Kif Tħares Int Lejn il-Għaxar Kmandamenti?
IN-NIES iħarsu lejn il-Għaxar Kmandamenti tal-Bibbja b’diversi modi. Is-Seventh-Day Adventists igħidu li l-Għaxar Kmandamenti jorbtu lin-nies kollha. Il-Luterani jqisuhom bħala “l-aqwa sett taʼ regoli li qatt ingħataw li fuqhom individwu jistaʼ jfassal ħajtu.” “Jekk tifhimhom sewwa,” jispjega wieħed kelliemi Kattoliku, “l-Għaxar Kmandamenti għadhom jipprovdu bażi għal għixien Kristjan.”
B’hekk, waqt li xi gruppi reliġjużi jemmnu li għandna nobdu l-Għaxar Kmandamenti għalkollox, oħrajn iqisuhom sempliċement bħala gwida għal imġieba morali tajba. Tabilħaqq, skond l-Encyclopoedia of Religion and Ethics, “ma hemm probabbli ebda dokument uman li eżerċita influwenza akbar fuq il-ħajja reliġjuża u morali mid-Dekalogu [l-Għaxar Kmandamenti].” Dan għala hu l-każ? Qis l-ewwelnett x’igħidu l-Għaxar Kmandamenti nfushom. Huma qosra, jiġbru ħafna fihom, u huma qawwija. X’ifissru għalik?
[Kaxxa f’paġna 3]
IL-GĦAXAR KMANDAMENTI
1. Ma trid ikollok ebda allat oħra kontra wiċċi.
2. Ma tridx tagħmel għalik innifsek xbieha minquxa jew xi forma bħal xi ħaġa li qiegħda fis-smewwiet fuq jew li qiegħda fuq l-art taħt jew li qiegħda fl-ilmijiet taħt l-art. Ma tridx tmil lejhom lanqas tiġi mħajjar taqdihom . . .
3. Ma tridx issemmi l-isem taʼ Jehovah Alla tiegħek b’mod bla ġieh. . .
4. Billi tiftakar jum is-sibt biex tqaddsu, trid tagħti servizz u trid tagħmel ix-xogħol kollu tiegħek sitt ijiem.... Ma trid tagħmel ebda xogħol, la int lanqas ibnek jew bintek, l-irsir tiegħek jew l-irsira tiegħek jew l-annimal domestiku tiegħek jew ir-resident barrani tiegħek li hu ġewwa x-xatbiet tiegħek . . .
5. Onora lil missierek u lil ommok . . .
6. Ma tridx toqtol.
7. Ma tridx tikkommetti adulterju.
8. Ma tridx tisraq.
9. Ma tridx tixhed fil-falz bħala xhud kontra sieħbek.
10. Ma tridx tixtieq id-dar taʼ sieħbek. Ma tridx tixtieq il-mara taʼ sieħbek, lanqas l-irsir tiegħu jew l-irsira tiegħu jew il-gendus tiegħu jew il-ħmar tiegħu jew kull ħaġa li hi taʼ sieħbek.—Eżodu 20:3-17.