Mistoqsijiet mill-​Qarrejja

Ħafna mix-​Xhieda taʼ Jehovah jfakkru l-​anniversarju tat-​tieġ tagħhom. Għeluq sninek hu l-​anniversarju taʼ meta twelidt. Allura għala niċċelebraw l-​anniversarju tat-​tieġ u mhux l-​anniversarju taʼ għeluq sninna?

Ngħiduha kif inhi, Kristjan m’għandu bżonn jiċċelebra ebda wieħed minnhom. Xorta waħda, dan ma jfissirx li t-​tnejn għandhom l-​istess sinjifikat jew li l-​Kristjani għandhom iqisu l-​anniversarji tat-​tieġ bħalma jqisu ċ-​ċelebrazzjonijiet taʼ għeluq sninhom.

Bħalma ġie nnotat, nistgħu ngħidu li t-​tnejn huma anniversarji għaliex “anniversarju” huwa ‘tfakkira ann­wali dwar data li timmarka xi ġrajja.’ Jistaʼ jkun anniversarju taʼ kwalunkwe ġrajja​—il-​jum meta ħbatt bil-​karozza, meta rajt eklissi tal-​qamar, meta mort il-​baħar mal-​familja tiegħek, u nibqgħu sejrin. Ovvjament, il-​Kristjani ma jdawrux kull “anniversarju” f’jum speċjali jew jagħmlu xi riċeviment biex jikkommemorawh. Wieħed għandu jikkunsidra l-​aspetti tal-​ġrajja li tkun u jiddeċiedi xi jkun xieraq.

Per eżempju, Alla ta istruzzjoni speċifika lill-​Iżraeliti biex kull sena jiċċelebraw il-​ġurnata meta l-​anġlu tiegħu għadda minn fuq id-​djar taʼ l-​Iżraeliti fl-​Eġittu u l-​eżodu tal-​poplu tiegħu li seħħ bħala riżultat taʼ dan fl-​1513 Q.E.K. (Eżodu 12:14) Meta iktar tard il-​Lhud, inkluż Ġesù, kienu jikkommemoraw l-​anniversarju taʼ din il-​ġrajja, dan kien b’ubbidjenza għad-​direzzjoni t’Alla, u ma kinux jiċċelebrawh b’xi riċeviment jew bir-​rigali. Il-​Lhud qiesu wkoll bħala xi ħaġa speċjali l-​anniversarju tad-​dedika mill-​ġdid tat-​tempju. Għalkemm fil-​Bibbja ma kienx ikkmandat li jikkommemoraw din il-​ġrajja storika, Ġwann 10:22, 23 jissuġġerixxi li Ġesù ma kkritikax il-​fatt li dan kien isir. Finalment, il-​Kristjani għandhom laqgħa speċjali fl-​anniversarju tal-​mewt taʼ Ġesù. M’għandniex xi ngħidu, dan jagħm­luh b’ubbidjenza għal kmand ċar li nsibu fil-​Kelma t’Alla.—Luqa 22:19, 20.

Xi ngħidu għall-​anniversarju tat-​tieġ? F’xi pajjiżi huwa komuni għal tnejn miżżewġin li jfakkru l-​anniversarju taʼ meta ħadu l-​istat taʼ miżżewġin, arranġament li oriġinah Alla. (Ġenesi 2:18-24; Mattew 19:4-6) Ċertament li l-​Bibbja ma tpinġihx ikrah iż-​żwieġ. Ġesù attenda ċelebrazzjoni taʼ żwieġ, u anki kkontribwixxa biex din l-​okkażjoni tkun waħda pjaċevoli.—Ġwann 2:1-11.

Allura ma tkunx xi ħaġa stramba li koppja, fl-​anniversarju tat-​tieġ tagħhom, forsi jqattgħu xi ħin jirriflettu fuq il-​ferħ taʼ dik l-​okkażjoni u fuq id-​determinazzjoni tagħhom biex ikomplu jaħdmu ħalli jirnexxu bħala koppja miżżewġa. Jekk humiex se jiffokaw fuq din l-​okkażjoni speċjali fil-​privat, bejniethom it-​tnejn, jew jekk jistednux xi ftit qraba jew ħbieb intimi biex ikunu magħhom iridu jiddeċiduha huma. L-​okkażjoni m’għandhiex issir sempliċi skuża għal xi laqgħa soċjali kbira. F’dak il-​jum il-​Kristjani jkunu jridu jiġu ggwidati mill-​prinċipji li japplikaw għal kull ġurnata taʼ ħajjithom. Mela jekk infakkrux l-​anniversarju tat-​tieġ jew le hija kwistjoni persunali.—Rumani 13:13, 14.

Xi ngħidu, iżda, dwar li nfakkru għeluq sninna b’manjiera speċjali? Għandna xi indikazzjoni fil-​Bibbja dwar anniversarju bħal dan?

Sewwa, kmieni f’dan is-​seklu, l-​Istudenti tal-​Bibbja, bħalma kienu magħrufin dak iż-​żmien ix-​Xhieda taʼ Jehovah, fil-​fatt kienu jfakkru għeluq is-​snin. Ħafna minnhom kellhom kotba żgħar jisimhom Daily Heav­enly Manna (Manna Mis-​Sema taʼ Kuljum). Dawn kien ikun fihom silta mill-​Bibbja għal kull ġurnata, u ħafna Kristjani kienu jwaħħlu ritratti żgħar taʼ xi Studenti tal-​Bibbja sħabhom, fuq il-​paġni li jikkorrispondu mal-​ġranet li fihom kienu jagħlqu sninhom. Ukoll, The Watch Tower tal-​15 taʼ Frar, 1909, irrakkonta li waqt konvenzjoni f’Jacksonville, ġewwa Florida, fl-​Istati Uniti, Ħuna Russell, li dak iż-​żmien kien il-​president tas-​Soċjetà, ġie mitlub jitlaʼ fuq il-​palk. Għala? Kellhom sorpriża lesta għalih​—rigal taʼ għeluq sninu li kien jikkonsisti f’kaxxi mimlijin grape­fruits, pine­apples, u larinġ. B’hekk, tajna daqqa t’għajn lejn x’kien jiġri fil-​passat. Biex ikollna l-​istampa koll­ha taʼ dak li kien isir, irridu niftakru li dak iż-​żmien, l-​Istudenti tal-​Bibbja kienu jikkommemoraw ukoll il-​25 taʼ Diċembru bħala l-​anniversarju tat-​twelid taʼ Ġesù, jew għeluq sninu. Saħansitra kien hemm id-​drawwa li jkollhom l-​ikla tal-​Milied fil-​kwartieri ġenerali taʼ Brook­lyn.

M’għandniex xi ngħidu, minn dak iż-​żmien ’l hawn il-​poplu t’Alla kiber spiritwalment f’ħafna aspetti. Fis-​snin 20, id-​dawl miżjud tal-​verità għenhom jaraw dan li ġej:

Ġesù ma twelidx nhar il-​25 taʼ Diċembru, data li hi marbuta mar-​reliġjon pagana. Il-​Bibbja tgħidilna biex nikkommemoraw id-​data tal-​mewt taʼ Ġesù, mhux l-​anniversarju tat-​twelid tiegħu jew taʼ xi ħadd ieħor. Meta nagħmlu dan inkunu qed naġixxu fi qbil maʼ Koħèlet 7:1 u l-​fatt li l-​mod kif tiżvolġi l-​ħajja taʼ bniedem leali hu iktar importanti minn jum it-​twelid tiegħu. Fil-​Bibbja ma hemmx imsemmi li xi qaddej leali ċċelebra għeluq sninu. Din issemmi ċelebrazzjonijiet taʼ għeluq snin nies pagani, billi dawn l-​okkażjonijiet torbothom maʼ atti krudili. Ejjew naraw x’kien l-​isfond taʼ dawn l-​anniversarji taʼ għeluq is-​snin.

L-ewwel wieħed hu għeluq snin il-​Fargħun taʼ żmien Ġużeppi. (Ġenesi 40:​20-23) Rigward dan l-​aspett, l-​artiklu dwar iċ-​ċelebrazzjoni taʼ għeluq is-​snin fl-​Encyclopædia of Religion and Ethics taʼ Hastings jibda hekk: “Id-​drawwa li jiġi kkommemorat jum it-​twelid hija konnessa, fil-​forma tagħha, maʼ li jiġi magħdud iż-​żmien, u, fil-​kontenut tagħha, maʼ ċerti prinċipji reliġjużi primittivi.” Iktar tard, l-​enċiklopedija tikkwota lill-​Eġittologu Sir J. Gardener Wilkinson, li kiteb: “Kull Eġizzjan kien jattribwixxi importanza kbira lill-​ġurnata, u saħansitra lis-​siegħa li twieled fiha; u wisq probabbli, bħalma kien isir fil-​Persja, kull individwu kien jiċċelebra għeluq sninu bil-​kbir, billi joffri lil ħbiebu kull tip taʼ divertiment li kien jeżisti, u abbundanza iktar mis-​soltu taʼ ikel delizzjuż.”

Ċelebrazzjoni oħra taʼ għeluq snin xi ħadd li tissemma fil-​Bibbja hija dik taʼ Erodi, fejn ġiet maqtugħa ras Ġwanni l-​Battista. (Mattew 14:6-10) The International Standard Bible Encyclopedia (edizzjoni taʼ l-​1979) tipprovdi din l-​informazzjoni iktar profonda: “Il-​Griegi pre-Ellenistiċi kienu jiċċelebraw għeluq snin l-​allat u l-​persuni prominenti. Il-​kelma G[rie]ga genéthlia kienet tirreferi għal dawn iċ-​ċelebrazzjonijiet, fil-​waqt li genésia kienet tfisser ċelebrazzjoni kommemorattiva taʼ għeluq snin xi ħadd importanti li jkun mejjet. Fit-​2 Makk[abin] 6:7 nsibu referenza għall-​genéthlia taʼ Antijoku IV, li kienet issir darba fix-​xahar, u li matulha l-​Lhud kienu jiġu sforzati ‘jieħdu sehem fis-​sagrifiċċji.’ . . . Meta Erodi ċċelebra għeluq sninu kien qed jaġixxi fi qbil maʼ drawwa Ellenistika; m’hemm ebda evidenza li kienu jiċċelebraw għeluq sninhom f’Iżrael fi żminijiet pre-Ellenistiċi.”

Irridu nammettu li l-​veri Kristjani llum ma joqogħdux jiffissaw fl-​għeruq u fil-​konnessjonijiet reliġjużi antiki li jistaʼ jkollha kull prattika jew drawwa, imma lanqas ma huma se jinjoraw l-​indikazzjonijiet ċari li fil-​fatt jeżistu fil-​Kelma t’Alla. Dan jinkludi li l-​uniċi ċelebrazzjonijiet fejn nies iċċelebraw għeluq sninhom iddokumentati fil-​Bibbja huma taʼ nies pagani u huma marbutin maʼ ġrajjiet li fihom intweriet krudeltà. Għalhekk, huwa ċar li l-​Iskrittura titfaʼ dell ikrah fuq iċ-​ċelebrazzjonijiet taʼ għeluq is-​snin, u dan huwa fatt li Kristjani sinċieri ma jinjorawhx.

Għaldaqstant, fil-​waqt li hija għalkollox kwistjoni persunali jekk il-​Kristjani jagħżlux li jfakkru l-​anniversarju tat-​tieġ tagħhom jew le, hemm raġunijiet validi għala Kristjani maturi jżommu lura milli jiċċelebraw għeluq is-​snin.