Eżattezza f’Dak li Jingħad

GĦALA Kristjan forsi jagħmel stqarrija li mhix vera? Hu forsi jkun sempliċement qed jirripeti xi ħaġa li semaʼ, mingħajr ma jieħu l-​ħin biex jiċċekkja l-​fatti. Jew jistaʼ jesaġera kwistjoni għax mingħajr ma jinduna, ikun qara ħażin il-​materjal li uża bħala sors. Meta nagħtu attenzjoni bir-​reqqa għall-​eżattezza anki fi kwistjonijiet żgħar, is-​semmiegħa tagħna se jaraw li jistaʼ jkollhom il-​fiduċja li l-​aspetti iktar importanti tal-​messaġġ tagħna huma veri.

Fil-​Ministeru tal-​Għalqa. Meta jirrealizzaw li għad għandhom ħafna x’jitgħallmu, ħafna jibżgħu jibdew joħorġu fil-​ministeru tal-​għalqa. Madankollu, dawn malajr isibu li huma kapaċi jagħtu xhieda effettiva, anki b’għarfien bażiku tal-​verità biss. Kif? Is-​sigriet hu l-​preparazzjoni.

Qabel ma toħroġ fis-​servizz tal-​għalqa, sir familjari mas-​suġġett li trid tiddiskuti. Ipprova aħseb f’mistoqsijiet li s-​semmiegħa tiegħek jistgħu jqajmu. Fittex tweġibiet sodisfaċenti bbażati minn fuq il-​Bibbja. Dan se jippreparak biex tagħti tweġibiet eżatti b’mod rilassat. Se tikkonduċi studju tal-​Bibbja? Irrivedi l-​materjal tal-​istudju bir-​reqqa. Kun ċert li tifhem il-​bażi Skritturali għat-​tweġibiet tal-​mistoqsijiet stampati.

Xi ngħidu jekk inkwilin jew sieħeb tax-​xogħol jagħmel mistoqsija li m’intix preparat biex twiġibha? Jekk m’intix ċert mill-​fatti, irreżisti t-​tentazzjoni li taqtaʼ. “Qalb il-​ġust timmedita sabiex twieġeb.” (Prov. 15:28) Forsi tistaʼ ssib l-​għajnuna li teħtieġ fil-​ktieb Reasoning From the Scriptures jew fis-​“Suġġetti Bibliċi Għal Diskussjoni” jekk huma disponibbli bil-​lingwa tiegħek. Jekk m’għandek ebda wieħed minn dawn miegħek, offri li tmur lura wara li tkun għamilt ftit riċerka. Jekk dak li jkun għamillek il-​mistoqsija jkun sinċier, mhux se jiddejjaq jistenna għat-​tweġiba korretta. Hu jistaʼ, fil-​fatt, jibqaʼ impressjonat b’mod favorevoli bl-​umiltà tiegħek.

Il-​ħidma fil-​ministeru tal-​għalqa maʼ pubblikaturi tal-​esperjenza tistaʼ tgħinek tiżviluppa sengħa f’li timmaniġġa sew il-​Kelma taʼ Alla. Osserva liema skritturi jużaw u kif jirraġunaw fuqhom. Aċċetta b’umiltà kwalunkwe suġġeriment jew korrezzjoni li joffru. Id-​dixxiplu żeluż Apollo bbenefika mill-​għajnuna li rċieva minn oħrajn. Luqa ddeskriva lil Apollo bħala li “jinqalaʼ biex jitkellem,” “midħla sew taʼ l-​Iskrittura,” u “mħeġġeġ bl-​ispirtu,” raġel “jitkellem u jgħallem b’eżattezza dwar Ġesù.” Madankollu, ma kienx fehem kollox. Meta Prixilla u Akwila indunaw b’dan, “ħaduh magħhom u fissrulu t-​triq t’Alla iktar eżatt.”—Atti 18:24-​28.

“Iżomm Sod mal-​Kelma li Tistaʼ Tafdaha.” Il-​preżentazzjonijiet tagħna fil-​laqgħat għandhom juru li nistmaw ħafna l-​irwol tal-​kongregazzjoni bħala “pilastru u appoġġ tal-​verità.” (1 Tim. 3:15) Sabiex inżommu mal-​verità, hu importanti li nieħdu s-​sens tal-​iskritturi li nippjanaw li nużaw fit-​taħditiet. Ikkunsidra l-​kuntest u l-​iskop tagħhom.

Dak li tgħid f’laqgħa tal-​kongregazzjoni jistaʼ jiġi ripetut minn ħaddieħor. M’għandniex xi ngħidu, “ilkoll nitfixklu ħafna drabi.” (Ġak. 3:2) Iżda int se tibbenefika billi tiżviluppa drawwiet li jgħinuk titkellem eżatt. Ħafna aħwa rġiel li huma miktubin fl-​Iskola tal-​Ministeru Teokratiku, maż-​żmien, isiru anzjani. Dawk li huma fdati b’responsabbiltà bħal din jiġi mitlub minnhom “iktar mis-​soltu.” (Lq. 12:48) Jekk anzjan b’mod traskurat jagħti parir żbaljat li jirriżulta fi problemi serji għall-​membri tal-​kongregazzjoni, l-​anzjan jistaʼ jġarrab id-​diżapprovazzjoni t’Alla. (Mt. 12:36, 37) B’hekk, ħu li jikkwalifika bħala anzjan irid ikun magħruf għall-​fatt li “jżomm sod mal-​kelma li tistaʼ tafdaha, biex ikun jistaʼ jħeġġeġ bit-​tagħlim mimli saħħa.”—Titu 1:9.

Oqgħod attent li l-​konklużjonijiet tiegħek ikunu fi qbil mal-​“kliem mimli saħħa” li jidher fil-​ġabra tal-​verità Skritturali kollha kemm hi. (2 Tim. 1:13) Dan m’għandux ibeżżgħek. Forsi għad trid taqra l-​Bibbja kollha kemm hi. Kompli aħdem fuq dan. Iżda sadanittant innota kif is-​suġġerimenti li ġejjin jistgħu jgħinuk tanalizza l-​materjal li tkun qed taħseb biex tuża fit-​tagħlim tiegħek.

L-​ewwel staqsi lilek innifsek: ‘Huwa dan il-​materjal fi qbil maʼ dak li diġà tgħallimt mill-​Bibbja? Se jiġbed lis-​semmiegħa tiegħi lejn Ġeħova, jew se jpoġġi l-​għerf tad-​dinja fuq pedestall, u jinkuraġġixxi lin-​nies jiġu gwidati minnu?’ Ġesù qal: “Kelmtek hi l-​verità.” (Ġw. 17:17; Dt. 13:1-​5; 1 Kor. 1:19-​21) Imbagħad, agħmel użu tajjeb mill-​għodod tal-​istudju provduti mill-​klassi tal-​ilsir leali u għaqli. Dawn se jgħinuk mhux biss biex tifhem l-​iskritturi b’mod korrett iżda wkoll biex tapplikahom bil-​bilanċ u b’mod raġunevoli. Jekk tibbaża t-​taħditiet tiegħek fuq il-​“mudell taʼ kliem mimli saħħa” u tistrieħ fuq il-​mezz taʼ komunikazzjoni li juża Ġeħova meta tispjega u tapplika l-​iskritturi, l-​istqarrijiet tiegħek se jkunu eżatti.

Iċċekkja l-​Eżattezza tal-​Informazzjoni. Ġrajjiet kurrenti, kwotazzjonijiet, u esperjenzi jistgħu jkunu taʼ għajnuna meta tkun qed tispjega u tapplika ċerti punti. Kif tistaʼ tkun ċert li huma eżatti? Mod wieħed hu billi tikseb affarijiet bħal dawn minn sorsi taʼ min joqgħod fuqhom. Tinsiex tiċċekkja li l-​informazzjoni tkun aġġornata. L-​istatistiki jistgħu ma jibqgħux jgħoddu; sejbiet xjentifiċi malajr jiqdiemu; u hekk kif il-​bniedem jikber fil-​fehma tal-​istorja u l-​lingwi tal-​qedem, il-​konklużjonijiet ibbażati fuq għarfien taʼ qabel ikollhom bżonn jiġu riveduti. Oqgħod tassew attent jekk qed taħseb biex tuża xi informazzjoni mill-​gazzetti, it-​televixin, ir-​radju, l-​e-​mail, jew l-​Internet. Proverbji 14:15 jagħti l-​parir: “Kulmin hu bla esperjenza jafda f’kull kelma li jismaʼ, imma min hu prudenti jqis il-​passi tiegħu.” Staqsi lilek innifsek: ‘Is-​sors huwa magħruf għall-​eżattezza? Tistaʼ l-​informazzjoni tiġi verifikata b’xi mezz ieħor?’ Jekk tiddubita l-​verità tal-​informazzjoni, tużahiex.

Minbarra li tiċċekkja kemm tistaʼ toqgħod fuqhom is-​sorsi, ikkunsidra bir-​reqqa kif bi ħsiebek tuża l-​informazzjoni. Kun ċert li l-​użu tiegħek tal-​kwotazzjonijiet u l-​istatistiki jkun fi qbil mal-​kuntest li minnu meħudin. Fi sforz biex tenfasizza l-​punt tiegħek, oqgħod attent li “ftit nies” ma ssirx “il-​biċċa l-​kbira min-​nies,” li “ħafna nies” ma ssirx “kulħadd,” u li “f’xi każi” ma ssirx “dejjem.” Jekk tgħaġġeb il-​kwistjonijiet jew tesaġera r-​rapporti li jinvolvu xi numru, ammont, jew is-​serjetà taʼ xi ħaġa se tqajjem id-​dubji dwar il-​kredibilità.

Meta tkun eżatt b’mod konsistenti f’dak li tgħid, int se ssir magħruf bħala persuna li tirrispetta l-​verità. Dan jirrifletti tajjeb fuq ix-​Xhieda taʼ Ġeħova bħala grupp. Iktar importanti minn hekk, dan jonora lil “Ġeħova, l-​Alla tal-​verità.”—Salm 31:5.