Int Dejjem Trid Tkun l-Ewwel?

TAF lil xi ħadd li dejjem irid ikun l-​ewwel?— Dan forsi jimbotta lil xi ħadd biex ikun hu l-​ewwel fil-​kju. Qatt rajt xi ħaġa bħal din tiġri?— L-​Għalliem il-​Kbir ra wkoll lill-​kbar jipprovaw jieħdu l-​ewwel postijiet, jew l-​iktar postijiet importanti. U ma ħax gost b’dan. Ejja naraw x’ġara.

Il-Bibbja tgħidilna li Ġesù ġie mistieden għal ikla kbira fid-​dar taʼ wieħed Fariżew, li kien mexxej reliġjuż importanti. Wara li wasal, Ġesù beda jħares lejn in-​nies l-​oħra deħlin u rahom jagħżlu l-​aħjar postijiet. Għalhekk qal storja lil dawk li kienu mistidnin. Trid tismagħha?—

Ġesù qal: ‘Meta xi ħadd jistiednek għal festa taʼ tieġ, tagħżilx l-​aħjar post jew l-​iktar wieħed importanti.’ Taf għala qal hekk Ġesù?— Hu spjega li forsi xi ħadd iktar importanti jkun ġie mistieden. Mela, kif tistaʼ tara fl-​istampa, dak li qed jagħmel il-​festa jiġi u jgħid: ‘Agħti l-​post lil dan ir-​raġel, u int mur hemm.’ Kif iħossu dan il-​mistieden imbagħad?— Iħossu jistħi għax il-​mistidnin l-​oħra kollha jkunu qed iħarsu lejh meta jmur f’post inqas importanti.

Ġesù kien qed juri li mhux sew li tkun trid l-​aħjar post. Għalhekk qal: ‘Meta tkun mistieden għal festa tat-​tieġ, mur oqgħod fl-​aħħar post, biex meta jiġi dak li stiednek jgħidlek, “Ħabib, itlaʼ iktar ’il fuq.” Imbagħad int tiġi onorat quddiem il-​mistidnin l-​oħrajn kollha meta tmur f’post aħjar.’—Luqa 14:​1, 7-11.

Fhimtu l-​punt taʼ l-​istorja taʼ Ġesù?— Ejja nużaw eżempju ħa naraw jekk fhimtux. Immaġina li tielaʼ fuq karozza tal-​linja mimlija. Għandek int tgħaġġel biex tilħaq post u tħalli lil xi ħadd akbar minnek bil-​wieqfa?— Jieħu pjaċir Ġesù jekk tagħmel hekk?—

Forsi hemm min jgħid li għal Ġesù ma jimpurtax x’nagħmlu aħna. Imma int temmnu dan?— Meta Ġesù kien f’dik l-​ikla l-​kbira fid-​dar tal-​Fariżew, hu qagħad jara lin-​nies jagħżlu l-​postijiet tagħhom. Ma taħsibx li llum ukoll jinteressah dak li nagħmlu aħna?— Issa li Ġesù qiegħed fis-​sema, żgur li jistaʼ jarana sew.

Meta xi ħadd jipprova jkun l-​ewwel, jistaʼ jaqlaʼ l-​inkwiet. Taʼ spiss tinqalaʼ xi ġlieda, u n-​nies jirrabjaw. Kultant dan jiġri meta t-​tfal imorru ħarġa flimkien. Hekk kif ikunu telgħin fil-​karozza tal-​linja, it-​tfal jgħaġġlu biex jitilgħu l-​ewwel. Ikunu jridu l-​aħjar postijiet, dawk ħdejn it-​tieqa. Imbagħad x’jistaʼ jiġri?— Eħe, jistgħu jiġġieldu.

Meta wieħed ikun irid jiġi l-​ewwel jistaʼ jaqlaʼ ħafna inkwiet. Anki fost l-​appostli taʼ Ġesù qam l-​inkwiet minħabba f’hekk. Bħalma tgħallimna f’Kapitlu 6 taʼ dan il-​ktieb, huma ġġieldu bejniethom dwar min kien l-​akbar fosthom. Imbagħad x’għamel Ġesù?— Iva, ikkoreġiehom. Imma iktar tard reġgħu ġġieldu. Ejja naraw kif bdew jiġġieldu.

L-​appostli, flimkien m’oħrajn, sejrin maʼ Ġesù lejn il-​belt taʼ Ġerusalemm għall-​aħħar darba. Ġesù għadu kif kellimhom dwar is-​Saltna tiegħu, u allura Ġakbu u Ġwanni kienu qed jaħsbu dwar meta se jaħkmu bħala slaten miegħu. Tkellmu wkoll m’ommhom, Salomè, dwar dan. (Mattew 27:56; Marku 15:40) Mela huma u sejrin Ġerusalemm, Salomè tmur għand Ġesù, tinżel quddiemu, u titolbu pjaċir.

“Xi trid?” Ġesù staqsa. Hi wiġbitu li xtaqet li Ġesù jħalli lil uliedha joqogħdu bil-​qiegħda ħdejh fis-​Saltna tiegħu, wieħed fuq il-​lemin u l-​ieħor fuq ix-​xellug. Issa, meta l-​għaxar appostli l-​oħra jsiru jafu dak li Ġakbu u Ġwanni riedu lil ommhom titlob lil Ġesù, kif taħseb li jħossuhom?—

Iva, huma rrabjati ħafna maʼ Ġakbu u Ġwanni. Allura Ġesù jagħti lill-​appostli tiegħu kollha parir tajjeb. Ġesù jgħidilhom li l-​ħakkiema tal-​ġnus jieħdu gost ikunu kbar u importanti. Iridu li jkollhom pożizzjoni għolja biex kulħadd jobdihom. Imma Ġesù jgħid lid-​dixxipli tiegħu li m’għandhomx ikunu hekk. Minflok, Ġesù jgħid: “Kulmin irid ikun l-​ewwel fostkom irid ikun l-​ilsir tagħkom.” Immaġina naqra!—Mattew 20:​20-28.

Taf x’jagħmel ilsir?— Hu jaqdi jew jagħmel affarijiet għal nies oħra, mhux jistenna li oħrajn jaqduh. Hu jieħu l-​aħħar post, mhux l-​ewwel post. Jaġixxi bħala l-​inqas wieħed importanti, mhux bħala l-​iktar wieħed importanti. U ftakar, Ġesù qal li dak li jrid ikun l-​ewwel għandu jaġixxi taʼ lsir m’oħrajn.

Issa, x’taħseb li jfisser dan għalina?— Taħseb li lsir joqgħod jiġġieled maʼ sidu dwar min se jieħu l-​aħjar post? Jew joqgħod jiġġieled dwar min se jiekol l-​ewwel? X’taħseb?— Ġesù spjega li lsir dejjem ipoġġi lil sidu qablu.—Luqa 17:​7-10.

Mela flok nipprovaw inkunu l-​ewwel, x’għandna nagħmlu?— Iva, għandna nkunu bħal ilsiera għal oħrajn. U dan ifisser li npoġġu lil oħrajn qabilna. Ifisser li nqisu lil oħrajn iktar importanti minna. Tistaʼ taħseb kif tistaʼ tpoġġi lil oħrajn l-​ewwel?— Għax ma tmurx lura f’paġni 40 u 41 u terġaʼ tħares lejn xi eżempji taʼ kif tistaʼ tpoġġi lil oħrajn l-​ewwel billi taqdihom.

Żgur li tiftakar li l-​Għalliem il-​Kbir poġġa lil oħrajn qablu billi qdiehom. Fl-​aħħar lejla li qattaʼ maʼ l-​appostli tiegħu, qagħad anki jitbaxxa u jaħslilhom saqajhom. Jekk aħna wkoll inpoġġu lil oħrajn l-​ewwel billi naqduhom, se nkunu qed nogħġbu kemm lill-​Għalliem il-​Kbir u kemm lil Missieru, Alla Ġeħova.