Kapitlu 106

Mikxufin b’Tixbihat dwar il-​Għalqa tad-​Dwieli

ĠESÙ qiegħed fit-​tempju. Għadu kif ħawwad lill-​mexxejja reliġjużi li riedu jkunu jafu bl-​awtorità taʼ min hu kien qed jagħmel l-​affarijiet. Qabel ma jirkupraw mill-​konfużjoni tagħhom, Ġesù jistaqsi: “X’taħsbu intom?” U mbagħad permezz taʼ tixbieha, hu jurihom liema xorta taʼ persuni tassew huma.

“Wieħed raġel kellu żewġt itfal,” jirrakkonta Ġesù. “Waqt li mar fuq l-​ewwel wieħed, qallu, ‘Tfajjel, mur aħdem illum fil-​għalqa tad-​dwieli.’ Bi tweġiba dan qal, ‘Hekk se nagħmel, sinjur,’ imma ma ħariġx. Waqt li avviċina lit-​tieni wieħed, hu qal l-​istess. Bi tweġiba dan qal, ‘Mhux se nagħmel hekk.’ Wara ddispjaċih u ħareġ. Liema minnhom it-​tnejn għamel ir-​rieda taʼ missieru?” jistaqsi Ġesù.

“Tal-​aħħar,” iwieġbu dawk li qed jopponuh.

Mela Ġesù jispjega: “Verament ingħidilkom li l-​kolletturi tat-​taxxa u n-​nisa żienja sejrin qabilkom fis-​saltna t’Alla.” Il-​kolletturi tat-​taxxa u n-​nisa żienja, fil-​fatt, fil-​bidu rrifjutaw li jaqdu lil Alla. Imma mbagħad, bħat-​tieni tifel, huma nidmu u fil-​fatt qdewh. Mill-​banda l-​oħra, il-​mexxejja reliġjużi, bħall-​ewwel tifel, qalu li qed jaqdu lil Alla, iżda, bħalma jinnota Ġesù: “Ġwanni [l-Għammied] ġie għandkom b’mod taʼ tjieba, imma intom m’emmintuhx. Madankollu, il-​kolletturi tat-​taxxa u n-​nisa żienja emmnuh, u intom, għalkemm rajtu dan, ma ddispjaċikomx wara biex temmnuh.”

Ġesù mbagħad juri li n-​nuqqas taʼ dawk il-​mexxejja reliġjużi m’huwiex biss li ma qdewx lil Alla. Le, imma huma fil-​fatt nies ħżiena ferm, mill-​agħar. “Kien hemm raġel, sid id-​dar,” jirrakkonta Ġesù, “li ħawwel għalqa tad-​dwieli u poġġa ċint madwarha u ħaffer magħsar tal-​inbid fiha u bena torri, u krieha lil xi bdiewa, u vvjaġġa barra l-​pajjiż. Meta l-​istaġun tal-​frott wasal, hu bagħat lill-​irsiera tiegħu għand il-​bdiewa biex iġibu l-​frott tiegħu. Madankollu, il-​bdiewa qabdu lill-​irsiera, u lil wieħed sawtuh, lil ieħor qatluh, lil ieħor ħaġġruh. Jerġaʼ bagħat irsiera oħra, iktar minn tal-​ewwel, imma huma għamlu l-​istess lil dawn.”

L-“irsiera” huma l-​profeti li “sid id-​dar,” Alla Jehovah, bagħat għand “il-​bdiewa” tal-​“għalqa tad-​dwieli” tiegħu. Dawn il-​bdiewa huma rappreżentanti minn taʼ quddiem tal-​ġens taʼ Iżrael, liema ġens il-​Bibbja tidentifikah bħala l-​“għalqa tad-​dwieli” t’Alla.

Ladarba “l-​bdiewa” jittrattaw ħażin u joqtlu lill-​“irsiera,” Ġesù jispjega: “Fl-​aħħar [sid il-​għalqa tad-​dwieli] bagħat lil ibnu għandhom, billi qal, ‘Huma se jirrispettawh lil ibni.’ Malli raw lill-​iben il-​bdiewa qalu bejniethom, ‘Dan hu l-​werriet; ejjew, ejja noqtluh u nieħdu l-​wirt tiegħu!’ Mela ħaduh u tefgħuh ’il barra mill-​għalqa tad-​dwieli u qatluh.”

Issa, billi jindirizza lill-​mexxejja reliġjużi, Ġesù jistaqsi: “Meta jiġi sid il-​għalqa tad-​dwieli, x’se jagħmlilhom lil dawk il-​bdiewa?”

“Peress li huma mill-​agħar,” iwieġbu l-​mexxejja reliġjużi, “hu se jġib qerda mill-​agħar fuqhom u se jikri l-​għalqa tad-​dwieli tiegħu lil bdiewa oħra, li se jagħtuh il-​frott meta jasal żmienu.”

Huma b’hekk bla ma jafu jġibu ġudizzju fuqhom infushom, ladarba huma inklużi fost il-​“bdiewa” Iżraeliti tal-​“għalqa tad-​dwieli” taʼ Jehovah tal-​ġens taʼ Iżrael. Il-​frott li Jehovah jistenna mingħand dawn il-​bdiewa huwa fidi f’Ibnu, il-​Messija veru. Talli ma pprovdewx dan il-​frott, Ġesù jwissi: “Qatt ma qrajtu fl-​Iskrittura [f’Salm 118:​22, 23], ‘Il-​ġebla li l-​bennejja rrifjutaw hi dik li saret il-​ġebla tal-​għareb ewlenija. Mingħand Jehovah seħħ dan, u huwa meraviljuż f’għajnejna’? Dan hu għala ngħidilkom, Is-​saltna t’Alla se tittieħed mingħandkom u tingħata lil ġens li jipproduċi l-​frott tagħha. Ukoll, il-​persuna li taqaʼ fuq din il-​ġebla se titfarrak. Inkwantu għal kulmin taqaʼ fuqu, se titħnu.”

L-iskribi u l-​qassisin ewlenin issa jirrikonoxxu li Ġesù qed jitkellem dwarhom, u huma jridu joqtlu lilu, il-​“werriet” bi dritt. Mela l-​privileġġ taʼ li jkunu ħakkiema fis-​Saltna t’Alla se jittieħed mingħandhom bħala ġens, u se jiġi maħluq ġens ġdid taʼ ‘bdiewa tal-​għalqa tad-​dwieli,’ ġens li se jipproduċi frott xieraq.

Peress li l-​mexxejja reliġjużi jibżgħu mill-​folol, li lil Ġesù jqisuh profeta, huma ma jippruvawx joqtluh f’din l-​okkażjoni. Mattew 21:​28-46; Mark 12:​1-12; Luqa 20:​9-19; Isaija 5:​1-7.

▪ Iż-​żewġt itfal fl-​ewwel tixbieha taʼ Ġesù lil min jirrappreżentaw?

▪ Fit-​tieni tixbieha, min huma rrappreżentati minn “sid id-​dar,” il-​“għalqa tad-​dwieli,” “il-​bdiewa,” l-​“irsiera,” u “l-​werriet”?

▪ X’se jsir mill-​‘bdiewa tal-​għalqa tad-​dwieli,’ u min se jieħu posthom?