Kordjalità u Sentiment

L-​EMOZZJONI hija parti fundamentali mill-​ħajja tal-​bnedmin. Meta individwu jesprimi l-​emozzjonijiet tiegħu, jirrivela dak li hemm f’qalbu, ix-​xorta taʼ persuna li hu minn ġewwa, kif iħossu dwar is-​sitwazzjonijiet u n-​nies. Minħabba l-​esperjenzi koroh f’ħajjithom—u f’xi każi minħabba l-​influwenzi kulturali—ħafna nies jaħbu l-​emozzjonijiet tagħhom. Iżda Ġeħova jinkuraġġina biex nikkultivaw kwalitajiet pożittivi fil-​persuna li aħna minn ġewwa u mbagħad nesprimu ruħna b’mod adattat dwar dak li hemm ġewwa fina.—Rum. 12:10; 1 Tess. 2:7, 8.

Meta nitħaddtu, il-​kliem li nużaw jistaʼ jidentifika b’mod korrett l-​emozzjonijiet. Iżda jekk kliemna ma jiġix espress b’sentiment li jikkorrispondi miegħu, dawk li jisimgħuna jistgħu jiddubitaw is-​sinċerità tagħna. Mill-​banda l-​oħra, jekk il-​kliem jiġi espress b’sentiment xieraq, diskorsna jistaʼ jikseb sbuħija u qawwa li jistgħu jmissu qalb is-​semmiegħa.

Esprimi Kordjalità. Sentimenti kordjali spiss huma marbutin maʼ ħsibijiet dwar in-​nies. B’hekk, meta nitkellmu dwar il-​kwalitajiet li jiġbduk taʼ Ġeħova u meta nesprimu l-​apprezzament tagħna għat-​tjubija taʼ Ġeħova, leħinna għandu jkun dħuli. (Is. 63:7-​9) U meta nitkellmu maʼ bnedmin sħabna, il-​mod kif nitkellmu għandu juri wkoll kordjalità li tiġbdek.

Raġel bil-​ġdiem jersaq lejn Ġesù u bil-​ħniena jitolbu jfejqu. Immaġina t-​ton taʼ Ġesù meta qal: “Irrid. Indaf.” (Mk. 1:40, 41) Ġib quddiem għajnejk ukoll ix-​xena taʼ mara li kienet tbati bi tnixxija taʼ demm għal 12-​il sena u li avviċinat bil-​mod lil Ġesù minn warajh u messitlu t-​tarf tal-​libsa. Meta rrealizzat li induna biha, il-​mara ġiet b’rogħda fuqha, inxteħtet f’riġlejn Ġesù u qalet quddiem kulħadd għala messet il-​libsa tiegħu u kif tfejqet. Aħseb dwar il-​mod kif Ġesù qalilha: “Binti, il-​fidi tiegħek fejqitek; mur fil-​paċi.” (Lq. 8:42b-​48) Il-​kordjalità li wera Ġesù f’dawn l-​okkażjonijiet tmissilna qalbna sal-​ġurnata tal-​lum.

Il-​mod kif nitkellmu man-​nies se juri jekk, bħal Ġesù, inħossux mogħdrija għalihom u jekk tassew inkunux irridu ngħinuhom. Espressjoni taʼ kordjalità bħal din hi sinċiera, mhux eċċessiva. Il-​kordjalità tagħna tistaʼ tagħmel differenza kbira fuq kif iwieġbu n-​nies. Ħafna mill-​affarijiet li ngħidu fil-​ministeru tal-​għalqa jirrikjedu din il-​kordjalità, speċjalment meta nkunu qed nirraġunaw, ninkuraġġixxu, inħeġġu, u nissimpatizzaw.

Jekk tħoss sentiment kordjali lejn ħaddieħor, urih fuq wiċċek. Meta turi kordjalità, l-​udjenza tiegħek se tinġibed lejk bħal meta tinġibed lejn is-​sħana tan-​nar f’lejla kiesħa. Jekk il-​kordjalità ma tkunx evidenti fuq wiċċek, dawk fl-​udjenza tiegħek jistgħu ma jkunux konvinti li int sinċerament jimpurtak minnhom. Il-​kordjalità ma tistax tintlibes bħal maskra—għandha tkun ġenwina.

Il-​kordjalità trid tkun evidenti wkoll fil-​vuċi tiegħek. Jekk għandek leħnek oħxon u goff, jistaʼ jkun diffiċli li tesprimi l-​kordjalità f’diskorsok. Iżda maż-​żmien u bi sforz ħabrieki jistaʼ jirnexxilek. Ħaġa waħda li tistaʼ tgħinek, mill-​ħarsa teknika, hija li tiftakar li l-​ħsejjes qosra u mgħaġġlin jagħmlu d-​diskors jinstemaʼ aħrax. Tgħallem tawwal ittri rotob fil-​kliem, bħall-​vokali. Dan se jgħin biex ikollok diskors iktar kordjali.

Madankollu, iktar importanti minn dan hu fuqiex qed tiffoka l-​interess tiegħek. Jekk ħsibijietek ikunu ffokati b’mod sinċier fuq dawk li titkellem magħhom u jkollok xewqa ħerqana li turi xi ħaġa li jistgħu jibbenefikaw minnha, dan is-​sentiment se jidher fil-​mod kif titkellem.

Taħdita ħajja hija stimulanti, iżda sentiment teneru huwa meħtieġ ukoll. Mhux dejjem ikun biżżejjed li nipperswadu l-​moħħ; irridu wkoll inqanqlu l-​qalb.

Esprimi Sentimenti Oħrajn. Persuna inkwetata għandha mnejn tesprimi emozzjonijiet bħall-​ansjetà, il-​biżaʼ, u d-​dwejjaq. Il-​ferħ huwa emozzjoni li għandha tkun prominenti f’ħajjitna u li nesprimu bil-​libertà meta nitkellmu maʼ oħrajn. Mill-​banda l-​oħra, xi emozzjonijiet iridu jitrażżnu. Mhumiex konsistenti mal-​personalità Kristjana. (Efes. 4:31, 32; Flp. 4:4) L-​emozzjonijiet taʼ kull xorta jistgħu jintwerew bil-​kliem li nagħżlu, bit-​ton taʼ leħinna, bl-​intensità li biha nitkellmu, bl-​espressjoni taʼ wiċċna, u bil-​ġesti.

Il-​Bibbja titkellem dwar l-​emozzjonijiet kollha kemm huma tal-​bniedem. Kultant sempliċement issemmihom. Drabi oħrajn tirrakkonta ġrajjiet jew tikkwota stqarrijiet li jirrivelaw l-​emozzjonijiet. Il-​qari taʼ materjal bħal dan b’leħen għoli se jkollu impatt iktar qawwi, kemm fuqek kif ukoll fuq is-​semmiegħa, jekk leħnek jirrifletti dawn l-​emozzjonijiet. Sabiex tagħmel dan jeħtieġ tpoġġi lilek innifsek fil-​post taʼ dawk li se taqra dwarhom. Madankollu, taħdita mhijiex xi produzzjoni teatrali, għalhekk oqgħod attent li ma tesaġerax. Agħmel is-​siltiet ħajjin fl-​imħuħ tas-​semmiegħa.

Adattat għall-​Materjal. Bħall-​entużjażmu, il-​kordjalità u l-​emozzjonijiet l-​oħrajn kollha li tesprimi jiddependu ħafna minn dak li tkun qed tgħid.

Sib Mattew 11:28-​30, u ara x’jgħidu dawn il-​versi. Imbagħad aqra l-​kundanna taʼ Ġesù lill-​iskribi u l-​Fariżej, bħalma hi mniżżla f’​Mattew kapitlu 23. Ma nistgħux nimmaġinawh jesprimi dan il-​kliem aħrax taʼ kundanna b’mod li hu bla ħajja u bla ħeġġa.

Liema xorta taʼ sentiment taħseb li hu meħtieġ f’rakkont bħal dak li nsibu f’​Ġenesi kapitlu 44 rigward it-​talba taʼ Ġuda dwar ħuh Benjamin? Innota l-​emozzjoni espressa f’Ġenesi 44 vers 13, l-​indikazzjoni taʼ kif ħassu Ġuda dwar ir-​raġuni għall-​inkwiet f’Ġenesi 44 vers 16, u kif irreaġixxa Ġużeppi nnifsu, bħalma hu mniżżel f’​Ġenesi 45:1.

B’hekk, sew jekk qed naqraw u sew jekk qed nitkellmu, biex nagħmlu dan b’mod effettiv irridu naħsbu mhux biss fil-​kliem u fl-​ideat imma wkoll fis-​sentiment li għandu jmur magħhom.