It-Tjubija t’Alla Tattirak?
GĦANDEK int xi ħabib intimu? Jekk inhu hekk, qatt irriflettejt dwar x’ġibdek lejn dik il-persuna? Forsi d-dehra tiegħu (jew tagħha)? Forsi kien il-fatt li intom interessati fl-istess affarijiet? Jew forsi kienu kwalitajiet iktar profondi, bħall-qalb tajba u l-għerf? Jekk il-kwalità li għaqqdet il-ħbiberija tagħkom kienet it-tjieba, allura għandek relazzjoni bnina tabilħaqq. It-tjieba ġenwina rari ssibha llum meta, fil-biċċa l-kbira, in-nies huma “mingħajr imħabba għat-tjieba.”—2 Timotew 3:3.
Għal wieħed Kristjan, l-iktar relazzjoni importanti fil-ħajja ma hix maʼ xi bniedem ieħor iżda m’Alla. Mela meta taħseb dwar din ir-relazzjoni, qatt ikkunsidrajt: ‘Liema mill-kwalitàjiet t’Alla jiġbduni l-iktar lejn Alla?’
L-Attributi Ewlenin t’Alla
Fil-fatt, il-Bibbja tiddeskrivi ħafna kwalitajiet t’Alla li jispikkaw. Ġeneralment l-erbgħa li jissemmew l-iktar huma l-imħabba tiegħu, il-ġustizzja tiegħu, il-għerf tiegħu, u l-qawwa tiegħu li jistaʼ kollox. (Dewteronomju 32:4; Ġob 12:13; Salm 147:5; 1 Ġwann 4:8) Kieku kellna nagħżlu bejn dawn l-erbaʼ kwalitajiet, forsi konna ngħidu li l-imħabba t’Alla ġibditna l-iktar lejh. Imsieħba mill-qrib mal-imħabba tiegħu, madankollu, hemm it-tjubija li jisboq fiha. Il-kittieba tal-Bibbja kitbu b’mod elokwenti dwar din il-ħaġa, u tjubija bħal din tħajjar lill-bnedmin ikollhom relazzjoni b’saħħitha u taʼ ferħ mal-Ħallieq tagħhom.
Per eżempju, tard fis-sitt seklu Q.E.K., il-profeta Żakkarija qal bi stagħġib dwar Jehovah: “Kemm hi kbira t-tjubija tiegħu, u kemm hi kbira s-sbuħija tiegħu!” (Żakkarija 9:17) Bosta snin qabel Żakkarija, Isaija b’mod simili faħħar lil Alla meta kiteb: “Il-qalb tajba bl-imħabba taʼ Jehovah jien se nsemmi, . . . saħansitra t-tjubija abbundanti għad-dar taʼ Iżrael li hu għamel għalihom.”−Isaija 63:7.
Tliet sekli qabel, is-Sultan David kien kiteb b’mod li jqanqal dwar it-tjubija t’Alla. David kiteb mill-esperjenza, billi kien gawda din it-tjubija matul ħajtu kollha. Alla kien tajjeb ferm maʼ David, speċjalment wara d-dnub serju ferm tiegħu f’konnessjoni maʼ Batxeba u żewġha Urija, meta Alla wera ħniena lejh. (2 Samwel 12:9, 13) F’Salm 31:19, David jiddikjara b’apprezzament: “Kemm hi abbundanti t-tjubija tiegħek, li int ħżint bħal teżor għal dawk li jibżgħu minnek!”
Tapprezzaha int it-tjubija t’Alla daqs kemm kienu japprezzawha dawk l-adoraturi tal-qedem? Jekk inhu hekk, int se ġġarrab il-vera “paċi t’Alla li tisboq kull ħsieb,” waqt li tkun ukoll imqanqal biex tagħmel ir-rieda tiegħu l-ħin kollu. (Filippin 4:7) Dan żgur li se jkabbar l-apprezzament tagħna lejn Missierna maħbub tas-sema.