Segretezza f’Isem il-​Mulej

ATTAKK b’gass velenuż fuq is-​subway taʼ Tokjo, fil-​Ġappun, f’Marzu taʼ l-​1995 qatel 12-il persuna, marrad eluf iżjed, u għen biex jinkixef sigriet. Setta reliġjuża magħrufa bħala Aum Shinrikyo (Verità Suprema) kienet akkumulat bil-​moħbi ħażna taʼ gass sarin ħalli tużah biex tilħaq għanijiet misterjużi.

Xahar wara, splużjoni taʼ bomba farrket bini federali fil-​belt taʼ Oklahoma, l-​Istati Uniti, u qatlet 167 ruħ. L-​evidenza donnha indikat li l-​attakk kien b’xi mod konness mat-​tilwima tal-​gvern mal-​kult reliġjuż tal-​Branch Davidian ġewwa Waco, Texas, eżattament sentejn qabel. F’dak iż-​żmien mietu madwar 80 membru tal-​kult. L-​isplużjoni tal-​bomba kixfet ukoll dak li kien sigriet għall-​biċċa l-​kbira tan-​nies: Partita gruppi tal-​milizzja paramilitari issa qegħdin joperaw fl-​Istati Uniti, u mill-​inqas xi wħud minnhom huma ssuspettati li qegħdin jippjanaw segretament azzjoni kontra l-​gvern.

Iktar tard, hekk kif waslet biex tintemm l-​1995, l-​iġsma maħruqin taʼ 16-il persuna nstabu ġewwa foresta żgħira ħdejn Grenoble, fi Franza. Dawn kienu membri taʼ l-​Ordni tat-​Tempju Solari, kult reliġjuż żgħir li f’Ottubru taʼ l-​1994 issemma fuq l-​aħbarijiet ġewwa l-​Isvizzera u l-​Kanada meta 53 mill-​membri tiegħu jew ikkommettew suwiċidju jew ġew maqtulin. Imma saħansitra wara din it-​traġedja, is-​setta baqgħet tiffunzjona. Sal-​lum il-​motivazzjoni u l-​għanijiet tagħha għadhom misturin fis-​segretezza.

Il-​Perikli Tas-​Segretezza Reliġjuża

Meta tqis ġrajjiet bħal dawn, huwa taʼ sorpriża li ħafna nies jissuspettaw lill-​gruppi reliġjużi? Ċertament li ħadd ma jkun irid jappoġġja organizzazzjoni sigrieta​—kemm dik reliġjuża u kemm dik li m’hijiex—​li tuża ħażin il-​fiduċja tiegħu u ġġagħlu jsegwi għanijiet li ma jaqbilx magħhom. X’jistgħu jagħmlu n-​nies, iżda, biex jevitaw li jaqgħu fin-​nassa taʼ involviment maʼ soċjetajiet sigrieti taʼ natura dubjuża?

Ovvjament, kull min qed jikkunsidra li jsir membru f’soċjetà sigrieta jkun għaqli li jkun żgur mill-​objettivi veri tiegħu. Hu jrid jgħasses kontra pressjoni mill-​ħbieb jew min-​nies li jaf u jibbaża kull deċiżjoni mhux fuq l-​emozzjoni imma fuq il-​fatti. Ftakar, x’aktarx li se jkun l-​individwu nnifsu​—mhux l-​oħrajn—​li se jiġi mitlub biex ibati kwalunkwe konsegwenzi li jinqalgħu.

Li ssegwi l-​prinċipji tal-​Bibbja huwa l-​iżjed metodu żgur biex tevita gruppi perikolużi li l-​motivi tagħhom m’humiex onorabbli. (Isaija 30:21) Dan jinvolvi li nżommu newtralità politika, nuru mħabba lejn oħrajn, saħansitra lejn għedewwa, nevitaw “l-​għemejjel tal-​ġisem,” u nikkultivaw il-​frott taʼ l-​ispirtu t’Alla. Fuq kollox, Kristjani veri ma jridu jkunu ebda parti mid-​dinja, saħansitra bl-​istess mod li Ġesù ma kienx, u din il-​korsa teskludi li wieħed jipparteċipa f’soċjetajiet sigrieti dinjin.—Galatin 5:19-23; Ġwann 17:14, 16; 18:36; Rumani 12:17-21; Ġakbu 4:4.

Ix-Xhieda taʼ Jehovah huma studenti serji tal-​Bibbja li l-​fidi tagħhom jiħduha bis-​serjetà u bil-​miftuħ jipprovaw jgħixu skond ma jemmnu. Madwar id-​dinja, huma magħrufin sew bħala grupp reliġjuż li ‘jfittex is-​sliem u jqis li jiksbu.’ (1 Pietru 3:11) Il-​ktieb tagħhom Jehovah’s Witnesses​—Proclaimers of God’s Kingdom jinnota b’mod korrett: “Ix-​Xhieda taʼ Jehovah m’huma fl-​ebda sens soċjetà sigrieta. It-​twemmin tagħhom ibbażat fuq il-​Bibbja huwa spjegat għal kollox f’pubblikazzjonijiet li huma disponibbli għal kulħadd. Barra minn hekk, huma jagħmlu sforz speċjali biex jistiednu lill-​pubbliku ħalli jattendi l-​laqgħat biex jara u jismaʼ għalih innifsu x’jiġri u x’ma jiġrix.”

Ir-reliġjon vera bl-​ebda mod ma tipprattika s-​segretezza. Adoraturi taʼ dak Alla veru ġew struwiti biex ma jaħbux l-​identità tagħhom jew joskuraw l-​iskop tagħhom bħala Xhieda taʼ Jehovah. Id-​dixxipli bikrin taʼ Ġesù mlew lill-​Ġerusalemm bit-​tagħlim tagħhom. It-​twemmin u l-​attività tagħhom wettquhom fil-​beraħ. L-​istess huwa veru għax-​Xhieda taʼ Jehovah llum. Taʼ min jifhem li, meta reġimi dittatorjali b’mod żbaljat irażżnu l-​libertà tal-​qima, il-​Kristjani jridu b’attenzjoni u b’kuraġġ ikomplu bl-​attività tagħhom, billi jobdu “aktar lil Alla milli l-​bnedmin.” Sitwazzjoni li hija inforzata fuqhom minħabba x-​xiehda pubblika kuraġġuża tagħhom.—Atti 5:27-29; 8:1; 12:1-14; Mattew 10:16, 26, 27.

Jekk xi darba għaddielek minn moħħok li x-​Xhieda taʼ Jehovah għandhom mnejn huma xi kult jew setta sigrieti, dak kien x’aktarx għaliex int kont taf ftit wisq dwarhom. Dik bil-​fors li kienet is-​sitwazzjoni fil-​każ taʼ ħafna fl-​ewwel seklu.

Atti kapitlu 28 jgħidilna dwar laqgħa li l-​appostlu Pawlu kellu f’Ruma mal-​“kapijiet tal-​Lhud.” Huma qalulu: “[I]rridu nisimgħu mingħandek kif taħsibha int; għax dwar din is-​setta nafu li kullimkien qegħdin jeħduha kontra tagħha.” (Atti 28:16-22) Bi tweġiba, Pawlu “qagħad jagħtihom xhieda u jfissrilhom x’inhi s-​Saltna taʼ Alla,” u “xi wħud emmnu dak li qalilhom.” (Atti 28:23, 24) Ċertament li kien għall-​benefiċċju dejjiemi tagħhom li jiksbu l-​fatti attwali dwar il-​Kristjanità vera.

Iddedikati kif inhuma għas-​servizz t’Alla, bil-​miftuħ u fil-​pubbliku, ix-​Xhieda taʼ Jehovah huma lesti li bil-​qalb kollha jiżvelaw il-​fatti kif inhuma taʼ l-​attivitajiet u t-​twemmin tagħhom lil kull min jimpurtah li jkun jaf il-​fatti. Għala ma tinvestigax għalik innifsek, u b’hekk tkun f’pożizzjoni li tkun informat b’mod xieraq inkwantu għall-​fidi tagħhom? (w97 6/1)

[Stampa f’paġna 6]

Ix-​Xhieda taʼ Jehovah huma lesti li bil-​qalb kollha jiżvelaw min huma u x’qegħdin jagħmlu