Nimxu m’Alla​—Il-​Passi tal-​Bidu

“Ersqu lejn Alla, u hu jersaq lejkom.”—ĠAKBU 4:8.

1, 2. Għala tgħid li huwa privileġġ kbir li taqdi lil Jehovah?

IR-​RAĠEL kien bata fil-​ħabs għal ħafna snin. Imbagħad bagħtu għalih biex jidher quddiem il-​ħakkiem tal-​pajjiż. Il-​ġrajjiet seħħew bil-​għaġla. F’daqqa waħda, il-​priġunier sab ruħu fis-​servizz taʼ l-​iktar sultan setgħan fid-​dinja taʼ dak iż-​żmien. Dak li qabel kien priġunier tpoġġa f’pożizzjoni taʼ responsabbiltà kbira u ġieħ straordinarju. Ġużeppi​—ir-​raġel li darba riġlejh kienu marbutin bil-​ktajjen—​issa kien jimxi maʼ sultan!—Ġenesi 41:14, 39-43; Salm 105:17, 18.

² Illum, il-​bnedmin għandhom l-​opportunità li jidħlu fis-​servizz taʼ xi ħadd ferm akbar mill-​Fargħun taʼ l-​Eġittu. Il-​Wieħed Suprem taʼ l-​univers jistedinna lkoll biex naqduh. Kemm hu privileġġ taʼ l-​għaġeb li wieħed jagħmel dan u li jikkultiva relazzjoni mill-​qrib maʼ Jehovah, dak Alla li jistaʼ kollox! Fl-​Iskrittura, qawwa maestuża u dija kif ukoll serenità, ġmiel, u ħlewwa huma assoċjati miegħu. (Eżekjel 1:26-28; Apokalissi 4:1-3) L-​imħabba tfur f’kulma jagħmel. (1 Ġwann 4:8) Hu qatt ma jigdeb. (Numri 23:19) U Jehovah qatt ma jiddiżappuntahom lil dawk leali lejh. (Salm 18:26 [Salm 18:25, NW]) Billi nikkonformaw mal-​ħtiġijiet tiegħu taʼ tjieba, nistgħu ngawdu ħajjiet hienja u sinjifikanti issa, waqt li nantiċipaw il-​ħajja taʼ dejjem. (Ġwann 17:3) L-​ebda ħakkiem uman ma joffri xi ħaġa li tistaʼ b’xi mod titqabbel maʼ dawn il-​barkiet u l-​privileġġi.

3. Noè b’liema mod ‘kien jimxi m’Alla’?

³ Żmien twil ilu, il-​patrijarka Noè kien determinat li jgħix fi qbil mar-​rieda u l-​iskop t’Alla. Dwaru, il-​Bibbja tgħid: “Noè kien bniedem ġust u kien perfett fost in-​nies taʼ żmienu; kien jimxi sewwa maʼ Alla.” (Ġenesi 6:9) M’għandniex xi ngħidu, Noè ma kienx jimxi litteralment maʼ Jehovah, ladarba ebda bniedem saħansitra ma ‘ra lil Alla f’xi żmien.’ (Ġwann 1:18) Minflok, Noè mexa m’Alla fis-​sens li hu għamel dak li qallu Alla. Minħabba li Noè ddedika ħajtu biex jagħmel ir-​rieda taʼ Jehovah, hu gawda relazzjoni intima u mill-​qalb m’Alla li Jistaʼ Kollox. Bħal Noè, miljuni llum qed ‘jimxu m’Alla’ billi jgħixu fi qbil mal-​pariri u l-​istruzzjoni taʼ Jehovah. Wieħed kif jibda f’korsa bħal din?

Għarfien Eżatt Huwa Essenzjali

4. Jehovah kif jgħallem lill-​poplu tiegħu?

⁴ Biex nimxu maʼ Jehovah, irridu l-​ewwel insiru nafuh. Il-​profeta Isaija bassar: “Għad jiġri fl-​aħħar jiem li l-​għolja tad-​dar tal-​Mulej togħla ’l fuq mill-​qċaċet tal-​muntanji, u tintrefa ’l fuq mill-​għoljiet, lejha għad jiġru l-​ġnus kollha. Kotra taʼ popli għad jiġu u jgħidu: ‘Ħalli mmorru u nitilgħu fuq l-​għolja tal-​Mulej, lejn id-​dar taʼ Alla taʼ Ġakobb, biex jgħallimna triqatu, u nimxu fil-​mogħdijiet tiegħu. Għax minn Sijon joħroġ it-​tagħlim, u l-​kelma tal-​Mulej minn Ġerusalemm.’” (Isaija 2:2, 3) Iva, nistgħu nkunu fiduċjużi li Jehovah se jgħallimhom lil dawk kollha li qed ifittxu li jimxu fil-​mogħdijiet tiegħu. Jehovah pprovda l-​Kelma tiegħu, il-​Bibbja, u jgħinna nifhmuha. Mod wieħed kif jagħmel dan hu permezz taʼ “l-​irsir leali u diskret.” (Mattew 24:45-47, NW) Jehovah juża lill-​“irsir leali” biex jipprovdi istruzzjoni spiritwali permezz taʼ pubblikazzjonijiet ibbażati fuq il-​Bibbja, laqgħat Kristjani, u l-​arranġament taʼ studji tal-​Bibbja fid-​djar b’xejn. Alla jgħin ukoll lin-​nies tiegħu jifhmu l-​Kelma tiegħu permezz taʼ l-​ispirtu qaddis tiegħu.—1 Korintin 2:10-16.

5. Il-​verità Skritturali għala hija daqshekk prezzjuża?

⁵ Għalkemm ma nħallsux flus għall-​verità tal-​Bibbja, din hija prezzjuża. Hekk kif nistudjaw il-​Kelma t’Alla, aħna nitgħallmu dwar Alla nnifsu​—ismu, il-​personalità tiegħu, l-​iskop tiegħu, u l-​mod kif jittratta mal-​bnedmin. Nitgħallmu wkoll it-​tweġibiet għall-​mistoqsijiet fundamentali tal-​ħajja li jagħtu l-​ħelsien: Għala qegħdin hawn? Alla għala jippermetti t-​tbatija? X’hemm maħżun għall-​futur? Għala nixjieħu u mmutu? Hemm ħajja wara l-​mewt? Iktar minn hekk, nitgħallmu x’inhi r-​rieda t’Alla għalina, jiġifieri, kif għandna nimxu sabiex nogħġbuh bis-​sħiħ. Nitgħallmu li l-​ħtiġijiet tiegħu huma raġunevoli u huma taʼ benefiċċju b’mod taʼ l-​għaġeb meta ngħixu fi qbil magħhom. Mingħajr l-​istruzzjonijiet t’Alla, żgur li qatt ma nistgħu nifhmuhom dawn l-​affarijiet.

6. Għarfien eżatt dwar il-​Bibbja liema korsa jgħinna nsegwu?

⁶ Il-​verità tal-​Bibbja hija qawwija u tqanqalna biex nagħmlu bidliet f’ħajjitna. (Lhud 4:12) Qabel ma ħadna l-​għarfien tal-​Bibbja, stajna biss nimxu “skond ix-​xejra taʼ din id-​dinja.” (Efesin 2:2) Iżda għarfien eżatt dwar il-​Kelma t’Alla jfasslilna korsa differenti sabiex ‘inkunu nistgħu ngħixu sewwa kif jixraq lill-​Mulej u nogħġbuh f’kollox.’ (Kolossin 1:10) Kemm hija ħaġa taʼ ferħ li nieħdu l-​ewwel passi tagħna fil-​mixi maʼ Jehovah, l-​iktar Persuna manjifika fl-​univers kollu!—Luqa 11:28.

Żewġ Passi Importanti ​—Dedikazzjoni u Magħmudija

7. Hekk kif nistudjaw il-​Kelma t’Alla, liema verità dwar it-​tmexxija umana ssir evidenti?

⁷ Meta tiżdied il-​fehma tagħna dwar il-​Bibbja, nibdew neżaminaw il-​ġrajjiet umani u ħajjitna stess fid-​dawl spiritwali tal-​Kelma t’Alla. Verità importanti b’hekk issir evidenti. Din il-​verità kienet espressa żmien twil ilu mill-​profeta Ġeremija, li kiteb: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Il-​bnedmin​—ilkoll kemm aħna—​jeħtieġu d-​direzzjoni t’Alla.

8. (a) X’inhu dak li jqanqal lin-​nies biex jiddedikaw lilhom infushom lil Alla? (b) X’inhi d-​dedikazzjoni Kristjana?

⁸ Meta nifhmu dan il-​fatt vitali niġu mqanqlin biex infittxu l-​gwida mingħand Jehovah. U mħabba għal Alla tqanqalna biex niddedikaw ħajjitna lilu. Li niddedikaw lilna nfusna lil Alla jfisser li navviċinawh fit-​talb u nwegħduh solennement li nużaw il-​ħajja tagħna biex naqduh u nimxu fedelment fil-​mogħdijiet tiegħu. Meta nagħmlu dan, inkunu qed nimitaw l-​eżempju taʼ Ġesù, li ppreżenta lilu nnifsu lil Jehovah b’determinazzjoni qawwija li jwettaq ir-​rieda divina.—Lhud 10:7.

9. Individwu għala jiddedika ħajtu lil Jehovah?

⁹ Alla Jehovah qatt ma jippressa jew jisforza lil xi ħadd biex jiddedika ruħu lilu. (Qabbel it-2 Korintin 9:7.) Iktar minn hekk, Alla ma jistenniex li xi ħadd jiddedika ħajtu Lilu minħabba xi emozzjoni tal-​mument. Qabel jitgħammed, wieħed irid ikun diġà dixxiplu; xi ħaġa li tirrikjedi sforz ħerqan biex wieħed jieħu l-​għarfien. (Mattew 28:19, 20) Pawlu talab bil-​ħniena lil dawk li kienu diġà mgħammdin biex ‘joffru lil ġisimhom b’sagrifiċċju ħaj, qaddis, jogħġob lil Alla, jiġifieri l-​qima spiritwali tagħhom.’ (Rumani 12:1) Huwa b’eżerċitar simili tal-​qawwa tar-​raġuni tagħna li aħna niddedikaw lilna nfusna lil Alla Jehovah. Wara li nsiru nafu x’inhu involut u naħsbu fil-​fond u bir-​reqqa dwar il-​kwistjoni, aħna minn jeddna u bil-​ferħ niddedikaw ħajjitna lil Alla.—Salm 110:3, KŻ.

10. Id-​dedikazzjoni kif inhi marbuta mal-​magħmudija?

¹⁰ Wara li navviċinaw lil Alla fit-​talb privatament biex nesprimu d-​determinazzjoni tagħna li nimxu fil-​mogħdijiet tiegħu, imbagħad nieħdu l-​pass li jkun imiss. Nagħmlu d-​dedikazzjoni tagħna magħrufa pubblikament billi nitgħammdu fl-​ilma. Din hija dikjarazzjoni pubblika tal-​fatt li aħna għamilna wegħda li nagħmlu r-​rieda t’Alla. Fil-​bidu tal-​ministeru tiegħu fuq l-​art, Ġesù ġie mgħammed minn Ġwanni, u b’hekk ħalla eżempju għalina. (Mattew 3:13-17) Iktar tard, Ġesù inkariga lis-​segwaċi tiegħu biex jagħmlu dixxipli u jgħammduhom. Għalhekk, id-​dedikazzjoni u l-​magħmudija huma passi essenzjali għal kulmin jixtieq jimxi maʼ Jehovah.

11, 12. (a) Il-​magħmudija kif tistaʼ titqabbel maʼ tieġ? (b) Liema parallel jistaʼ jsir bejn ir-​relazzjoni tagħna maʼ Jehovah u dik li teżisti bejn mara u raġel miżżewġin?

¹¹ Li ssir dixxiplu dedikat u mgħammed taʼ Ġesù Kristu huwa xi ftit jew wisq simili għal meta wieħed jiżżewweġ. F’ħafna pajjiżi, il-​ġurnata tat-​tieġ tiġi wara diversi passi. Raġel u mara jiltaqgħu, isiru jafu lil xulxin, u jsiru jinħabbu. Imbagħad tiġi l-​għerusija. It-​tieġ jagħmel pubbliku dak li ġie deċiż fil-​privat​—li dawn jidħlu għar-​rabta taż-​żwieġ u mbagħad jgħixu flimkien bħala raġel u mara miżżewġin. Huwa t-​tieġ li jimmarka pubblikament il-​bidu taʼ dik ir-​relazzjoni speċjali. Dik id-​data timmarka l-​bidu taż-​żwieġ. Bl-​istess mod, il-​magħmudija timmarka l-​bidu taʼ ħajja mogħtija għall-​mixi maʼ Jehovah f’relazzjoni ddedikata.

¹² Ikkunsidra parallel ieħor. Wara l-​ġurnata tat-​tieġ, l-​imħabba bejn ir-​raġel u l-​mara għandha tikber u timmatura. Biex jersqu dejjem eqreb lejn xulxin, iż-​żewġ imseħbin iridu jistinkaw bla egoiżmu biex iżommu u jsaħħu r-​relazzjoni matrimonjali tagħhom. Għalkemm aħna ma nidħlux fi żwieġ m’Alla, wara l-​magħmudija tagħna rridu naħdmu biex inżommu relazzjoni mill-​qrib maʼ Jehovah. Hu josserva u japprezza l-​isforzi tagħna biex nagħmlu r-​rieda tiegħu u jersaq qrib tagħna. “Ersqu lejn Alla,” kiteb id-​dixxiplu Ġakbu, “u hu jersaq lejkom.”—Ġakbu 4:8.

Nimxu fil-​Passi taʼ Ġesù

13. Fil-​mixi tagħna m’Alla, l-​eżempju taʼ min għandna nsegwu?

¹³ Biex nimxu maʼ Jehovah, irridu nikkonformaw maʼ l-​eżempju mħolli minn Ġesù Kristu. L-​appostlu Pietru kiteb: “Għal dan intom kontu msejjħa għax Kristu wkoll bata għalikom u ħallielkom eżempju biex timxu fuq il-​passi tiegħu.” (1 Pietru 2:21) Ladarba Ġesù kien perfett u aħna imperfetti, ma nistgħux insegwuh perfettament l-​eżempju li ħallielna. Minkejja dan, Jehovah jistenna minna li nagħmlu l-​aħjar li nistgħu. Ejjew nikkunsidraw ħames fatturi mill-​ħajja u l-​ministeru taʼ Ġesù li Kristjani dedikati għandhom jistinkaw biex jimitawhom.

14. X’inhu involut f’li nkunu nafu l-​Kelma t’Alla?

¹⁴ Ġesù kellu għarfien eżatt u ddettaljat tal-​Kelma t’Alla. Matul il-​ministeru tiegħu, Ġesù spiss ikkwota mill-​Iskrittura Ebrajka. (Luqa 4:4, 8) M’għandniex xi ngħidu, il-​mexxejja reliġjużi mill-​agħar taʼ dak iż-​żmien ukoll ikkwotaw mill-​Iskrittura. (Mattew 22:23, 24) Id-​differenza kienet li Ġesù fehem x’kienet tfisser l-​Iskrittura, u applikaha f’ħajtu. Hu kien jaf mhux biss l-​ittra tal-​Liġi imma wkoll l-​ispirtu tagħha. Hekk kif insegwu l-​eżempju taʼ Kristu, aħna wkoll għandna nistinkaw biex nifhmu l-​Kelma t’Alla, billi nieħdu s-​sens, jew l-​ispirtu tagħha. Billi nagħmlu dan, nistgħu nsiru ħaddiema approvati minn Alla li kapaċi ‘nxandru bir-​reqqa l-​kelma tal-​verità.’—2 Timotju 2:15.

15. Ġesù kif ħalla eżempju rigward li jitkellem dwar Alla?

¹⁵ Kristu Ġesù tkellem m’oħrajn dwar Missieru tas-​sema. Ġesù ma żammx l-​għarfien li kellu dwar il-​Kelma t’Alla għalih innifsu. Saħansitra l-​għedewwa tiegħu indirizzawh bħala “Mgħallem,” għax kulfejn kien imur kien jitkellem m’oħrajn dwar Jehovah u dwar l-​iskopijiet Tiegħu. (Mattew 12:38) Ġesù ppriedka pubblikament fil-​limiti tat-​tempju, fis-​sinagogi, fl-​ibliet, u fil-​kampanja. (Mark 1:39; Luqa 8:1; Ġwann 18:20) Hu għallem bil-​mogħdrija u l-​ħniena, billi wera mħabba lil dawk li kien jgħin. (Mattew 4:23) Dawk li jsegwu l-​eżempju taʼ Ġesù wkoll isibu ħafna postijiet u diversi modi biex jgħallmu lil oħrajn dwar Alla Jehovah u l-​iskopijiet meraviljużi tiegħu.

16. Kemm kienet mill-​qrib ir-​relazzjoni taʼ Ġesù maʼ adoraturi taʼ Jehovah sħabu?

¹⁶ Ġesù ħass rabta mill-​qrib maʼ adoraturi oħrajn taʼ Jehovah. Waqt li Ġesù kien qed ikellem lill-​folol f’okkażjoni minnhom, ġew biex ikellmuh ommu u ħutu li ma kinux jemmnu. Ir-​rakkont tal-​Bibbja jgħid: “Xi ħadd qallu: ‘Ara, ommok u ħutek qegħdin barra jfittxu li jkellmuk.’ Iżda hu wieġeb lil dak li kellmu, u qallu: ‘Min hi ommi? U min huma ħuti?’ Mbagħad medd idu lejn id-​dixxipli tiegħu u qal: ‘Dawn, araw, huma ommi u ħuti. Għax kull min jagħmel ir-​rieda taʼ Missieri li hu fis-​smewwiet, dak huwa ħija, u oħti, u ommi.’” (Mattew 12:47-50) Dan ma jfissirx li Ġesù ċaħad lill-​familja tiegħu, għax affarijiet li ġraw wara taw prova li m’għamilx hekk. (Ġwann 19:25-27) Iżda, dan ir-​rakkont jenfasizza l-​imħabba li Ġesù kellu għal sħabu fit-​twemmin. Bl-​istess mod illum, dawk li jimxu m’Alla jfittxu s-​sħubija taʼ qaddejja oħrajn taʼ Jehovah u jsiru jħobbuhom mill-​qalb.—1 Pietru 4:8.

17. Ġesù kif kien iħossu dwar li jagħmel ir-​rieda taʼ Missieru tas-​sema, u dan kif għandu jeffettwana?

¹⁷ Billi għamel ir-​rieda divina, Ġesù wera mħabba għal Missieru tas-​sema. Ġesù obda lil Jehovah f’kollox. Hu qal: “L-​ikel tiegħi hu li nagħmel ir-​rieda taʼ min bagħatni u li nwassal fit-​tmiem l-​opra tiegħu.” (Ġwann 4:34) Kristu qal ukoll: “Jiena dejjem nagħmel dak li jogħġob lilu [lil Alla].” (Ġwann 8:29) Ġesù tant ħabb lil Missieru tas-​sema li “ċekken lilu nnifsu, billi obda sal-​mewt, anzi sal-​mewt tas-​salib.” (Filippin 2:8) Mill-​banda l-​oħra, Jehovah bierek lil Ġesù, billi għollieh għal pożizzjoni taʼ awtorità u unur wara biss dik taʼ Jehovah nnifsu. (Filippin 2:9-11) Bħal Ġesù, aħna nuru mħabbitna lejn Alla billi nħarsu l-​kmandamenti tiegħu u billi nagħmlu r-​rieda tiegħu.—1 Ġwann 5:3.

18. Ġesù b’liema mod kien taʼ eżempju fil-​kwistjoni tat-​talb?

¹⁸ Ġesù kien bniedem li jħobb jitlob. Talab fil-​magħmudija tiegħu. (Luqa 3:21) Qabel ma għażel lit-​12-il appostlu tiegħu, hu ddedika lejl sħiħ għat-​talb. (Luqa 6:12, 13) Ġesù għallem lid-​dixxipli tiegħu kif jitolbu. (Luqa 11:1-4) Fil-​lejla taʼ qabel mewtu, hu talab għad-​dixxipli tiegħu u talab magħhom. (Ġwann 17:1-26) It-​talb kellu parti importanti fil-​ħajja taʼ Ġesù, saħansitra bħalma għandu jkollu f’ħajjitna, ladarba aħna s-​segwaċi tiegħu. X’unur li titkellem mas-​Sovran Universali fit-​talb! Barra minn hekk, Jehovah jwieġeb it-​talb, għax Ġwanni kiteb: “Din hi l-​fiduċja sħiħa li għandna fih, li jekk nitolbu xi ħaġa skond ir-​rieda tiegħu, hu jismagħna. U ladarba nafu li hu jismagħna f’dak li nitolbu, mela nafu wkoll li kull ma tlabnieh jinsab diġà għandna.”—1 Ġwann 5:14, 15.

19. (a) Liema kwalitajiet taʼ Ġesù għandna nimitaw? (b) B’liema modi nibbenefikaw meta nistudjaw il-​ħajja u l-​ministeru taʼ Ġesù?

¹⁹ Hemm ferm x’nitgħallmu jekk neżaminaw mill-​qrib il-​ħajja u l-​ministeru taʼ Ġesù Kristu fuq l-​art! Irrifletti fuq il-​kwalitajiet li wera: imħabba, mogħdrija, ħniena, saħħa, bilanċ, raġunevolezza, umiltà, kuraġġ, u nuqqas taʼ egoiżmu. Iktar ma nitgħallmu dwar Ġesù, akbar tkun ix-​xewqa tagħna li nsiru s-​segwaċi leali tiegħu. Għarfien dwar Ġesù jressaqna wkoll eqreb lejn Jehovah. Wara kollox, Ġesù kien riflessjoni perfetta taʼ Missieru tas-​sema. Hu kien tant intimu maʼ Jehovah li setaʼ jgħid: “Min ra lili ra lill-​Missier.”—Ġwann 14:9.

Afda f’Alla biex Iwieżnek

20. Kif nistgħu niksbu fiduċja fil-​mixi maʼ Jehovah?

²⁰ Meta t-​tfal ikunu għadhom kif bdew jitgħallmu jimxu, il-​passi tagħhom ma jkunux sodi. Kif jitgħallmu jimxu bil-​kunfidenza? Huwa biss bil-​prattika u l-​perseveranza. Sewwa, dawk li jimxu maʼ Jehovah jistinkaw biex jimxu b’pass sod u kunfidenti. Dan ukoll jirrikjedi żmien u perseveranza. Pawlu indika l-​importanza tal-​perseveranza fil-​mixi tagħna m’Alla meta kiteb: “Fl-​aħħar, ħuti, intom tgħallimtu mingħandna kif għandkom timxu biex togħġbu lil Alla, kif tabilħaqq qegħdin iġġibu ruħkom; aħna f’Sidna Ġesù nitolbukom u nħeġġukom biex tagħmlu xi ħaġa iżjed.”—1 Tessalonikin 4:1.

21. Hekk kif nimxu maʼ Jehovah, liema barkiet nistgħu ngawdu?

²¹ Jekk aħna dedikati totalment lil Alla, hu se jgħinna nibqgħu nimxu miegħu. (Isaija 40:29-31) M’hemm xejn li din id-​dinja tistaʼ toffri li jistaʼ jitqabbel mal-​barkiet li hu jitfaʼ fuq dawk li jimxu fil-​mogħdijiet tiegħu. Hu ‘Dak li jgħallimna għall-​ġid tagħna, u jqabbadna t-​triq fejn għandna nimxu.’ U jekk attwalment nagħtu widen għall-​kmandamenti tiegħu, ‘ikun bħal xmara s-​sliem tagħna, u s-​sedqa tagħna bħal mewġ tal-​baħar.’ (Isaija 48:17, 18) Billi naċċettaw l-​istedina biex nimxu m’Alla u billi nagħmlu dan fedelment, nistgħu ngawdu paċi miegħu għal dejjem.

Kif Twieġeb Int?

◻ Għala huwa unur li timxi mal-​veru Alla?

◻ L-​istudju, id-​dedikazzjoni, u l-​magħmudija għala huma passi tal-​bidu fil-​mixi tagħna maʼ Jehovah?

◻ Kif nistgħu nsegwu l-​passi taʼ Ġesù?

◻ Kif nafu li Jehovah se jwiżinna hekk kif nimxu miegħu?

[Stampi f’paġna 13]

Studju, dedikazzjoni, u magħmudija huma passi tal-​bidu fil-​mixi tagħna m’Alla