Ir-​Rwol tal-​Awtoritajiet Superjuri

“Hija l-​ministru t’Alla għalik għall-​ġid tiegħek. Imma jekk int qed tagħmel dak li hu ħażin, kun fil-​biżaʼ.”—RUMANI 13:4.

1, 2. Ħafna fil-​Kristjaneżmu kif saru nvoluti f’attivitajiet revoluzzjonarji?

SENTEJN ilu laqgħa taʼ isqfijiet f’Londra qanqlet editorjal taʼ tkażar fin-​New York Post. Il-​laqgħa kienet il-​Lambeth Conference, li attendew għaliha iktar minn 500 isqof tal-​komunità Anglikana. It-​tkażar ġie mqanqal minn reżoluzzjoni mgħoddija mill-​konferenza li tesprimi simpatija maʼ nies “li, wara li jippruvaw kull mezz ieħor, jagħżlu t-​triq taʼ taqbid armat bħala l-​unika triq għall-​ġustizzja.”

² Il-​Post qalet li dan kien, fil-​fatt, approvazzjoni għal terroriżmu. Madankollu, l-​isqfijiet kienu sempliċement qed isegwu tendenza li qed tikber. L-​attitudni tagħhom ma kienet xejn differenti minn dik tal-​qassis Kattoliku fil-​Ghana li rrikkmanda ġlied tal-​gwerilli bħala l-​iktar mod ħafif, ċert, u żgur biex tinħeles l-​Afrika; jew tal-​isqof Metodista Afrikan li ħalef li jmexxi “l-​gwerra taʼ liberazzjoni sat-​tmiem assolut”; jew tal-​ħafna missjunarji tal-​Kristjaneżmu li ġġieldu maʼ ribelli kontra gvernijiet stabbiliti fl-​Asja u fl-​Amerka t’isfel.

Kristjani Veri Ma ‘Jopponux l-​Awtoritajiet’

3, 4. (a) Liema prinċipji qed jinkisru minn hekk imsejħa Kristjani li javvanzaw ir-​revoluzzjoni? (b) Wieħed raġel xi skopra dwar ix-​Xhieda taʼ Jehovah?

³ Fl-​ewwel seklu, Ġesù qal dwar is-​segwaċi tiegħu: “Ma huma ebda parti mid-​dinja, sewwa sew bħalma jien ma jien ebda parti mid-​dinja.” (Ġwann 17:14) Kwalunkwe hekk imsejjaħ Kristjan li javvanza revoluzzjoni huwa bil-​wisq parti mid-​dinja. Mhux qed isegwi lil Ġesù; lanqas m’hu ‘sottomess lejn l-​awtoritajiet superjuri.’ (Rumani 13:1) Hu jagħmel tajjeb li jagħti kas tat-​twissija tal-​appostlu Pawlu li “dak li jopponi l-​awtorità ħa waqfa kontra l-​arranġament t’Alla; dawk li ħadu waqfa kontra tagħha se jirċievu l-​ġudizzju għalihom infushom.”—Rumani 13:2.

⁴ F’kuntrast maʼ ħafna mill-​Kristjaneżmu, ix-​Xhieda taʼ Jehovah ma għandhom xejn x’jaqsmu maʼ vjolenza armata. Raġel fl-​Ewropa skopra dan. Hu jikteb: “Meta rajt x’kienu pproduċew ir-​reliġjon u l-​politika, jiena sirt iddedikat biex inwaqqaʼ l-​ordni soċjali stabbilita. Ingħaqadt maʼ grupp taʼ terroristi u rċevejt taħrig fl-​immaniġġjar taʼ kull tip taʼ arma; jien ħadt sehem f’ħafna serqiet armati. Hajti kienet kontinwament fil-​periklu. Hekk kif beda għaddej iż-​żmien, sar evidenti li konna qed niġġieldu battalja mitlufa. Kont raġel irrabbjat, mirbuħ minn disperazzjoni sħhiħa fil-​ħajja. Imbagħad Xhud ħabbtitli l-​bieb. Hi qaltli dwar is-​Saltna t’Alla. Billi nsistejt li dan kien ħela taʼ ħin, jien issuġġerejt li marti toqgħod tismaʼ. Hekk għamlet, u bdew studju tal-​Bibbja. Fl-​aħħar, jien aċċettajt li nattendi għall-​istudju. M’hemmx kliem biex infisser is-​serħan li ħassejt meta fhimt dwar il-​forza li qed timbotta lill-​umanità lejn il-​ħażen. Il-​wegħda meraviljuża tas-​Saltna tatni tama taʼ appoġġ u għan fil-​ħajja.”

5. Il-​Kristjani għala jibqgħu fil-​paċi sottomessi lejn l-​awtoritajiet superjuri, u dan sakemm se jkun il-​każ?

⁵ Il-​Kristjani huma ambaxxaturi jew mibgħutin speċjali t’Alla u taʼ Kristu. (Isaija 61:1, 2; 2 Korintin 5:20; Efesin 6:19, 20) Bħala talin, huma jżommu newtrali fil-​konflitti taʼ din id-​dinja. Avolja xi sistemi politiċi jidhru li huma ekonomikament iżjed taʼ suċċess minn oħrajn, u biċċa minnhom jagħtu iżjed libertà minn oħrajn, il-​Kristjani ma javvanzawx jew igħollu xi sistema fuq oħra. Huma jafu li s-​sistemi kollha huma imperfetti. Huwa “l-​arranġament t’Alla” li dawn jibqgħu jeżistu sakemm is-​Saltna tiegħu tieħu l-​poter. (Danjel 2:44) B’hekk, il-​Kristjani jibqgħu fil-​paċi sottomessi lejn l-​awtoritajiet superjuri fil-​waqt li javvanzaw il-​ġid etern taʼ oħrajn billi jippridkaw l-​aħbar tajba tas-​Saltna.—Mattew 24:14; 1 Pietru 3:11, 12.

Nobdu l-​Liġi

6. Ħafna liġijiet umani għala huma tajbin avolja “d-​dinja kollha qiegħda taħt il-​qawwa tal-​wieħed mill-​agħar”?

⁶ Gvernijiet nazzjonali jagħmlu sistemi taʼ liġijiet, u l-​biċċa l-​kbira minn dawn il-​liġijiet huma tajbin. Għandu dan jissorprendina, minħabba l-​fatt li “d-​dinja kollha qiegħda taħt il-​qawwa tal-​wieħed mill-​agħar”? (1 Ġwann 5:19) Le. Jehovah ta lill-​missier oriġinali tagħna, Adam, kuxjenza, u dan is-​sens ereditarju taʼ tajjeb u ħażin hu rifless b’ħafna modi fil-​liġijiet umani. (Rumani 2:13-16) Ħammurabi, legiżlatur Babilonjan tal-​qedem, fil-​prefazju tal-​kodiċi tal-​liġi tiegħu kiteb hekk: “F’dak iż-​żmien [huma] innominawni biex navvanza l-​ġid tal-​poplu, lili, Ħammurabi, il-​prinċep devot u li jibżaʼ minn Alla, biex nikkaġuna l-​ġustizzja biex isseħħ fl-​art, biex neqred lill-​ħżiena u lil nies mill-​agħar, biex il-​qawwijin ma jaħqrux lid-​dgħajfin.”

7. Jekk xi ħadd jikser il-​liġi, min għandu d-​dritt jikkastigah, u għala?

⁷ Il-​biċċa l-​kbira tal-​gvernijiet igħidulek li l-​għan tal-​liġijiet tagħhom hu simili: biex javvanzaw il-​gid taċ-​ċittadini u l-​bonordni fis-​soċjetà. B’hekk, huma jippenalizzaw atti kontra s-​soċjetà, bħal qtil u serq, u jagħmlu regolamenti bħal limiti fuq sewqan u liġijiet dwar ipparkjar. Dawk kollha li jiksru apposta l-​liġijiet tagħhom jieħdu waqfa kontra l-​awtorità u “se jirċievu l-​ġudizzju għalihom infushom.” Ġudizzju mingħand min? Mhux neċessarjament mingħand Alla. Il-​kelma Griega hawn tradotta ġudizzju tistaʼ tirreferi għal proċeduri ċivili minflok ġudizzji minn Jehovah. (Qabbel 1 Korintin 6:7.) Jekk xi ħadd jaġixxi kontra l-​liġi, l-​awtorità superjuri għandha d-​dritt li tikkastigah.

8. Il-​kongregazzjoni kif twieġeb jekk membru jikkommetti att kriminali serju?

⁸ Ix-​Xhieda taʼ Jehovah għandhom reputazzjoni tajba għax ma jopponux awtoritajiet umani. Jekk jiġri li xi individwu fil-​kongregazzjoni jikser il-​liġi, il-​kongregazzjoni ma tgħinux biex jiskansa l-​kastig skond il-​liġi. Jekk xi ħadd jisraq, joqtol, jimmalafama, iqarraq fit-​taxxi tiegħu, jattakka sesswalment, jimbrolja, juża drogi illegalment, jew b’xi mod ieħor jopponi awtorità legali, hu se jiffaċċja dixxiplina ħarxa mill-​kongregazzjoni—u m’għandux iħossu ppersegwitat meta jiġi kkastigat mill-​awtorità sekulari.—1 Korintin 5:12, 13; 1 Pietru 2:13-17, 20.

Oġġett taʼ Biżaʼ

9. Fejn jistgħu b’mod xieraq jirrikorru l-​Kristjani jekk jiġu mheddin minn elementi bla liġi?

⁹ Pawlu jissokta d-​diskussjoni tiegħu dwar l-​awtoritajiet superjuri, billi jgħid: “Għax dawk li jaħkmu huma oġġett taʼ biżaʼ, mhux għall-​egħmil tajjeb, imma għall-​ħażin. Trid int, mela, li ma jkollok ebda biżaʼ mill-​awtorità? Ibqaʼ agħmel it-​tajjeb, u int se jkollok tifħir mingħandha.” (Rumani 13:3) M’humiex il-​Kristjani leali li għandhom jibżgħu mill-​kastig tal-​awtorità imma dawk li jagħmlu l-​ħażin, dawk li jikkommettu ‘egħmejjel ħżiena,’ atti kriminali. Meta jiġu mhedda minn dawn l-​elementi bla liġi, ix-​Xhieda taʼ Jehovah jistgħu b’mod xieraq jaċċettaw mill-​awtorità protezzjoni tal-​pulizija jew tal-​militar.—Atti 23:12-22.

10. Ix-​Xhieda taʼ Jehovah kif ‘irċevew tifħir’ mill-​awtorità?

¹⁰ Lill-​Kristjan li jħares il-​liġi tal-​awtorità superjuri, Pawlu jgħid: “Int se jkollok tifħir min-​għandha.” Bħala eżempju taʼ dan, ikkunsidra xi ittri li rċevew ix-​Xhieda taʼ Jehovah fil-​Brażil wara l-​konvenzjoni distrettwali tagħhom. Mingħand il-​kanċillier taʼ dipartiment muniċipali tal-​isports: “L-​ogħla tifħir hu mistħoqq għall-​kondotta taʼ paċi tagħkom. Hu taʼ faraġ fid-​dinja kollha nkwiet tal-​lum li tkun taf li tant nies għadhom jemmnu u jqimu lil Alla.” Mingħand id-​direttur taʼ stadju muniċipali: “Minkejja l-​għadd kbir ħafna li attendew, l-​ebda inċident ma ġie rrapportat biex ikerrah il-​ġrajja, ħajr għall-​organizzazzjoni impekkabbli.” Minn uffiċċju taʼ sindku: “Irridu nieħdu din l-​opportunità biex nifirħulkom taʼ kemm intom taʼ ordni u taʼ dixxiplina meraviljuża u spontanja, u nixtiqulkom kull suċċess għal avvenimenti futuri.”

11. L-​ippridkar tal-​aħbar tajba għala bl-​ebda mod ma jistaʼ jintqal li hu egħmil ħażin?

¹¹ It-​terminu “egħmil tajjeb” jirreferi għal atti b’ubbidjenza għal-​liġijiet tal-​awtoritajiet superjuri. Flimkien maʼ dan, ix-​xogħol tagħna taʼ ppridkar, li hu kkmandat minn Alla, mhux mill-​bniedem, mhux egħmil ħażin—punt li l-​awtoritajiet politiċi għandhom jagħrfu. Huwa servizz pubbliku li jgħolli l-​kalibru morali taʼ dawk li jwieġbu għalih. Għalhekk, hija t-​tama tagħna li l-​awtoritajiet superjuri jipproteġu d-​dritt tagħna li nippridkaw lill-​oħrajn. Pawlu appella lill-​awtoritajiet sabiex jistabbilixxu legalment l-​ippridkar tal-​aħbar tajba. (Atti 16:35-40; 25:8-12; Filippin 1:7) Dan l-​aħħar, ix-​Xhieda taʼ Jehovah b’mod simili fittxew u qalgħu għarfien legali tax-​xogħol tagħhom fil-​Ġermanja tal-​Lvant, fl-​Ungerija, fil-​Polonja, fir-​Rumanija, f’Benin, u f’Myanmar (Burma).

“Hija l-​Ministru t’Alla”

12-14. L-​awtoritajiet superjuri kif aġixxew bħala ministru t’Alla (a) fi żminijiet Bibliċi? (b) fi żminijiet moderni?

¹² Meta jitkellem dwar l-​awtorità sekulari, Pawlu jissokta jgħid: “Hija l-​ministru t’Alla għalik għall-​ġid tiegħek. Imma jekk int qed tagħmel dak li hu ħażin, kun fil-​biżaʼ: għax mhux għalxejn li ġġorr is-​sejf; għax hi l-​ministru t’Alla, wieħed li jpattiha biex jesprimi l-​għadab fuq dak li jipprattika dak li hu ħażin.”—Rumani 13:4.

¹³ Awtoritajiet nazzjonali xi drabi qdew bħala l-​ministru t’Alla f’modi speċifiċi. Ċiru għamel dan meta sejjaħ lil-​Lhud biex jirritornaw minn Babilonja u jibnu mill-​ġdid id-​dar t’Alla. (Eżra 1:1-4; Isaija 44:28) Artaxerxes kien il-​ministru t’Alla meta bagħat lil Eżra b’kontribuzzjoni għall-​bini mill-​ġdid taʼ dik id-​dar u iktar tard meta hu inkariga lil Neħemija biex jibni mill-​ġdid il-​ħitan taʼ Ġerusalemm. (Eżra 7:11-26; 8:25-30; Neħemija 2:1-8) L-​awtorità superjuri taʼ Ruma qdiet b’dan il-​mod meta ħelset lil Pawlu mill-​folla f’Ġerusalemm, ipproteġietu matul in-​nawfraġju, u rranġatlu biex ikollu daru stess f’Ruma.—Atti 21:31, 32; 28:7-10, 30, 31.

¹⁴ B’mod simili, awtoritajiet sekulari qdew bħala l-​ministru t’Alla fi żminijiet moderni. Fl-​1959, per eżempju, il-​Qorti Suprema tal-​Kanada ddeċidiet li wieħed mix-​Xhieda taʼ Jehovah akkużat fi Quebec li ppubblika artikli sedizzjużi u taʼ malafama ma kienx ħati—billi b’hekk marret kontra l-​preġudizzju tal-​prim ministru taʼ Quebec taʼ dak iż-​żmien, Maurice Duplessis.

15. B’liema mod ġenerali l-​awtoritajiet jaġixxu bħala l-​ministru t’Alla, u xi dritt jagħtihom dan?

¹⁵ Jerġaʼ, b’mod ġenerali, il-​gvernijiet nazzjonali jaqdu bħala l-​ministru t’Alla billi jżommu l-​ordni pubblika sakemm is-​Saltna t’Alla tieħu f’idejha dik ir-​responsabbiltà. Skond Pawlu, għal dan il-​għan l-​awtorità “ġġorr is-​sejf,” li jissimbolizza d-​dritt tagħha biex tagħti l-​kastig. Normalment, dan jinvolvi tfigħ il-​ħabs jew multi. F’xi pajjiżi tistaʼ tinkludi wkoll il-​piena tal-​mewt.a Mill-​banda l-​oħra, ħafna ġnus għażlu li ma jkollhomx il-​piena tal-​mewt, u dak ukoll hu d-​dritt tagħhom.

16. (a) Ladarba l-​awtorità hi l-​ministru t’Alla, xi wħud mill-​qaddejja t’Alla x’qisuha ħaġa xierqa li jagħmlu? (b) Liema xorta taʼ mpjieg ma jaċċettax wieħed Kristjan, u għala le?

¹⁶ Il-​fatt li l-​awtoritajiet superjuri huma l-​ministru t’Alla jispjega għala Danjel, it-​tliet Ebrej, Neħemija, u Mordekaj setgħu jaċċettaw pożizzjonijiet taʼ responsabbiltà fil-​gvernijiet taʼ Babilonja u l-​Persja. Huma b’hekk setgħu jappellaw lill-​awtorità tal-​Istat għall-​ġid tal-​poplu t’Alla. (Neħemija 1:11; Ester 10:3; Danjel 2:48, 49; 6:1, 2) Illum xi Kristjani wkoll jaħdmu fis-​servizz mal-​gvern. Imma ladarba huma separati mid-​dinja, huma ma jingħaqdux maʼ partiti politiċi, ma jfittxux karigi politiċi, jew jaċċettaw pożizzjonijiet taʼ responsabbiltà għal deċiżjoni f’organizzazzjonijiet politiċi.

Il-​Ħtieġa għal Fidi

17. Liema sitwazzjonijiet jistgħu jqanqlu lil xi wħud li m’humiex Kristjani biex jirreżistu lill-​awtorità?

¹⁷ Xi ngħidu, iżda, jekk l-​awtorità tippermetti l-​korruzzjoni jew saħansitra l-​oppressjoni? Għandhom il-​Kristjani jippruvaw ibiddlu l-​awtorità maʼ waħda li tidher aħjar? Ara, inġustizzja u korruzzjoni fil-​gvern m’humiex xi ħaġa ġdida. Fl-​ewwel seklu, l-​Imperu Ruman ippermetta inġustizzji bħalma hu l-​iskjavitù. Kien jittollera wkoll uffiċjali korrotti. Il-​Bibbja titkellem dwar kolletturi tat-​taxxa li kienu jqarrqu, dwar imħallef mingħajr tjieba, u gvernatur provinċjali li fittex li jinxtara.—Luqa 3:12, 13; 18:2-5; Atti 24:26, 27.

18, 19. (a) Il-​Kristjani kif jirreaġixxu jekk isiru abbużi jew korruzzjoni min-​naħa taʼ uffiċjali tal-​gvern? (b) Il-​Kristjani kif tejbu l-​ħajjiet taʼ individwi, kif indikat minn wieħed kittieb tal-​istorja u mill-​kaxxa t’hawn taħt?

¹⁸ Il-​Kristjani setgħu ppruvaw iġibu tmiem għal dawn l-​abbużi lura f’dak iż-​żmien, imma m’għamlux dan. Per eżempju, Pawlu ma ppridkax tmiem għall-​iskjavitù, u ma qalx lill-​Kristjani li kellhom l-​irsiera biex jeħilsu lill-​irsiera tagħhom. Minflok hu wissa lill-​irsiera u lis-​sidien tal-​irsiera biex juru mogħdrija Kristjana meta jittrattaw maʼ xulxin. (1 Korintin 7:20-24; Efesin 6:1-9; Filemon 10-16; ara wkoll 1 Pietru 2:18.) B’mod simili il-​Kristjani ma ġewx involuti f’attività revoluzzjonarja. Huma kellhom wisq x’jagħmlu fix-​xogħol tal-​ippridkar tal-​“aħbar tajba tal-​paċi.” (Atti 10:36) Fis-​sena 66 E.K., armata Rumana assedjat lil Ġerusalemm u mbagħad irtirat. Minflok ma baqgħu mar-​ribelli li ddefendew il-​belt, Kristjani Ebrej ‘ħarbu lejn il-​muntanji’ b’ubbidjenza lejn id-​direzzjoni taʼ Ġesù.—Luqa 21:20, 21.

¹⁹ Il-​Kristjani tal-​bidu għexu bl-​affarijiet kif kienu u ppruvaw itejbu l-​ħajjiet taʼ individwi billi jgħinuhom isegwu prinċipji tal-​Bibbja. Il-​kittieb tal-​istorja John Lord, fil-​ktieb tiegħu The Old Roman World, kiteb: “Il-​veri trijonfi tal-​Kristjanità kienu jidhru f’li tagħmel nies tajbin min dawk li jipprofessaw id-​duttrini tagħha, minflok tbiddel minn barra istituzzjonijiet popolari, jew gvernijiet, jew liġijiet.” Għandhom il-​Kristjani llum jaġixxu b’mod differenti?

Meta L-​Istat Ma Jagħtix Għajnuna

20, 21. (a) Awtorità sekulari kif naqset li taġixxi bħala l-​ministru t’Alla għall-​gid? (b) Ix-​Xhieda taʼ Jehovah kif jirreaġixxu meta jiġu ppersegwitati bl-​appoġġ tal-​Istat?

²⁰ F’Settembru 1972, persekuzzjoni feroċi faqqgħet kontra x-​Xhieda taʼ Jehovah f’pajjiż fl-​Afrika ċentrali. Eluf ġew misruqa minn kulma kellhom u ġew suġġetti għal ħruxijiet oħra, inklużi swat, torturi, u qtil. Wettqet l-​awtorità superjuri d-​dmir tagħha biex tipproteġi lix-​Xhieda? Le! Minflok, hija nkuraġġiet il-​vjolenza, billi ġiegħlet lil dawn il-​Kristjani ġwejdin biex jaħarbu f’pajjiżi ġirien għall-​ħarsien taʼ ħajjithom.

²¹ M’għandhomx ix-​Xhieda taʼ Jehovah iqumu b’rabja kontra tormentaturi bħal dawn? Le. Il-​Kristjani għandhom bis-​sabar jissaporti dan it-​tkasbir, billi jaġixxu bl-​umiltà f’imitazzjoni għal Ġesù: “Meta kien qed ibati, ma marx ihedded, imma baqaʼ jikkommetti ruħu lil dak li jiġġudika bit-​tjieba.” (1 Pietru 2:23) Huma jiftakru li meta Ġesù ġie arrestat fil-​ġnien tal-​Ġetsemani, hu ċanfar lid-​dixxiplu li ġie biex jiddefendih b’sejf, u iktar tard qal lil Ponzju Pilatu: “Is-​saltna tiegħi ma hi ebda parti minn did-dinja. Kieku s-​saltna tiegħi kienet parti minn did-dinja, il-​qaddejja tiegħi kienu jiġġieldu biex ma ningħatax f’idejn il-​Lhud. Imma, kif inhi, is-​saltna tiegħi mhix minn dan is-​sors.”—Ġwann 18:36; Mattew 26:52; Luqa 22:50, 51.

22. X’eżempju mill-​aħjar taw xi Xhieda fl-​Afrika meta batew persekuzzjoni ħarxa?

²² Bl-​eżempju taʼ Ġesù f’moħħhom, dawk ix-​Xhieda Afrikani kellhom il-​kuraġġ li jsegwu l-​parir taʼ Pawlu: “Troddu ħażen għal ħażen lil ħadd. Ipprovdu affarijiet mill-​aħjar quddiem il-​bnedmin kollha. Jekk inhu possibbli, sakemm jiddependi minnkom, żommu l-​paċi mal-​bnedmin kollha. Tivvendikawx erwieħkom, maħbubin, imma ċedu għall-​korla; għax hu miktub: ‘Tiegħi hi l-​vendetta; jien se nħallas lura, jgħid Jehovah.’” (Rumani 12:17-19; qabbel Ebrej 10:32-34.) X’eżempju stimulanti jagħtu ħutna l-​Afrikani lilna lkoll illum! Saħansitra meta l-​awtorità tirrifjuta li taġixxi b’mod onorabbli, Kristjani veri ma jabbandunawx prinċipji tal-​Bibbja.

23. X’mistoqsijiet jibqaʼ biex jiġu diskussi?

²³ Iżda, x’jistgħu jistennew l-​awtoritajiet superjuri mill-​Kristjani? U hemm xi limiti għall-​ordnijiet li bi dritt jistgħu jagħmlu? Dan se jiġi diskuss fl-​artiklu li jmiss.

[Nota taʼ taħt]

Tistaʼ Tispjega?

◻ Liema huma xi modi fejn individwu jistaʼ ‘jieħu waqfa kontra’ l-​awtoritajiet superjuri?

◻ X’inhu “l-​arranġament t’Alla” rigward l-​awtorità governattiva?

◻ B’liema mod l-​awtoritajiet huma “oġġett taʼ biżaʼ”?

◻ Gvernijiet umani kif jaqdu bħala “ministru t’Alla”?

[Kaxxa f’paġna 10]

Ittra Mingħand Kap tal-​Pulizija

ITTRA li ġġorr it-​timbru “Servizz Pubbliku għall-​Istat taʼ Minas Gerais” waslet fl-​uffiċċju tal-​fergħa tal-​Watch Tower Society fil-​Brażil. Kienet mingħand il-​kap tal-​pulizija tal-​belt taʼ Conquista. Kien hemm xi ħaġa ħażina? Ħalli l-​ittra tispjega. Hija tgħid:

“Għażiż Sinjur:

“Huwa bi pjaċir li nintroduċi lili nnifsi lilek permezz taʼ din l-​ittra. Jien ili l-​kap tal-​pulizija fil-​belt taʼ Conquista, Minas Gerais, għal kważi tliet snin. Fuq ix-​xogħol, nipprova dejjem li nkun kuxjenzjuż, imma kien ikolli l-​problemi biex inżomm il-​paċi fil-​ħabs. Il-​ħabsin, għalkemm kienu jingħataw taħriġ f’ċerti xogħlijiet, kienu bla kwiet.

“Xi xhur ilu, Senhor O— ġie fil-​belt tagħna u introduċa lilu nnifsu bħala wieħed mix-​Xhieda taʼ Jehovah. Hu beda jippriedka l-​Bibbja lil xi wħud mill-​priġunieri, billi jgħallimhom jaqraw u jiktbu u billi jurihom affarijiet bażiċi fuq l-​iġene u fl-​imġieba soċjali kif ukoll igħidilhom dwar il-​Bibbja Mqaddsa. Il-​mod kif dan il-​predikatur kien jaħdem wera dedikazzjoni, mħabba, u sagrifiċċju persunali. L-​imġieba tal-​ħabsin malajr tbiddlet b’mod li tinnotah għall-​aħjar, bl-​istagħġib u apprezzament kbir minn dawk li raw dan.

“Minħabba dak li ġara fil-​ħabs tagħna, jien nixtieq uffiċċjalment ingħarraf lill-​Watch Tower Bible and Tract Society dwar l-​apprezzament tagħna għax-​xogħol mill-​aħjar li sar fil-​komunità tagħna mill-​predikatur li ħaqqu kull tifħir.”

Rigward awtorità governattiva, l-​appostlu Pawlu qal: “Ibqaʼ agħmel it-​tajjeb, u int se jkollok tifħir mingħandha.” (Rumani 13:3) Dan kien ċertament veru fil-​każ t’hawn fuq. X’testimonjanza għall-​qawwa li tbiddel tal-​Kelma t’Alla li l-​aħbar tajba wettqet fi kwistjoni taʼ xhur dak li s-​sistema penali ma setgħetx tagħmel għal snin twal!—Salm 19:7-9.