Inżommu l-paċi u l-indafa tal-kongregazzjoni

KULL sena, bi twettiq tal-​profezija Biblika, eluf taʼ nies jinġemgħu lejn id-​dar tal-​qima pura taʼ Ġeħova. (Mik. 4:1, 2) Kemm aħna ferħanin li nilqgħuhom fil-​“kongregazzjoni t’Alla”! (Atti 20:28) Huma japprezzaw l-​opportunità li jaqdu lil Ġeħova magħna u jgawdu l-​ambjent nadif u paċifiku tal-​ġenna spiritwali tagħna. L-​ispirtu qaddis t’Alla u l-​pariri għaqlin misjubin fil-​Kelma tiegħu jgħinuna nżommu l-​paċi u nżommu l-​kongregazzjoni nadifa.—Salm 119:105; Żak. 4:6.

² Billi napplikaw prinċipji Bibliċi aħna nilbsu “l-​personalità l-​ġdida.” (Kol. 3:10) Aħna nwarrbu kwistjonijiet żgħar u differenzi persunali. Billi naraw l-​affarijiet kif jarahom Ġeħova, negħlbu l-​influwenzi dinjin li jifirdu u naħdmu magħqudin bħala fratellanza internazzjonali.—Atti 10:34, 35.

³ Minkejja dan, minn żmien għal żmien iqumu diffikultajiet li jeffettwaw il-​paċi u l-​unità tal-​kongregazzjoni. Għala jiġri dan? Fil-​biċċa l-​kbira mill-​każi, ikun għax ma jiġux applikati pariri Bibliċi. Xorta jkollna nkampaw bit-​tendenzi umani imperfetti tagħna. Ħadd minna mhu bla dnub. (1 Ġw. 1:10) Xi ħadd għandu mnejn jieħu pass falz li jistaʼ jdaħħal nuqqas taʼ ndafa morali jew spiritwali fil-​kongregazzjoni. Nistgħu noffendu lil xi ħadd b’dak li ngħidu jew nagħmlu bla ħsieb, jew nistgħu nitfixklu minħabba xi ħaġa li qal jew għamel ħaddieħor. (Rum. 3:23) Meta jqumu diffikultajiet bħal dawn, x’nistgħu nagħmlu biex nirranġaw l-​affarijiet?

⁴ Bi mħabba Ġeħova kkunsidra dan kollu. Il-​Kelma tiegħu tipprovdi pariri dwar x’għandna nagħmlu meta jqumu d-​diffikultajiet. Għajnuna persunali hi disponibbli mingħand ragħajja spiritwali, l-​anzjani. Billi napplikaw il-​pariri Skritturali tagħhom, nistgħu nerġgħu niksbu relazzjoni tajba m’oħrajn u nżommu waqfa tajba quddiem Ġeħova. Jekk niġu dixxiplinati jew imwiddbin minħabba li nkunu għamilna xi ħaġa ħażina, nistgħu nibqgħu ċerti li korrezzjoni bħal din hi espressjoni tal-​imħabba li Missierna tas-​sema għandu għalina.—Prov. 3:11, 12; Ebr. 12:6.

INSOLVU DIFFERENZI ŻGĦAR

⁵ Jistaʼ jkun hemm drabi meta jqum tilwim persunali jew diffikultajiet żgħar bejn dawk fil-​kongregazzjoni. Dawn għandhom jiġu solvuti mill-​iktar fis possibbli fi spirtu taʼ mħabba li teżisti bejn l-​aħwa. (Efes. 4:26; Flp. 2:2-​4; Kol. 3:12-​14) Aktarx, se ssib li problemi taʼ natura persunali li jinvolvu r-​relazzjoni tiegħek maʼ Kristjan ieħor jistgħu jiġu solvuti billi tapplika l-​parir tal-​appostlu Pietru biex ‘ikollna mħabba profonda lejn xulxin, għax l-​imħabba tgħatti kotra taʼ dnubiet.’ (1 Pt. 4:8) Il-​Bibbja tgħid: “Ilkoll nitfixklu ħafna drabi.” (Ġak. 3:2) Meta napplikaw ir-​Regola tad-​Deheb, billi nagħmlu lil oħrajn dak kollu li rriduhom jagħmlu lilna, ġeneralment inkunu nistgħu naħfru u ninsew offiżi żgħar.—Mt. 6:14, 15; 7:12.

⁶ Jekk tinduna li b’dak li tkun għedt jew għamilt tkun offendejt lil xi ħadd, għandek tieħu l-​inizjattiva biex tagħmel paċi mill-​iktar fis. Ftakar li r-​relazzjoni tiegħek maʼ Ġeħova tiġi effettwata wkoll. Ġesù ta dan il-​parir lid-​dixxipli tiegħu: “Allura, jekk waqt li tkun qed iġġib l-​għotja tiegħek lejn l-​artal tiftakar li ħuk għandu xi ħaġa kontrik, itlaq l-​għotja tiegħek hemmhekk quddiem l-​artal, u mur l-​ewwel agħmel paċi maʼ ħuk, u mbagħad, meta tkun ġejt lura, offri l-​għotja tiegħek.” (Mt. 5:23, 24) Forsi kien hemm xi nuqqas taʼ ftehim. Jekk inhu hekk, ikkomunika. Il-​komunikazzjoni tajba bejn dawk kollha fil-​kongregazzjoni tgħin ħafna biex ma jkunx hemm nuqqas taʼ ftehim u biex jissolvew problemi li jqumu minħabba l-​imperfezzjoni umana.

PARIRI SKRITTURALI MEĦTIEĠA

⁷ Kultant, l-​indokraturi jistaʼ jkollhom bżonn jagħtu parir lil xi ħadd biex jaġġustaw mill-​ġdid il-​ħsieb tiegħu. Dan mhux dejjem ikun faċli. Lill-​Kristjani fil-​Galazja, l-​appostlu Pawlu kitbilhom: “Ħuti, anki jekk bniedem jagħmel xi pass falz qabel ma jinduna, intom li għandkom kwalifiki spiritwali pprovaw aġġustawh mill-​ġdid bi spirtu taʼ ħlewwa.”—Gal. 6:1.

⁸ Billi jirgħu lill-​merħla, l-​indokraturi jistgħu jipproteġu lill-​kongregazzjoni minn ħafna perikli spiritwali u jipprevienu li jiżviluppaw problemi serji. L-​anzjani jistinkaw biex is-​servizz tagħhom lill-​kongregazzjoni jilħaq il-​livell taʼ dak li Ġeħova wiegħed permezz taʼ Isaija: “Kull wieħed ikun bħal post taʼ kenn mir-​riħ u lqugħ mill-​maltempata tax-​xita, bħal nixxigħat taʼ l-​ilma f’art bla ilma, bħad-​dell taʼ blata kbira f’art niexfa.”—Is. 32:2.

IMMARKAR TAʼ DAWK LI JIMXU BID-​DIŻORDNI

⁹ L-​appostlu Pawlu wissa dwar ċerti wħud li setgħu jinfluwenzaw ħażin lill-​kongregazzjoni. Pawlu qal: “Qed nordnawlkom . . . biex twarrbu minn kull ħu li hu miexi bid-​diżordni u mhux skond it-​tradizzjoni li rċivejtu mingħandna.” Hu ċċara din l-​istqarrija billi kiteb: “Jekk xi ħadd ma jobdix dak li qed ngħidulkom b’din l-​ittra, lil dan żommuh immarkat u tibqgħux tissieħbu miegħu, biex jistħi. Iżda tqisuhx bħala għadu, imma komplu widdbuh bħala ħu.”—2 Tess. 3:6, 14, 15.

¹⁰ Kultant, xi ħadd li ma jkunx ħati taʼ li jipprattika dnub serju li għalih ikun jistaʼ jitkeċċa mill-​kongregazzjoni, juri nuqqas kbir taʼ rispett lejn il-​livell t’Alla li għandu jiggwida lill-​Kristjani. Dan jistaʼ jinkludi affarijiet bħal li jkun estremament għażżien jew maħmuġ, jew jikkritika bil-​kbir. Jistaʼ jkun qiegħed ‘jindaħal fejn ma jesgħux.’ (2 Tess. 3:11) Jew jistaʼ jkun xi ħadd li jippjana li jieħu vantaġġ minn oħrajn jew li jieħu pjaċir f’divertiment li biċ-​ċar ma jkunx xieraq. L-​imġiba ħażina tkun serja biżżejjed li tirrifletti ħażin fuq il-​kongregazzjoni u tistaʼ tinfirex għal fuq Kristjani oħrajn.

¹¹ L-​anzjani jipprovaw jgħinu lil persuna li timxi bid-​diżordni billi l-​ewwel jagħtuha pariri bbażati fuq il-​Bibbja. Però, jekk il-​persuna tibqaʼ tinjora prinċipji Bibliċi minkejja twiddib ripetut, l-​anzjani jistgħu jiddeċiedu li tingħata taħdita taʼ twissija lill-​kongregazzjoni. L-​anzjani se jużaw id-​dixxerniment biex jiddeterminaw jekk sitwazzjoni partikulari tkunx biżżejjed serja u taʼ tfixkil lil ħaddieħor tant li jkun hemm bżonn taħdita taʼ twissija. Il-​kelliem se jipprovdi pariri xierqa rigward kondotta taʼ diżordni, imma ma jsemmix isem dak li jkun miexi bid-​diżordni. B’hekk, dawk li jafu bis-​sitwazzjoni msemmija fit-​taħdita se jaraw li jevitaw kuntatt soċjali maʼ individwu bħal dan għalkemm ikomplu jkollhom assoċjazzjoni spiritwali miegħu, u ‘jkomplu jwiddbuh bħala ħu.’

¹² Nittamaw li l-​waqfa soda li jkunu ħadu Kristjani leali se tgħin lil individwu li jkun miexi bid-​diżordni biex jibda jistħi minħabba kif qed jaġixxi. B’hekk, jiġi mmotivat biex jinbidel. Meta jkun ċar li l-​individwu abbanduna l-​mixi bid-​diżordni tiegħu, ma jkunx hemm iktar għalfejn li jiġi trattat bħala individwu mmarkat.

KIF JISSOLVA ĊERTU ĦAŻEN SERJU

¹³ Il-​fatt li nkunu lesti nagħlqu għajnejna għall-​offiżi u li naħfru ma jfissirx li ma nagħtux kas il-​ħażen jew li napprovawh. Ma nistgħux inwaħħlu fl-​imperfezzjoni għall-​ħażen kollu; lanqas ma jkun xieraq li nagħlqu għajnejna għall-​ħażen li jkun iktar minn offiża żgħira. (Lev. 19:17; Salm 141:5) Il-​patt tal-​Liġi rrikonoxxa li ċerti dnubiet huma iżjed serji minn oħrajn, u dan hu minnu wkoll fl-​arranġament Kristjan.—1 Ġw. 5:16, 17.

¹⁴ Ġesù semma proċedura speċifika biex jissolvew problemi serji li jistgħu jinqalgħu bejn il-​Kristjani. Innota l-​passi li stabbilixxa: “Jekk ħuk jagħmel dnub, [1] mur sibu waħdu u urih l-​iżball tiegħu. Jekk jismaʼ minnek, tkun ksibt lura lil ħuk. Imma jekk ma jismax, [2] ħu miegħek wieħed jew tnejn oħra, sabiex kull ħaġa tkun stabbilita minn fomm żewġ xhieda jew tlieta. Jekk ma jismax minnhom, [3] kellem lill-​kongregazzjoni. Jekk lanqas mill-​kongregazzjoni ma jismaʼ, ħa jkun għalik bħal raġel mill-​ġnus u bħal kollettur tat-​taxxi.”—Mt. 18:15-​17.

¹⁵ Meta nqisu t-​tixbiha li ta Ġesù iktar tard, imniżżla f’​Mattew 18:23-​35, jidher li wieħed mid-​dnubiet kunsidrati f’​Mattew 18:15-​17 jinvolvi kwistjonijiet finanzjarji jew taʼ proprjetà, bħal li jonqos li jitħallas lura xi self jew li wieħed jagħmel frodi. Jew l-​offiża tistaʼ tkun malafama, li tagħmel ħsara kbira lir-​reputazzjoni taʼ xi ħadd.

¹⁶ Jekk ikollok evidenza li xi ħadd fil-​kongregazzjoni għamel dnub bħal dan kontrik, tgħaġġilx biex iddur lejn l-​anzjani u titlobhom jindaħlu għalik. Bħalma ta l-​parir Ġesù, l-​ewwel kellem lil dak li għandek ilment kontrih. Ipprova solvi l-​kwistjoni bejnietkom it-​tnejn biss mingħajr ma tinvolvi lil xi ħadd ieħor. Żomm f’moħħok li Ġesù ma qalx ‘mur darba biss u urih l-​iżball tiegħu.’ Għalhekk, jekk l-​individwu ma ammettiex l-​iżball u ma talabx maħfra, ikun tajjeb tikkunsidra li terġaʼ tavviċinah iktar tard. Jekk il-​kwistjoni tkun tistaʼ tiġi solvuta b’dan il-​mod, dak li jkun dineb ċertament li se japprezza l-​fatt li int m’għedtx lil oħrajn dwar dnubu jew li għarraqt ir-​reputazzjoni tajba tiegħu fil-​kongregazzjoni. Tkun “ksibt lura lil ħuk.”

¹⁷ Jekk dak li għamel l-​offiża jaċċetta r-​responsabbiltà, ifittex il-​maħfra, u jieħu passi biex jirranġa l-​iżball, ma jkunx hemm għalfejn jittieħdu iżjed passi. Għalkemm id-​dnub kien serju, offiża taʼ dan it-​tip tistaʼ tissolva bejn l-​individwi involuti.

¹⁸ Jekk ma tkunx tistaʼ tikseb lura lil ħuk billi ‘ssibu waħdu’ u turih l-​iżball tiegħu, imbagħad tkun tistaʼ tagħmel bħalma qal Ġesù, “ħu miegħek wieħed jew tnejn oħra,” u erġaʼ tkellem maʼ ħuk. Dawk li tieħu miegħek għandhom ukoll ikollhom il-​mira li jiksbu lura lil ħuk. Preferibbilment, għandhom ikunu xhieda tal-​għemil ħażin li għedt li għamel, imma jekk ma jkunx hemm xhieda li raw b’għajnejhom, tistaʼ tagħżel li titlob lil persuna jew tnejn oħra biex ikunu xhieda tad-​diskussjoni. Forsi jkollhom l-​esperjenza fil-​kwistjoni li trid tiġi solvuta u jistgħu jistabbilixxu jekk dak li ġara kienx verament nuqqas. L-​anzjani magħżulin biex ikunu xhieda ma jirrappreżentawx lill-​kongregazzjoni, ladarba l-​ġemgħa tal-​anzjani ma tkunx inkarigathom speċifikament biex jagħmlu dan.

¹⁹ Jekk il-​kwistjoni ma ssolvietx wara li pprovajt kemm-​il darba—tkellimt miegħu waħdu u mort għandu maʼ persuna jew tnejn oħra—u tħoss li ma tistax tħalliha għaddejja, imbagħad għandek tirrapportaha lill-​indokraturi tal-​kongregazzjoni. Ftakar li l-​mira tagħhom hi li jżommu l-​paċi u l-​indafa tal-​kongregazzjoni. La tkun avviċinajt lill-​anzjani, għandek tħalli l-​problema f’idejhom u tafda f’Ġeħova. Qatt m’għandek tħalli l-​kondotta taʼ xi ħadd ieħor tfixklek jew tisraqlek il-​ferħ fis-​servizz taʼ Ġeħova.—Salm 119:165.

²⁰ Ir-​ragħajja tal-​merħla se jinvestigaw il-​kwistjoni. Jekk isir evidenti li l-​persuna tabilħaqq għamlet dnub serju kontrik u ma tkunx niedma u ma tkunx trid tirranġa b’mod raġunevoli u xieraq, jistaʼ jkun hemm bżonn li kumitat taʼ indokraturi jkeċċu lil min ikun għamel il-​ħażin mill-​kongregazzjoni. B’hekk jipproteġu lill-​merħla u jissalvagwardjaw l-​indafa tal-​kongregazzjoni.—Mt. 18:17.

KIF JIĠU TTRATTATI KAŻI T’GĦEMIL ĦAŻIN SERJU

²¹ Xi offiżi serji, bħall-​immoralità sesswali, adulterju, omosesswalità, dagħa, apostasija, idolatrija, u dnubiet kbar simili, jirrikjedu iżjed minn maħfra mingħand xi ħadd li jkun ġie offiż. (1 Kor. 6:9, 10; Gal. 5:19-​21) Peress li jkunu ġew mheddin l-​indafa spiritwali u dik morali tal-​kongregazzjoni, dnubiet serji bħal dawn għandhom jiġu rapportati lill-​anzjani u jieħdu ħsiebhom huma. (1 Kor. 5:6; Ġak. 5:14, 15) Xi individwi jistgħu javviċinaw lill-​anzjani biex jew jistqarru dnubhom stess jew biex jirrapportaw dak li jafu rigward l-​għemil ħażin t’oħrajn. (Lev. 5:1; Ġak. 5:16) Hu x’inhu l-​mod li bih l-​anzjani jisimgħu għall-​ewwel darba rapporti t’għemil ħażin serju min-​naħa taʼ Xhud mgħammed, issir investigazzjoni inizjali minn żewġ anzjani. Jekk jiġi stabbilit li hemm bażi għar-​rapport u li hemm evidenza disponibbli li turi li jkun sar dnub serju, il-​ġemgħa tal-​anzjani tinkariga kumitat ġudizzjarju taʼ mill-​inqas tliet anzjani biex jieħdu ħsieb il-​kwistjoni.

²² L-​anzjani jieħdu ħsieb il-​merħla b’attenzjoni kbira billi jaraw li jipproteġuha minn kwalunkwe ħaġa li tistaʼ tkun taʼ ħsara spiritwalment. Ukoll jagħmlu ħilithom biex jużaw il-​Kelma t’Alla bis-​sengħa biex iwiddbu lil kull min ikun żbalja u jipprovaw jerġgħu jsaħħuh spiritwalment. (Ġuda 21-​23) Dan hu fi qbil mal-​istruzzjonijiet mogħtijin lil Timotju mill-​appostlu Pawlu, li kiteb: “Nordnalek solennement quddiem Alla u Kristu Ġesù, li għandu jiġġudika l-​ħajjin u l-​mejtin, . . . widdeb, ċanfar, ħeġġeġ, bil-​paċenzja kollha u bl-​arti tat-​tagħlim.” (2 Tim. 4:1, 2) Jistaʼ jieħu ħafna ħin biex isir dan, imma dan hu parti mix-​xogħol iebes tal-​anzjani. Il-​kongregazzjoni tapprezza l-​isforzi tagħhom u tqishom “denji t’unur doppju.”—1 Tim. 5:17.

²³ F’kull sitwazzjoni fejn tiġi stabbilita ħtija, l-​indokraturi għandhom jistinkaw primarjament biex jerġgħu jsaħħu spiritwalment lil min ikun għamel il-​ħażen. Jekk juri ndiema ġenwina u jkunu jistgħu jgħinuh, it-​twiddib tagħhom, fil-​privat jew quddiem xhieda li jistaʼ jkun hemm u li jkunu xehdu fil-​każ ġudizzjarju, se jservi biex jiddixxiplina lilu u jnissel biżaʼ bnin f’dawk li jafu bil-​każ. (2 Sam. 12:13; 1 Tim. 5:20) Fil-​każi kollha taʼ twiddib ġudizzjarju, jiġu imposti restrizzjonijiet. B’hekk, min ikun għamel il-​ħażen ikun jistaʼ jiġi megħjun biex ‘jiddritta l-​mogħdijiet għal saqajh’ minn hemm ’il quddiem. (Ebr. 12:13) Maż-​żmien, ir-​restrizzjonijiet jitneħħew hekk kif jidher ċar li l-​individwu jkun irkupra spiritwalment.

AVVIŻ DWAR IT-​TWIDDIB

²⁴ Jekk kumitat ġudizzjarju jiddetermina li individwu hu niedem imma li l-​kwistjoni x’aktarx li se ssir magħrufa fil-​kongregazzjoni jew fil-​komunità jew jekk il-​kongregazzjoni għandha bżonn toqgħod għassa rigward dak li jkun għamel il-​ħażen imma li jkun nidem, isir avviż sempliċi matul il-​Laqgħa tal-​Ħajja u l-​Ministeru Tagħna. L-​avviż għandu jgħid: “[Isem l-​individwu] ġie mwiddeb.”

JEKK ID-​DEĊIŻJONI TKUN QTUGĦ MIS-​SĦUBIJA

²⁵ F’xi każi min ikun għamel il-​ħażen jistaʼ jwebbes rasu fil-​kondotta midinba tiegħu, u b’hekk ma jweġibx għall-​isforzi li jsiru biex jgħinuh. Jistaʼ ma jkunx hemm biżżejjed “għemejjel li jixirqu lill-​indiema” evidenti fiż-​żmien meta jsir is-​smigħ ġudizzjarju. (Atti 26:20) Imbagħad x’jiġri? F’każi bħal dawn, ikun neċessarju li min ikun għamel il-​ħażen u ma jindimx jitkeċċa mill-​kongregazzjoni, u b’hekk jiġi mċaħħad minn sħubija man-​nies nodfa taʼ Ġeħova. L-​influwenza ħażina taʼ min ikun għamel il-​ħażen titneħħa mill-​kongregazzjoni, u b’hekk l-​indafa morali u spiritwali tal-​kongregazzjoni jiġu salvagwardjati u l-​isem tajjeb tagħha jiġi protett. (Dt. 21:20, 21; 22:23, 24) Malli l-​appostlu Pawlu sar jaf bil-​kondotta t’għajb taʼ xi ħadd fil-​kongregazzjoni taʼ Korintu, hu widdeb lill-​anzjani biex ‘jagħtu lil dan il-​bniedem f’idejn Satana . . . , sabiex l-​ispirtu [tal-​kongregazzjoni] jiġi salvat.’ (1 Kor. 5:5, 11-​13) Pawlu rrapporta wkoll il-​qtugħ mis-​sħubija t’oħrajn li kienu rribellaw kontra l-​verità fl-​ewwel seklu.—1 Tim. 1:20.

²⁶ Meta kumitat ġudizzjarju jiddetermina li xi ħadd li għamel il-​ħażen u ma nidimx għandu jiġi maqtugħ mis-​sħubija, għandu jinforma lil dan l-​individwu bid-​deċiżjoni, u jgħidlu ċar ir-​raġuni(jiet) Skritturali għall-​qtugħ mis-​sħubija. Meta l-​kumitat ġudizzjarju jinforma lil min ikun għamel il-​ħażen bid-​deċiżjoni, se jgħidlu wkoll li jekk jemmen li sar żball serju fil-​ġudizzju u jixtieq jappella d-​deċiżjoni, hu għandu jagħmel dan b’ittra u jistqarr ċar ir-​raġunijiet għall-​appell tiegħu. Hu jingħata sebat ijiem biex jagħmel dan, li jibdew jgħoddu minn dakinhar li jsir jaf bid-​deċiżjoni tal-​kumitat. Jekk il-​ġemgħa tal-​anzjani tirċievi appell, se tikkuntattja lill-​indokratur li jżur il-​kongregazzjonijiet, u dan jagħżel anzjani kkwalifikati biex jaqdu f’kumitat tal-​appell biex jerġaʼ jinstemaʼ l-​każ. Se jagħmlu kull sforz biex is-​smigħ tal-​appell isir sa ġimgħa wara li jirċievu l-​ittra. Jekk ikun hemm appell, l-​avviż tal-​qtugħ mis-​sħubija għandu jiġi pospost. Sadanittant, l-​individwu akkużat ma jitħalliex jikkummenta u jitlob fil-​laqgħat jew ikollu privileġġi speċjali taʼ servizz.

²⁷ Appell jingħata bħala qalb tajba lill-​akkużat u jippermettilu smigħ ieħor dwar dak li jkun qed jinkwetah. B’hekk, jekk min ikun għamel il-​ħażen ma jmurx għas-​smigħ tal-​appell apposta, l-​avviż dwar il-​qtugħ mis-​sħubija se jsir wara li jkunu saru sforzi raġunevoli biex jikkuntattjawh.

²⁸ Jekk min ikun għamel il-​ħażen ma jixtieqx jappella, il-​kumitat ġudizzjarju se jispjegalu li jeħtieġ jindem u x’passi jistaʼ jieħu biex jiġi aċċettat lura maż-​żmien. Dan ikun kemm t’għajnuna kif ukoll taʼ qalb tajba u għandu jsir bit-​tama li hu jbiddel triqatu u maż-​żmien jikkwalifika biex jiġi lura fl-​organizzazzjoni taʼ Ġeħova.—2 Kor. 2:6, 7.

AVVIŻ TAʼ QTUGĦ MIS-​SĦUBIJA

²⁹ Meta jkun neċessarju li wieħed li jkun għamel il-​ħażen u ma nidimx jiġi maqtugħ mis-​sħubija tal-​kongregazzjoni, isir avviż qasir li jgħid: “[Isem l-​individwu] m’għadux wieħed mix-​Xhieda taʼ Ġeħova.” L-​avviż se jiġbed l-​attenzjoni taʼ wħud leali fil-​kongregazzjoni biex ma jibqgħux jassoċjaw maʼ dan l-​individwu.—1 Kor. 5:11.

ID-​DIŻASSOĊJAZZJONI

³⁰ Il-​kelma “diżassoċjazzjoni” tapplika għall-​azzjoni meħuda minn individwu li, għalkemm hu Xhud mgħammed, apposta jiċħad il-​waqfa Kristjana tiegħu, billi jistqarr li ma jridx iktar jiġi rikonoxxut, jew magħruf, bħala wieħed mix-​Xhieda taʼ Ġeħova. Jew jistaʼ jiċħad il-​pożizzjoni tiegħu fil-​kongregazzjoni Kristjana bl-​aġir tiegħu, bħal pereżempju, billi jingħaqad maʼ organizzazzjoni sekulari li jkollha miri kuntrarju għal tagħlim Bibliku, u b’hekk ikun qiegħed taħt il-​ġudizzju taʼ Alla Ġeħova.—Is. 2:4; Riv. 19:17-​21.

³¹ Rigward dawk li ċaħdu l-​fidi Kristjana tagħhom fi żmienu, l-​appostlu Ġwanni kiteb: “Huma ħarġu minn fostna, imma ma kinux it-​tip tagħna; għax kieku kienu t-​tip tagħna, kienu jibqgħu magħna.”—1 Ġw. 2:19.

³² Meta wieħed jiddiżassoċja ruħu, is-​sitwazzjoni tiegħu quddiem Ġeħova tkun differenti ferm minn dik taʼ Kristjan inattiv, wieħed li m’għadux jieħu sehem fil-​ministeru tal-​għalqa. Individwu forsi sar inattiv għax naqas li jistudja l-​Kelma t’Alla regolarment. Jew forsi esperjenza problemi persunali jew persekuzzjoni u tilef iż-​żelu biex jaqdi lil Ġeħova. L-​anzjani kif ukoll oħrajn fil-​kongregazzjoni se jkomplu jagħtu għajnuna spiritwali xierqa lil Kristjan inattiv.—Rum. 15:1; 1 Tess. 5:14; Ebr. 12:12.

³³ Għall-​kuntrarju, jekk persuna li tkun Kristjana tagħżel li tiddiżassoċja ruħha, isir avviż qasir biex il-​kongregazzjoni tiġi mgħarrfa, li jgħid: “[Isem l-​individwu] m’għadux wieħed mix-​Xhieda taʼ Ġeħova.” Persuna bħal din titqies l-​istess bħal persuna li tkun ġiet maqtugħa mis-​sħubija.

META XI ĦADD JIĠI AĊĊETTAT LURA

³⁴ Individwu maqtugħ mis-​sħubija jew wieħed li jkun iddiżassoċja ruħu minn mal-​kongregazzjoni jistaʼ jiġi aċċettat lura meta jagħti evidenza ċara taʼ ndiema, u f’perijodu taʼ żmien raġunevoli juri li abbanduna t-​triq midinba li kien qabad. Juri li jixtieq ikollu relazzjoni tajba maʼ Ġeħova. L-​anzjani joqogħdu attenti biex iħallu żmien biżżejjed—ħafna xhur, sena, jew saħansitra iktar, skont iċ-​ċirkustanzi—biex l-​individwu jagħti prova li l-​indiema tiegħu hi ġenwina. Meta l-​ġemgħa tal-​anzjani tirċievi ittra biex wieħed jistaqsi ħalli jiġi aċċettat lura, il-​kumitat tal-​aċċettar lura jitkellem mal-​individwu. Il-​kumitat jevalwa l-​evidenza taʼ “għemejjel li jixirqu lill-​indiema” min-​naħa tal-​individwu u jiddeċiedi jekk għandux jiġi aċċettat lura dak iż-​żmien jew le.—Atti 26:20.

³⁵ Jekk l-​individwu li jitlob li jiġi aċċettat lura kien ġie maqtugħ mis-​sħubija minn kongregazzjoni oħra, kumitat tal-​aċċettar lura lokali se jiltaqaʼ mal-​individwu u jikkunsidra t-​talba. Jekk il-​membri tal-​kumitat tal-​aċċettar lura lokali jemmnu li għandu jiġi aċċettat lura, huma se jgħaddu r-​rakkomandazzjoni tagħhom lill-​ġemgħa tal-​anzjani fil-​kongregazzjoni li kienet ħadet ħsieb il-​kwistjoni qabel. Il-​kumitati involuti se jaħdmu flimkien biex jassiguraw li jinġabru l-​fatti kollha biex tittieħed deċiżjoni ġusta. Madankollu, id-​deċiżjoni biex wieħed jiġi aċċettat lura tittieħed mill-​kumitat tal-​aċċettar lura oriġinali tal-​kongregazzjoni li kienet ħadet ħsieb il-​kwistjoni qabel.

AVVIŻ TAʼ META WIEĦED JIĠI AĊĊETTAT LURA

³⁶ Meta l-​kumitat tal-​aċċettar lura jkun konvint li l-​individwu maqtugħ mis-​sħubija jew diżassoċjat nidem ġenwinament u għandu jiġi aċċettat lura, isir avviż li jkun ġie aċċettat lura fil-​kongregazzjoni li kienet ħadet ħsieb il-​kwistjoni qabel. Jekk l-​individwu issa jinsab f’kongregazzjoni oħra, l-​avviż isir hemmhekk ukoll. L-​avviż għandu jgħid sempliċement: “[Isem l-​individwu] huwa aċċettat lura bħala wieħed mix-​Xhieda taʼ Ġeħova.”

KAŻI LI JINVOLVU MINORENNI MGĦAMMDIN

³⁷ Għemil ħażin serju li jsir minn minorenni mgħammdin għandu jiġi rapportat lill-​anzjani. Meta l-​anzjani jittrattaw każi taʼ dnubiet serji li jinvolvu minorenni, preferibbilment il-​ġenituri mgħammdin taż-​żagħżugħ ikunu preżenti. Huma se jkunu jridu jikkooperaw mal-​kumitat ġudizzjarju, u mhux jipprovaw jipproteġu mid-​dixxiplina neċessarja liż-​żagħżugħ li jkun żbalja. Il-​kumitat ġudizzjarju jagħmel ħiltu biex iwiddeb u jerġaʼ jsaħħaħ spiritwalment lil dak li jkun għamel il-​ħażen, sewwasew bħalma jagħmel fil-​każ taʼ adulti li jidinbu. Madankollu, jekk dan ma jindimx, jiġi maqtugħ mis-​sħubija.

META PUBBLIKATURI MHUX MGĦAMMDIN JAGĦMLU L-​ĦAŻEN

³⁸ X’għandu jsir meta pubblikaturi mhux mgħammdin jinvolvu ruħhom f’għemil ħażin serju? Ladarba mhumiex Xhieda mgħammdin, ma jistgħux jiġu maqtugħin mis-​sħubija. Madankollu, forsi ma jifhmux bis-​sħiħ il-​livelli tal-​Bibbja, u parir b’qalb tajba jistaʼ jgħinhom ‘jiddrittaw il-​mogħdijiet’ għal saqajhom.—Ebr. 12:13.

³⁹ Jekk xi ħadd li ma jkunx mgħammed jagħmel il-​ħażen u ma jindimx wara li żewġ anzjani jkunu ltaqgħu miegħu u jkunu pprovaw jgħinuh, ikun hemm bżonn li l-​kongregazzjoni tiġi informata. Isir avviż qasir li jgħid: “[Isem l-​individwu] m’għadux rikonoxxut bħala pubblikatur mhux mgħammed.” Il-​kongregazzjoni mbagħad tqis lil dak li jkun bħala persuna tad-​dinja. Għalkemm il-​midneb ma jkunx maqtugħ mis-​sħubija, il-​Kristjani joqogħdu attenti rigward sħubija miegħu. (1 Kor. 15:33) Ebda rapport tas-​servizz tal-​għalqa ma jiġi aċċettat mingħandu.

⁴⁰ Maż-​żmien, individwu mhux mgħammed li tneħħa minn pubblikatur forsi jkun jixtieq jerġaʼ jsir pubblikatur. F’sitwazzjoni bħal din, żewġ anzjani jiltaqgħu miegħu u jaraw fejn ikun fil-​progress spiritwali. Jekk jikkwalifika, isir avviż qasir li jgħid: “[Isem l-​individwu] reġaʼ huwa rikonoxxut bħala pubblikatur mhux mgħammed.”

ĠEĦOVA JBIEREK IL-​QIMA PAĊIFIKA U NADIFA

⁴¹ Kull min hu msieħeb mal-​kongregazzjoni taʼ Alla llum jistaʼ jithenna bl-​affarijiet spiritwali għonja li Ġeħova ta lill-​poplu tiegħu. Il-​mergħat spiritwali tagħna huma tabilħaqq abbundanti, u għandna abbundanza taʼ ilmijiet taʼ verità rifreskanti. Għandna wkoll il-​ħarsien protettiv taʼ Ġeħova permezz tal-​arranġament teokratiku tiegħu taħt l-​istat taʼ kap taʼ Kristu. (Salm 23; Is. 32:1, 2) Il-​fatt li qegħdin fil-​ġenna spiritwali f’dawn l-​aħħar jiem mimlijin inkwiet tana sens taʼ sigurtà.

⁴² Billi nżommu l-​paċi u l-​indafa tal-​kongregazzjoni, aħna nkomplu nħallu d-​dawl tagħna tal-​verità tas-​Saltna jiddi. (Mt. 5:16; Ġak. 3:18) Bil-​barka t’Alla, se jkollna l-​ferħ li naraw lil ħafna iktar nies isiru jafu lil Ġeħova u jaqdu magħna f’li nagħmlu r-​rieda tiegħu.