Żomm l-​Integrità u Għix!

“ISĦET ’l Alla u mut!” esklamat mart Ġob, li attakkatu b’dawk il-​kelmiet. Dak kien madwar 3,600 sena ilu. Madankollu dak l-​attakk verbali fuq il-​qaddej leali t’Alla jenfasizza kwistjoni li tikkonfronta lill-​umanità sal-​ġurnata tal-​lum. Il-​leali Ġob kien sofra telfiet terribbli​—il-​bhejjem tiegħu, id-​dar tiegħu, l-​għaxar uliedu. Issa ġismu kien qed jiġi ttorturat minn marda kronika, li ttestjatu sal-​limitu. Ir-​raġuni? L-​akbar għadu t’Alla u tal-​bniedem, Satana x-​Xitan, kien qiegħed ikompli bi sfida li l-​bniedem ma jistax iżomm l-​integrità lejn Alla taħt prova qalila.—Ġob 1:11, 12; 2:4, 5, 9, 10.

Illum, bħal fi żmien Ġob, “[i]d-dinja kollha qiegħda taħt il-​qawwa tal-​wieħed mill-​agħar,” Satana x-​Xitan. (1 Ġwann 5:19) Tabilħaqq, dak huwa saħansitra iktar veru llum, għax issa “l-​wieħed imsejjaħ Xitan u Satana, li qiegħed jiżżvija lill-​art abitata kollha kemm hija,” ġie mitfugħ ’il barra mis-​smewwiet ’l isfel lejn din l-​art. (Rivelazzjoni 12:9) Din hija r-​raġuni għall-​gwajiet qliel li jifilġu lill-​umanità fi żmienna. L-​ewwel gwerra dinjija, li faqqgħet fl-​1914, immarkat “bidu taʼ weġgħat taʼ hemm” li baqgħu sejrin sa l-​aħħar taʼ dan is-​seklu 20.—Mattew 24:7, 8.

F’din id-​dinja krudila u degradanti, qatt tħossok li wasalt sal-​punt li ma tistax tissaporti iktar? Qatt toqgħod taħseb, ‘Hemm xi skop għall-​ħajja?’ Ġob setaʼ ħassu hekk, imma qatt ma tilef il-​fidi f’Alla, għalkemm għamel żbalji. Hu esprima d-​determinazzjoni tiegħu f’dan il-​kliem: “Sakemm nintemm m’inix se nneħħi l-​integrità tiegħi minni nnifsi!” Kellu fiduċja li Alla kellu ‘jsir jaf l-​integrità tiegħu.’—Ġob 27:5; 31:6.

Ġesù Kristu, l-​istess Iben t’Alla, ukoll kellu jissaporti provi waqt li kien hawn fuq l-​art. Satana attakka lil Ġesù b’diversi modi. Approfitta ruħu mill-​ħtiġijiet fiżiċi taʼ Ġesù u ttestjalu l-​fiduċja Tiegħu fil-​Kelma t’Alla, bħal fuq il-​muntanja taʼ tentazzjoni. (Mattew 4:1-11) Irrita lil Ġesù billi ġiegħel lill-​iskribi u l-​Fariżej apostati u l-​imqarrqin sħabhom biex jippersegwitawh, jakkużawh b’dagħa, u jikkonfoffaw biex joqtluh. (Luqa 5:21; Ġwann 5:16-18; 10:36-39; 11:57) Lil Ġesù għamlulu ferm agħar milli kienu għamlu t-​tliet farraġa foloz lil Ġob.—Ġob 16:2; 19:1, 2.

Fil-ġnien tal-​Ġetsemani, hekk kif Ġesù qorob lejn il-​quċċata taʼ dan l-​ittestjar, qal lid-​dixxipli tiegħu: “Ruħi mnikkta profondament, saħansitra sal-​mewt.” Imbagħad, “waqaʼ għal wiċċu, jitlob u jgħid: ‘Missieri, jekk inhu possibbli, ħalli dan il-​kies iwarrab minni. Madankollu, mhux kif irrid jien, imma kif trid int.’” Finalment, fuq iz-​zokk tat-​tortura, bi twettieq tal-​kliem profetiku taʼ Salm 22:1, Ġesù għajjat: “Alla tiegħi, Alla tiegħi, għala abbandunajtni?” Imma fl-​aħħar mill-​aħħar Alla m’abbandunahx lil Ġesù għaliex Ġesù żamm integrità perfetta Lejh, billi pprovda mudell għall-​Kristjani veri kollha biex isegwu. Jehovah ppremja ż-​żamma taʼ integrità taʼ Ġesù billi rxoxtah u eżaltah għall-​ogħla smewwiet. (Mattew 26:38, 39; 27:46; Atti 2:32-36; 5:30; 1 Pietru 2:21) Alla se jippremja lill-​oħrajn kollha li bl-​istess mod iżommu l-​integrità lejh.

L-integrità taʼ Ġesù mhux biss tat tweġiba kompleta għall-​isfida taʼ Satana imma talli s-​sagrifiċċju tal-​ħajja umana u perfetta tiegħu pprovda r-​rahan, li fuq il-​bażi tiegħu bnedmin li jżommu l-​integrità jistgħu jiksbu ħajja taʼ dejjem. (Mattew 20:28) L-​ewwel, Ġesù jiġbor lill-​“merħla ċkejkna” midlukin li jsiru werrieta sħab miegħu fis-​Saltna tas-​smewwiet. (Luqa 12:32) Wara dan, “folla kbira” jiġu miġburin biex jibqgħu ħajjin wara t-​“tribulazzjoni l-​kbira,” billi joħorġu minnha biex jirtu ħajja taʼ dejjem fil-​qasam tas-​Saltna t’Alla fuq l-​art.—Rivelazzjoni 7:9, 14-17.

Ġob li żamm l-​integrità se jkun fost il-​biljuni taʼ wħud mejtin li dak in-​nhar se jiġu rxoxtati biex isiru parti minn dik is-​soċjetà t’“art ġdida” mimlija paċi. (2 Pietru 3:13; Ġwann 5:28, 29) L-​integrità ġiet ippremjata fi żmien Ġob meta Jehovah “bierek it-​tmiem taʼ Ġob . . . iktar mill-​bidu tiegħu.” Kien kiseb saħħa spiritwali bħala wieħed li “ma dinibx b’xofftejh.” Alla estendielu ħajtu b’mija u erbgħin sena oħra. Materjalment, ta lil Ġob id-​doppju taʼ kulma kellu qabel, u Ġob “ġie li jkollu sebaʼ wlied subjien u tliet ulied bniet,” il-​bniet meqjusin bħala l-​isbaħ fl-​art kollha. (Ġob 2:10; 42:12-17) Imma din il-​prosperità kollha kienet biss antiċipazzjoni tal-​barkiet li dawk li jżommu l-​integrità se jgawdu fil-​Ġenna taʼ l-​“art ġdida.” Int ukoll tistaʼ tieħu sehem f’dak il-​ferħ, bħalma se jispjegaw il-​paġni li ġejjin! (w95 1/1)

[Stampa f’paġna 18]

Ġesù stabbilixxa l-​eżempju perfett bħala wieħed li jżomm l-​integrità