Kapitlu 129

Iktar Dehriet

ID-​DIXXIPLI għadhom qalbhom imnikkta. Huma ma jifhmux is-​sinjifikat tal-​qabar vojt, lanqas ma jemmnu r-​rapporti tan-​nisa. Mela iktar tard f’jum il-​Ħadd, Kleopas u dixxiplu ieħor jitilqu minn Ġerusalemm għal Emmaws, distanza taʼ xi sebaʼ mili.

Fit-triq, waqt li qed jiddiskutu l-​ġrajjiet tal-​ġurnata, wieħed barrani jingħaqad magħhom. “X’inhuma dawn il-​kwistjonijiet li qegħdin tiddibattu bejnietkom intom u mexjin?” jistaqsi hu.

Id-dixxipli jieqfu, wiċċhom ’l isfel lejn l-​art, u Kleopas iwieġeb: “Qiegħed inti toqgħod bħala barrani għalik waħdek f’Ġerusalemm u għalhekk ma tafhomx l-​affarijiet li ġraw fiha f’dawn il-​jiem?” Hu jistaqsi: “Liema affarijiet?”

“L-​affarijiet li għandhom x’jaqsmu maʼ Ġesù n-​Nazzarenu,” jwieġbu huma. “Il-​qassisin ewlenin u l-​ħakkiema tagħna tawh biex jingħata s-​sentenza tal-​mewt u sammruh maʼ zokk. Imma aħna konna qed nittamaw li dan ir-​raġel kien il-​wieħed iddestinat li jeħles lil Iżrael.”

Kleopas u sieħbu jispjegaw il-​ġrajjiet tal-​għaġeb tal-​ġurnata​—ir-​rapport dwar id-​dehra sopranaturali taʼ xi anġli u l-​qabar vojt​—imma mbagħad jistqarru l-​istagħġib tagħhom rigward it-​tifsira taʼ dawn l-​affarijiet. Il-​barrani jċanfarhom: “O wħud bla sens u tqal fil-​qalb biex temmnu l-​affarijiet kollha li tkellmu l-​profeti! Ma kienx neċessarju li l-​Kristu jsofri dawn l-​affarijiet u li jidħol fil-​glorja tiegħu?” Hu mbagħad jinterpretalhom xi passaġġi mit-​test sagru li jappartjenu lill-​Kristu.

Fl-aħħarnett huma jaslu qrib Emmaws, u l-​barrani jagħmel taʼ bir-​ruħu li se jibqaʼ sejjer. Billi riedu jisimgħu iktar, id-​dixxipli jħeġġu: “Oqgħod magħna, għaliex dalwaqt isir fil-​għaxija.” Mela hu joqgħod hemm għal ikla. Hekk kif igħid talba u jaqsam il-​ħobż u jnewwilulhom, huma jagħrfu li hu tassew Ġesù f’ġisem uman immaterjalizzat. Imma mbagħad hu jisparixxi.

Issa huma jifhmu kif il-​barrani kien jaf daqshekk! “Ma kinux qlubna mkebbsin,” jistaqsu huma, “hu u jkellimna fit-​triq, hu u jiftħilna għalkollox l-​Iskrittura?” Mingħajr dewmien, huma jqumu u jgħaġġlu t-​triq kollha lura lejn Ġerusalemm, fejn isibu lill-​appostli u lil dawk miġmugħin magħhom. Qabel ma Kleopas u sieħbu jistgħu jgħidu xi ħaġa, l-​oħrajn jirrapportaw b’eċċitament: “Fil-​fatt il-​Mulej ġie mqajjem u hu deher lil Xmun!” Imbagħad it-​tnejn jirrakkontaw kif Ġesù deher ukoll lilhom. Dan jagħmilhom erbaʼ darbiet matul il-​ġurnata li hu deher lil uħud differenti mid-​dixxipli tiegħu.

Ġesù f’daqqa waħda jagħmel il-​ħames dehra. Għalkemm il-​bibien huma msakkrin minħabba li d-​dixxipli jibżgħu mil-​Lhud, hu jidħol, billi joqgħod bil-​wieqfa dritt f’nofshom, u jgħid: “Jalla jkollkom il-​paċi.” Huma mwerwrin, billi jimmaġinaw li qed jaraw xi spirtu. Mela, billi jispjega li hu mhux xi apparizzjoni, Ġesù jgħid: “Għala intom inkwetati, u għala jqumu xi dubji fi qlubkom? Araw idejja u saqajja, li huwa jien innifsi; ħossuni u araw, għaliex spirtu m’għandux laħam u għadam sewwa sew bħalma qegħdin tilmħu li għandi jien.” Xorta waħda, huma ma jridux jemmnu.

Biex igħinhom jifhmu li hu verament Ġesù, hu jistaqsi: “Għandkom xi ħaġa hemm x’niekol?” Wara li jaċċetta biċċa ħuta mixwija u jikolha, hu jgħid: “Dawn huma l-​kelmiet tiegħi li jien għedtilkom waqt li kont għadni magħkom [qabel il-​mewt tiegħi], li l-​affarijiet kollha miktubin fil-​liġi taʼ Mosè u fil-​Profeti u fis-​Salmi dwari jridu jiġu mwettqin.”

Billi jkompli dak li, fil-​fatt, jammonta għal studju tal-​Bibbja magħhom, Ġesù jgħallem: “B’dan il-​mod huwa miktub li l-​Kristu kellu jbati u jqum minn fost l-​imwiet fit-​tielet jum, u fuq il-​bażi taʼ ismu l-​indiema għall-​maħfra tad-​dnubiet kellha tiġi ppridkata fil-​ġnus kollha​—billi tibdew minn Ġerusalemm, intom tridu tkunu xhieda taʼ dawn l-​affarijiet.”

Għal xi raġuni Tumas mhux preżenti għal din il-​laqgħa vitali tal-​Ħadd fil-​għaxija. Mela matul il-​jiem li jsegwu, l-​oħrajn bil-​ferħ igħidulu: “Aħna rajna lill-​Mulej!”

“Jekk ma narax f’idejh il-​marka taʼ l-​imsiemer,” jipprotesta Tumas, “u ma ndaħħalx sebgħi ġol-​marka taʼ l-​imsiemer u ma ndaħħalx idi ġo ġenbu, jien ċertament m’iniex se nemmen.”

Sewwa, tmint ijiem wara d-​dixxipli qed jiltaqgħu mill-​ġdid ġewwa. Din id-​darba Tumas qiegħed magħhom. Għalkemm il-​bibien huma msakkrin, Ġesù għal darb’oħra qiegħed bil-​wieqfa f’nofshom u jgħid: “Jalla jkollkom il-​paċi.” Imbagħad, billi jdur lejn Tumas, hu jistieden: “Poġġi sebgħek hawn, u ara jdejja, u aqbad idek u daħħalha ġo ġenbi, u ieqaf milli tkun ma temminx.”

“Mulej tiegħi u Alla tiegħi!” jesklama Tumas.

“Għaliex rajtni emmint?” jistaqsi Ġesù. “Henjin huma dawk li ma jarawx u madankollu jemmnu.” Luqa 24:​11, 13-48; Ġwann 20:​19-29.

▪ Wieħed barrani liema mistoqsijiet jagħmel lil żewġ dixxipli fit-​triq lejn Emmaws?

▪ Il-​barrani x’igħid li jġiegħel lill-​qlub tad-​dixxipli jaqbdu ġewwa fihom?

▪ Id-​dixxipli kif jindunaw min hu l-​barrani?

▪ Meta Kleopas u sieħbu jmorru lura lejn Ġerusalemm, liema rapport eċċitanti jisimgħu?

▪ Ġesù liema ħames dehra jagħmel lid-​dixxipli tiegħu, u x’jiġri matulha?

▪ X’jiġri tmint ijiem wara l-​ħames dehra taʼ Ġesù, u Tumas kif jiġi fl-​aħħarnett konvint li Ġesù huwa ħaj?