Il-​Ħarsa tal-​Bibbja Lejn id-​Divorzju u s-​Separazzjoni

Ġeħova jistenna li dawk Ii huma miżżewġin jibqgħu leali lejn il-​wegħda taż-​żwieġ. Meta għaqqad lill-​ewwel raġel u mara fiż-​żwieġ, Ġeħova qal: “Raġel . . . irid jingħaqad maʼ martu u huma jsiru ġisem wieħed.” Iktar tard, Ġesù Kristu rripeta din l-​istqarrija u żied: “Għalhekk, dak li Alla għaqqad flimkien ħa ma jifirdu ebda bniedem.” (Ġenesi 2:24; Mattew 19:3-6) B’hekk, Ġeħova u Ġesù jqisu ż-​żwieġ bħala rabta dejjiema li tispiċċa biss meta s-​sieħeb jew is-​sieħba tmut. (1 Korintin 7:39) Ladarba ż-​żwieġ huwa arranġament sagru, id-​divorzju m’għandux jittieħed ħafif ħafif. Fil-​fatt, Ġeħova jobgħod id-​divorzji li m’għandhomx bażi Skritturali.—Malakija 2:15, 16.

X’inhi l-​bażi Skritturali għad-​divorzju? Ngħiduha kif inhi, Ġeħova jobgħod l-​adulterju u ż-​żína. (Ġenesi 39:9; 2 Samwel 11:26, 27; Salm 51:4) Tabilħaqq, tant jistmerr iż-​żína li jippermettiha tkun il-​bażi għad-​divorzju. (Għal diskussjoni dwar x’tinvolvi ż-​żína, ara Kapitlu 9, paragrafu 7, fejn tiġi spjegata ż-​żína.) Ġeħova jħalli f’idejn is-​sieħeb jew is-​sieħba innoċenti biex tiddeċiedi jekk tibqax mal-​wieħed ħati jew titlobx divorzju. (Mattew 19:9) Għalhekk, jekk sieħeb jew sieħba innoċenti tiddeċiedi li titlob divorzju ma tkunx qed tieħu pass li Ġeħova jobgħod. Fl-​istess ħin, madankollu, il-​kongregazzjoni Kristjana ma tinkuraġġixxi lil ħadd biex jiddivorzja. Fil-​fatt, ċerti ċirkustanzi jistgħu jqanqlu lis-​sieħeb jew lis-​sieħba innoċenti tibqaʼ mal-​ħati speċjalment jekk dan nidem ġenwinament. Iżda, fl-​aħħar mill-​aħħar, dawk li għandhom il-​bażi Skritturali għal divorzju għandhom jieħdu d-​deċiżjoni huma stess u jaċċettaw kwalunkwe konsegwenza li ġġib magħha.—Galatin 6:5.

F’ċerti sitwazzjonijiet estremi, xi Kristjani ddeċidew li jisseparaw minn mas-​sieħeb jew is-​sieħba tagħhom jew jiddivorzjawha anki jekk din ma tkunx wettqet iż-​żína. F’każ bħal dan, il-​Bibbja tgħid lill-​persuna li titlaq biex “tibqaʼ ma tiżżewwiġx, inkella terġaʼ tirranġa maʼ żewġha.” (1 Korintin 7:11) Kristjan bħal dan m’hux ħieles li jfittex terza persuna bil-​ħsieb li jerġaʼ jiżżewweġ. (Mattew 5:32) Issa kkunsidra ftit sitwazzjonijiet mhux tas-​soltu li xi wħud qisuhom bħala bażi għal separazzjoni.

Nuqqas taʼ manteniment magħmul bi ħsieb. Familja tistaʼ tiftaqar u tkun nieqsa mill-​affarijiet bażiċi u essenzjali tal-​ħajja għaliex ir-​raġel jonqos milli jipprovdi għaliha, għalkemm ikun kapaċi jagħmel dan. Il-​Bibbja tgħid: “Jekk xi ħadd ma jipprovdix . . . għall-​membri taʼ daru, ikun ċaħad il-​fidi u jkun agħar minn bniedem mingħajr fidi.” (1 Timotju 5:8) Jekk bniedem bħal dan jirrifjuta li jbiddel ħajtu, martu jkollha tiddeċiedi jekk għandhiex bżonn tipproteġi l-​benesseri tagħha u dak taʼ wliedha billi ġġib separazzjoni legali. M’għandniex xi ngħidu, l-​anzjani Kristjani għandhom jagħtu konsiderazzjoni bil-​ħsieb għal xi akkuża dwar Kristjan li jirrifjuta li jmantni lill-​familja tiegħu. Wieħed li jirrifjuta li jieħu ħsieb familtu jistaʼ jiġi maqtugħ mis-​sħubija.

Abbuż fiżiku estrem. Wieħed mill-​imseħbin fiż-​żwieġ li jkun abbużiv jistaʼ tant ikun vjolenti li s-​saħħa tas-​sieħeb jew tas-​sieħba abbużata u saħansitra l-​ħajja jkunu fil-​periklu. Jekk l-​imseħbin fiż-​żwieġ bil-​problemi jkunu Kristjani t-​tnejn, l-​anzjani tal-​kongregazzjoni għandhom jinvestigaw jekk dan hux minnu jew le. L-​għadab u l-​prattika taʼ mġiba vjolenti huma raġunijiet ġusti għal qtugħ mis-​sħubija.—Galatin 5:19-21.

Periklu assolut għall-​ħajja spiritwali. Wieħed mill-​imseħbin fiż-​żwieġ jistaʼ kontinwament jipprova jagħmilha impossibbli għall-​parti l-​oħra li tkompli fil-​qima vera jew anki jistaʼ jipprova jisforzaha biex b’xi mod tikser il-​kmandi t’Alla. F’każ bħal dan, min ikun fil-​periklu jkollu jiddeċiedi jekk l-​uniku mod biex ‘jobdi lil Alla bħala ħakkiem u mhux lill-​bnedmin’ ikunx biss billi jġib separazzjoni legali.—Atti 5:29.

Fil-każi kollha li jinvolvu sitwazzjonijiet estremi bħal dawn li għadna kif iddiskutejna, ħadd m’għandu jipprova jikkonvinċi lill-​wieħed innoċenti biex jissepara jew biex jibqaʼ mas-​sieħeb jew is-​sieħba. Filwaqt li l-​ħbieb maturi spiritwalment u l-​anzjani jistgħu jkunu t’appoġġ u jagħtu pariri bbażati fuq il-​Bibbja, huma ma jistgħux ikunu jafu d-​dettalji kollha taʼ dak li jkun għaddej bejn raġel u mara miżżewġin. Ġeħova biss jistaʼ jkun jaf dan. Bla dubju, mara miżżewġa Kristjana ma tkunx qed tonora lil Alla jew l-​arranġament taż-​żwieġ jekk esaġerat is-​serjetà tal-​problemi f’darha sempliċement biex tgħix separatament minn żewġha, jew viċi versa. Ġeħova hu konxju taʼ kwalunkwe ppjanar għal separazzjoni, minkejja kif wieħed jistaʼ jipprova jaħbih. Tabilħaqq, “kollox hu għeri u mikxuf beraħ quddiem dak li rridu nagħtuh kont.” (Ebrej 4:13) Iżda jekk xi sitwazzjoni perikoluża b’mod estrem tippersisti, ħadd m’għandu jikkritika lil Kristjan li, meta jara li m’hemmx triq oħra, jagħżel li jissepara. Fl-​aħħar mill-​aħħar, “ilkoll se nidhru quddiem it-​tron tal-​ġudizzju t’Alla.”—Rumani 14:10-12.