L-​Użu tal-​Bibbja Biex Twieġeb

META niġu mistoqsijin dwar it-​twemmin tagħna, il-​mod taʼ ħajja tagħna, il-​ħarsa tagħna rigward ġrajjiet kurrenti, jew it-​tama tagħna għall-​futur, aħna nistinkaw biex nużaw il-​Bibbja meta nwieġbu. Għala? Għax hija l-​Kelma taʼ Alla. Huwa mill-​Bibbja li nieħdu t-​twemmin tagħna. Aħna nibbażaw il-​mod taʼ ħajja tagħna fuq il-​Bibbja. Din issawwar il-​ħarsa tagħna lejn il-​ġrajjiet tad-​dinja. It-​tama tagħna għall-​futur hi stabbilita fis-​sod fil-​wegħdi ispirati tal-​Bibbja.—2 Tim. 3:16, 17.

Aħna konxji tassew tar-​responsabbiltà li nġorru maʼ isimna. Aħna Xhieda taʼ Ġeħova. (Is. 43:12) Għalhekk, ma nwiġbux mistoqsijiet fuq il-​bażi tal-​filosofija umana, iżda fuq il-​bażi taʼ dak li Ġeħova jgħid fil-​Kelma ispirata tiegħu. Huwa minnu li bħala individwi aħna għandna opinjonijiet dwar kwistjonijiet, iżda nħallu l-​Kelma taʼ Alla ssawrilna l-​ħarsa tagħna minħabba li aħna konvinti b’mod sod li hija l-​verità. M’għandniex xi ngħidu, il-​Bibbja tagħtina l-​libertà li jkollna preferenzi persunali f’ħafna affarijiet. Minflok ma nimponu l-​preferenzi tagħna fuq oħrajn, aħna nixtiequ ngħallmu l-​prinċipji mniżżlin fl-​Iskrittura, u b’hekk inħallu s-​semmiegħa tagħna jeżerċitaw l-​istess libertà tal-​għażla li ngawdu aħna. Bħall-​appostlu Pawlu, aħna nfittxu li ‘ninkuraġġixxu l-​ubbidjenza bil-​fidi.’—Rum. 16:26.

Ġesù Kristu hu deskritt bħala “x-​xhud leali u veru” f’​Rivelazzjoni 3:14. Kif wieġeb il-​mistoqsijiet u ttratta mas-​sitwazzjonijiet li ffaċċja? Kultant billi uża tixbihat li ġiegħlu lin-​nies jaħsbu. Drabi oħrajn billi staqsa lill-​individwu li għamillu l-​mistoqsija dwar il-​fehma tiegħu stess taʼ xi skrittura. U spiss billi kkwota, qal fi kliemu, jew irrefera għall-​iskritturi. (Mt. 4:3-​10; 12:1-​8; Lq. 10:25-​28; 17:32) Fl-​ewwel seklu, ir-​rombli tal-​Iskrittura kienu ġeneralment jinżammu fis-​sinagogi. M’hemm ebda evidenza li Ġesù kellu kollezzjoni persunali taʼ dawn ir-​rombli, iżda hu kien jaf l-​Iskrittura tajjeb u spiss irrefera għaliha meta kien jgħallem lil oħrajn. (Lq. 24:27, 44-​47) Hu setaʼ tassew jgħid li dak li għallem ma kienx ġej minnu stess. Hu qal dak li kien semaʼ mingħand Missieru.—Ġw. 8:26.

Ix-​xewqa tagħna hi li nsegwu l-​eżempju taʼ Ġesù. Aħna ma smajniex personalment lil Alla jitkellem, bħal fil-​każ taʼ Ġesù. Iżda l-​Bibbja hija l-​Kelma taʼ Alla. Meta nużawha bħala l-​bażi għat-​tweġibiet tagħna, aħna nevitaw li niġbdu l-​attenzjoni fuqna nfusna. Aħna nuru li minflok ma nagħtu l-​opinjoni tagħna bħala bnedmin imperfetti, aħna determinati b’mod sod li nħallu lil Alla jgħidilna x’inhi l-​verità.—Ġw. 7:18; Rum. 3:4.

M’għandniex xi ngħidu, ix-​xewqa tagħna mhijiex sempliċement li nużaw il-​Bibbja iżda li nagħmlu dan b’mod li se jkun l-​iktar taʼ benefiċċju għas-​semmiegħ tagħna. Aħna rriduh jagħti widen b’moħħ miftuħ. Skont l-​attitudni tal-​persuna, int tistaʼ tintroduċi ħsibijiet Bibliċi billi tgħid: “Ma taqbilx li fl-​aħħar mill-​aħħar dak li verament jgħodd hu dak li jgħid Alla?” Jew tistaʼ tgħid: “Kont taf li l-​Bibbja tiddiskuti proprju din il-​mistoqsija?” Jekk qed tkellem lil xi ħadd li m’għandux rispett lejn il-​Bibbja, għandek mnejn tkun trid tuża introduzzjoni li tkun daqsxejn differenti. Tistaʼ tgħid: “Ħalli naqsam din il-​profezija tal-​qedem miegħek.” Jew tistaʼ tgħid: “L-​iktar ktieb imqassam fl-​istorja umana jgħid dan . . . ”

Kultant, tistaʼ tagħżel li sempliċement tgħid xi vers fi kliemek. Madankollu, fejn hu possibbli, ikun aħjar li tiftaħ il-​Bibbja stess u taqra dak li hemm fiha. Uri l-​iskrittura lill-​individwu fil-​Bibbja tiegħu stess kull meta dan ikun prattiku. Dan l-​użu dirett tal-​Bibbja spiss ikollu effett qawwi fuq in-​nies.—Ebr. 4:12.

L-​anzjani Kristjani għandhom responsabbiltà speċjali biex jużaw il-​Bibbja meta jwieġbu mistoqsijiet. Waħda mill-​kwalifiki biex ħu jaqdi bħala anzjan hi li “fil-​mod kif jgħallem iżomm sod mal-​kelma li tistaʼ tafdaha.” (Titu 1:9) Membru tal-​kongregazzjoni jistaʼ jieħu deċiżjoni serja fil-​ħajja wara li anzjan ikun tah xi parir. Kemm hu importanti li dan il-​parir ikun ibbażat fis-​sod fuq l-​Iskrittura! L-​eżempju taʼ anzjan f’li jagħmel dan jistaʼ jinfluwenza lil ħafna oħrajn fil-​mod kif huma jgħallmu.