Il-Kwistjoni l-​Kbira X’Inhi?

X’INHI l-​kwistjoni l-​kbira li qed tiffaċċja lil kull wieħed minna? Huwa l-​livell li dejjem jogħla tal-​baħar u t-​temp imħawwad li hu kkaġunat miż-​żjieda fis-​sħana globali? Huwa t-​tqattigħ tal-​ozone layer, li qed iwassal għal li niġu esposti b’mod perikoluż għar-​raġġi ultraviolet tax-​xemx li tant jagħmlu ħsara? Hija ż-​żjieda f’daqqa fil-​popolazzjoni, li ġġib magħha problemi globali oħra, bħalma huma l-​faqar u l-​kriminalità? Jew huwa l-​prospett li miljuni jiġu meqruda bi gwerra nukleari, b’xi wħud li jsalvaw mill-​olokawst u li eventwalment imutu f’agunija bil-​kesħa, ġuħ, jew mir-​radjazzjoni?

Wara li ġew diskussi dawn il-​kwistjonijiet u oħrajn fl-​1989 il-​ġurnal Scientific American ikkonkluda: “Il-​possibiltà taʼ gwerra nukleari bla dubju tirrappreżenta l-​iktar periklu gravi li jistaʼ jkun hemm għal . . . salvazzjoni.” Hija gwerra nukleari, allura, l-​kwistjoni l-​kbira li qed tiffaċċjana?

Il-​Kwisjtoni l-​Kbira

Bil-​bidla fil-​klima politika mill-​1989 ’il hawn, gwerra nukleari tistaʼ tidher iktar u iktar improbabbli. Xorta waħda, sakemm jeżistu l-​armi nukleari, huma se jkunu taʼ theddida serja għall-​umanità. Madankollu, informazzjoni fin-​1990 Britannica Book of the Year tipponta lejn kwistjoni kritika oħra. Skond dan ix-​xogħol taʼ referenza, ’il fuq minn 230 miljun mill-​abitanti tal-​art huma atei. Sorsi oħra juru li miljuni iżjed huma influwenzati mill-​filosofiji tal-​Lvant li jagħtu lok għall-​opinjoni li m’hemmx Ħallieq. Barra minn hekk, waqt li mijiet taʼ miljuni jemmnu f’Ħallieq, l-​ideat tagħhom dwaru jvarjaw b’mod radikali. U f’ħafna każi, l-​azzjonijiet tagħhom iġib tmaqdir kbir fuq Dak li huma jsostnu li qed iqimu.—2 Pietru 2:1, 2.

Jekk Alla jeżisti—u żgur li jeżisti—mela żgur li l-​akbar kwistjoni llum trid tinvolvi lilu. Għala ħalaq lill-​bniedem? X’inhi r-​responsabbiltà tagħna lejh? Kif se jirreaġġixxi għall-​mod li l-​bniedem qed jeqred l-​art? U kif se jwieġeb għall-​isfida implikata milli ħafna jirrifjutaw li jemmnu fih u jissottomettu rwieħhom għar-​rieda tiegħu? Fil-​fatt, il-​kwistjoni l-​kbira li qed tiffaċċja lil kull wieħed u waħda minna hi jekk naċċettawx jew le s-​sovranità t’Alla, “li ismu biss hu JEHOVAH.”−Salm 83:18, King James Version.

L-​Oriġini tal-​Univers

Naturalment, għal dawk li ma jemmnux f’Alla, ir-​responsabbiltà tagħna lejh m’hi taʼ ebda kwistjoni. Imma kwalunkwe wieħed li jħares bl-​onestà lejn id-​disinn u l-​ġmiel tal-​art li hija d-​dar tagħna jiġi mqanqal biex jammetti li jrid ikun hemm Disinnjatur mill-​aqwa. Huwa veru li meta jipprovaw jispjegaw l-​egħġubijiet naturali li hemm madwarna, il-​biċċa l-​kbira tax-​xjenzati ma jdaħħlux lil Alla fl-​istampa. Ħafna jgħidu, per eżempju, li l-​univers sar daqs li hu fil-​preżent minn tikka żgħira li hi ħafna inqas minn ponta taʼ labbra, u li ġara kollox “b’mod naturali” b’kumbinazzjoni, mingħajr il-​ħtieġa taʼ xi Ħallieq. Madankollu, wara li jispjega teorija popolari ġdida fuq kif beda l-​univers, il-​fiżiċista Hanbury Brown, fil-​ktieb tiegħu The Wisdom of Science, jammetti: “Għall-​maġġoranza tal-​bnedmin, naħseb jien, dan se jkun iktar bħala xi bużullotta milli spjegazzjoni.” Il-​professur Brown jikkonkludi li “l-​oriġini u l-​iskop tad-​dinja” huma “misteri kbar” li x-​xjenza tidher li mhix kapaċi ssolvi.

Ix-xjenzati wrew li l-​materja u l-​enerġija huma relatati mill-​qrib u li l-​materja tistaʼ tiġi mibdula f’enerġija u l-​enerġija f’materja. Bħalma ġara fl-​isplużjonijiet nukleari, ammont ċkejken taʼ materja jirrappreżenta ammont enormi taʼ enerġija. Fejn, allura, huwa s-​sors taʼ dik l-​enerġija kollha rrappreżentata mill-​l00,000 miljun stilel fil-​galassa tagħna, kif ukoll l-​iktar mill-​1,000 miljun galassi li huma fl-​univers viżibbli?

Il-Bibbja tgħid: “Erfgħu għajnejkom ’il fuq u araw. Min ħalaq dawn l-​affarijiet? Huwa Dak li qed joħroġ l-​armata tagħhom saħansitra bin-​numru, li lkoll kemm huma jsejħilhom saħansitra bl-​isem. Minħabba l-​abbundanza tal-​enerġija dinamika, billi hu wkoll vigoruż fil-​qawwa, lanqas waħda minnhom ma hi nieqsa.” Min hu Dak? Il-​Bibbja tagħti t-​tweġiba: “Jiena Jehovah. Dak hu ismi; u lil ħadd ieħor ma se nagħti l-​glorja tiegħi stess.”−Isaija 40:26; 42:5, 8.

Spekulazzjoni li l-​art flimkien mal-​bqija tal-​univers oriġinaw b’kumbinazzjoni tieħu l-​glorja li tixraq lill-​Ħallieq, Alla Jehovah. (Rivelazzjoni 4:11) Tneħħi wkoll il-​mottiv qawwi biex wieħed jaġixxi b’responsabbiltà lejn l-​art. Li kieku l-​bnedmin kienu konxji li jridu jagħtu kont lil Alla taʼ dak li jagħmlu lill-​ħolqien tiegħu, forsi huma jkunu iktar attenti fejn jidħol it-​tniġġis, il-​qerda tal-​ozone layer, u s-​sħana tal-​globu.

L-​Oriġini tal-​Ħajja

Ikkunsidra wkoll il-​mistoqsija: Kif bdiet il-​ħajja? In-​nies ġew imgħallmin li l-​ħajja bdiet mingħajr ebda intervent minn Alla. Imma dan jikkontradixxi prinċipju xjentifiku li huwa stabbilit sew. F’xi żmien kienu jemmnu li n-​nannakola ġiet mid-​demel tal-​baqra, id-​dud minn laħam imħassar, u l-​ġrieden mit-​tajn. Saħansitra matul l-​aħħar seklu, ix-​xjenzati għallmu li l-​mikroorganiżmi ġew minn materja bla ħajja. Imma ideat bħal dawn ġew provati li huma ħżiena minn Redi, Pasteur, u xjenzati oħra. The World Book Encyclopedia (edizzjoni tal-​1990) jistqarr: “Wara l-​esperimenti taʼ Pasteur, ħafna bioloġisti aċċettaw l-​idea li kull forma taʼ ħajja tiġi minn ħajja li diġà teżisti.”

Minkejja dan, ix-​xjenzati joħorgu b’teoriji li l-​affarijiet kienu differenti fi żmien il-​qedem. Huma jgħidu li l-​ewwel organiżmi b’ċellola waħda ġew b’kumbinazzjoni minn taħlita bla ħajja li huma jsejħu soppa primevali, li kellha fiha l-​kimiċi meħtieġa għall-​ħajja. “B’kumbinazzjoni, u b’kumbinazzjoni biss, sar dan kollu, mis-​soppa primevali sal-​bniedem,” jiddikjara Christian de Duve f’A Guided Tour of the Living Cell.

Billi titkellem dwar Alla, il-​Bibbja tgħid: “Miegħek hu s-​sors tal-​ħajja.” (Salm 36:9) Din l-​istqarrija hija verament fi qbil maʼ dak li ġie osservat—li l-​ħajja tistaʼ tiġi biss min ħajja li diġa teżisti. Ladarba, madankollu, x-​xjenza popolari tippreferi li tqis wieħed mill-​iktar rigali prezzjużi taʼ Alla, il-​ħajja, bħala xi ħaġa li ġiet b’ċikka, ħafna nies ma jħossu ebda responsabbiltà lejn Alla dwar kif huma jużaw ħajjithom. B’hekk, huma jiksru l-​liġijiet t’Alla, jgħakksu lil xulxin, jisirqu lil xulxin, joqtlu lil xulxin, u jonfqu partita flus, ħin, u inġenwità biex jiddisenjaw armi qattiela li joqtlu u jagħmlu ħerba b’effiċjenza tal-​biżaʼ.

Tiġi Ssetiljata l-​Kwistjoni

Minbarra l-​atei u l-​modernisti, numru ieħor bla għadd jiċħdu s-​sovranità t’Alla. Numru mhux ħażin illum isostnu li jemmnu b’Alla, u iktar minn 1,700 miljun isejħu lilhom infushom Kristjani. Għal sekli sħaħ il-​knejjes tal-​Kristjaneżmu faħħru pubblikament lil Alla fiċ-​ċerimonji tagħhom. Imma fuq liema naħa jinsabu verament il-​biċċa l-​kbira taʼ dawk il-​1,700 miljun ruħ fuq il-​kwistjoni tas-​sovranità t’Alla?

Kemm individwi u kemm ġnus urew li ma jagħtux kasha billi marru kontra l-​kmandi speċifiċi t’Alla. Il-​ġnus li jsostnu li huma Kristjani kienu responsabbli taʼ atti ħżiena taʼ vjolenza, inklużi l-​agħar żewġ gwerer dinjin tal-​istorja umana—u l-​kleru “Kristjan” fuq iż-​żewġ naħat bierku dawk il-​gwerer! B’ipokrezija bħal din, huma rrappreżentaw ħażin lil Alla. Bħalma tistqarr il-​Bibbja: “Huma pubblikament jiddikjaraw li jafu ’l Alla, imma jiċħduh bix-​xogħlijiet tagħhom.”−Titus 1:16.

Minkejja dan, Alla “ma jistax jiċħad lilu nnifsu.” (2 Timotew 2:13) Iż-​żmien irid jasal meta hu se jsolvi kull aspett taʼ din il-​kwistjoni tas-​sovranità fi qbil mal-​għan mistqarr tiegħu stess: “Se jkollhom ikunu jafu li jiena Jehovah.” (Eżekjel 38:23) Imma għala ħalla daqshekk żmien? Il-​kwistjoni kif se tiġi solvuta fl-​aħħar mill-​aħħar? U int kif tistaʼ tagħmel deċiżjonijiet tajbin f’din l-​iktar kwistjoni importanti?

[Sors taʼ l-Istampa f’paġna 3]

Sfond: Ritratt tal-​U.S. Naval Observatory