Il-​Ferħ taʼ Jehovah Huwa l-​Post b’Saħħtu Tagħna

“Dan il-​jum huwa qaddis għall-​Mulej tagħna, u tħossukomx imweġġgħin, għax il-​ferħ taʼ Jehovah huwa l-​post b’saħħtu tagħkom.”—NEĦEMIJA 8:10.

1, 2. (a) X’inhuwa post b’saħħtu? (b) David kif wera li ħa refuġju f’Jehovah?

JEHOVAH hu post b’saħħtu bla paragun. U x’inhuwa post b’saħħtu? Huwa post iffortifikat, wieħed taʼ sigurtà jew taʼ salvâr. David taʼ Iżrael tal-​qedem ikkunsidra lil Alla bħala l-​post b’saħħtu tiegħu. Per eżempju, ikkunsidra l-​għanja li David idderieġa lill-​Iktar Għoli “fil-​jum li Jehovah kien ħelsu mill-​pala t’id l-​għedewwa kollha tiegħu u minn id Sawl,” is-​sultan taʼ Iżrael.—Salm 18, skrizzjoni taʼ fuq.

² David beda dik l-​għanja kommoventi bil-​kliem: “Jien se jkolli affezzjoni għalik, O Jehovah is-​saħħa tiegħi. Jehovah hu l-​blata fl-​għoli tiegħi u l-​post b’saħħtu tiegħi u Dak li jipprovdi l-​ħarba għalija. Alla tiegħi hu l-​blata tiegħi. Jien se nieħu refuġju fih, it-​tarka tiegħi u l-​qarn taʼ salvazzjoni tiegħi, l-​għoli fis-​sigurtà tiegħi.” (Salm 18:1, 2) Priv mill-​protezzjoni tal-​liġi b’mod inġust u segwit mis-​Sultan Sawl, ir-​rett David sab refuġju f’Jehovah, l-​istess bħalma wieħed jistaʼ jiġri għal ġo post iffortifikat biex isalva minn xi gwaj.

3. Il-​Lhud fi żmien Eżra għala ġarrbu “hena kbira”?

³ Il-​ferħ li jagħti Jehovah huwa post b’saħħtu li qatt ma jfalli għal dawk li jimxu fil-​mogħdija tiegħu bħala wħud li jżommu l-​integrità. (Proverbji 2:6-8; 10:29) Biex ikollhom il-​ferħ li jagħti Alla, m’għandniex xi ngħidu, in-​nies iridu jagħmlu r-​rieda divina. F’dan ir-​rigward, ikkunsidra x’ġara f’Ġerusalemm fis-​sena 468 Q.E.K. Eżra, li kien jikkopja, u oħrajn taw fehma permezz taʼ qari tal-​Liġi mimli tifsir. Imbagħad in-​nies ġew imħeġġin: “Morru, kulu l-​affarijiet imsemmnin u ixorbu l-​affarijiet ħelwin, u ibagħtu porzjonijiet lill-​wieħed li għalih xejn ma ġie mħejji; għax dan il-​jum huwa qaddis għall-​Mulej tagħna, u tħossukomx imweġġgħin, għax il-​ferħ taʼ Jehovah huwa l-​post b’saħħtu tagħkom.” “Hena kbira” rriżultat hekk kif il-​Lhud applikaw l-​għarfien li kienu kisbu u ċċelebraw Festa taʼ l-​Għerejjex ferriħija. (Neħemija 8:1-12) Dawk li kellhom ‘il-​ferħ taʼ Jehovah bħala l-​post b’saħħtu tagħhom’ kisbu saħħa għall-​qima u s-​servizz tiegħu. Ladarba l-​ferħ taʼ Jehovah kien il-​post b’saħħtu tagħhom, għandna nistennew li n-​nies t’Alla llum ikunu mimlijin bil-​ferħ ukoll. X’inhuma, allura, xi ftit mir-​raġunijiet taż-​żmien preżent għall-​ferħ?

“Xejn Ħlief Mimli Ferħ”

4. Liema huwa sors wieħed li jispikka taʼ ferħ għan-​nies taʼ Jehovah?

⁴ Raġuni waħda li tispikka għall-​ferħ hija l-​provvediment li Jehovah jagħmel għall-​ġbir flimkien. L-​assembleat u l-​konvenzjonijiet tax-​Xhieda taʼ Jehovah iġibulhom ferħ illum, l-​istess bħalma l-​festi annwali ċċelebrati mill-​Iżraeliti ġabulhom ferħ fi qlubhom. Lin-​nies taʼ Iżrael intqalilhom: “Sebat ijiem se tiċċelebra l-​festa [taʼ l-​għerejjex] lil Jehovah Alla tiegħek fil-​post li Jehovah se jagħżel, għaliex Jehovah Alla tiegħek se jbierkek f’dak kollu li tipproduċi u f’kull għemil taʼ idek, u m’għandek issir xejn ħlief mimli ferħ.” (Dewteronomju 16:13-15) Iva, Alla riedhom li ‘jsiru xejn ħlief mimlijin ferħ.’ L-​istess huwa veru dwar il-​Kristjani, għax l-​appostlu Pawlu ħeġġeġ lill-​kredenti sħabu: “Dejjem ithennew fil-​Mulej. Għal darb’oħra se ngħid, Ithennew!”—Filippin 4:4.

5. (a) X’inhuwa l-​ferħ, u l-​Kristjani kif jiksbuh? (b) Kif jistaʼ jkollna l-​ferħ minkejja l-​provi?

⁵ Ladarba Jehovah iridna nsiru mimlijin ferħ, jagħtina l-​ferħ bħala waħda mill-​frottiet taʼ l-​ispirtu qaddis tiegħu. (Galatin 5:22, 23) U x’inhuwa l-​ferħ? Huwa l-​emozzjoni taʼ gost ikkaġunata mill-​istennija jew l-​akkwist taʼ dak li huwa taʼ benefiċċju u mixtieq. Il-​ferħ huwa stat taʼ kuntentizza vera, saħansitra eżaltazzjoni. Din il-​frotta taʼ l-​ispirtu qaddis t’Alla ssostnina taħt prova. “Għall-​ferħ li tqiegħed quddiemu [Ġesù] ssaporta zokk tat-​tortura, billi stmerr l-​għajb, u qagħad bil-​qiegħda fuq il-​leminija tat-​tron t’Alla.” (Ebrej 12:2) Id-​dixxiplu Ġakbu kiteb: “Qisuh kollu ferħ, ħuti, meta tiltaqgħu maʼ diversi provi, billi tafu li din il-​kwalità pprovata tal-​fidi tagħkom tipproduċi s-​sabar.” Imma xi ngħidu jekk ma nafux x’għandna nagħmlu dwar ċerta prova? Imbagħad nistgħu b’mod fiduċjuż nitolbu għall-​għerf biex nittrattaw magħha. Li naġixxu f’armonija m’għerf tas-​sema jgħinna nsolvu l-​problemi jew inkampaw maʼ provi persistenti mingħajr ma nitilfu l-​ferħ taʼ Jehovah.—Ġakbu 1:2-8.

6. X’relazzjoni teżisti bejn il-​ferħ u l-​qima vera?

⁶ Il-​ferħ li jagħtina Jehovah isaħħaħna biex nippromwovu l-​qima vera. Dak kien li ġara fi żmien Neħemija u Eżra. Lhud taʼ dak iż-​żmien li kellhom il-​ferħ taʼ Jehovah bħala l-​post b’saħħtu tagħhom kienu msaħħin biex javanzaw l-​interessi tal-​qima vera. U hekk kif ippromwovew il-​qima taʼ Jehovah, il-​ferħ tagħhom kiber. L-​istess huwa veru llum. Bħala adoraturi taʼ Jehovah, għandna bażi għal hena kbira. Ejjew issa nikkunsidraw ftit iktar mill-​ħafna raġunijiet li għandna għall-​ferħ.

Relazzjoni M’Alla Permezz Taʼ Kristu

7. Rigward Jehovah, il-​Kristjani liema raġuni għandhom għall-​ferħ?

⁷ Ir-​relazzjoni mill-​qrib tagħna maʼ Jehovah tagħmilna l-​iktar nies henjin fuq l-​art. Qabel ma sirna Kristjani, konna parti mis-​soċjetà umana bla tjieba li tinsab ‘fid-​dlam mentalment u maqtugħa mill-​ħajja li tappartjeni lil Alla.’ (Efesin 4:18) Kemm huwa taʼ pjaċir għalina li m’għadniex iżjed imbegħdin minn Jehovah! M’għandniex xi ngħidu, jirrikjedi sforz biex tibqaʼ fil-​favur tiegħu. Irridu ‘nkomplu fil-​fidi, stabbiliti fuq il-​pedament u sodi u m’aħniex qegħdin nitwarrbu mit-​tama taʼ dik l-​aħbar tajba.’ (Kolossin 1:21-23) Nistgħu nithennew li Jehovah ġibidna lejn Ibnu fi qbil mal-​kliem taʼ Ġesù stess: “Ebda bniedem ma jistaʼ jiġi għandi jekk il-​Missier, li bagħatni, ma jiġbdux.” (Ġwann 6:44) Jekk verament napprezzaw ir-​relazzjoni prezzjuża tagħna m’Alla permezz taʼ Kristu, se ngħassu kontra kwalunkwe ħaġa li tistaʼ tirrovinaha.

8. Ġesù kif ikkontribwixxa għall-​istat tagħna taʼ ferħ?

⁸ Il-​maħfra tad-​dnubiet permezz tal-​fidi fis-​sagrifiċċju taʼ rahan taʼ Ġesù hija raġuni kbira għall-​ferħ għaliex dan huwa li jagħmel ir-​relazzjoni tagħna m’Alla possibbli. Bil-​korsa volontarja tiegħu taʼ dnub, l-​antenat tagħna Adam ġab mewt fuq l-​umanità kollha. Madankollu, l-​appostlu Pawlu spjega: “Alla jirrikmanda l-​imħabba tiegħu stess lilna billi, waqt li konna għadna midinbin, Kristu miet għalina.” Pawlu kiteb ukoll: “Bħalma permezz taʼ nuqqas wieħed ir-​riżultat għall-​bnedmin taʼ kull xorta kien kundanna, bl-​istess mod ukoll permezz t’att wieħed taʼ ġustifikazzjoni r-​riżultat għall-​bnedmin taʼ kull xorta huwa li jiġu ddikjarati twajbin għall-​ħajja. Għax sewwa sew bħalma permezz tad-​diżubbidjenza tar-​raġel wieħed ħafna ġew kostitwiti midinbin, bl-​istess mod ukoll permezz taʼ l-​ubbidjenza tal-​persuna waħda ħafna se jiġu kostitwiti twajbin.” (Rumani 5:8, 18, 19) Kemm nistgħu nimtlew bil-​ferħ li Alla Jehovah jogħġbu jifdi lil dawk min-​nisel t’Adam li jagħmlu użu minn provvediment taʼ mħabba bħal dan!

Libertà u Tidwil Reliġjużi

9. Għala aħna mimlijin ferħ minn aspett reliġjuż?

⁹ Libertà minn Babilonja l-​Kbira, l-​imperu dinji taʼ reliġjon falza, hija raġuni oħra biex nimtlew bil-​ferħ. Hija verità divina li għamlitna liberi. (Ġwann 8:32) U libertà minn din il-​prostituta reliġjuża tfisser li ma nixxirkux fi dnubietha, ma nġarrbux il-​kastigi tagħha, u ma nispiċċawx fil-​qerda magħha. (Rivelazzjoni 18:1-8) M’hemm xejn taʼ niket f’li naħarbu dak kollu!

10. Liema tidwil ingawdu bħala nies taʼ Jehovah?

¹⁰ Li tifhem u tapplika l-​Kelma t’Alla fil-​ħajja huma raġunijiet għal hena kbira. Liberi mill-​influwenza tar-​reliġjon falza, ingawdu dehen spiritwali li jsir iżjed ċar b’mod progressiv ipprovdut minn Missierna tas-​sema permezz taʼ “l-​irsir leali u diskret.” (Mattew 24:45-47) Minn fost in-​nies kollha li jgħixu fuq l-​art, dawk biss li b’mod esklussiv huma devoti lejn Jehovah għandhom l-​ispirtu qaddis tiegħu u l-​fehma mbierka tal-​Kelma u r-​rieda tiegħu. Huwa bħalma qal Pawlu: “Huwa lilna li Alla rrivelahom [l-affarijiet li ħejja għal dawk li jħobbuh] permezz taʼ l-​ispirtu tiegħu, għax l-​ispirtu jfittex fl-​affarijiet kollha, saħansitra l-​affarijiet profondi t’Alla.” (1 Korintin 2:9, 10) Nistgħu nkunu kemm grati kif ukoll ferħanin li qegħdin ingawdu l-​fehma li b’mod progressiv issir aħjar indikata fil-​kliem taʼ Proverbji 4:18: “[I]l-passaġġ taʼ l-​uħud twajbin huwa bħad-​dawl qawwi li qiegħed isir iktar u iktar qawwi sakemm il-​jum jiġi stabbilit fis-​sod.”

Tama Tas-​Saltna u Ħajja Eterna

11. It-​tama mimlija ferħ tas-​Saltna kif ġiet maqsuma m’oħrajn?

¹¹ It-​tama tagħna tas-​Saltna wkoll tagħmilna mimlijin bil-​ferħ. (Mattew 6:9, 10) Bħala Xhieda taʼ Jehovah, ilna żmien twil nipproklamaw li s-​Saltna t’Alla hija l-​unika tama għall-​umanità kollha. Per eżempju, ikkunsidra s-​sena 1931, meta ħaddanna l-​isem Xhieda taʼ Jehovah b’reżoluzzjoni milqugħa b’mod ferrieħi f’51 konvenzjoni madwar id-​dinja. (Isaija 43:10-12) Dik ir-​reżoluzzjoni u taħdita sinjifikanti fil-​konvenzjoni mogħtija minn J. F. Rutherford (li dak iż-​żmien kien il-​president tal-​Watch Tower Society) ġew ippubblikati fil-​ktejjeb The Kingdom, the Hope of the World. Inkluża fih kien hemm reżoluzzjoni oħra adottata f’dik il-​konvenzjoni, waħda li takkuża lill-​Kristjaneżmu għall-​apostasija tiegħu u talli ttratta l-​pariri taʼ Jehovah bi stmerrija. Hija pproklamat ukoll: “It-​tama tad-​dinja hija s-​Saltna t’Alla, u m’hemmx tama oħra.” Fi ftit xhur, ix-​Xhieda taʼ Jehovah qassmu ’l fuq minn ħames miljun kopja taʼ dan il-​ktejjeb fil-​partijiet kollha taʼ l-​art. Minn dak iż-​żmien ’l hawn taʼ spiss affermajna li s-​Saltna hija l-​unika tama taʼ l-​umanità.

12. Liema prospetti ferriħin taʼ ħajja huma mqegħdin quddiem dawk li jaqdu lil Jehovah?

¹² Nithennew, ukoll, fil-​prospett taʼ ħajja eterna taħt il-​ħakma tas-​Saltna. Il-​“merħla ċkejkna” taʼ Kristjani midlukin għandhom tama ferriħija għas-​sema. “Ikun imbierek dak Alla u Missier il-​Mulej tagħna Ġesù Kristu,” kiteb l-​appostlu Pietru, “għax skond il-​ħniena kbira tiegħu tana twelid ġdid għal tama ħajja permezz taʼ l-​irxoxt taʼ Ġesù Kristu mill-​imwiet, għal wirt li ma jitħassarx u li ma jitniġġisx u li ma jitbielx. Huwa merfugħ fis-​smewwiet għalikom.” (Luqa 12:32; 1 Pietru 1:3, 4) Illum, il-​maġġoranza vasta tax-​Xhieda taʼ Jehovah iħarsu ’l quddiem lejn ħajja taʼ dejjem fil-​Ġenna ġod-​dominju tas-​Saltna. (Luqa 23:43; Ġwann 17:3) L-​ebda nies oħrajn fuq l-​art m’għandhom xi jħabbatha mal-​prospetti tagħna mimlijin ferħ. Kemm għandna ngħożżuhom!

Fratellanza Mbierka

13. Kif għandna nħarsu lejn il-​fratellanza internazzjonali tagħna?

¹³ Li tkun parti mill-​unika fratellanza internazzjonali approvata minn Alla huwa wkoll sors taʼ ferħ kbir. B’hena, għandna l-​iktar imseħbin mixtiqin fuq l-​art. Alla Jehovah innifsu dderieġa l-​attenzjoni b’mod speċifiku għal żmienna u qal: “Se nissussa l-​ġnus kollha, u l-​affarijiet mixtiqin tal-​ġnus kollha jridu jidħlu; u se nimla lil din id-​dar bil-​glorja.” (Ħaggaj 2:7) Veru, il-​Kristjani kollha huma imperfetti. Madankollu, Jehovah ġibed individwi bħal dawn lejh permezz taʼ Ġesù Kristu. (Ġwann 14:6) Ladarba Jehovah ġibed lejh nies li jqishom bħala mixtiqin, il-​ferħ tagħna se joktor jekk nuruhom imħabba taʼ l-​aħwa, nagħtuhom stima kbira, nikkoperaw magħhom f’attivitajiet taʼ tjieba, nappoġġjawhom fil-​provi tagħhom, u nitolbu għan-​nom tagħhom.

14. Liema inkuraġġiment nistgħu nieħdu mill-1 Pietru 5:5-11?

¹⁴ Dan kollu se jikkontribwixxi għall-​ferħ tagħna. Tabilħaqq, huwa l-​ferħ taʼ Jehovah li huwa l-​post b’saħħtu tal-​fratellanza spiritwali tagħna madwar l-​art kollha. Iva, ilkoll kemm aħna nsofru persekuzzjoni u tbatijiet oħrajn. Imma dan għandu jiġbidna flimkien u jagħtina sens t’unità bħala parti mill-​organizzazzjoni waħda ġenwina t’Alla fuq l-​art. Bħalma qal Pietru, għandna numiljaw lilna nfusna taħt l-​id setgħana t’Alla, billi nitfgħu l-​anzjetà kollha tagħna fuqu bl-​għarfien li hu jimpurtah minna. Għandna bżonn noqogħdu għassa għaliex ix-​Xitan ifittex li jiblagħna, imma f’dan m’aħniex waħedna, għax Pietru jżid: “Ħudu l-​waqfa tagħkom kontra tiegħu, solidi fil-​fidi, billi tafu li l-​istess affarijiet f’dawk li huma sofferenzi qegħdin jiġu mwettqin fis-​sħubija kollha kemm hija taʼ ħutkom fid-​dinja.” U din il-​fratellanza internazzjonali mimlija ferħ qatt ma se tiġġarraf, għax għandna l-​assiguranza li ‘wara li nkunu sofrejna għal ftit żmien, Alla se jtemm it-​taħriġ tagħna u se jagħmilna sodi u b’saħħitna.’ (1 Pietru 5:5-11) Aħseb ftit. Il-​fratellanza tagħna mimlija ferħ se tibqaʼ għal dejjem!

Ħajja Taʼ Skop

15. Għala jistaʼ jingħad li x-​Xhieda taʼ Jehovah għandhom ħajja mimlija skop?

¹⁵ Għandna l-​ferħ f’din id-​dinja taʼ inkwiet għaliex għandna ħajja mimlija skop. Ġejna fdati b’ministeru li jagħmel lilna u lil oħrajn henjin. (Rumani 10:10) Huwa ċertament privileġġ ferrieħi li nkunu ħaddiema sħab t’Alla. F’dan ir-​rigward, Pawlu qal: “X’inhu . . . Apollos? Iva, x’inhu Pawlu? Ministri li permezz tagħhom sirtu temmnu, saħansitra skond ma l-​Mulej ta lil kull wieħed. Jien ħawwilt, Apollos saqqa, imma Alla baqaʼ jkabbarha; sabiex la hu xi ħaġa dak li jħawwel lanqas hu dak li jsaqqi, imma Alla li jagħmilha tikber. Issa dak li jħawwel u dak li jsaqqi huma ħaġa waħda, imma kull persuna se tirċievi l-​ħlas tagħha skond ix-​xogħol tagħha stess. Għax aħna ħaddiema sħab t’Alla. Intom l-​għalqa t’Alla li qiegħda tiġi kkultivata, il-​bini t’Alla.”—1 Korintin 3:5-9.

16, 17. Liema eżempji jistgħu jiġu ċċitati biex jagħtu prova li n-​nies taʼ Jehovah għandhom ħajjiet ferriħin taʼ skop?

¹⁶ Ħafna eżempji jistgħu jiġu ċċitati biex juru li meta taqdi lil Jehovah bil-​fedeltà jirriżulta f’ħajja mimlija skop li timlina bil-​ferħ. Tipika hija din l-​istqarrija: “Ħarist madwar is-​Sala tas-​Saltna mimlija nies [dak in-​nhar tal-​programm tad-​dedikazzjoni tagħha] u stajt nara tminn membri mill-​familja tiegħi preżenti, inklużi jien u marti u tlieta mit-​tfal tagħna u l-​imseħbin tagħhom. . . . Marti u jien għaddejna ħajja verament hienja u mimlija skop fis-​servizz t’Alla.”

¹⁷ Huwa wkoll inkuraġġanti li tirrealizza li taʼ kwalunkwe età wieħed jistaʼ jibda ħajja ferrieħa taʼ skop veru fis-​servizz taʼ Jehovah. Per eżempju, waħda mara li tgħallmet il-​verità tal-​Bibbja f’dar tax-​xjuħ tgħammdet bħala waħda mix-​Xhieda taʼ Jehovah fl-​età taʼ 102. Hi b’hekk spiċċat ħajjitha bi skop mimli ferħ, ‘tibżaʼ minn dak Alla veru u żżomm il-​kmandamenti tiegħu.’—Ekkleżjasti 12:13.

Post B’Saħħtu Li Qatt Ma Jfalli

18. X’jistaʼ jsir biex negħlbu l-​indifferenza u biex inżidu l-​ferħ tagħna?

¹⁸ Il-​ferħ taʼ Jehovah huwa post b’saħħtu li qatt ma jfalli għal dawk li huma leali. Madankollu, li jkollna dan il-​ferħ ma jfissirx li qatt ma se jkollna mumenti taʼ niket bħal dawk li qanqlu lil Ġesù biex jgħid fil-​Ġetsemani: “Ruħi mnikkta profondament, saħansitra sal-​mewt.” (Mark 14:32-34) Nassumu li rriżultat l-​indifferenza minħabba li ċedejna għal interessi egoistiċi. Allura ejjew inbiddlu l-​istil taʼ ħajja tagħna. Jekk naqsilna l-​ferħ minħabba li bla egoiżmu nġorru tagħbija tqila taʼ responsabbiltajiet Skritturali, forsi nistgħu nagħmlu aġġustamenti li se jnaqqsu l-​istress u jirrestawraw l-​ispirtu ferrieħi tagħna. Barra minn hekk, Jehovah se jberikna bil-​ferħ jekk infittxu li nogħġbuh billi b’mod vigoruż nirreżistu l-​laħam midneb, id-​dinja mill-​agħar, u x-​Xitan.—Galatin 5:24; 6:14; Ġakbu 4:7.

19. Kif għandna nħarsu lejn kwalunkwe privileġġi li għandna fl-​organizzazzjoni t’Alla?

¹⁹ Għal raġunijiet li ddiskutejna, u għal ħafna oħrajn, għandna ferħ kbir. Kemm jekk aħna pubblikaturi tal-​kongregazzjoni jew qegħdin nieħdu sehem f’xi għamla taʼ servizz full-time, ilkoll kemm aħna nistgħu jkollna ħafna x’nagħmlu fix-​xogħol tal-​Mulej, u dan żgur li se jikkontribwixxi għall-​ferħ tagħna. (1 Korintin 15:58) Huma x’inhuma l-​privileġġi li għandna fl-​organizzazzjoni taʼ Jehovah, ejjew inkunu grati għalihom u bil-​ferħ nibqgħu nagħtu servizz sagru lil Dak Alla tagħna taʼ mħabba u taʼ hena.—1 Timotew 1:11.

20. Liema huwa l-​akbar privileġġ tagħna, u dwar liema ħaġa nistgħu nkunu ċerti?

²⁰ B’mod speċjali għandna raġuni biex nithennew bil-​privileġġ tagħna li nġorru l-​isem kbir taʼ Jehovah bħala x-​Xhieda tiegħu. Iva, aħna imperfetti u niffaċċjaw ħafna provi, imma ejjew inżommu f’moħħna l-​barkiet taʼ l-​għaġeb tagħna bħala Xhieda taʼ Jehovah. U ftakru, l-​għażiż Missierna tas-​sema qatt ma se jonqosna. Nistgħu nkunu ċerti li dejjem se niġu mberkin jekk il-​ferħ taʼ Jehovah huwa l-​post b’saħħtu tagħna. (w95 1/15)

Kif Twieġeb Int?

◻ X’inhuwa “l-​ferħ taʼ Jehovah”?

◻ Il-​Kristjani kif jiksbu ferħ veru?

◻ Liema huma xi raġunijiet għala x-​Xhieda taʼ Jehovah huma mimlijin ferħ?

◻ Il-​ferħ taʼ Jehovah għala huwa post b’saħħtu li ma jfallix?