Kapitlu 130

Ħdejn il-​Baħar tal-​Galilija

L-​APPOSTLI issa jmorru lura lejn il-​Galilija, bħalma Ġesù kien qalilhom iktar kmieni biex jagħmlu. Imma m’humiex ċerti dwar x’għandhom jagħmlu hemmhekk. Wara ftit tal-​ħin, Pietru jgħid lil Tumas, Natanjel, Ġakbu u ħuh Ġwanni, u żewġ appostli oħra: “Jien sejjer nistad.”

“Aħna wkoll ġejjin miegħek,” iwieġbu s-​sitta.

Matul il-​lejl kollu, huma ma jaqbdu xejn. Madankollu, hekk kif qed jisbaħ, Ġesù jidher fuq ix-​xatt, imma l-​appostli ma jindunawx li hu Ġesù. Hu jgħajjat: “Tfal żgħar, m’għandkom xejn x’tieklu, hux hekk?”

“Le!” jgħajtu huma lura min-​naħa l-​oħra tal-​ilma.

“Itfgħu x-​xibka fuq in-​naħa tal-​lemin tad-​dgħajsa u se ssibu xi ftit,” igħid hu. U meta jagħmlu hekk, ma jkunux jistgħu jtellgħu x-​xibka tagħhom minħabba l-​ħut kollu.

“Huwa l-​Mulej!” igħajjat Ġwanni.

Malli jismaʼ dan, Pietru jħażżem il-​libsa taʼ fuq tiegħu, għax hu neżaʼ ħwejġu, u jinxteħet fil-​baħar. Hu mbagħad igħum madwar mitt jarda lejn ix-​xatt. L-​appostli l-​oħra jsegwu fid-​dgħajsa ċkejkna, ikaxkru x-​xibka mimlija ħut.

Meta jaslu fuq ix-​xatt, hemm nar jaqbad bil-​faħam, bil-​ħut mixħut fuqu, u hemm il-​ħobż. “Ġibu ftit mill-​ħut li għadkom kif qbadtu issa,” jgħid Ġesù. Pietru jitlaʼ fuq id-​dgħajsa u jiġbed ix-​xibka għal fuq ix-​xatt. Fiha 153 ħuta kbira!

“Ejjew, ħudu l-​kolazzjon tagħkom,” jistieden Ġesù.

Ħadd minnhom m’għandu l-​kuraġġ jistaqsi, “Min int?” għaliex kollha kemm huma jafu li huwa Ġesù. Din hi s-​sebaʼ dehra tiegħu wara l-​irxoxt, u t-​tielet waħda tiegħu lill-​appostli bħala grupp. Hu issa jservi l-​kolazzjon, billi jagħti lil kull wieħed minnhom ftit ħobż u ħut.

Meta jispiċċaw jieklu, Ġesù, x’aktarx billi jħares lejn il-​qabda kbira taʼ ħut, jistaqsi lil Pietru: “Xmun bin Ġwanni, tħobbni int iktar minn dawn?” Bla dubju hu jrid ifisser, Għandek int qalbek marbuta iktar man-​negozju tas-​sajd milli max-​xogħol li ħejjejtek biex tagħmel?

“Int taf li jien għandi affezzjoni għalik,” iwieġeb Pietru.

“Itmaʼ l-​ħrief tiegħi,” jwieġeb Ġesù.

Jerġaʼ, it-​tieni darba, hu jistaqsi: “Xmun bin Ġwanni, tħobbni int?”

“Iva, Mulej, int taf li jien għandi affezzjoni għalik,” Pietru jwieġeb bil-​ħerqa.

“Irgħa n-​ngħaġ ċkejknin tiegħi,” Ġesù jikkmanda mill-​ġdid.

Imbagħad, jerġaʼ t-​tielet darba, hu jistaqsi: “Xmun bin Ġwanni, għandek int affezzjoni għalija?”

Issa Pietru huwa mnikket. Forsi qed jaħseb jekk Ġesù hux jiddubita l-​lealtà tiegħu. Wara kollox, meta Ġesù dan l-​aħħar għadda ġuri għall-​ħajja tiegħu, Pietru tliet darbiet ċaħad li jafu. Mela Pietru jgħid: “Mulej, inti taf l-​affarijiet kollha; inti konxju li jien għandi affezzjoni għalik.”

“Itmaʼ n-​ngħaġ ċkejknin tiegħi,” Ġesù jikkmanda t-​tielet darba.

Ġesù b’hekk juża lil Pietru bħala xempju biex idaħħal f’moħħ l-​oħrajn ix-​xogħol li hu jridhom jagħmlu. Hu dalwaqt se jitlaq minn fuq l-​art, u hu jridhom jieħdu t-​tmexxija f’li jimministraw lil dawk li se jiġu mdaħħlin fil-​maqjel tan-​ngħaġ t’Alla.

Sewwa sew bħalma Ġesù kien marbut u maqtul għaliex għamel ix-​xogħol li Alla nkarigah biex jagħmel, hekk ukoll, hu issa jirrivela, Pietru se jsofri esperjenza simili. “Meta int kont iżgħar,” igħidlu Ġesù, “int kont tħażżem lilek innifsek u tmur fejn trid. Imma meta tixjieħ int se tmidd idejk u raġel ieħor se jħażżmek u jieħdok fejn ma tixtieqx.” Minkejja l-​mewta taʼ martri li qed tistenna lil Pietru, Ġesù jħeġġu: “Ibqaʼ segwini.”

Malli jdur lura, Pietru jara lil Ġwanni u jistaqsi: “Mulej, dan ir-​raġel x’se jagħmel?”

“Jekk hi r-​rieda tiegħi għalih li jibqaʼ sakemm niġi jien,” iwieġeb Ġesù, “dak x’inhu affarik? Int ibqaʼ segwini.” Dan il-​kliem taʼ Ġesù ġie mifhum minn ħafna mid-​dixxipli li jfisser li l-​appostlu Ġwanni qatt ma kien se jmut. Madankollu, bħalma spjega iktar tard l-​appostlu Ġwanni, Ġesù ma qalx li hu ma kienx se jmut, imma Ġesù sempliċement qal: “Jekk hi r-​rieda tiegħi għalih li jibqaʼ sakemm niġi jien, dak x’inhu affarik?”

Ġwanni iktar tard għamel ukoll din l-​osservazzjoni sinjifikanti: “Hemm, fil-​fatt, ħafna affarijiet oħra wkoll li Ġesù għamel, li, kieku qatt kellhom jinkitbu sa l-​iċken dettal, nissuponi, id-​dinja nfisha ma setgħetx tesaʼ r-​rombli miktubin.” Ġwann 21:​1-25; Mattew 26:32; 28:​7, 10.

▪ Liema ħaġa turi li l-​appostli m’humiex ċerti dwar x’għandhom jagħmlu fil-​Galilija?

▪ L-​appostli kif jagħrfuh lil Ġesù ħdejn il-​Baħar tal-​Galilija?

▪ Ġesù issa kemm-il darba deher mill-​irxoxt tiegħu ’l hawn?

▪ Ġesù kif jenfasizza x’iridhom jagħmlu lill-​appostli?

▪ Ġesù kif jindika l-​manjiera li biha Pietru se jmut?

▪ Liema kummenti taʼ Ġesù dwar Ġwanni kienu mifhuma ħażin minn ħafna mid-​dixxipli?