Inqimu lil Alla bil-​Verità

Biex il-​qima tkun aċċettabbli għal Alla, trid tkun ibbażata fuq il-​verità. (Ġwann 4:23) Il-​Bibbja tidentifika lill-​adoraturi veri bħala li jappartjenu lill-​“Knisja taʼ Alla l-​ħaj, kolonna u pedament tal-​verità.” (1 Timotju 3:15) Dawk li jifformaw il-​kongregazzjoni t’Alla mhux biss jemmnu l-​verità tal-​Kelma t’Alla imma wkoll jgħixu fi qbil magħha u jiddefenduha, billi jagħmluha magħrufa mad-​dinja kollha.—Mattew 24:14; Rumani 10:9-15.

IX-​XHIEDA TAʼ JEHOVAH huma magħrufin sew għax-​xogħol tagħhom f’li jgħall­mu l-​Bibbja, u dan issa qed isir f’iktar minn 200 pajjiż. Huma jistudjaw il-​Bibbja u jgħall­muha bħala l-​verità, mingħajr ma jinkorporaw l-​influwenza li ddgħajjef tal-​filosofiji tal-​bniedem. Familjari int mat-​tagħlim tagħhom ibbażat fuq il-​Bibbja? Ħafna jżommu lura milli jisimgħu lix-​Xhieda taʼ Jehovah minħabba l-​informazzjoni negattiva li tiġi ċċirkolata kontriehom. Imma nies taʼ qalb onesta jiġu mistednin biex jiddeċiedu għalihom infushom jekk dak li x-​Xhieda qed jipp­ridkaw huwiex il-​verità jew le. Deċiżjoni vitali bħal din m’għandh­iex tkun ibbażata fuq l-​għajdut tan-​nies. Ħafna li eżaminaw personalment it-​tagħlim tax-​Xhieda taʼ Jehovah bbenefikaw ferm.

L-​Għarfien tal-​Verità Jneħħi l-​Biżaʼ

Ikkunsidra, per eżempju, il-​każ taʼ Eugenia. Din trabbiet ġo familja Kattolika stretta. Missierha kien wieħed mill-​organizzaturi għaż-​żjara tal-​Papa fil-​Messiku fl-​1979. Waqt li kienet qed iżżur lil xi ħbieb, Eugenia ġiet f’kuntatt max-​Xhieda taʼ Jehovah. Bil-​għajnuna tagħhom bdiet tanalizza iktar bir-​reqqa dak li tgħid il-​Bibbja. Hi tiftakar: “Għall-​ewwel bdejt nibżaʼ. Kont sibt il-​verità! Imma dan kien ifisser li l-​biċċa l-​kbira mit-​twemmin li kelli kien ħażin. It-​twemmin tal-​familja tiegħi, taʼ ħbiebi, tan-​nies li kont inħobb​—kollu kien ħażin. Kont beżgħana. Bqajt nhewden dwar kif il-​familja tiegħi kienet se tirreaġixxi għal dak li kont għadni kemm skoprejt. Maż-​żmien u bil-​għajnuna taʼ Jehovah, bdejt naddatta ruħi għal din l-​esperjenza tremenda. Jum wieħed iddeċidejt li niftaħ qalbi maʼ ħabib tal-​familja, li kien professur tat-​teoloġija. Għedtlu dwar ix-​xewqa tiegħi li nsib il-​verità. Imbagħad qalli, ‘Jekk trid tkun taf il-​verità, fittex lix-​Xhieda taʼ Jehovah.’”

Bħalma bassret Eugenia, il-​familja tagħha keċċewha mid-​dar. Ix-​Xhieda, madankollu, baqgħu jagħtuha għajnuna spiritwali. Hi tikkummenta: “Ġejt imsaħħa biex nieħu l-​waqfa tiegħi għall-​verità. Irrealizzajt li kienet xi ħaġa taʼ min jiġġieled għaliha. Il-​merħba li rċevejt mingħand ix-​Xhieda taʼ Jehovah tant kienet importanti. Ħassejt li kont maħbuba ġewwa l-​kongregazzjoni Kristjana. Kien ferm t’għajnuna għalija li nersaq qrib l-​organizzazz­joni t’Alla, u dan għeni negħleb il-​biżaʼ biex nieħu l-​waqfa tiegħi.”

Ikkunsidra eżempju ieħor. Sabrina trabbiet ġewwa familja li kellhom id-​drawwa li jagħm­lu diskussjonijiet regulari dwar il-​Bibbja. Fil-​fatt, huma żviluppaw forma taʼ ‘reliġjon tal-​familja.’ Hi ħaditha drawwa li tassoċja maʼ membri taʼ diversi reliġjonijiet biex tikxef l-​iżbalji tagħhom. Meta waħda mix-​Xhieda taʼ Jehovah offritilha studju tal-​Bibbja, mill-​ewwel aċċettat bl-​intenzjoni li turi li t-​twemmin tagħhom huwa falz. Hi tiftakar: “Wara li domt iktar minn sena nistudja, bdejt nibżaʼ li se nitlef ‘il-​verità tiegħi.’ Kont sibtha faċli li nikxef il-​qerq tal-​ħafna reliġjonijiet li kont involuta fihom, imma din id-​darba ma kinitx daqshekk faċli.”

Il-biżaʼ taʼ Sabrina ġagħalha tieqaf tistudja l-​Bibbja max-​Xhieda taʼ Jehovah. Imma mbagħad bdiet tħossha vojta spiritwalment. Iddeċidiet li terġaʼ tibda tistudja u eventwalment bdiet taċċetta din il-​verità ġdida li kienet sabet. Sabrina tant għamlet progress li riedet taqsam dak li kienet qed titgħallem m’oħrajn. Saħansitra talbet li takkumpanja lix-​Xhieda fil-​ministeru tagħhom minn dar għal dar. Sabrina tispjega: “Qabel ma kelli l-​approvazzjoni li nippriedka max-​Xhieda taʼ Jehovah, staqsewni: ‘Tassew trid issir waħda mix-​Xhieda taʼ Jehovah?’ ‘Le!’ weġibthom. Erġajt bdejt nibżaʼ.” Fl-​aħħar, wara li baqgħet tattendi għal-​laqgħat kollha u qagħdet tosserva lin-​nies t’Alla, kif huma japplikaw il-​prinċipji tal-​Bibbja, Sabrina waslet għall-​konklużjoni li din tassew kienet il-​verità. Tgħammdet u issa hi evanġelizzatriċi full-time.

Għala Daqshekk Differenti?

Xi ħadd għandu mnejn jistaqsi, ‘It-​tagħlim tax-​Xhieda taʼ Jehovah għala huwa daqshekk differenti minn reliġjonijiet oħrajn?’ Ħarsa ħafifa dwar dak li jemmnu x-​Xhieda se tgħinek tara li huma Kristjani sinċieri, studenti kuxjenzjużi tal-​Bibbja. Inħeġġuk li tfittex fil-​Bibbja tiegħek stess it-​testi li hemm fis-​sommarju tat-​twemmin bażiku tagħhom murijin hawn fuq.

Billi tagħti ħarsa iktar mill-​qrib lejn dak li jemmnu x-​Xhieda taʼ Jehovah u kif huma jżommu maʼ dak li tgħallem il-​Bibbja, int tistaʼ tiġi mbierek bil-​ħelsien li tipprovdi l-​verità. (Ġwann 17:17) M’hemm ebda raġuni għala għandek tibżaʼ mill-​verità. Ftakar fil-​wegħda taʼ Ġesù: “U tagħrfu l-​verità u l-​verità teħliskom.”—Ġwann 8:32.

[Kaxxa f’paġna 6]

XI TWEMMIN BAŻIKU TAX-​XHIEDA TAʼ JEHOVAH

◯ Jehovah hu Alla li Jistaʼ Kollox. L-​isem persunali tiegħu jidher iktar minn 7,000 darba fl-​eqdem manuskritti tal-​Bibbja.—Salm 83:19 [Salm 83:18, New World Translation].

◯ Ġesù Kristu hu l-​Iben t’Alla, li ġie fuq l-​art biex jagħti ħajtu għall-​umanità. (Ġwann 3:16, 17) Ix-​Xhieda taʼ Jehovah jsegwu t-​tagħlim taʼ Ġesù Kristu kif misjub fil-​Vanġeli.

◯ L-​isem Xhieda taʼ Jehovah huwa bbażat fuq Isaija 43:10, li jgħid: “Intom ix-​xhieda tiegħi, oraklu tal-​Mulej.”

◯ Is-​Saltna li n-​nies jitolbu għaliha fit-​talba tal-​“Missierna” hija gvern tas-​sema li dalwaqt se jneħħi s-​sofferenza u l-​uġigħ kollu li hawn fid-​dinja biex jagħmel il-​wisaʼ għall-​Ġenna taʼ l-​art li l-​Bibbja qed twiegħed.—Isaija 9:5, 6 [Isaija 9:6, 7, NW]; Danjel 2:44; Mattew 6:9, 10; Apokalissi 21:3, 4.

◯ Kulmin jagħmel ir-​rieda t’Alla għandu l-​opportunità li jgawdi l-​barkiet tas-​Saltna għall-​eternità.—Ġwann 17:3; 1 Ġwann 2:17.

◯ Il-​Kristjani jridu jfasslu l-​imġiba tagħhom skond dak li tgħid il-​Bibbja. Iridu jħabirku biex ikunu onesti, jgħixu ħajja morali u nadifa, u juru mħabba lejn għajrhom.—Mattew 22:39; Ġwann 13:35; 1 Korintin 6:9, 10.

[Stampa f’paġna 5]

Ix-​Xhieda taʼ Jehovah juru l-​verità tal-​Bibbja lin-​nies f’iktar minn 200 pajjiż