Paċi Vera​—Minn Liema Sors?

“[Jehovah] iwaqqaf il-​gwerer sa tarf l-​art.”—SALM 46:10 [SALM 46:9, NW].

1. Liema wegħda meraviljuża taʼ paċi nsibu fil-​profezija taʼ Isaija?

“IS-​SLIEM ikun frott il-​ġustizzja, u l-​ħidma tal-​ġustizzja tkun serħan u tama għal dejjem. U l-​poplu tiegħi f’post tas-​sliem, jgħammar bla biżaʼ, mistrieħ fil-​kwiet.” (Isaija 32:17, 18) X’wegħda sabiħa dik! Hija wegħda taʼ paċi vera miġjuba minn Alla.

2, 3. Iddeskrivi l-​paċi vera.

² X’inhi, iżda, il-​paċi vera? Hija din sempliċement in-​nuqqas taʼ gwerer? Jew hi biss perijodu li fih il-​ġnus iħejju għall-​gwerra li jmiss? Hija l-​paċi vera sempliċi ħolma? Dawn huma mistoqsijiet li għalihom neħtieġu tweġibiet taʼ min joqgħod fuqhom. L-​ewwel, il-​paċi vera hija wisq iżjed minn ħolma. Il-​paċi mwiegħda t’Alla tisboq lil kwalunkwe ħaġa li din id-​dinja tistaʼ timmaġina. (Isaija 64:3 [Isaija 64:4, NW]) Din m’hijiex paċi għal xi ftit snin jew ftit għexur taʼ snin. Din tibqaʼ għal dejjem! U m’hijiex paċi biss għal xi ftit uħud privileġġati​—tħaddan is-​sema u l-​art, l-​anġli u l-​bnedmin. Testendi għal nies taʼ kull ġens, grupp etniku, lingwa, u kulur. Ma tagħraf ebda fruntieri, ebda barrikati, ebda fallimenti.—Salm 72:7, 8; Isaija 48:18.

³ Paċi vera tfisser paċi kuljum. Tfisser li int tqum kull fil-​għodu mingħajr ħsieb taʼ gwerra, mingħajr ma jkollok tinkwieta dwar il-​futur tiegħek, il-​futur taʼ wliedek, saħansitra l-​futur taʼ wlied uliedek. Tfisser paċi sħiħa tal-​moħħ. (Kolossin 3:15) Tfisser qatt iktar kriminalità, qatt iktar vjolenza, qatt iktar familji mifrudin, qatt iktar nies bla djar, qatt iktar nies imutu bil-​ġuħ jew bil-​kesħa, u qatt iktar disperazzjoni u frustrazzjoni. Jerġaʼ aħjar, il-​paċi t’Alla tfisser dinja mingħajr mard, uġigħ, niket, jew mewt. (Apokalissi 21:4) X’tama meraviljuża għandna li ngawdu l-​paċi vera għal dejjem! M’huwiex dan it-​tip taʼ paċi u hena li lkoll kemm aħna nixxennqu għalih? M’huwiex dan it-​tip taʼ paċi li għandna nitolbu u naħdmu għalih?

L-​Isforzi Falluti Tal-​Bniedem

4. Il-​ġnus liema sforzi għall-​paċi għamlu, u b’liema riżultati?

⁴ Ilhom sekli sħaħ in-​nies u l-​ġnus jitkellmu dwar il-​paċi, jiddibattu dwar il-​paċi, jiffirmaw mijiet taʼ trattati taʼ paċi. X’kien ir-​riżultat? F’dawn l-​aħħar 80 sena, tistaʼ tgħid li qatt ma kien hemm mument wieħed meta xi ġens jew grupp ma kienx fil-​gwerra. Biċ-​ċar, il-​paċi ħarbitlu lill-​bniedem. Mela l-​mistoqsija hi, Għala fallew l-​isforzi kollha tal-​bniedem biex jistabbilixxi paċi internazzjonali, u l-​bniedem għala mhux kapaċi jġib paċi vera li tibqaʼ?

5. L-​isforzi taʼ l-​umanità għall-​paċi għala fallew konsistentement?

⁵ It-​tweġiba sempliċi hi li l-​umanità ma daritx lejn is-​sors it-​tajjeb għal paċi vera. Taħt l-​influwenza taʼ Satana x-​Xitan, il-​bnedmin ħolqu organizzazzjonijiet li jaqgħu vittmi tad-​dgħjufijiet u l-​vizzji tagħhom stess​—ir-​regħba u l-​ambizzjoni tagħhom, il-​leblieba tagħhom għall-​poter u l-​prominenza. Irrikorrew għal istituzzjonijiet taʼ tagħlim iktar għoli u stabbilew fondazzjonijiet u korporazzjonijiet, li vvintaw biss iktar mezzi t’oppressjoni u qerda. Il-​bnedmin lejn liema sors ġew iddireġuti? Fejn fittxew?

6, 7. (a) Il-​Lega tan-​Nazzjonijiet liema rekord għamlet għaliha nfisha? (b) X’inhu r-​rekord tal-​Ġnus Magħquda?

⁶ Lura fl-​1919 il-​ġnus poġġew il-​fiduċja tagħhom fil-​Lega tan-​Nazzjonijiet biex tistabbilixxi paċi permanenti. Dik it-​tama ġiet fix-​xejn meta Mussolini invada l-​Etjopja fl-​1935 u bil-​gwerra ċivili fi Spanja li bdiet fl-​1936. Il-​Lega spiċċat għal kollox meta faqqgħet it-​Tieni Gwerra Dinjija fl-​1939. L-​hekk imsejħa paċi lanqas biss damet 20 sena.

⁷ Xi ngħidu dwar il-​Ġnus Magħquda? Ipprovdiet din xi tama reali taʼ paċi dejjiema maʼ l-​art kollha? Xejn affattu. Minn mindu din bdiet topera fl-​1945 ġew miġġielda iktar minn 150 gwerra u konflitt bl-​armi! Mhux taʼ b’xejn li Gwynne Dyer, Kanadiż li jistudja dwar il-​gwerra u l-​oriġini tagħha, iddeskriva lill-​ĠM bħala “assoċjazzjoni taʼ ħallelin taʼ l-​annimali mibdulin fi protetturi tagħhom, mhux assemblea taʼ qaddisin,” u “fil-​biċċa l-​kbira istituzzjoni bla saħħa taʼ ħafna paroli fil-​vojt.”—Qabbel Ġeremija 6:14; 8:15.

8. Minkejja t-​taħditiet tagħhom favur il-​paċi, il-​ġnus x’kienu u għadhom qegħdin jagħmlu? (Isaija 59:8)

⁸ Minkejja l-​paroli tagħhom dwar il-​paċi, il-​ġnus ikomplu jivvintaw u jimmanifatturaw l-​armamenti. Il-​pajjiżi li jisponsorjaw konferenzi taʼ paċi taʼ spiss huma stess qegħdin fuq quddiem fil-​manifattura taʼ l-​armi. Interessi kummerċjali qawwija f’dawn il-​pajjiżi jippromwovu l-​produzzjoni t’armamenti qattiela, inklużi land mines djaboliċi li kull sena joqtlu jew jimmankaw madwar 26,000 nies ċivili kbar u żgħar. Ir-​regħba u l-​korruzzjoni huma forzi motivanti. It-​tixħim u l-​għotjiet taʼ flus imorru id f’id man-​negozju internazzjonali taʼ l-​armi. Xi politikanti jistagħnew minn dan is-​sors.

9, 10. Esperti dinjin x’osservaw rigward il-​gwerer u l-​isforzi umani?

⁹ F’Diċembru 1995, Joseph Rotblat, xjenzat Pollakk tal-​fiżika u rebbieħ tal-​Premju Nobel għall-​Paċi, appella lill-​ġnus biex iwaqqfu t-​tellieqa taʼ l-​armamenti. Hu qal: “L-​uniku mod biex ma ssirx [tellieqa ġdida taʼ l-​armamenti] huwa li l-​gwerra tiġi abolita għalkollox.” Taħseb int li dan x’aktarx li jseħħ? Mill-​1928 ’il quddiem, 62 ġens irratifikaw il-​Patt Kellogg-Briand li bih irrinunzjaw il-​gwerer bħala mod biex jissetiljaw id-​differenzi. It-​Tieni Gwerra Dinjija wriet biċ-​ċar li l-​patt lanqas biss kien jiswa l-​karta li nkiteb fuqha.

¹⁰ Mingħajr ebda dubju, il-​gwerer minn dejjem kienu ġebel taʼ tfixkil fil-​passaġġ taʼ l-​istorja taʼ l-​umanità. Bħalma kiteb Gwynne Dyer, “il-​gwerra hija istituzzjoni ċentrali fiċ-​ċivilizzazzjoni umana, u għandha storja twila daqs iċ-​ċivilizzazzjoni nfisha.” Iva, tistaʼ tgħid li kull ċivilizzazzjoni u imperu kellhom l-​eroj militari meqjumin tagħhom, l-​armati tagħhom dejjem għal-​lest, il-​battalji famużi tagħhom, l-​akkademji militari sagrosanti tagħhom, u l-​ħażna t’armi tagħhom. Madankollu, is-​seklu tagħna huwa kkaratterizzat bi gwerer iktar minn kwalunkwe seklu ieħor, kemm fil-​qerda u kemm fit-​telf taʼ ħajja.

11. Il-​mexxejja dinjin liema fattur bażiku injoraw fit-​tfittxija tagħhom għall-​paċi?

¹¹ Huwa ovvju li l-​mexxejja dinjin injoraw l-​għerf bażiku taʼ Ġeremija 10:23: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” Jekk Alla jiġi injorat, ma jistax ikun hemm paċi vera. Ifisser dan kollu, allura, li l-​gwerer huma inevitabbli f’soċjetà ċivilizzata? Ifisser dan li l-​paċi​—il-​paċi vera—​hija ħolma impossibbli?

Insibu R-​Raġuni Bażika

12, 13. (a) Il-​Bibbja x’tirrivela rigward il-​kaġun bażiku, inviżibbli tal-​gwerer? (b) Satana kif dawwar l-​attenzjoni taʼ l-​umanità lil hinn mis-​soluzzjoni reali għall-​problemi tad-​dinja?

¹² Biex inwieġbu dawk il-​mistoqsijiet, għandna bżonn nifhmu x’jikkaġuna l-​gwerer. Il-​Bibbja tistqarr b’mod ċar li l-​anġlu ribelluż Satana hu l-​“qattiel” u l-​“giddieb” oriġinali u li “d-​dinja kollha qiegħda taħt idejn il-​Ħażin.” (Ġwann 8:44; 1 Ġwann 5:19) X’għamel dan biex javanza l-​iskemi tiegħu? Naqraw fit-2 Korintin 4:3, 4: “Jekk imbagħad l-​Evanġelju tagħna jibqaʼ mistur, jibqaʼ mistur għal dawk li jintilfu; dawk li l-​alla taʼ din id-​dinja dallmilhom il-​moħħ tagħhom nieqes mill-​fidi, biex ma jarawx jiddi d-​dawl taʼ l-​Evanġelju glorjuż taʼ Kristu, li hu xbieha taʼ Alla.” Satana jagħmel dak kollu possibbli biex idawwar l-​attenzjoni tal-​bnedmin ’il bogħod mis-​Saltna t’Alla bħala s-​soluzzjoni għall-​problemi tad-​dinja. Hu jagħmi u jiżvija lin-​nies bi kwistjonijiet soċjali, politiċi, u reliġjużi diviżivi, sabiex dawn jidhru li huma iżjed importanti mit-​tmexxija t’Alla. Il-​mewġa dinjija riċenti taʼ nazzjonaliżmu hija eżempju f’waqtu.

¹³ Satana x-​Xitan jippromwovi n-​nazzjonaliżmu u t-​tribwaliżmu, it-​twemmin fis-​superjorità taʼ xi ġens, razza, jew tribù fuq oħrajn. Mibegħda b’għeruq fil-​fond li ilha tiġi mrażżna għal sekli sħaħ qiegħda tingħata l-​ħajja mill-​ġdid biex tkebbes iżjed gwerer u konflitti. Federico Mayor, direttur ġenerali tal-​UNESCO, wissa dwar din it-​tendenza: “Saħansitra fejn it-​tolleranza kienet prevalenti, bidla lejn ix-​xenofobja [biżaʼ mill-​barranin] qiegħda ssir iżjed evidenti, u rimarki parzjali jew razzisti li kienu qishom spiċċaw qegħdin jinstemgħu iżjed u iżjed taʼ spiss.” X’kien ir-​riżultat? Il-​massakri makabri fl-​ex Jugoslavja u t-​tixrid taʼ demm bejn it-​tribujiet fl-​Irwanda huma biss żewġ żviluppi bħal dawn li smajna dwarhom fl-​aħbarijiet.

14. Apokalissi 6:4 kif jagħti stampa tal-​gwerer u l-​effetti tagħhom fi żmienna?

¹⁴ Il-​Bibbja bassret li fiż-​żmien tat-​tmiem taʼ din is-​sistema żiemel lewn in-​nar, li jissimbolizza l-​gwerer, kellu jiggaloppja maʼ l-​art kollha. Naqraw f’Apokalissi 6:4: “Ħareġ żiemel ieħor, taʼ lewn aħmar nar, u lil dak li kien riekeb fuqu ngħatatlu s-​setgħa li jeqred il-​paċi minn fuq wiċċ l-​art, ħalli b’hekk il-​bnedmin jitqatlu bejniethom; u għalhekk ingħatatlu xabla kbira.” Mill-​1914 ’l hawn rajna lil dan ir-​rikkieb simboliku “jeqred il-​paċi,” u l-​ġnus komplew jiġġieldu u jiggwerraw.

15, 16. (a) X’kien u għadu l-​irwol tar-​reliġjon fil-​gwerer u l-​qtil? (b) Jehovah kif iqisu dak li għamlu r-​reliġjonijiet?

¹⁵ Dak li ma rridux ninsew hu l-​irwol tar-​reliġjon f’dawn il-​gwerer u l-​qtil. L-​istorja mdemmija taʼ l-​umanità tistaʼ tiġi attribwita fil-​parti l-​kbira lill-​influwenza li tiżvija tar-​reliġjon falza. It-​teologu Kattoliku Hans Küng kiteb: “Ħadd ma jistaʼ jiċħad li f’termini negattivi u distruttivi [r-reliġjonijiet] taw u għadhom jagħtu kontribut enormi. Hemm tant u tant taqbid, konflitti mdemmija, tabilħaqq ‘gwerer reliġjużi,’ li huma jridu jagħtu kont tagħhom; . . . u dan japplika wkoll għaż-​żewġ gwerer dinjin.”

¹⁶ Alla Jehovah kif iqis l-​irwol tar-​reliġjon falza fil-​qtil u l-​gwerer? L-​akkuża minn Alla fuq ir-​reliġjon falza, iddokumentata f’Apokalissi 18:5, tistqarr: “Dnubietha saru ħemel għoli sas-​sema, u Alla ftakar fl-​għemejjel ħżiena tagħha.” Il-​kompliċità tar-​reliġjon falza mal-​mexxejja politiċi tad-​dinja tammonta għal tant ħtija taʼ demm, ħemel tant kbir taʼ dnubiet miġmugħa, li Alla sempliċement ma jistax jinjorah. Hu dalwaqt jelimina kompletament lil dan ix-​xkiel fil-​mogħdija tal-​paċi vera.—Apokalissi 18:21.

It-​Triq Lejn Il-​Paċi

17, 18. (a) Għala m’hijiex biss ħolma fiergħa li temmen li paċi għal dejjem hi possibbli? (b) Jehovah liema ħaġa diġà għamel biex jiżgura li paċi vera se tiġi?

¹⁷ Jekk il-​bnedmin, permezz t’aġenziji bħall-​Ġnus Magħquda, ma jistgħux iġibu paċi vera u dejjiema, il-​paċi vera minn liema sors se tiġi, u kif? Hi biss ħolma mhix realistika li temmen li paċi għal dejjem hi possibbli? Mhux jekk induru lejn is-​sors it-​tajjeb taʼ paċi. U dan min hu? Salm 46:10 jwieġeb billi jgħidilna li Jehovah “iwaqqaf il-​gwerer sa tarf l-​art; l-​ark jaqsam u l-​lanza jkisser, jaħraq it-​tarka bin-​nar.” U Jehovah diġà beda l-​proċess biex itemm il-​gwerer u jistabbilixxi paċi vera. Kif? Billi poġġa lil Kristu Ġesù fuq it-​tron leġittimu tiegħu tas-​Saltna fl-​1914 u billi ppromwova l-​akbar kampanja edukattiva għall-​paċi fl-​istorja taʼ l-​umanità. Il-​kliem profetiku taʼ Isaija 54:13 jiżgurana: “Uliedek ilkoll ikunu mgħallma mill-​Mulej, kbir għad ikun ġid uliedek.”

¹⁸ Din il-​profezija tagħti stampa tal-​prinċipju tal-​kawża u l-​effett​—jiġifieri, kull effett għandu l-​kawża tiegħu. F’dan il-​każ, it-​tagħlim taʼ Jehovah​—il-​kawża—​ibiddel lil nies li jħobbu jiggwerraw f’nies li jħobbu l-​paċi u li huma paċi m’Alla. L-​effett huwa l-​bidla fil-​qalb li tagħmel lin-​nies uħud li jħobbu l-​paċi. Dan it-​tagħlim li jbiddel il-​qlub u l-​imħuħ tan-​nies qiegħed saħansitra issa jinfirex mad-​dinja kollha hekk kif miljuni jsegwu l-​eżempju tal-​“Prinċep tas-​sliem,” Ġesù Kristu.—Isaija 9:5 [Isaija 9:6, NW].

19. Ġesù x’għallem dwar il-​paċi vera?

¹⁹ U Ġesù x’għallem dwar il-​paċi vera? Hu tkellem mhux biss dwar paċi bejn il-​ġnus imma dwar paċi bejn in-​nies fir-​relazzjonijiet tagħhom u dwar il-​paċi ġewwinija li tiġi minn kuxjenza tajba. Fi Ġwann 14:27, naqraw il-​kliem taʼ Ġesù lis-​segwaċi tiegħu: “Jiena nħallilkom is-​sliem; nagħtikom is-​sliem tiegħi; ma nagħtihulkomx kif tagħtih id-​dinja. Tħallux qalbkom titħawwad u anqas titbeżżaʼ.” Il-​paċi taʼ Ġesù kif kienet differenti minn dik tad-​dinja?

20. Ġesù permezz taʼ liema ħaġa se jġib paċi vera?

²⁰ L-​ewwel, il-​paċi taʼ Ġesù kienet marbuta mill-​qrib mal-​messaġġ tiegħu tas-​Saltna. Hu kien jaf li l-​gvern taʼ tjieba tas-​sema, ifformat minn Ġesù u 144,000 mexxejja mseħbin, kellu jġib fi tmiem il-​gwerer u lil dawk li joħolquhom. (Apokalissi 14:1, 3) Kien jaf li dan kellu jġib il-​kundizzjonijiet sereni taʼ Ġenna li hu kien offra lil dak il-​kriminal li miet maġenbu. Ġesù m’offrilux post fis-​Saltna tas-​sema, imma qallu: “Tassew ngħidlek, . . . tkun fil-​Ġenna miegħi.”—Luqa 23:43.

21, 22. (a) Il-​paċi vera tinkludi liema tama taʼ l-​għaġeb li ssostnik? (b) X’għandna nagħmlu biex nixhdu dik il-​barka?

²¹ Ġesù kien jaf ukoll li s-​Saltna tiegħu kellha ġġib faraġ lil dawk kollha li jeżerċitaw fidi fih u li huma mnikktin minħabba t-​telfa taʼ xi ħadd maħbub. Il-​paċi tiegħu tinkludi t-​tama taʼ l-​irxoxt li ssostni b’mod taʼ l-​għaġeb lil dak li jkun. Ftakar fil-​kliem inkuraġġanti tiegħu li jinsab fi Ġwann 5:28, 29: “Tistagħġbux b’dan: tiġi siegħa meta dawk kollha li jkunu fl-​oqbra jisimgħu leħnu u joħorġu; dawk li jkunu għamlu t-​tajjeb iqumu għall-​ħajja, imma dawk li jkunu għamlu l-​ħażin iqumu għall-​kundanna.”

²² Tħares int ’il quddiem lejn dak iż-​żmien? Tlift int lil xi maħbubin għeżież fil-​mewt? Tixxennaq int biex tarahom mill-​ġdid? Allura aċċetta l-​paċi li joffri Ġesù. Ħa jkollok fidi bħal dik taʼ Marta, oħt Lażżru, li qalet lil Ġesù: “Jiena naf li jerġaʼ jqum, fil-​qawmien mill-​imwiet fl-​aħħar jum.” Imma innota t-​tweġiba li thennik li Ġesù ta lil Marta: “Jien hu l-​qawmien u l-​ħajja. Kull min jemmen fija, ukoll jekk imut, jgħix; u kull min jgħix u jemmen fija, dan ma jmut qatt. Temmnu inti dan?”—Ġwann 11:24-26.

23. Għarfien eżatt tal-​Kelma t’Alla għala hu essenzjali biex niksbu l-​paċi vera?

²³ Int ukoll tistaʼ temmen f’dik il-​wegħda u tibbenefika minnha. Kif? Billi tikseb għarfien eżatt tal-​Kelma t’Alla. Innota kif l-​appostlu Pawlu enfasizza l-​importanza taʼ l-​għarfien eżatt: “Aħna . . . ma hedejniex nitolbu għalikom, u nibqgħu nitolbu li tagħrfu sewwa r-​rieda taʼ Alla bl-​għerf kollu u d-​dehen spiritwali, Hekk tkunu tistgħu tgħixu sewwa kif jixraq lill-​Mulej u togħġbuh f’kollox bil-​frott taʼ kull opra tajba, u tikbru fl-​għarfien taʼ Alla.” (Kolossin 1:9, 10) Dan l-​għarfien eżatt se jikkonvinċik li Alla Jehovah hu s-​sors tal-​paċi vera. Dan se jgħidlek ukoll x’għandek tagħmel issa biex tistaʼ tingħaqad mas-​salmista f’li tgħid: “Nimtedd u norqod minnufih fis-​sliem, għax int waħdek, Mulej, fis-​sod tqegħedni.”—Salm 4:8. (w97 4/15)

Tistaʼ Tispjega?

◻ L-​isforzi umani għall-​paċi għala fallew konsistentement?

◻ X’inhi r-​raġuni bażika tal-​gwerra?

◻ Paċi dejjiema għala m’hijiex ħolma fiergħa?

◻ X’inhu s-​sors taʼ paċi vera?

[Stampa f’paġna 7]

Il-​paċi vera m’hijiex ħolma. Hija l-​wegħda t’Alla

[Stampa f’paġna 8]

Mill-​1914 ’l hawn ir-​rikkieb simboliku taż-​żiemel lewn in-​nar neħħa l-​paċi minn fuq l-​art

[Stampa f’paġna 9]

Jistgħu r-​reliġjon u l-​ĠM jġibu l-​paċi?

[Sors]

Ritratt ĠM