju jerġaʼ jqattaʼ l-​lejl mal-​ħabib tiegħu Lażżru. Mindu wasal minn Ġeriko l-​Ġimgħa, dan hu r-​rabaʼ lejl li hu qattaʼ f’Betanja.

Issa, kmieni t-​Tlieta fil-​għodu, il-​11 taʼ Nisan, hu u d-​dixxipli tiegħu jerġgħu jerħulha għal għonq it-​triq. Dan fil-​fatt se jkun jum kruċjali tal-​ministeru taʼ Ġesù, l-​iktar li kellu x’jagħmel fih s’issa. Huwa l-​aħħar jum li fih hu jidher fit-​tempju. U huwa l-​aħħar jum tal-​ministeru pubbliku tiegħu qabel il-​ġuri u l-​esekuzzjoni tiegħu.

Ġesù u d-​dixxipli tiegħu jaqbdu l-​istess rotta minn fuq il-​Muntanja taż-​Żebbuġ lejn Ġerusalemm. Matul it-​triq minn Betanja, Pietru jinnota s-​siġra li Ġesù seħet il-​jum taʼ qabel fil-​għodu. “Rabbi, ara!” hu jesklama, “is-​siġra tat-​tin li int sħett nixfet.”

Imma Ġesù għala qatilha s-​siġra? Hu jindika għala meta jissokta jgħid: “Verament ingħidilkom, Kieku mqar ikollkom fidi u ma tiddubitawx, mhux biss se tagħmlu dak li jien għamilt lis-​siġra tat-​tin, imma wkoll jekk tgħidu lil din il-​muntanja [il-Muntanja taż-​Żebbuġ li fuqha qegħdin bil-​wieqfa], ‘Kun merfugħa u mixħuta ġewwa l-​baħar,’ hekk se jiġri. U l-​affarijiet kollha li tistaqsu għalihom fit-​talb, billi jkollkom fidi, se tirċevuhom.”

Mela billi jnixxef is-​siġra, Ġesù qed jipprovdi għad-​dixxipli tiegħu lezzjoni ċara dwar il-​ħtieġa tagħhom li jkollhom fidi f’Alla. Bħalma jistqarr hu: “L-​affarijiet kollha li titolbu u tistaqsu għalihom ħa jkollkom fidi li prattikament irċevejtuhom, u se teħduhom.” X’lezzjoni importanti għalihom x’jitgħallmu, speċjalment minħabba l-​provi tal-​biżaʼ li dalwaqt ġejjin! Iżda, hemm konnessjoni oħra bejn it-​tnixxif tas-​siġra tat-​tin u l-​kwalità tal-​fidi.

Il-ġens taʼ Iżrael, bħal din is-​siġra tat-​tin, għandu dehra qarrieqa. Għalkemm il-​ġens qiegħed f’relazzjoni taʼ patt m’Alla u jistaʼ jidher minn barra li qed josserva r-​regolamenti tiegħu, wera li hu mingħajr fidi, nieqes minn frott tajjeb. Minħabba n-​nuqqas taʼ fidi, qiegħed saħansitra fil-​proċess taʼ li jirrifjuta lill-​Iben t’Alla stess! Għalhekk, billi jnixxef is-​siġra tat-​tin mhix produttiva, Ġesù qed juri b’mod ċar ħafna x’se jkun ir-​riżultat finali għal dan il-​ġens bla frott, bla fidi.

Fi żmien qasir, Ġesù u d-​dixxipli tiegħu jidħlu f’Ġerusalemm, u bħalma hi d-​drawwa tagħhom, imorru fit-​tempju, fejn Ġesù jibda jgħallem. Il-​qassisin ewlenin u x-​xjuħ tal-​poplu, bla dubju billi għandhom f’moħħhom l-​aġir taʼ Ġesù l-​jum taʼ qabel kontra s-​sarrafa tal-​flus, jisfidawh: “B’liema awtorità tagħmel dawn l-​affarijiet? U min tak din l-​awtorità?”

Bi tweġiba Ġesù jgħid: “Jien, ukoll, se nistaqsikom ħaġa waħda. Jekk tgħiduhieli, jien ukoll se ngħidilkom b’liema awtorità nagħmel dawn l-​affarijiet: Il-​magħmudija minn Ġwanni, minn liema sors kienet? Mis-​sema jew mill-​bnedmin?”

Il-qassisin u x-​xjuħ jibdew jikkonsultaw bejniethom dwar kif se jwieġbu. “Jekk ingħidu, ‘Mis-​sema,’ se jgħidilna, ‘Għala, mela, m’emmintuhx?’ Jekk, iżda, ngħidu, ‘Mill-​bnedmin,’ għandna l-​folla x’nibżgħu minnha, għax huma lkoll iżommu lil Ġwanni bħala profeta.”

Il-mexxejja ma jafux x’iridu jwieġbu. Mela huma jwieġbu lil Ġesù: “Ma nafux.”

Ġesù, mill-​banda l-​oħra, jgħid: “Lanqas ma ngħidilkom jien b’liema awtorità nagħmel dawn l-​affarijiet.” Mattew 21:​19-27; Mark 11:​19-33; Luqa 20:​1-8.

▪ X’inhu sinjifikanti dwar it-​Tlieta, 11 taʼ Nisan?

▪ Ġesù liema lezzjonijiet jipprovdi meta jnixxef is-​siġra tat-​tin?

▪ Ġesù kif iwieġeb lil dawk li jistaqsu b’liema awtorità hu jagħmel l-​affarijiet?