Għala Għandna Bżonn Naħdmu

X’TIEĦU pjaċir tagħmel l-​iktar, taħdem jew tilgħab?— Fil-​fatt, m’hemm xejn ħażin li tilgħab. Il-​Bibbja titkellem dwar Ġerusalemm bħala ‘mimlija bi tfal subien u bniet jilagħbu fil-​pjazez tagħha.’—Żakkarija 8:5.

L-Għalliem il-​Kbir kien jieħu pjaċir jara t-​tfal jilagħbu. Qabel ġie fuq l-​art, hu qal: ‘Jien kont ħdejn Alla bħala ħaddiem tas-​sengħa, hieni quddiemu l-​ħin kollu.’ Innota li Ġesù kien ħaddiem maʼ Ġeħova fis-​sema. U meta kien hemm, hu qal: “L-​affarijiet li kont nitgħaxxaq bihom kienu maʼ wlied il-​bnedmin.” Iva, bħalma tgħallimna qabel, l-​Għalliem il-​Kbir kien jinteressah ħafna minn kulħadd, anki miż-​żgħar.​—Proverbji 8:​30, 31, NW.

Taħseb li Ġesù kien jilgħab meta kien żgħir?— X’aktarx li kien. Imma jekk fis-​sema kien “ħaddiem tas-​sengħa”, meta kien fuq l-​art kien jaħdem ukoll?— Ħeqq, lil Ġesù kienu jgħidulu “bin il-​mastrudaxxa.” Imma kienu jgħidulu wkoll “il-​mastrudaxxa.” Dan x’juri?— Ġużeppi, li rabba lil Ġesù bħala t-​tifel tiegħu, żgur li għallmu. Allura Ġesù wkoll sar mastrudaxxa.​—Mattew 13:55; Marku 6:3.

X’tip taʼ mastrudaxxa kien Ġesù?— Jekk kien ħaddiem tas-​sengħa fis-​sema, ma taħsibx li fuq l-​art sar ħaddiem tas-​sengħa wkoll?— Aħseb ftit kemm kien iebes dak iż-​żmien ix-​xogħol taʼ mastrudaxxa. Ġesù x’aktarx kellu joqgħod imur u jaqtaʼ xi siġra, iqattagħha biċċiet, iġorr l-​injam id-​dar, u mbagħad jifforma l-​injam u jaħdmu fi mwejjed, bankijiet, u affarijiet oħra.

Taħseb li Ġesù kien jieħu gost jagħmel dan ix-​xogħol?— Kont tieħu pjaċir kieku kont taf tagħmel imwejjed u siġġijiet u affarijiet oħra sbieħ biex jużawhom in-​nies?— Il-​Bibbja tgħid li huwa tajjeb li wieħed “igawdi xogħol idejh.” Ix-​xogħol jagħtik ċertu gost li l-​logħob ma jagħtikx.​—Koħèlet 3:22.

Fil-fatt, ix-​xogħol huwa tajjeb kemm għal moħħna u kemm għal ġisimna. Ħafna tfal kulma jagħmlu hu li joqogħdu bil-​qiegħda jaraw it-​televixin jew jilagħbu l-​logħob tal-​kompjuter. Dawn jeħxienu u ma jibqgħux f’saħħithom. La jkunu verament ferħanin u lanqas ma jferrħu lil ħaddieħor. X’għandna bżonn nagħmlu biex inkunu ferħanin?—

F’Kapitlu 17 taʼ dan il-​ktieb tgħallimna li jekk nagħtu u nagħmlu affarijiet biex ngħinu lil oħrajn se nkunu ferħanin. (Atti 20:35) Il-​Bibbja ssejjaħ lil Ġeħova “l-​Alla l-​hieni.” (1 Timotju 1:11) U, bħalma qrajna fi Proverbji, Ġesù kien “hieni quddiemu l-​ħin kollu.” Ġesù għala kien ferħan?— Hu semma waħda mir-​raġunijiet meta qal: “Missieri baqaʼ jaħdem s’issa, u jien nibqaʼ naħdem.”—Ġwanni 5:17.

Meta Ġesù kien fuq l-​art, hu ma ħadimx bħala mastrudaxxa ħajtu kollha. Alla Ġeħova kellu xogħol speċjali għalih x’jagħmel fuq l-​art. Taf x’kien?— Ġesù qal: “Irrid inxandar l-​aħbar tajba tas-​saltna t’Alla . . . għax għal dan intbgħatt.” (Luqa 4:43) Xi drabi meta Ġesù kien jippriedka lin-​nies, dawn kienu jemmnuh. Imbagħad kienu jgħidu lil oħrajn l-​affarijiet li qalilhom, bħalma għamlet il-​mara Samaritana li qed tara hawn.​—Ġwanni 4:​7-15, 27-30.

Kif taħseb li kien iħossu Ġesù dwar dan ix-​xogħol? Taħseb li ried jagħmlu?— Ġesù qal: “L-​ikel tiegħi hu li nagħmel ir-​rieda taʼ dak li bagħatni u li ntemm xogħlu.” (Ġwanni 4:34) Kemm tieħu pjaċir tiekol l-​ikel favorit tiegħek?— Dan jistaʼ jgħinek tifhem ftit kemm Ġesù kien iħobb ix-​xogħol li Alla tah jagħmel.

Alla ħalaqna b’tali mod li meta nitgħallmu naħdmu nistgħu nħossuna ferħanin. Hu jgħid li ta rigal lill-​bniedem u r-​rigal hu li l-​bniedem jistaʼ “jifraħ b’xogħlu.” Allura meta titgħallem taħdem mindu tkun żgħir, il-​ħajja tiegħek kollha se tkun iktar sabiħa.​—Koħèlet 5:​18 (5:​19, NW).

Dan ma jfissirx li t-​tfal iż-​żgħar jistgħu jagħmlu x-​xogħol tal-​kbar, imma kollha kemm aħna nistgħu nagħmlu xi xogħol. Il-​ġenituri tiegħek forsi jmorru jaħdmu kuljum biex jaqilgħu l-​flus ħalli bħala familja jkollkom ikel x’tieklu u dar fejn tgħixu. U bħalma suppost taf, hemm ħafna xogħol li jrid isir fid-​dar biex din tibqaʼ nadifa u jkun hemm kollox f’postu.

Liema xogħol tistaʼ tagħmel int għall-​ġid tal-​familja tiegħek kollha?— Tistaʼ tgħin biex tlesti l-​mejda għall-​ikel, taħsel il-​platti, toħroġ iż-​żibel barra, tnaddaf il-​kamra tiegħek, u terfaʼ l-​ġugarelli. Forsi diġà tagħmel xi affarijiet minn dawn. Dan ix-​xogħol huwa taʼ ġid kbir għall-​familja.

Ejja naraw kif dan ix-​xogħol hu taʼ ġid. Il-​ġugarelli suppost terfagħhom wara li tilgħab. Għala taħseb li hu importanti dan?— Tkun qed tgħin biex fid-​dar ma jkunx hemm imbarazz fin-​nofs, u tistaʼ tevita wkoll li jweġġaʼ xi ħadd. Jekk ma tiġborx il-​ġugarelli tiegħek, xi darba tistaʼ tiġi ommok b’ħafna basktijiet u affarijiet u tirfes xi wieħed mill-​ġugarelli. Imbagħad titfixkel, taqaʼ, u tweġġaʼ. Forsi jkollha tmur l-​isptar ukoll. Ma tkunx xi ħaġa kerha ħafna din?— Mela meta terfaʼ l-​ġugarelli wara li tilgħab, dan se jkun taʼ ġid għal kulħadd.

Hemm xogħol ieħor li jridu jagħmlu t-​tfal. Per eżempju, ix-​xogħol taʼ l-​iskola. Fl-​iskola titgħallem taqra. Xi tfal jieħdu pjaċir jaqraw, imma oħrajn jgħidu li hu diffiċli. Anki jekk ikun diffiċli għall-​ewwel, meta titgħallem taqra tajjeb se tieħu pjaċir. U meta tkun taf taqra, tistaʼ titgħallem ħafna affarijiet interessanti. Tkun tistaʼ wkoll taqra waħdek il-​ktieb t’Alla stess, il-​Bibbja. Mela meta tagħmel ix-​xogħol taʼ l-​iskola sew, se jkun taʼ ħafna ġid, hux veru?—

Hemm xi nies li jipprovaw jiskansaw ix-​xogħol. Forsi taf lil xi ħadd li jagħmel hekk. Imma jekk Alla ħalaqna biex naħdmu, għandna bżonn nitgħallmu kif nieħdu gost naħdmu. Kemm kien jieħu gost jagħmel ix-​xogħol tiegħu l-​Għalliem il-​Kbir?— Kien daqslikieku qed jiekol l-​ikel favorit tiegħu. U fuq liema xogħol kien qed jitkellem?— Li jgħid lil oħrajn dwar Alla Ġeħova u kif jistgħu jieħdu l-​ħajja taʼ dejjem.

Mela xi ħaġa li tistaʼ tgħinna nieħdu gost naħdmu hi li nistaqsu lilna nfusna, ‘Dan ix-​xogħol għala għandu bżonn isir?’ Meta tkun taf għala xi ħaġa hi importanti, iktar issibha faċli biex tagħmilha. U sew jekk ix-​xogħol ikun kbir u sew jekk żgħir, agħmel biċċa xogħol tajba. Jekk tagħmel hekk, tkun tistaʼ tifraħ b’xogħol idejk, bħalma għamel l-​Għalliem il-​Kbir tagħna.