Kif Wieħed Ikun Naturali

ESPRIMI lilek innifsek b’mod naturali, u dan jgħinek tirbaħ il-​fiduċja taʼ oħrajn. Tpoġġi int il-​fiduċja f’xi ħaġa li ntqalet minn xi ħadd liebes maskra? Tagħmel differenza kieku l-​wiċċ tal-​maskra jkun isbaħ minn wiċċ il-​kelliemi stess? X’aktarx li le. Mela flok taħbi min int, kun naturali.

In-​naturalezza m’għandekx titfixkilha mat-​traskuraġni. L-​iżbalji fil-​grammatika, il-​pronunzja ħażina, u d-​diskors li ma jinftihemx mhumiex xierqa. Għandu jiġi evitat kliem informali żżejjed. Irridu dejjem nuru dinjità xierqa, kemm fi kliemna u kemm fil-​manjieri tagħna. Xi ħadd li juri naturalezza bħal din la hu formali wisq u lanqas konċernat iżżejjed dwar li jimpressjona lil oħrajn.

Fil-​Ministeru tal-​Għalqa. Meta tavviċina dar jew lil xi ħadd f’post pubbliku bil-​mira li tagħti xhieda, tħossok ansjuż? Ħafna minna hekk inħossuna, iżda għal xi wħud is-​sentiment hu iktar persistenti minn taʼ oħrajn. It-​tensjoni tistaʼ ġġiegħel il-​vuċi tinstemaʼ mhix naturali jew imriegħda, jew l-​ansjetà tistaʼ tintwera fiċ-​ċaqliq stramb tal-​idejn jew tar-​ras.

Pubblikatur jistaʼ jiltaqaʼ maʼ din il-​problema minħabba diversi raġunijiet. Forsi qed jaħseb dwar l-​impressjoni li se jagħti jew jekk il-​preżentazzjoni tiegħu hix se tkun waħda taʼ suċċess. Hu normali li individwu jinkwieta dwar dan, iżda l-​problemi jinqalgħu meta tingħata wisq attenzjoni lil dawn l-​affarijiet. Jekk tkun ansjuż qabel tieħu sehem fil-​ministeru, x’jistaʼ jgħin? Preparazzjoni bir-​reqqa u talb bil-​ħerqa lil Ġeħova. (Atti 4:29) Aħseb dwar il-​ħniena kbira li Ġeħova juri meta jistieden lin-​nies igawdu saħħa perfetta u ħajja taʼ dejjem f’Ġenna tal-​art. Aħseb dwar dawk li qed tistinka biex tgħin u dwar il-​bżonn tagħhom li jisimgħu l-​aħbar tajba.

Ftakar ukoll li n-​nies għandhom il-​libertà tal-​għażla, għalhekk jistgħu jew jaċċettaw jew jirrifjutaw il-​messaġġ. L-​istess setaʼ jingħad meta Ġesù ta xhieda f’Israel tal-​qedem. L-​inkarigu tiegħek sempliċement hu li tipprietka. (Mt. 24:14) Anki meta n-​nies ma jħallukx titkellem, il-​preżenza tiegħek stess se tagħti xhieda. Tkun irnexxejt għax tkun ħallejt lil Ġeħova jużak biex twettaq ir-​rieda tiegħu. Fl-​okkażjonijiet meta jkollok l-​opportunità li titkellem, x’se jikkaratterizza d-​diskors tiegħek? Jekk titgħallem tiffoka l-​ħsibijiet tiegħek fuq il-​bżonnijiet taʼ oħrajn, diskorsok se jkun naturali u se jiġbed lil dak li jkun.

Meta tagħti xhieda, jekk taġixxi u titkellem bħalma tagħmel fil-​ħajja taʼ kuljum, dan se jġiegħel lis-​semmiegħa tiegħek iħossuhom komdi. Forsi jkunu iktar lesti li jisimgħu l-​ħsibijiet Skritturali li tkun tixtieq taqsam magħhom. Minflok ma tagħmlilhom taħdita, tkellem magħhom. Kun dħuli. Uri interess fihom, u ilqaʼ l-​kummenti tagħhom. F’xi lingwi jew kulturi hemm ċerti regoli dwar kif turi rispett meta tkellem nies li ma tafhomx. M’għandniex xi ngħidu, fejn jeżistu dawn ir-​regoli jridu jiġu osservati. Iżda dejjem tistaʼ tkun lest bi tbissima rilassata.

Fuq il-​“Platform.” Meta titkellem quddiem grupp taʼ nies, ġeneralment ikun aħjar li tuża stil naturali u konversazzjonali fit-​taħdita. Bla dubju, meta l-​udjenza tkun kbira, hemm bżonn li leħnek iwassal iktar. Jekk tipprova titgħallem it-​taħdita tiegħek bl-​amment jew jekk in-​noti tiegħek huma wisq dettaljati, x’aktarx li int konċernat iżżejjed dwar kif se tpoġġi l-​kliem b’mod preċiż. Hu importanti li tuża kliem xieraq, iżda meta tingħata wisq attenzjoni, it-​taħdita ssir riġida u formali. Tintilef in-​naturalezza. L-​ideat tiegħek għandhom ikunu maħsubin bir-​reqqa minn qabel, iżda oqgħod attent l-​iktar għall-​ideat, mhux għall-​kliem eżatt.

L-​istess jistaʼ jingħad dwar meta tkun qed tiġi intervistat waqt xi laqgħa. Kun preparat sew, iżda taqrax jew titgħallimx it-​tweġibiet bl-​amment. Għidhom b’modulazzjoni naturali sabiex l-​udjenza tieħu iktar pjaċir bil-​kummenti spontanji tiegħek.

Anki kwalitajiet mixtiqin tad-​diskors, jekk ikunu esaġerati, jistgħu jagħtu l-​impressjoni lill-​udjenza li mhumiex naturali. Pereżempju, għandek titkellem b’mod ċar u tuża pronunzja xierqa iżda mhux sal-​punt li diskorsok jinstemaʼ riġidu jew artifiċjali. Ġesti enfatiċi jew deskrittivi, meta jintużaw sewwa, jistgħu jagħtu l-​ħajja lit-​taħdita tiegħek, iżda ġesti li huma riġidi jew esaġerati se jtellfu minn dak li tkun qed tgħid. Uża leħen għoli biżżejjed, iżda pprova tgħajjatx iżżejjed. Huwa tajjeb li kultant tuża l-​entużjażmu fit-​taħdita tiegħek, iżda għandek tevita li tkun bombastiku. Il-​modulazzjoni, l-​entużjażmu, u s-​sentiment għandek tużahom kollha b’mod li ma tiġbidx l-​attenzjoni lejk innifsek jew tagħmel lill-​udjenza tħossha skomda.

Xi wħud b’mod naturali għandhom mod preċiż kif jesprimu lilhom infushom, anki meta ma jkunux qed jagħtu taħdita. Oħrajn jitkellmu b’mod iktar informali. L-​importanti hu li titkellem tajjeb kuljum u li ġġib ruħek b’dinjità Kristjana. Imbagħad, fuq il-​platform se jkun iktar faċli għalik li titkellem u taġixxi b’naturalezza li tingħoġob.

Meta Taqra fil-​Pubbliku. Jirrikjedi sforz biex tkun naturali fil-​qari pubbliku. Biex tikseb dan, identifika l-​ideat prinċipali fil-​materjal li tkun se taqra, u osserva kif dawn jiġu żviluppati. Żommhom ċari f’moħħok; inkella, se tkun qed taqra biss kliem. Iċċekkja l-​pronunzja taʼ kliem li mhux familjari. Ipprattika l-​qari b’leħen għoli sabiex tikseb it-​ton xieraq u biex tiġbor flimkien il-​kliem b’mod li turi ċar il-​ħsibijiet. Agħmilha għal darba wara l-​oħra sakemm il-​qari tiegħek ikun fluwenti. Sir af il-​materjal tajjeb biżżejjed sabiex meta taqra b’leħen għoli l-​qari tiegħek jinstemaʼ bħal konversazzjoni ħajja. Dan hu kif tkun naturali.

M’għandniex xi ngħidu, ħafna mill-​qari pubbliku tagħna jkun mill-​pubblikazzjonijiet ibbażati mill-​Bibbja. Flimkien mal-​inkarigi tal-​qari fl-​Iskola tal-​Ministeru Teokratiku, aħna naqraw skritturi fil-​ministeru tal-​għalqa u meta nagħtu taħditiet mill-​platform. L-​aħwa rġiel jiġu inkarigati biex jaqraw materjal li jkun qed jiġi kunsidrat fl-​Istudju tat-​Torri tal-​Għassa u fl-​Istudju tal-​Bibbja tal-​Kongregazzjoni. Xi aħwa rġiel kwalifikati jirċievu inkarigi biex jaqraw manuskritti quddiem l-​udjenza fil-​konvenzjonijiet. Sew jekk taqra l-​Bibbja u sew jekk taqra materjal ieħor, aqra s-​siltiet li jinkludu kwotazzjonijiet b’mod li tagħmel il-​materjal ħaj. Jekk jiġu kwotati karattri diversi, biddel leħnek xi ftit għal kull wieħed. Kelma taʼ twissija: Tkunx drammatiku żżejjed, imma agħti l-​ħajja lill-​qari tiegħek b’mod naturali.

Qari li hu naturali hu qari li jinstemaʼ bħall-​konversazzjoni taʼ kuljum. Ma jinstemax artifiċjali iżda hu konvinċenti.