Prospett Uniku!

“Kull min jgħix u jemmen fija, dan ma jmut qatt.”—ĠWANN 11:26.

1. Miljuni li bħalissa jinsabu mejtin, għal liema xorta taʼ ambjent se jiġu rxoxtati?

M ETA miljuni jiġu mqajmin fl-​irxoxt, dawn ma jinġibux lura għall-​ħajja fuq l-​art diżabitata. (Atti 24:15) Huma se jistenbħu f’ambjent imsebbaħ u se jsibu li ġie ppreparat għalihom fejn joqogħdu, x’jilbsu, u abbundanza taʼ ikel. Min se jagħmel dawn il-​preparazzjonijiet kollha? Ovvjament, se jkun hemm min ikun qed jgħix fid-​dinja l-​ġdida qabel ma jibda l-​irxoxt għal fuq l-​art. Imma min?

2-4. Liema prospett uniku jistenna lil dawk li qed jgħixu “fl-​aħħar jiem”?

² It-​twettiq tal-​profezija tal-​Bibbja juri li qegħdin ngħixu “fl-​aħħar jiem” taʼ din is-​sistema t’affarijiet.a (2 Timotju 3:1, NW) Dalwaqt issa, Alla Jehovah se jindaħal fit-​tmexxija umana u jeqred għalkollox il-​ħażen mill-​art. (Salm 37:​10, 11; Proverbji 2:​21, 22) F’dak iż-​żmien, x’se jiġrilhom dawk li jkunu qegħdin jaqdu lil Alla fedelment?

³ Jehovah m’hux se jeqred lit-​twajbin flimkien maʼ dawk mill-​agħar. (Salm 145:20) Hu qatt ma għamel ħaġa bħal din, u m’hux se jagħmel dan meta jnaddaf l-​art mill-​ħażen kollu. (Qabbel Ġenesi 18:​22, 23, 26.) Fil-​fatt, l-​aħħar ktieb tal-​Bibbja jitkellem dwar “kotra kbira li ħadd ma jistaʼ jgħoddha, minn kull ġens u tribù, minn kull poplu u lsien,” ħierġa mit-​“taħbit il-​kbir [“tribulazzjoni l-​kbira,” NW].” (Apokalissi 7:​9-14) Iva, kotra kbira se tibqaʼ ħajja wara t-​tribulazzjoni l-​kbira li permezz tagħha tintemm id-​dinja preżenti mill-​agħar, u dawn se jidħlu fid-​dinja l-​ġdida t’Alla. Hemmhekk, l-​umanità ubbidjenti tistaʼ tibbenefika bis-​sħiħ mill-​provvediment meraviljuż t’Alla biex jeħles lill-​umanità mid-​dnub u l-​mewt. (Apokalissi 22:​1, 2) B’hekk, il-​“kotra kbira” qatt ma se jkollha għalfejn tesperjenza l-​mewt. Xi prospett uniku!

⁴ Nistgħu aħna jkollna fiduċja f’din it-​tama taʼ l-​għaġeb? Assolutament! Ġesù Kristu nnifsu indika li kellu jkun hemm żmien meta n-​nies kienu se jgħixu mingħajr qatt ma jmutu. Ftit qabel ma rxoxta lil ħabibu Lazzru, Ġesù qal lil Marta: “Kull min jgħix u jemmen fija, dan ma jmut qatt.”​—Ġwann 11:26.

Int Ukoll Tistaʼ Tgħix għal Dejjem

5, 6. Jekk trid tgħix għal dejjem fil-​Ġenna fuq l-​art, x’għandek tagħmel?

⁵ Trid int tgħix għal dejjem fil-​Ġenna fuq l-​art? Għandek xewqa kbira li tara lill-​maħbubin tiegħek mill-​ġdid? Allura għandek tieħu għarfien eżatt dwar ir-​rieda u l-​iskopijiet t’Alla. F’talba lil Alla, Ġesù qal: “Din hi l-​ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.”​—Ġwann 17:3.

⁶ Hija r-​rieda t’Alla li “l-​bnedmin kollha jsalvaw u jaslu biex jagħrfu l-​verità.” (1 Timotju 2:​3, 4) Issa huwa ż-​żmien li titgħallem kif int, flimkien maʼ miljuni oħrajn li diġà qegħdin jagħmlu r-​rieda t’Alla, tistaʼ tgħix għal dejjem fil-​Ġenna fuq l-​art. Ix-​Xhieda taʼ Jehovah bil-​qalb kollha lesti li jgħinuk titgħallem iktar dwar Alla u l-​ħtiġijiet tiegħu. Għala ma tikkuntattjahomx f’xi Sala tas-​Saltna qrib tiegħek jew tikteb fl-​eqreb indirizz mil-​lista fil-​paġna li jmiss?

[Nota taʼ taħt]

[Stampa f’paġna 31]

“Kotra kbira” qatt ma se jkollha għalfejn tesperjenza l-​mewt