Il-Verità Dwar Ġesù

DONNU li m’hemmx tmiem għal teoriji u spekulazzjonijiet dwar min kien Ġesù u x’wettaq. Imma xi ngħidu għall-​Bibbja nfisha? Din x’tgħidilna dwar Ġesù Kristu?

Dak Li Tgħid Il-​Bibbja

Billi taqra l-​Bibbja bir-​reqqa, se tinnota dawn il-​fatti prinċipali:

◻ Ġesù hu l-​Iben uniġenitu t’Alla, l-​ewwel imwieled mill-​ħolqien kollu.—Ġwann 3:16; Kolossin 1:15.

◻ Xi żewġ millennji ilu, Alla ttrasferixxa l-​ħajja taʼ Ġesù għal ġol-​ġuf taʼ verġni Lhudija biex jiġi mwieled bħala bniedem.—Mattew 1:18; Ġwann 1:14.

◻ Ġesù kien iktar minn sempliċement raġel tajjeb. Hu kien f’kull aspett riflessjoni leali tal-​personalità sabiħa taʼ Missieru, Alla Jehovah.—Ġwann 14:9, 10; Lhud 1:3.

◻ Matul il-​ministeru tiegħu fuq l-​art, Ġesù b’imħabba ħa ħsieb tal-​bżonnijiet taʼ dawk maħqurin. Fejjaq mirakolożament lill-​morda u saħansitra qajjem lill-​mejtin.—Mattew 11:4-6; Ġwann 11:5-45.

◻ Ġesù pproklama s-​Saltna t’Alla bħala l-​unika tama għall-​umanità mnikkta, u ħarreġ lid-​dixxipli tiegħu biex ikomplu dan ix-​xogħol taʼ l-​ippridkar.—Mattew 4:17; 10:5-7; 28:19, 20.

◻ Fl-​14 taʼ Nisan (madwar l-​1 t’April), 33 E.K., Ġesù ġie arrestat, mgħoddi ġuri, issentenzjat, u maqtul fuq l-​akkuża falza taʼ sedizzjoni.—Mattew 26:18-20; 26:48–27:50.

◻ Il-​mewt taʼ Ġesù sservi bħala rahan, billi teħles lill-​umanità kredenti mill-​istat midneb tagħha u b’hekk tiftaħ il-​mogħdija għall-​ħajja eterna għal dawk kollha li jeżerċitaw fidi fih.—Rumani 3:23, 24; 1 Ġwann 2:2.

◻ Fis-​16 taʼ Nisan, Ġesù ġie rxoxtat, u ftit żmien wara dan telaʼ lura lejn is-​sema biex iħallas lil Missieru l-​valur tar-​rahan tal-​ħajja umana perfetta tiegħu.—Mark 16:1-8; Luqa 24:50-53; Atti 1:6-9.

◻ Bħala s-​Sultan maħtur taʼ Jehovah, Ġesù rxoxtat għandu awtorità sħiħa biex iwettaq l-​iskop oriġinali t’Alla għall-​bniedem.—Isaija 9:6, 7; Luqa 1:32, 33.

B’hekk, il-​Bibbja tippreżenta lil Ġesù bħala l-​figura prinċipali fit-​twettiq taʼ l-​iskopijiet t’Alla. Imma kif tistaʼ tkun ċert li dan hu dak Ġesù veru​—Ġesù taʼ l-​istorja, li kien imwieled ġewwa Betlehem u li mexa fuq din l-​art xi 2,000 sena ilu?

Bażi Għall-​Fiduċja

Ħafna dubji jistgħu jitneħħew sempliċement billi taqra l-​Iskrittura Griega Kristjana b’moħħ mingħajr preġudizzji. F’li tagħmel hekk, se ssib li r-​rakkont tal-​Bibbja m’huwiex rakkont vag taʼ ġrajjiet, kif inhu fil-​każ tal-​mitoloġija. Minflok, ismijiet, żminijiet speċifiċi, u postijiet eżatti huma mniżżlin. (Per eżempju, ara Luqa 3:1, 2.) Iżjed minn hekk, id-​dixxipli taʼ Ġesù huma deskritti b’onestà rimarkevoli, bi frankezza li tnissel fiduċja fil-​qarrej. Il-​kittieba ma ħbew il-​ħtijiet taʼ ħadd​—saħansitra lanqas tagħhom infushom—​sabiex id-​dokumentar ikun leali. Iva, int se tinduna li l-​Bibbja hija l-​verità.—Mattew 14:28-31; 16:21-23; 26:56, 69-75; Mark 9:33, 34; Galatin 2:11-14; 2 Pietru 1:16.

Ir-rakkonti ppreżentati fl-​Iskrittura Griega Kristjana kienu aċċettati bla tlaqliq minn eluf li kienu jgħixu fl-​ewwel seklu. Saħansitra l-​għedewwa tal-​Kristjanità ma ċaħdux il-​verità taʼ dak li Ġesù ġie rrapportat li qal u li għamel. Inkwantu għall-​possibiltà li l-​karattru taʼ Ġesù kien mirqum mid-​dixxipli tiegħu wara mewtu, il-​Professur F. F. Bruce jikkummenta: “Ċertament li ma kinitx daqshekk faċli daqskemm xi kittieba jistgħu jaħsbu biex tivvinta kliem u għemejjel taʼ Ġesù f’dawk is-​snin bikrin, meta daqstant dixxipli Tiegħu kienu għadhom ħajjin, li setgħu jiftakru x’kien u x’ma kienx seħħ. . . . Id-​dixxipli ma setgħux jaffordjaw li jissograw ineżattezzi (aħseb u ara manipulazzjoni apposta tal-​fatti), li kienu jiġu mikxufin mill-​ewwel minn dawk li żgur li kienu jieħdu gost jagħmlu hekk.”

Għala Ma Jemmnux

Minkejja dan, xi studjużi jibqgħu xettiċi. Fil-​waqt li jassumu li l-​kitbiet Bibliċi huma fittizji, huma jiflu b’ħerqa kitbiet apokrifi u jaċċettawhom bħala li huma taʼ min jemminhom! Għala? Ovvjament, il-​kitbiet tal-​Bibbja fihom affarijiet li ħafna nies intellettwali moderni ma jridux jemmnuhom.

Xi xettiċi għandhom motivi ulterjuri f’li jwarrbu l-​Iskrittura Griega Kristjana. Il-​problema li għandhom m’hijiex minħabba l-​kredibbiltà tagħha imma minħabba l-​livelli tagħha. Per eżempju, Ġesù qal dwar is-​segwaċi tiegħu: “Huma m’humiex tad-​dinja, kif jiena m’iniex tad-​dinja.” (Ġwann 17:14) Madankollu, ħafna li jgħidu li huma Kristjani huma involuti profondament fl-​affarijiet politiċi taʼ din id-​dinja, saħansitra billi huma involuti fi gwerer imdemmijin. Minflok ma jikkonformaw mal-​livelli tal-​Bibbja, ħafna nies kieku jixtiequ li l-​Bibbja tikkonforma mal-​livelli tagħhom stess.

Ikkunsidra, ukoll, il-​kwistjoni tal-​morali. Ġesù ta parir qawwi lill-​kongregazzjoni taʼ Tijatira talli ttollerat il-​prattika tal-​fornikazzjoni. “Jiena hu dak li jifli l-​ġewwieni [“kliewi,” New World Translation] u l-​qalb,” qalilhom, “u li jagħti lil kull wieħed minnkom skond ma ħaqqu għall-​opri tiegħu.”a (Apokalissi 2:18-23) Madankollu, m’huwiex dan veru li ħafna li jistqarru li huma Kristjani jwarrbu l-​livelli morali fil-​ġenb? Jippreferu jwarrbu dak li qal Ġesù milli jwarrbu l-​korsa taʼ kondotta immorali tagħhom.

Insibu Lil Dak Ġesù Veru

Ġesù stinka biex iqanqal il-​qlub taʼ dawk li sinċerament huma bil-​ġuħ għall-​verità u t-​tjieba. (Mattew 5:3, 6; 13:10-15) Uħud bħal dawn iwieġbu għall-​istedina taʼ Ġesù: “Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-​madmad tiegħi u tgħallmu minni, għaliex jiena taʼ qalb ħelwa u umli, u intom issibu l-​mistrieħ għal ruħkom. Għax il-​madmad tiegħi ħelu u t-​toqol tiegħi ħafif.”—Mattew 11:28-30.

Dan Ġesù veru ma jinstabx fil-​kotba miktubin minn studjużi moderni; lanqas ma jinstab fil-​knejjes tal-​Kristjaneżmu, li saru art għammiela għal tradizzjonijiet magħmulin mill-​bniedem. Tistaʼ ssib lil dak Ġesù storiku fil-​kopja tiegħek tal-​Bibbja. Tixtieq titgħallem iżjed dwaru? Ix-​Xhieda taʼ Jehovah ikunu ferħanin li jgħinuk tagħmel dan.

[Nota taʼ taħt]