Ittra mingħand il-Ġemgħa li Tiggverna

Għeżież pubblikaturi sħabna tal-​aħbar tajba:

Xi privileġġ mill-​isbaħ għandna li aħna magħqudin fil-​qima taʼ Ġeħova, l-​uniku Alla veru! Aħna “ħaddiema sħab” miegħu, fdati bix-​xogħol sagru u li jsalva l-​ħajjiet tal-​ippritkar u tat-​tagħlim tal-​aħbar tajba tas-​Saltna stabbilita tiegħu. (1 Kor. 3:9; Mt. 28:19, 20) Biex inwettqu dan ix-​xogħol madwar id-​dinja fil-​paċi u l-​unità, hemm bżonn li nkunu organizzati tajjeb.—1 Kor. 14:40.

Dan il-​ktieb se jgħinek tifhem kif taħdem il-​kongregazzjoni Kristjana llum. Jiddiskuti l-​privileġġi u r-​responsabbiltajiet li għandek bħala wieħed mix-​Xhieda taʼ Ġeħova. Jekk tapprezza l-​privileġġi tiegħek u twettaq ir-​responsabbiltajiet tiegħek, int se ‘tissoda fil-​fidi.’—Atti 16:4, 5; Gal. 6:5.

Għalhekk, ninkuraġġuk tistudja dan il-​ktieb bir-​reqqa. Sib modi kif tistaʼ tapplika l-​informazzjoni f’ħajtek. Pereżempju, jekk reċentement sirt pubblikatur mhux mgħammed, x’passi għandek tieħu biex titgħammed bħala wieħed mix-​Xhieda taʼ Ġeħova? Mill-​banda l-​oħra, jekk int mgħammed, x’tistaʼ tagħmel biex tikber spiritwalment u tespandi s-​servizz tiegħek lil Ġeħova? (1 Tim. 4:15) Kif tistaʼ żżid mal-​paċi tal-​kongregazzjoni? (2 Kor. 13:11) Fittex it-​tweġibiet għal dawn il-​mistoqsijiet f’dan il-​ktieb.

Jekk int ħu mgħammed, x’tistaʼ tagħmel biex tikkwalifika biex taqdi bħala qaddej ministerjali u iktar tard bħala anzjan? Hekk kif eluf ġodda jkomplu jingħaqdu mal-​organizzazzjoni t’Alla, hemm bżonn urġenti taʼ aħwa rġiel kwalifikati biex jieħdu t-​tmexxija. Dan il-​ktieb se jgħinek tara x’inhu involut f’li ‘tirsisti’ għal dawn il-​miri spiritwali.—1 Tim. 3:1.

Bil-​ħeġġa nitolbu li dan il-​ktieb se jgħinek tara l-​post tiegħek fl-​arranġament taʼ Ġeħova u li tgħożżu. Inħobbukom ħafna kollha kemm intom u nkomplu nitolbu li tkunu fost dawk li se jifirħu għal dejjem f’li jqimu lil Missierna tas-​sema, Ġeħova.—Salm 37:10, 11; Is. 65:21-​25.