Gawdi l-Ħajja tal-Familja
Jistgħu l-familji tassew ikunu ferħanin?
Kif inhu possibbli?
Taf familji li huma magħqudin u ferħanin bħal dawn li qed tara f’dan il-fuljett? Kulfejn indawru wiċċna naraw familji li qegħdin jitkissru. Id-divorzju, in-nuqqas taʼ garanzija taʼ xogħol, il-problemi taʼ ġenituri waħedhom, il-frustrazzjoni—dawn kollha jikkontribwixxu għall-kriżi. Espert fuq il-ħajja tal-familja lmenta: “Illum kulħadd jaf li l-familja qiegħda fil-periklu li tisfaxxa.”
Il-familji għala huma bombardjati bi problemi serji bħal dawn? Kif nistgħu ngawdu l-ħajja tal-familja?
Kif Oriġinat il-Familja
Sabiex inwieġbu dawn il-mistoqsijiet, irridu nkunu nafu minfejn oriġinaw iż-żwieġ u l-familja. Għax jekk dawn kellhom Oriġinatur—Ħallieq—il-membri tal-familja għandhom iduru lejh għall-gwida, ladarba li hu żgur l-iktar wieħed li jaf kif nistgħu ngawdu l-ħajja tal-familja bl-aħjar mod.
Taʼ interess, ħafna jaħsbu li l-arranġament tal-familja ma kellux Oriġinatur. L-Encyclopedia Americana tgħid: “Xi studjużi jorbtu l-oriġini taż-żwieġ mal-mod kif jitlaqqgħu l-annimali li huma inferjuri għall-bniedem.” Madankollu, Ġesù Kristu tkellem dwar il-ħolqien tar-raġel u tal-mara. Hu kkwota r-rakkont Bibliku tal-bidu bħala awtorità u qal: “Dak li Alla għaqqad flimkien ħa ma jifirdu ebda bniedem.”—Mattew 19:4-6.
Mela Ġesù Kristu għandu raġun. Kien hemm Alla intelliġenti li ħalaq lill-ewwel bnedmin u għamel arranġamenti biex il-ħajja tal-familja tkun ferħana. Alla għaqqad l-ewwel koppja umana fiż-żwieġ u qal li r-raġel għandu “jingħaqad maʼ martu u jsiru ġisem wieħed.” (Ġenesi 2:22-24) Jistaʼ jkun, mela, li l-problemi li tiffaċċja l-familja llum il-ġurnata jinqalgħu minħabba l-ġiri wara stili taʼ ħajja li jmorru kontra l-livelli li poġġa l-Ħallieq fil-Kelma tiegħu, il-Bibbja?
Kif Jistaʼ Jkollok Suċċess?
Bħalma żgur diġà indunajt, id-dinja taʼ llum tħeġġeġ lil dak li jkun biex ifittex l-interessi persunali tiegħu u li jissodisfa lilu nnifsu. “Ir-regħba hija tajba,” qal wieħed finanzier lil klassi taʼ gradwati fl-Istati Uniti. “Tistgħu tkunu rgħiba u xorta tħossukom tajbin dwarkom infuskom.” Imma l-ġiri wara l-affarijiet materjali ma jwassalx għal suċċess. Fil-fatt, il-materjaliżmu huwa wieħed mill-iktar theddidiet għall-ħajja tal-familja għax jidħol bejn ir-relazzjonijiet umani u jisraq il-ħin u l-flus taʼ dak li jkun. B’kuntrast għal dan, ikkunsidra kif sempliċement żewġ proverbji mill-Bibbja jgħinuna naraw x’inhu importanti biex inkunu ferħanin.
“Aħjar platt ħaxix mogħti bl-imħabba, minn gendus smin bil-mibegħda miegħu.”
“Aħjar loqma ħobż niexfa bis-sliem, minn dar mimlija bl-ikel u l-ġlied.”
Kemm hu qawwi dan il-kliem, hux vera? Immaġina kemm tkun differenti d-dinja li kieku kull familja żżomm maʼ dawn il-prijoritajiet! Il-Bibbja tipprovdi gwida imprezzabbli fuq kif il-membri tal-familja għandhom jittrattaw lil xulxin. Ikkunsidra xi ftit mid-direzzjonijiet li tagħti.
L-Irġiel: ‘Ħobb lil martek bħal ġismek stess.’—Efesin 5:28-30.
Sempliċi, imma verament prattiku! Il-Bibbja tgħid ukoll lir-raġel sabiex ‘jonora lill-mara.’ (1 Pietru 3:7) Hu jagħmel dan billi jagħtiha attenzjoni speċjali, u dan jinkludi li jkun teneru magħha, jifhimha, u jassiguraha. Hu jqis l-opinjonijiet tagħha u jismagħha. (Qabbel Ġenesi 21:12.) Ma taqbilx li kwalunkwe familja se tibbenefika jekk ir-raġel jittratta ’l martu b’interess, bħalma jixtieq li jiġi trattat hu?—Mattew 7:12.
In-Nisa: ‘Għandu jkollok rispett profond lejn żewġek.’—Efesin 5:33.
Mara tikkontribwixxi għall-hena tal-familja billi tgħin lir-raġel iwettaq ir-responsabbiltajiet tqal li għandu. Hekk kellu f’moħħu Alla ladarba hu pprovda l-mara sabiex tkun “għajnuna tgħodd għalih.” (Ġenesi 2:18) Tistaʼ tifhem kemm se tkun taʼ barka għall-ħajja tal-familja jekk il-mara tirrispetta ’l żewġha billi tappoġġa d-deċiżjonijiet tiegħu u tikkoopera miegħu sabiex jintlaħqu l-miri tal-familja?
L-Imseħbin fiż-Żwieġ: “L-irġiel u n-nisa għandhom ikunu leali lejn xulxin.”—Ebrej 13:4, “Today’s English Version.”
Meta jagħmlu dan, il-ħajja tal-familja żgur se tibbenefika. L-adulterju spiss ikisser familja. (Proverbji 6:27-29, 32) Għalhekk, b’għerf kbir il-Bibbja tħeġġeġ: “Kun ferħan b’martek u tgħaxxaq bit-tfajla li żżewwiġt . . . Għala għandek tagħti mħabbtek lil mara oħra?”—Proverbji 5:18-20, TEV.
Il-Ġenituri: ‘Ħarrġu t-tfal [tagħkom] jimxu fit-triq it-tajba.’—Proverbji 22:6.
Meta l-ġenituri jagħtu l-ħin u l-attenzjoni lit-tfal tagħhom, il-ħajja tal-familja żgur timxi ’l quddiem. Għalhekk, il-Bibbja tħeġġeġ lill-ġenituri sabiex jgħallmu lil uliedhom il-prinċipji tajbin ‘meta jkunu mistriħin f’darhom u mexjin fit-triq; meta jimteddu u meta jqumu.’ (Dewteronomju 11:19) Il-Bibbja tgħid ukoll li l-ġenituri għandhom juru li jħobbu lil uliedhom billi jiddixxiplinawhom.—Efesin 6:4.
It-Tfal: “Tfal, obdu lill-ġenituri tagħkom f’unjoni mal-Mulej.”—Efesin 6:1.
Veru, f’din id-dinja fejn in-nies ma jagħtux kas il-liġijiet, m’huwiex dejjem faċli li tobdi lill-ġenituri tiegħek. Madankollu, ma taqbilx li huwa għaqli li tagħmel dak li l-Oriġinatur tal-familja jgħidilna nagħmlu? Hu jaf x’għandna nagħmlu sabiex il-ħajja tal-familja tagħna tkun iktar ferħana. Għalhekk, ipprova obdi l-ġenituri tiegħek. Kun determinat li tevita l-ħafna tentazzjonijiet li d-dinja tippreżentalek biex tagħmel dak li hu ħażin.—Proverbji 1:10-19.
Il-ħajja tal-familja se tibbenefika sakemm kull membru tal-familja japplika l-pariri tal-Bibbja. Il-familja mhux biss se tgawdi ħajja aħjar issa imma se jkollha l-prospett taʼ futur mill-isbaħ fid-dinja l-ġdida mwiegħda minn Alla. (2 Pietru 3:13; Rivelazzjoni 21:3, 4) Għalhekk, agħmluha drawwa tal-familja li tistudjaw il-Bibbja flimkien! Miljuni taʼ familji madwar id-dinja kollha sabu l-gwida provduta fil-ktieb Is-Sigriet taʼ l-Hena fil-Familja bħala għajnuna siewja.
Jekk mhux indikat mod ieħor, il-kwotazzjonijiet mill-Iskrittura Ebrajka huma meħudin mill-Bibbja Għaqda Biblika Maltija, It-Tieni Edizzjoni (1996), u dawk mill-Iskrittura Griega huma meħudin mit-Traduzzjoni tad-Dinja l-Ġdida taʼ l-Iskrittura Griega Kristjana.