Kapitlu 133

Ġesù Jtemm Kulma Jitlob Alla

META s-​Sultan Gwerrier Ġesù Kristu jneħħi min-​nofs lil Satana u lid-​dinja tiegħu li mhix taʼ tjieba, x’raġuni għal ferħ se jkun hemm! Ir-​Renju taʼ Elf Sena taʼ paċi taʼ Ġesù jibda sa fl-​aħħar!

Taħt id-​direzzjoni taʼ Ġesù u tas-​slaten imseħbin tiegħu, dawk li jibqgħu ħajjin wara Armageddon se jnaddfu l-​ħerba li se tħalli dik il-​gwerra taʼ tjieba. X’aktarx li dawk li jibqgħu ħajjin fuq l-​art se jkollhom it-​tfal ukoll għal xi żmien, u dawn se jieħdu sehem fix-​xogħol sabiħ ferm taʼ li jikkultivaw l-​art u jagħmluha ġnien bħal park taʼ ġmiel kbir.

Maż-żmien Ġesù se jqajjem lil miljuni bla għadd mill-​oqbra tagħhom biex igawdu din il-​Ġenna tal-​art sabiħa. Hu dan se jagħmlu fi twettieq tal-​garanzija tiegħu stess: “Ġejja s-​siegħa li fiha dawk kollha fl-​oqbra tal-​mafkar se . . . joħorġu.”

Fost dawk li lilhom Ġesù jirxoxta se jkun hemm dak li qabel kien raġel ħażin u li miet maġenbu fuq iz-​zokk tat-​tortura. Ftakar li Ġesù wiegħdu: “Verament ingħidlek illum, Int se tkun miegħi fil-​Ġenna.” Le, dak ir-​raġel mhux se jittieħed fis-​sema biex jaħkem bħala sultan maʼ Ġesù, u lanqas ma sejjer Ġesù jerġaʼ jsir bniedem u jgħix fuq l-​art magħmula Ġenna miegħu. Minflok, Ġesù se jkun maʼ dak li qabel kien raġel ħażin fis-​sens taʼ li Hu se jirxoxtah għall-​ħajja fil-​Ġenna tal-​art u se jara li xi ħadd se jieħu ħsieb il-​ħtiġijiet tiegħu, kemm fiżiċi u kemm spiritwali, kif inhu muri fil-​paġna li jmiss.

Aħseb ftit dwar dan! Taħt l-​attenzjoni taʼ mħabba taʼ Ġesù, il-​familja umana kollha​—dawk li jibqgħu ħajjin wara Armageddon, in-​nisel tagħhom, u l-​eluf taʼ miljuni taʼ mejtin irxoxtati li jobduh​—se jikbru għall-​perfezzjoni umana. Jehovah, permezz tal-​Iben irjali tiegħu, Ġesù Kristu, se jgħammar spiritwalment mal-​umanità. “U,” bħalma jgħid il-​leħen li Ġwanni samaʼ mis-​sema, “[hu] se jimsaħ kull demgħa minn għajnejhom, u l-​mewt ma tkunx iżjed, u la l-​għali u la l-​biki u lanqas l-​uġigħ ma jkunu iżjed.” Ebda persuna fuq l-​art ma se tbati jew tkun marida.

Sat-tmiem tar-​Renju taʼ Elf Sena taʼ Ġesù, is-​sitwazzjoni se tkun eżatt kif Alla riedha li tkun oriġinalment meta qal lill-​ewwel par uman, Adam u Eva, biex jimmoltiplikaw u jimlew l-​art. Iva, l-​art se tkun mimlija b’razza taʼ tjieba taʼ bnedmin perfetti. Dan isir għaliex il-​benefiċċji tas-​sagrifiċċju taʼ rahan taʼ Ġesù se jkunu ġew applikati għal kulħadd. Il-​mewt minħabba d-​dnub taʼ Adam mhix se tkun iktar!

B’hekk, Ġesù se jkun wettaq dak kollu li Jehovah talbu. Għalhekk, fit-​tmiem tal-​elf sena, hu se jgħaddi s-​Saltna u l-​familja umana pperfezzjonata f’idejn Missieru. Alla mbagħad se jeħles lil Satana u lid-​demonji tiegħu mill-​abbiss taʼ inattività bħall-​mewt. Għal liema għan?

Sewwa, sat-​tmiem tal-​elf sena, il-​biċċa l-​kbira minn dawk li jkunu qed igħixu fil-​Ġenna tal-​art se jkunu wħud irxoxtati li qatt ma kellhom il-​fidi tagħhom ittestjata. Qabel ma mietu, huma qatt ma kienu jafu bil-​wegħdi t’Alla u għalhekk ma setgħux juru fidi fihom. Imbagħad, wara li ġew irxoxtati u mgħallmin il-​veritajiet tal-​Bibbja, kien faċli għalihom fil-​​Ġenna tal-​art, mingħajr ebda oppożizzjoni, li jaqdu lil Alla. Imma jekk Satana jingħata l-​opportunità li jipprova jwaqqafhom milli jkomplu jaqdu lil Alla, se juru li huma leali taħt prova? Biex tiġi solvuta din il-​mistoqsija, Satana se jiġi meħlus.

Ir-rivelazzjoni mogħtija lil Ġwanni tirrivela li wara r-​​Renju taʼ Elf Sena taʼ Ġesù, Satana se jirnexxilu jdawwar lil numru mhux determinat taʼ nies lil hinn milli jaqdu ’l Alla. Imma mbagħad, meta t-​test finali jkun spiċċa, Satana, id-​demonji tiegħu, u dawk kollha li lilhom hu jirnexxilu jiżżvija se jiġu meqrudin għal dejjem. Mill-​banda l-​oħra, l-​uħud leali li jibqgħu ħajjin u li jkunu ġew ittestjati bis-​sħiħ se jibqgħu jgħixu biex igawdu l-​barkiet taʼ Missierhom tas-​sema matul l-​eternità kollha.

Biċ-ċar, Ġesù kellu, u se jkompli jkollu, rwol vitali f’li jwettaq il-​għanijiet glorjużi t’Alla. X’futur grandjuż aħna nistgħu ngawdu bħala riżultat taʼ dak kollu li hu jwettaq bħala s-​Sultan kbir tas-​sema t’Alla. Iżda, ma nistgħux ninsew dak kollu li hu għamel waqt li kien bniedem.

Ġesù minn qalbu ġie fuq l-​art u għallimna dwar Missieru. Iktar minn hekk hu wera bl-​eżempju tiegħu l-​kwalitajiet prezzjużi t’Alla. Qlubna jitqanqlu meta nikkunsidraw il-​kuraġġ u l-​irġulija sublimi tiegħu, il-​għerf tiegħu li m’hawnx daqsu, l-​abbiltà kbira tiegħu bħala għalliem, it-​tmexxija tiegħu bla biżaʼ, u l-​mogħdrija tenera u l-​empatija tiegħu. Meta niftakru kemm sofra b’mod li ma jistax jiġi deskritt biex iforni r-​rahan, li bih biss nistgħu aħna niksbu l-​ħajja, ċertament li qlubna jitqanqlu b’apprezzament lejh!

Verament, xi bniedem rajna f’dan l-​istudju tal-​ħajja taʼ Ġesù! Il-​kobor tiegħu huwa ovvju u tal-​għaġeb. Niġu mqanqlin biex nidwu l-​kliem tal-​gvernatur Ruman Ponzju Pilatu: “Ħares! Ir-​raġel!” Iva, tabilħaqq, “Ir-​raġel,” l-​aqwa bniedem li qatt għex!

Billi aħna naċċettaw il-​provvediment tas-​sagrifiċċju taʼ rahan tiegħu, it-​tagħbija tad-​dnub u l-​mewt li writna mingħand Adam tistaʼ titneħħa minn fuqna, u Ġesù jistaʼ jsir il-​“Missier Etern” tagħna. Dawk kollha li jridu jiksbu ħajja taʼ dejjem iridu jieħdu għarfien mhux biss dwar Alla imma wkoll dwar Ibnu, Ġesù Kristu. Jalla l-​qari u l-​istudju minnek taʼ dan il-​ktieb igħinuk f’li tieħu għarfien bħal dan li jagħti l-​ħajja!

1 Ġwann 2:17; 1:7; Ġwann 5:​28, 29; 3:16; 17:3; 19:5; Luqa 23:43; Ġenesi 1:28; 1 Korintin 15:​24-28; Rivelazzjoni 20:​1-3, 6-10; 21:​3, 4; Isaija 9:6.

▪ X’se jkun il-​privileġġ hieni taʼ dawk li jibqgħu ħajjin wara Armageddon u tat-​tfal tagħhom?

▪ Min se jgawdi l-​Ġenna tal-​art minbarra dawk li jibqgħu ħajjin wara Armageddon u t-​tfal tagħhom, u Ġesù f’liema sens se jkun magħhom?

▪ X’se tkun is-​sitwazzjoni fit-​tmiem tal-​elf sena, u Ġesù x’se jagħmel f’dak iż-​żmien?

▪ Satana għala se jinħeles mill-​abbiss, u x’se jiġri eventwalment lilu u lil dawk kollha li jsegwuh?

▪ Ġesù kif jistaʼ jsir il-​“Missier Etern” tagħna?

Tixtieq int iktar tagħrif

jew studju tal-​Bibbja fid-​dar b’xejn?

Ikteb lil Watch Tower fl-​indirizz xieraq hawn taħt.