X’Jiġri fil-Mewt?

Il-​mewt hija l-​oppost tal-​ħajja. Il-​mewt hija bħal raqda fil-​fond. (Ġwann 11:11-14) Il-​mejtin ma jistgħux jisimgħu, jaraw, jitkellmu, jew jaħsbu f’xi ħaġa. (Koħèlet 9:5, 10) Ir-​reliġjon falza tgħallem li l-​mejtin imorru f’dinja ta’ l-​ispirti biex jgħixu ma’ l-​antenati tagħhom. Dan mhux kif tgħallem il-​Bibbja.

Dawk li mietu la jistgħu jgħinuna, u lanqas jagħmlulna ħsara. Huwa komuni għan-​nies li jagħmlu r-​ritwali u s-​sagrifiċċji għax jemmnu li bihom se jogħġbu lil dawk li mietu. Dan ma jogħġobx lil Alla għax huwa bbażat fuq waħda mill-​gideb ta’ Satana. U lanqas ma jista’ jogħġob lill-​mejtin, ladarba huma bla ħajja. M’għandniex nibżgħu mill-​mejtin jew nadurawhom. Għandna naduraw biss lil Alla.—Mattew 4:10.

Il-​mejtin se jerġgħu jgħixu. Jehovah se jqajjem lill-​mejtin għall-​ħajja fuq l-​art magħmula ġenna. Dan se jseħħ fil-​futur. (Ġwann 5:28, 29; Atti 24:15) Alla jista’ jqajjem lil dawk li mietu sewwa sew bħalma int tista’ tqajjem persuna mill-​irqad.—Mark 5:22, 23, 41, 42.

L-​idea li aħna ma mmutux hija gidba li xerridha Satana x-​Xitan. Satana u d-​demonji tiegħu jġagħlu lin-​nies jaħsbu li l-​ispirti tal-​mejtin huma ħajjin u jikkaġunaw mard u problemi oħra. Satana jqarraq bin-​nies, xi drabi permezz tal-​ħolm u viżjonijiet. Jehovah jikkundannahom lil dawk li jipprovaw jitkellmu mal-​mejtin.—Dewteronomju 18:10-12.