Dawn Għamlu r-​Rieda taʼ Jehovah

Pawlu Jittrijonfa fuq l-​Avversità

PAWLU jinsab f’qagħda kerha. Hu u 275 oħra qegħdin fuq bastiment maqbud f’nofs grigalata​—l-​iktar riħ vjolenti fil-​Mediterran. Il-​maltempata tant hi kiefra li la tidher ix-​xemx matul il-​ġurnata u lanqas il-​kwiekeb matul il-​lejl. Kif wieħed jistaʼ jimmaġina, il-​passiġġieri qed jibżgħu li se jitilfu ħajjithom. Madankollu, Pawlu jfarraġhom billi jgħidilhom x’kien urieh Alla f’ħolma: “Ħadd minnkom m’hu se jitlef ħajtu; il-​ġifen biss jintilef.”—Atti 27:14, 20-22.

Fl-14-il lejl tal-​maltempata, il-​baħrin jagħmlu skoperta li taħsadhom​—qegħdin f’fond t’20 qama biss.a Wara distanza qasira, jerġgħu jiskandaljaw. Din id-​darba, jinstabu fi 15-il qama fond. L-​art tinsab fil-​qrib! Imma din l-​aħbar tajba tqajjem tħassib kbir. Mitfugħ ’l hawn u ’l hemm matul il-​lejl f’baħar baxx, il-​ġifen jistaʼ jitkisser mal-​blat u jiġġarraf. B’mod għaqli, il-​baħrin jitfgħu l-​ankri. X’uħud minnhom iridu jniżżlu d-​dgħajsa ż-​żgħira u jitilgħu fuqha, għax forsi jaħsbu li hekk għandhom iktar ċans li jsalvaw.b Imma Pawlu jwaqqafhom. Hu jgħid liċ-​ċenturjun u lis-​suldati: “Jekk dawn ma jibqgħux fuq il-​ġifen, intom ma tistgħux issalvaw.” Iċ-​ċenturjun joqgħod fuq kliem Pawlu, u l-​276 passiġġier qegħdin issa lkoll jistennew b’ħerqa li jisbaħ.—Atti 27:27-32.

In-​Nawfraġju

Malli jisbaħ, il-​passiġġieri tal-​ġifen jilmħu bajja bi xtajta fiha. B’tama mxettla, il-​baħrin jaqtgħu l-​ankri u jtellgħu l-​qalaʼ ż-​żgħir għar-​riħ. Il-​ġifen jibda riesaq lejn ix-​xatt​—bla dubju fost għajjat taʼ ferħ.—Atti 27:39, 40.

F’daqqa waħda, madankollu, il-​ġifen jeħel ġo sikka. Agħar minn hekk, il-​qilla tal-​mewġ tibda tagħmel tagħha fuq il-​poppa tal-​bastiment u din tibda titfarrak f’biċċiet. Il-​passiġġieri kollha se jkollhom jabbandunaw il-​ġifen! (Atti 27:41) Imma dan iqajjem problema. Ħafna minn dawk abbord​—inkluż Pawlu—​huma priġunieri. Taħt il-​liġi Rumana, gwardjan li jħalli priġunier jaħrab għandu jieħu l-​kastig li kien intenzjonat għall-​priġunier tiegħu. Per eżempju, jekk jaħrab qattiel, il-​gwardjan negliġenti jkollu jħallas b’ħajtu.

Billi jibżgħu li jiġrilhom hekk, is-​suldati jaqtgħuha li joqtlu lill-​priġunieri kollha. Madankollu, iċ-​ċenturjun, li għandu ħbiberija maʼ Pawlu, jinterċedi. Jikkmanda lil dawk kollha li jistgħu, biex jaqbżu l-​baħar u jgħumuha għall-​art. Dawk li ma jafux jgħumu jridu jserrħu maʼ xi twavel jew bċejjeċ oħrajn mill-​ġifen. Wieħed wieħed, il-​passiġġieri tal-​ġifen mitluf jaslu l-​art. Bi twettiq taʼ kliem Pawlu, ħadd minnhom ma jitlef ħajtu!—Atti 27:42-44.

Miraklu fuq Malta

Il-​grupp mifni sab refuġju fuq gżira jisimha Malta. L-​abitanti huma “nies li jitkellmu b’ilsien barrani,” litteralment “barbari” (Grieg, barʹba·ros).c Imma l-​Maltin m’humiex xi nies slavaġ. Għall-​kuntrarju, Luqa, sieħeb Pawlu li kien qed jivvjaġġa miegħu, jirrapporta li huma “ġiebu ruħhom magħna bi ħlewwa li ma bħalha. Laqgħuna tajjeb lilna lkoll u qabdulna ħuġġieġa, għax kienet bdiet nieżla x-​xita u kien il-​bard.” Pawlu nnifsu jingħaqad mal-​Maltin f’li jiġbru u jitfgħu z-​zkuk fin-​nar.—Atti 28:1-3.

F’daqqa waħda, lifgħa taqbad maʼ id Pawlu! In-​nies tal-​gżira jassumu li Pawlu hu xi qattiel. Probabbilment jaħsbu li Alla jikkastiga lil midinbin billi jattakka l-​parti tal-​ġisem li kien l-​istrument tad-​dnub. Imma ara! B’sorpriża kbira għan-​nies tal-​post, Pawlu jfarfar il-​lifgħa ġon-​nar. Kif jgħid ir-​rakkont taʼ Luqa, xhud li ra b’għajnejh stess dan kollu, “huma stennew li se jarawh [lil Pawlu] jintefaħ jew jaqaʼ u jmut f’daqqa.” In-​nies tal-​gżira jbiddlu l-​ħsieb u jibdew jgħidu li Pawlu bilfors li hu xi alla.—Atti 28:3-6.

Pawlu jqattaʼ tliet xhur f’Malta u matulhom ifejjaq lil missier Publju, ir-​raġel prinċipali tal-​gżira, li rċieva lil Pawlu b’mod ospitabbli, u lil oħrajn li huma milqutin minn xi mard. Barra minn hekk, Pawlu jiżraʼ żrieragħ tal-​verità, li jirriżultaw f’ħafna barkiet għall-​abitanti ospitabbli taʼ Malta.—Atti 28:7-11.

Lezzjoni Għalina

Matul il-​ministeru tiegħu, Pawlu ffaċċja ħafna sfidi. (2 Korintin 11:23-27) Fir-​rakkont t’hawn fuq, kien priġunier minħabba l-​aħbar tajba. Imbagħad, kellu jiffaċċja provi mhux mistennijin: maltempata qalila u n-​nawfraġju li ġie wara. Matul dan kollu, Pawlu qatt ma ħalla d-​determinazzjoni tiegħu biex ikun predikatur żeluż taʼ l-​aħbar tajba tonqos. Mill-​esperjenza, hu kiteb: “Noqgħod għal kollox; ix-​xabaʼ u l-​ġuħ; il-​ġid u l-​għaks. Għal kollox niflaħ bis-​saħħa taʼ dak li jqawwini.”—Filippin 4:12, 13.

Qatt m’għandu l-​inkwiet tal-​ħajja jdgħajjef id-​deċiżjoni tagħna li nkunu ministri żelużi taʼ dak Alla veru! Meta jinqalgħu provi mhux mistennijin, aħna nitfgħu t-​tagħbija tagħna fuq Jehovah. (Salm 55:23 [Salm 55:22, NW]) Imbagħad, nistennew bil-​paċenzja biex naraw kif hu jagħmilha possibbli għalina li nissaportu t-​test. Sadanittant, inkomplu naqduh b’mod leali, fiduċjużi li hu jimpurtah minna. (1 Korintin 10:13; 1 Pietru 5:7) Billi nibqgħu sodi, jiġri x’jiġri, aħna​—bħal Pawlu—​nistgħu nittrijonfaw fuq l-​avversità.

[Noti taʼ taħt]