Kapitlu Tmintax

“M’Huma Ebda Parti mid-​Dinja”

1. (a) Qabel mewtu, x’talab Ġesù għan-​nom tad-​dixxipli tiegħu? (b) Għala huwa daqshekk importanti li ma nkunu “ebda parti mid-​dinja”?

FIL-​LEJLA qabel ma nqatel, Ġesù talab għan-​nom tad-​dixxipli tiegħu. Peress li kien jaf li Satana kien se jagħmlilhom pressjoni tremenda, Ġesù qal lil Missieru: “Jien nitolbok, mhux biex toħroġhom ’il barra mid-​dinja, imma biex tgħasses fuqhom minħabba l-​wieħed mill-​agħar. M’huma ebda parti mid-​dinja, sewwa sew bħalma jien ma jien ebda parti mid-​dinja.” (Ġwann 17:​15, 16, NW) Għala huwa daqshekk importanti li wieħed ikun separat mid-​dinja? Għax Satana huwa l-​ħakkiem tagħha. Il-​Kristjani żgur ma jridux isiru parti mid-​dinja li tinsab fil-​kontroll tiegħu.—Luqa 4:​5-8; Ġwann 14:30; 1 Ġwann 5:19.

2. B’liema modi Ġesù ma kien ebda parti mid-​dinja?

² Il-​fatt li ma kien ebda parti mid-​dinja ma kienx ifisser li Ġesù ma kellux imħabba għal oħrajn. Għall-​kuntrarju, hu fejjaq lill-​morda, qajjem lill-​mejtin, u għallem lin-​nies dwar is-​Saltna t’Alla. Saħansitra ta ħajtu għall-​umanità. Imma hu ma kienx iħobb l-​attitudnijiet u l-​azzjonijiet mill-​agħar taʼ dawk li kienu juru l-​ispirtu tad-​dinja taʼ Satana. B’hekk, hu wissa kontra affarijiet bħal xewqat immorali, ħajja materjalistika, u xenqa għall-​prominenza. (Mattew 5:​27, 28; 6:​19-​21; Luqa 20:​46, 47) Mhux taʼ b’xejn mela li Ġesù evita wkoll il-​politika tad-​dinja. Għalkemm kien Lhudi, hu żamm in-​newtralità fil-​kontroversji politiċi bejn ir-​Rumani u l-​Lhud.

“Is-​Saltna Tiegħi M’Hijiex taʼ Din id-​Dinja”

3. (a) Liema akkuża rigward Ġesù għamlu l-​mexxejja reliġjużi Lhud lil Pilatu, u għala? (b) X’juri li Ġesù ma kellu l-​ebda interess li jsir sultan bħala bniedem?

³ Ikkunsidra x’ġara meta l-​mexxejja reliġjużi Lhud arrestaw lil Ġesù u ħaduh għand Ponzju Pilatu, il-​gvernatur Ruman. Fir-​realtà, dawk il-​mexxejja kienu rrabjati għax Ġesù kien kixfilhom l-​ipokrisija tagħhom. Biex iġagħlu lill-​gvernatur jieħu azzjoni kontra Ġesù, huma akkużawh u qalu: “Aħna sibna li dan il-​bniedem qiegħed ixewwex lill-​ġens tagħna, li m’huwiex iħalli lil min iħallas it-​taxxa lil Ċesari, u li qiegħed jgħid li hu l-​Messija Sultan.” (Luqa 23:2) B’mod ċar, din kienet gidba għax sena qabel meta n-​nies riedu jagħmlu lil Ġesù sultan, hu rrifjuta. (Ġwann 6:15) Hu kien jaf li kellu jkun Sultan tas-​sema fil-​futur. (Luqa 19:​11, 12) Ukoll, kellu jingħata t-​tron, mhux mill-​bnedmin, imma minn Jehovah.

4. X’kienet l-​attitudni taʼ Ġesù dwar il-​ħlas tat-​taxxi?

⁴ Tlett ijiem biss qabel ma Ġesù ġie arrestat, il-​Fariżej ipprovaw iġagħlu lil Ġesù jgħid xi ħaġa dwar il-​kwistjoni tal-​ħlas tat-​taxxi li setgħu jakkużawh biha. Imma hu qal: “Uruni dinar [munita Rumana]. Il-​wiċċ u l-​kitba taʼ min huma?” Meta qalulu “taʼ Ċesari,” hu weġibhom: “Mela agħtu lil Ċesari dak li hu taʼ Ċesari, u lil Alla dak li hu taʼ Alla.”—Luqa 20:​20-25.

5. (a) Liema lezzjoni għallem Ġesù lid-​dixxipli tiegħu meta s-​suldati marru biex jarrestawh? (b) Ġesù kif spjega r-​raġuni għal dak li kien għamel? (ċ) X’kien ir-​riżultat taʼ din il-​prova?

⁵ Le, Ġesù m’għallimx ir-​ribelljoni kontra l-​awtoritajiet sekulari. Meta s-​suldati u rġiel oħra marru biex jarrestaw lil Ġesù, Pietru ħareġ sejf u ħabat għal raġel minnhom, u qatagħlu widintu. Imma Ġesù qallu: “Erġaʼ daħħal sejfek f’postu għax kull min jaqbad is-​sejf, bis-​sejf jinqered.” (Mattew 26:​51, 52) L-​għada Ġesù ta lil Pilatu r-​raġuni għal dak li kien għamel, meta qal: “Is-​saltna tiegħi m’hijiex taʼ din id-​dinja. Li kieku saltnati kienet taʼ din id-​dinja, l-​għases tiegħi kienu jiġġieldu biex ma ningħatax f’idejn il-​Lhud.” (Ġwann 18:36) Pilatu ammetta li ma kien sab “ebda ħtija” kontra Ġesù. Imma ċeda għall-​pressjoni li għamlulu nies mill-​agħar, u ġiegħel li Ġesù jinqatel.—Luqa 23:​13-15; Ġwann 19:​12-16.

Id-​Dixxipli Jsegwu t-​Tmexxija taʼ Ġesù

6. Il-​Kristjani tal-​bidu kif urew li evitaw l-​ispirtu tad-​dinja imma li kienu jħobbu lin-​nies?

⁶ B’hekk, id-​dixxipli taʼ Ġesù fehmu x’kien meħtieġ biex ma jkunu ebda parti mid-​dinja. Kien ifisser li jevitaw l-​ispirtu u l-​azzjonijiet mill-​agħar tad-​dinja, li kienu jinkludu l-​vjolenza u d-​divertiment immorali li kienu jsiru fl-​arena u t-​teatru Ruman. Minħabba dan, id-​dixxipli bdew jiġu msejħin għedewwa tal-​bnedmin. Imma huma mhux talli ma kinux jobogħdu lil sħabhom il-​bnedmin, talli kienu jaħdmu iebes biex jgħinu lil oħrajn jibbenefikaw mill-​provvedimenti t’Alla għas-​salvazzjoni.

7. (a) Minħabba li ma kienu ebda parti mid-​dinja, x’esperjenzaw id-​dixxipli tal-​bidu? (b) Huma kif kienu jqisu lill-​ħakkiema politiċi u l-​ħlas tat-​taxxi, u għala?

⁷ Is-​segwaċi taʼ Ġesù ġew persegwitati l-​istess bħalu, taʼ spiss minn uffiċjali tal-​gvern li kienu informati ħażin. Madankollu, madwar is-​sena 56 E.K., l-​appostlu Pawlu kiteb lill-​Kristjani f’Ruma, waqt li ħeġġiġhom biex ‘jobdu lill-​awtorità taʼ fuqhom [lill-ħakkiema politiċi].’ Hu qalilhom ukoll: “Ma hemmx awtorità jekk m’hix ġejja minn Alla.” Dan ma jfissirx li Jehovah jistabbilixxi lill-​gvernijiet sekulari, imma hu jippermetti li jeżistu sakemm is-​Saltna tiegħu biss taħkem l-​art kollha. B’mod xieraq, Pawlu wissa lill-​Kristjani biex jirrispettaw lill-​mexxejja sekulari u jħallsu t-​taxxi.—Rumani 13:​1-7; Titu 3:​1, 2.

8. (a) Sa liema punt għandhom il-​Kristjani jkunu sottomessi lejn l-​awtoritajiet taʼ fuqhom? (b) Il-​Kristjani tal-​bidu kif segwew l-​eżempju taʼ Ġesù?

⁸ Madankollu, l-​ubbidjenza lejn il-​ħakkiema politiċi trid tkun relattiva, mhux assoluta. Fejn ikun hemm konflitt bejn il-​liġijiet taʼ Jehovah u l-​liġijiet tal-​bniedem, dawk li jaqdu lil Jehovah iridu jobdu l-​liġijiet Tiegħu. Innota x’jgħid dwar il-​Kristjani tal-​bidu l-​ktieb On the Road to Civilization​—A World History: “Il-​Kristjani rrifjutaw li jieħdu sehem f’ċerti dmirijiet taċ-​ċittadini Rumani. Il-​Kristjani . . . kienu jħossu li qed imorru kontra r-​reliġjon tagħhom jekk jidħlu fis-​servizz militari. Ma kinux jaċċettaw xi kariga politika. Ma kinux iqimu lill-​imperatur.” Meta l-​qorti għolja Lhudija b’saħħa ordnat lid-​dixxipli biex ma jkomplux jippridkaw, huma wieġbu: “Jeħtieġ nobdu aktar lil Alla milli l-​bnedmin.”—Atti 5:​27-29.

9. (a) Il-​Kristjani f’Ġerusalemm għala ħadu dik l-​azzjoni fis-​sena 66 E.K.? (b) B’liema mod huwa dan mudell prezzjuż?

⁹ Rigward il-​kontroversji politiċi u militari, id-​dixxipli żammew newtralità assoluta. Fis-​sena 66 E.K., il-​Lhud li kienu jgħixu fil-​Lhudija ħaduha kontra Ċesari. L-​armata Rumana dawret minnufih lil Ġerusalemm. X’għamlu l-​Kristjani tal-​belt? Huma ftakru fil-​parir taʼ Ġesù biex joħorġu mill-​belt. Meta r-​Rumani rtiraw għal ftit żmien, il-​Kristjani ħarbu minn ġox-​Xmara Ġordan għar-​reġjun muntanjuż taʼ Pella. (Luqa 21:​20-24) In-​newtralità tagħhom kellha sservi taʼ mudell għall-​Kristjani leali iktar tard.

Il-​Kristjani Jridu Jibqgħu Newtrali f’Dawn l-​Aħħar Jiem

10. (a) F’liema xogħol ix-​Xhieda taʼ Jehovah jibqgħu medhijin, u għala? (b) Rigward xiex huma newtrali?

¹⁰ Juru d-​dokumenti storiċi li hemm xi grupp f’dawn l-​aħħar jiem li segwa l-​istess newtralità assoluta tal-​Kristjani tal-​bidu? Iva, dawn huma x-​Xhieda taʼ Jehovah. Matul dan il-​perijodu kollu taʼ żmien, huma baqgħu jippridkaw li s-​Saltna t’Alla hija l-​uniku mezz li se jġib paċi dejjiema, prosperità, u hena għal dawk li jħobbu s-​sewwa. (Mattew 24:14) Imma rigward il-​kontroversji fost il-​ġnus, huma żammew newtralità assoluta.

11. (a) In-​newtralità tax-​Xhieda kif hija b’kuntrast mal-​prattiċi tal-​kleru? (b) X’ħarsa għandhom ix-​Xhieda taʼ Jehovah rigward x’sehem jieħu ħaddieħor fil-​politika?

¹¹ B’kuntrast kbir maʼ dan, il-​membri tal-​kleru tar-​reliġjonijiet taʼ din id-​dinja involvew ruħhom sew fi kwistjonijiet politiċi. F’xi pajjiżi, huma għamlu kampanji favur jew kontra kandidati politiċi. Xi wħud mill-​kleru saħansitra jaċċettaw kariga politika. Oħrajn influwenzaw lill-​politikanti biex jippreferu skemi soċjali jew liġijiet approvati mill-​kleru. Madankollu, ix-​Xhieda taʼ Jehovah ma jindaħlux fil-​politika. Lanqas ma jindaħlu lil ħaddieħor x’għandu jagħmel dwar jekk jingħaqadx maʼ xi partit politiku, joħroġx għall-​politika, jew jivvotax fl-​elezzjonijiet. Ġesù qal li d-​dixxipli tiegħu m’għandhom ikunu ebda parti mid-​dinja, u għalhekk ix-​Xhieda taʼ Jehovah ma jieħdu l-​ebda sehem fil-​politika.

12. X’riżultat naraw minħabba li r-​reliġjonijiet taʼ din id-​dinja m’humiex newtrali?

¹² Bħalma bassar Ġesù, il-​ġnus kemm-il darba għamlu gwerer. Saħansitra fl-​istess pajjiż, il-​partiti ġġieldu kontra xulxin. (Mattew 24:​3, 6, 7) Il-​mexxejja reliġjużi kważi dejjem appoġġaw ġens jew partit kontra ieħor, waqt li ħeġġew lis-​segwaċi tagħhom biex jagħmlu l-​istess. X’inhu r-​riżultat? Membri taʼ l-​istess reliġjon joqtlu lil xulxin fil-​gwerra sempliċement minħabba d-​differenzi fin-​nazzjonalità jew fit-​tribù. Din hija kontra r-​rieda t’Alla.—1 Ġwann 3:​10-12; 4:​8, 20.

13. X’turi l-​evidenza dwar in-​newtralità tax-​Xhieda taʼ Jehovah?

¹³ Madankollu, ix-​Xhieda taʼ Jehovah żammew newtralità assoluta fil-​konflitti kollha. The Watchtower taʼ l-​1 taʼ Novembru, 1939 stqarr: “Kulmin hu fuq in-​naħa tal-​Mulej se jkun newtrali fil-​gwerer bejn il-​ġnus.” Ix-​Xhieda taʼ Jehovah f’kull ġens u f’kull ċirkustanza jibqgħu jappoġġaw din il-​pożizzjoni. Huma ma jħallux il-​politika u l-​gwerer, li qed jifirdu d-​dinja, ikissru l-​fratellanza internazzjonali tagħhom. Huma “jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel.” Ladarba huma newtrali ma jitgħallmux iktar il-​gwerra.—Isaija 2:​3, 4; 2 Korintin 10:​3, 4.

14. Minħabba li jibqgħu separati mid-​dinja, x’esperjenzaw ix-​Xhieda taʼ Jehovah?

¹⁴ Liema hu riżultat wieħed tan-​newtralità tagħhom? Ġesù qal: “Billi m’intomx tad-​dinja, . . . id-​dinja tobgħodkom.” (Ġwann 15:19) Ħafna mix-​Xhieda taʼ Jehovah ġew mitfugħin il-​ħabs talli huma qaddejja t’Alla. Xi wħud ġew torturati, saħansitra maqtulin, l-​istess bħalma ġara lill-​Kristjani taʼ l-​ewwel seklu. Dan jiġri għax Satana, “l-​alla taʼ din id-​dinja,” jopponi lill-​qaddejja taʼ Jehovah, li m’huma ebda parti minnha.—2 Korintin 4:4; Apokalissi 12:12.

15. (a) Lejn xiex huma mexjin il-​ġnus kollha, u x-​Xhieda taʼ Jehovah xi jridu joqogħdu attenti li jevitaw? (b) Għala hija kwistjoni serja li nżommu separati mid-​dinja?

¹⁵ Il-​qaddejja taʼ Jehovah jinsabu ferħanin li m’huma ebda parti mid-​dinja, għax il-​ġnus kollha tagħha mexjin lejn tmiemhom f’Armageddon. (Danjel 2:44; Apokalissi 16:​14, 16; 19:​11-21) Aħna se nevitaw li jkollna dan it-​tmiem għax inżommu ’l bogħod mid-​dinja. Bħala nies magħqudin fid-​dinja kollha, aħna leali lejn is-​Saltna t’Alla fis-​sema. Veru, talli m’aħna ebda parti mid-​dinja, nesperjenzaw twaqqigħ għaċ-​ċajt u persekuzzjoni mingħandha. Iżda dalwaqt, dan se jieqaf ladarba din id-​dinja preżenti mill-​agħar, li qiegħda fil-​kontroll taʼ Satana, se tinqered għal dejjem. Mill-​banda l-​oħra, dawk li jaqdu lil Jehovah se jgħixu għal dejjem fid-​dinja l-​ġdida, ġusta u sewwa tiegħu, taħt is-​Saltna t’Alla.—2 Pietru 3:​10-13; 1 Ġwann 2:​15-17.

Diskussjoni Bħala Reviżjoni

• Ġesù kif wera xi jfisser li ma tkun “ebda parti mid-​dinja”?

• X’kienet l-​attitudni tal-​Kristjani tal-​bidu lejn (a) l-​ispirtu tad-​dinja, (b) il-​ħakkiema sekulari, u (ċ) il-​ħlas tat-​taxxi?

• B’liema modi x-​Xhieda taʼ Jehovah fi żminijiet moderni taw evidenza tan-​newtralità Kristjana tagħhom?

[Stampa f’paġna 165]

Ġesù spjega li hu u s-​segwaċi tiegħu ma kienu “ebda parti mid-​dinja”