L-​Appostli Jippritkaw Bla Biżaʼ

GĦAXART ijiem wara li Ġesù telaʼ s-​sema, madwar 120 dixxiplu tiegħu nġabru f’dar f’Ġerusalemm fi żmien il-​Festa Lhudija taʼ Pentekoste, 33 E.K. F’daqqa waħda, ħoss bħal kurrent taʼ riħ qawwi mela d-​dar. Id-​dixxipli b’miraklu bdew jitkellmu b’lingwi li lanqas biss kienu jafu. Għalfejn kienu qed jiġru dawn l-​affarijiet mhux tas-​soltu? Alla kien ta l-​ispirtu qaddis lid-​dixxipli.

Barra kien hemm folla nies għax ħafna kienu ġew għall-​festa minn diversi pajjiżi. Dawn baqgħu mgħaġġbin jisimgħu lid-​dixxipli taʼ Ġesù jitkellmu fluwenti bil-​lingwi tagħhom stess. Biex jispjega x’kien qed jiġri, Pietru rrefera għall-​profezija tal-​profeta Ġoel li Alla kien se ‘jferraʼ’ l-​ispirtu tiegħu, li kien se jagħti għotjiet mirakolużi lil dawk li jirċivuh. (Ġoel 2:28, 29) Din l-​evidenza qawwija tal-​ispirtu qaddis uriet ċar li kienet saret bidla importanti: Ma kienx iktar Israel li kellu l-​approvazzjoni t’Alla, imma l-​kongregazzjoni Kristjana li kienet għadha kemm ġiet ifformata. Dawk li riedu jaqdu lil Alla b’mod aċċettabbli issa kellhom isiru segwaċi taʼ Kristu.

Sadanittant, l-​oppożizzjoni bdiet tiżdied, u l-​għedewwa tefgħu lid-​dixxipli l-​ħabs. Imma matul il-​lejl, l-​anġlu taʼ Ġeħova fetaħ il-​bibien tal-​ħabs u qal lid-​dixxipli biex ikomplu jippritkaw. Mas-​sebħ, għamlu preċiż hekk. Daħlu fit-​tempju u bdew jgħallmu l-​aħbar tajba dwar Ġesù. L-​opponenti reliġjużi tagħhom għadbu ferm għalihom u ordnawlhom jieqfu jippritkaw. Bla biżaʼ, l-​appostli wieġbu: “Jeħtieġ li aħna nobdu lil Alla bħala ħakkiem u mhux lill-​bnedmin.”—Atti 5:28, 29.

Il-​persekuzzjoni kompliet tiħrax. Ċerti Lhud akkużaw lid-​dixxiplu Stiefnu li kien dagħa u ħaġġruh għall-​mewt. Wieħed żagħżugħ—Sawl taʼ Tarsu—kien xhud taʼ dan il-​qtil u approvah. Imbagħad mar Damasku biex jarresta lil kull min kien isegwi lil Kristu. Waqt li Sawl kien fit-​triq, idda madwaru dawl mis-​sema u leħen instemaʼ jgħid: “Sawl, Sawl, għala qed tippersegwitani?” Mogħmi minn dak id-​dawl, Sawl staqsa: “Min int, Mulej?” Il-​leħen wieġeb: “Jien Ġesù.”—Atti 9:3-​5.

Tlett ijiem wara, Ġesù bagħat dixxiplu jismu Ananija biex jerġaʼ jagħti l-​vista lura lil Sawl. Sawl tgħammed u beda jipprietka bil-​qlubija dwar Ġesù. Sawl sar magħruf bħala l-​appostlu Pawlu u sar membru żeluż tal-​kongregazzjoni Kristjana.

Id-​dixxipli taʼ Ġesù kienu qed ixandru l-​aħbar tajba tas-​Saltna t’Alla lil-​Lhud u s-​Samaritani biss. Imbagħad deher anġlu lil Kornelju, fizzjal tal-​armata Rumana li kellu l-​biżaʼ t’Alla, u qallu biex jibgħat għall-​appostlu Pietru. Pietru mar għand Kornelju flimkien maʼ xi wħud oħrajn, u pprietka lilu u lin-​nies taʼ daru. Waqt li Pietru kien qed jitkellem, niżel l-​ispirtu qaddis fuq dawk il-​Ġentili li kienu jemmnu, u l-​appostlu ordna li jiġu mgħammdin f’isem Ġesù. It-​triq għall-​ħajja taʼ dejjem issa kienet infetħet għal nies mill-​ġnus kollha. Il-​kongregazzjoni kienet lesta biex ixxerred l-​aħbar tajba maʼ kullimkien.

—Ibbażat fuq Atti 1:1–11:21.