Henjin li Jehovah Jurina Triqtu

“Dritta hi t-​triq taʼ Alla; safja hi l-​kelma tal-​Mulej.”—2 SAMWEL 22:31.

1, 2. (a) Il-​bnedmin kollha għal liema ħaġa għandhom ħtieġa fundamentali? (b) L-​eżempju taʼ min nagħmlu tajjeb li nimitaw?

IL-​BNEDMIN kollha għandhom ħtieġa fundamentali għall-​gwida. Tabilħaqq, neħtieġu l-​għajnuna biex tiggwidana fil-​ħajja. Veru, Jehovah żejjinna b’ammont taʼ intelliġenza u kuxjenza biex tgħinna nagħrfu t-​tajjeb mill-​ħażin. Imma l-​kuxjenza tagħna trid tiġi mħarrġa biex tkun gwida taʼ min joqgħod fuqha. (Lhud 5:14) U moħħna jeħtieġ informazzjoni korretta​—kif ukoll taħriġ biex jiżen dik l-​informazzjoni—​biex nieħdu deċiżjonijiet tajbin. (Proverbji 2:1-5) Anki f’dan il-​każ, minħabba l-​inċertezzi tal-​ħajja, id-​deċiżjonijiet tagħna għandhom mnejn ma jirnexxux kif nixtiquhom. (Koħèlet 9:11) Minna nfusna, m’għandna l-​ebda mod taʼ min joqgħod fuqu kif inkunu nafu x’hemm fil-​futur.

² Għal dawn ir-​raġunijiet u ħafna oħrajn, il-​profeta Ġeremija kiteb: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Ġesù Kristu, l-​aqwa bniedem li qatt għex, aċċetta d-​direzzjoni. Hu qal: “L-​Iben ebda ħaġa ma jistaʼ jagħmel minn rajh jekk ma jarax lil Missieru jagħmilha; għax il-​ħwejjeġ li jagħmel il-​Missier, jagħmilhom l-​Iben ukoll, bħalu.” (Ġwann 5:​19) Mela kemm hu għaqli li nimitaw lil Ġesù u nħarsu lejn Jehovah għall-​għajnuna biex nidderieġu l-​passi tagħna! Is-​sultan David kanta: “Dritta hi t-​triq taʼ Alla; safja hi l-​kelma tal-​Mulej. Tarka huwa Alla għal kull min jistkenn fih.” (2 Samwel 22:31) Jekk infittxu li nimxu fit-​triq taʼ Jehovah minflok ma nimxu fuq l-​għerf tagħna stess, se jkollna gwida perfetta. Jekk nirrifjutaw it-​triq t’Alla se nispiċċaw ħażin.

Jehovah Juri t-​Triq

3. Jehovah kif iggwida lil Adam u Eva, waqt li offrielhom liema prospetti?

³ Ikkunsidra l-​każ taʼ Adam u Eva. Għalkemm kienu bla dnub, xorta waħda kienu jeħtieġu d-​direzzjoni. Jehovah ma ħalliex lil Adam jippjana kollox għal rasu fil-​ġnien sabiħ taʼ Għeden. Minflok, Alla tah xogħol x’jagħmel. L-​ewwel, Adam kellu jagħti isem lill-​annimali. Imbagħad, Jehovah ta lil Adam u Eva miri fit-​tul. Huma kellhom irażżnu l-​art, jimlewha bin-​nisel tagħhom, u jieħdu ħsieb l-​annimali taʼ fuqha. (Ġenesi 1:28) Din kellha tkun biċċa xogħol kbira, imma r-​riżultat aħħari kien se jkun ġenna maʼ l-​art kollha mimlija b’razza umana perfetta li tgħix f’armonija maʼ l-​annimali maħluqin. Xi prospett taʼ l-​għaġeb! Iżjed minn hekk, waqt li Adam u Eva kienu jimxu fedelment fit-​triq taʼ Jehovah, huma kien se jkollhom komunikazzjoni miegħu. (Qabbel Ġenesi 3:8.) Xi privileġġ meraviljuż​—li jkollok relazzjoni persunali kontinwa mal-​Ħallieq!

4. Adam u Eva kif urew nuqqas taʼ fiduċja u lealtà, u b’liema riżultati diżastrużi?

⁴ Jehovah pprojbixxa lill-​ewwel koppja umana li jieklu mis-​siġra taʼ l-​għarfien tat-​tajjeb u tal-​ħażin li kienet f’Għeden, u dan tahom opportunità immedjata biex juru l-​ubbidjenza tagħhom​—ix-​xewqa tagħhom li jimxu fit-​triq taʼ Jehovah. (Ġenesi 2:17) Iżda dik l-​ubbidjenza ma damitx ma ġiet ittestjata. Meta ġie Satana bil-​kliem qarrieq tiegħu, Adam u Eva kienu meħtieġa juru lealtà lejn Jehovah u jafdaw fil-​wegħdi Tiegħu jekk riedu jibqgħu ubbidjenti. B’sogħba, huma kienu neqsin mil-​lealtà u l-​fiduċja. Meta Satana offra l-​indipendenza lil Eva u akkuża b’mod falz lil Jehovah bil-​gideb, hi tqarrqet u ma obdietx lil Alla. Adam dineb bħalha. (Ġenesi 3:1-6; 1 Timotju 2:14) It-​telfa li ġiet fuqhom kienet immensa. Li jimxu fit-​triq taʼ Jehovah kien se jagħtihom ferħ li dejjem jiżdied hekk kif huma wettqu r-​rieda tiegħu b’mod progressiv. Minflok, ħajjithom kienet mimlija b’diżappunt u wġigħ sakemm il-​mewt ħadithom.—Ġenesi 3:16-19; 5:1-5.

5. Liema hu l-​iskop fit-​tul taʼ Jehovah, u hu kif jgħin lil bnedmin leali jaraw it-​twettiq tiegħu?

⁵ Minkejja dan, Jehovah ma bidilx l-​iskop tiegħu li xi darba l-​art għad tkun dar ġenna għal bnedmin perfetti u bla dnub. (Salm 37:11, 29) U hu qatt ma naqas li jagħti gwida perfetta lil dawk li jimxu fit-​triq tiegħu u li jittamaw li jaraw it-​twettiq taʼ dik il-​wegħda. Għal dawk minna b’widnejn li jisimgħu, leħen Jehovah qiegħed warajna u qed jgħidilna: “Din hi t-​triq; għaddi minnha.”—Isaija 30:21.

Xi Wħud Imxew fit-​Triq taʼ Jehovah

6. Liema żewġt irġiel tal-​qedem imxew fit-​triq taʼ Jehovah, u b’liema riżultati?

⁶ Skond id-​dokumentazzjoni tal-​Bibbja, minoranza biss minn nisel Adam u Eva mxiet fit-​triq taʼ Jehovah. Abel kien l-​ewwel wieħed minn dawn. Għalkemm sofra mewta prematura, hu miet fil-​favur taʼ Jehovah, u b’hekk għandu l-​prospett ċert li jieħu sehem ‘fil-​qawmien tat-​tajbin’ meta jkun il-​waqt t’Alla. (Atti 24:15) Hu se jara t-​twettiq aħħari taʼ l-​iskop grandjuż taʼ Jehovah għall-​art u l-​umanità. (Lhud 11:4) Ieħor li mexa fit-​triq taʼ Jehovah kien Ħenok, li fil-​ktieb taʼ Ġuda insibu ppreservata l-​profezija tiegħu dwar it-​tmiem aħħari taʼ din is-​sistema taʼ affarijiet. (Ġuda 14, 15) Ħenok ukoll ma rnexxilux jgħix il-​potenzjal kollu taʼ ħajtu. (Ġenesi 5:21-24) Xorta waħda, “kiseb xhieda li hu kien għoġob lil Alla.” (Lhud 11:5) Meta miet, hu, bħal Abel, kellu l-​prospett ċert taʼ qawmien, u hu se jkun fost dawk li se jaraw l-​iskopijiet taʼ Jehovah jitwettqu.

7. Noè u l-​familja tiegħu kif urew lealtà lejn Jehovah u fdaw fih?

⁷ Hekk kif id-​dinja taʼ qabel id-​Dilluvju għodsot iżjed ’l isfel fil-​ħażen, l-​ubbidjenza lejn Jehovah saret iżjed u iżjed prova taʼ lealtà. Lejn tmiem dik id-​dinja, grupp żgħir wieħed biss instab miexi fit-​triq taʼ Jehovah. Noè u l-​familja tiegħu taw widen għal Alla u fdaw f’dak li qal. Huma wettqu bil-​fedeltà ix-​xogħol li tqiegħed quddiemhom u rrifjutaw li jinqabdu fil-​prattiċi ħżiena tad-​dinja taʼ dak iż-​żmien. (Ġenesi 6:5-7, 13-16; Lhud 11:7; 2 Pietru 2:5) Għandna għalxiex inkunu grati għall-​ubbidjenza leali u fiduċjuża tagħhom. Minħabba fiha, huma salvaw mid-​Dilluvju u saru l-​antenati tagħna.—Ġenesi 6:22; 1 Pietru 3:20.

8. Għall-​ġens taʼ Iżrael, x’kien involut f’li jimxi fit-​triq t’Alla?

⁸ Maż-​żmien, Jehovah għamel patt mad-​dixxendenti taʼ Ġakobb li kien leali, u huma saru l-​ġens speċjali tiegħu. (Eżodu 19:5, 6) Jehovah pprovda d-​direzzjoni għall-​poplu li kien f’patt miegħu permezz taʼ Liġi miktuba, saċerdozju, u gwida profetika kontinwa. Imma kien jiddependi mill-​Iżraeliti li jsegwu dik id-​direzzjoni. Jehovah qabbad lill-​profeta tiegħu jgħid lill-​Iżraeliti: “Araw, jiena llum inqiegħed quddiemkom barka u saħta; il-​barka, jekk tħarsu l-​kmandamenti tal-​Mulej, Alla tagħkom, li jiena llum qiegħed nordnalkom; u s-​saħta, jekk ma tħarsux il-​kmandamenti tal-​Mulej, Alla tagħkom, imma toħorġu mit-​triq li jiena llum qiegħed nordnalkom, biex timxu wara allat oħra li ma kontux tafu bihom.”—Dewteronomju 11:26-28.

Għala xi Wħud Abbandunaw it-​Triq taʼ Jehovah

9, 10. L-​Iżraeliti minħabba liema sitwazzjoni kellhom bżonn jafdaw f’Jehovah u jikkultivaw lealtà lejh?

⁹ Bħal fil-​każ taʼ Adam u Eva, l-​Iżraeliti kienu meħtieġa jafdaw f’Jehovah u jkunu leali lejh jekk riedu jibqgħu ubbidjenti. Iżrael kien ġens żgħir imdawwar b’ġirien pezza kustjoni. Lejn il-​lbiċ kien hemm l-​Eġittu u l-​Etjopja. Lejn il-​grigal kien hemm is-​Sirja u l-​Assirja. Preċiż maġenbhom kien hemm il-​Filistja, Għammon, Mowab, u Edom. F’xi żmien jew ieħor, dawn kollha saru l-​għedewwa taʼ Iżrael. Iktar minn hekk, ilkoll kemm huma kienu jipprattikaw reliġjon falza, ikkaratterizzata mill-​qima taʼ l-​allat idoli, astroloġija, u f’xi każi riti sesswali sfaċċati u l-​issagrifikar krudili tat-​tfal. Il-​ġirien taʼ Iżrael kienu jittamaw fl-​allat tagħhom biex jipprovdulhom familji kbar, ħsad fertili, u rebħa fil-​gwerra.

¹⁰ Iżrael biss kien iqim lil Alla wieħed, Jehovah. Hu wegħedhom il-​barkiet taʼ familji kbar, ħsad abbundanti, u sigurtà kontra l-​għedewwa tagħhom jekk jobdu l-​liġijiet tiegħu. (Dewteronomju 28:1-14) B’sogħba, ħafna f’Iżrael naqsu li jagħmluh dan. Minn dawk li tassew imxew fit-​triq taʼ Jehovah, ħafna minnhom sofrew minħabba l-​lealtà tagħhom. Xi wħud ġew saħansitra ttorturati, irridikolati, ifflaġellati, mitfugħin il-​ħabs, imħaġġrin, u maqtulin minn Iżraeliti bħalhom. (Atti 7:51, 52; Lhud 11:35-38) Żgur li din kienet prova kbira għal min kien leali! Iżda, ħafna għala żvijaw mit-​triq taʼ Jehovah? Żewġ eżempji mill-​istorja taʼ Iżrael jgħinuna naraw il-​ħsieb żbaljat tagħhom.

L-​Eżempju Ħażin taʼ Aħaż

11, 12. (a) Meta kien mhedded mis-​Sirja, Aħaż x’irrifjuta li jagħmel? (b) Aħaż lil liema żewġ sorsi fittex għas-​sigurtà?

¹¹ Aħaż saltan fuq is-​saltna taʼ Ġuda tan-​nofsinhar fit-​tmien seklu Q.E.K. Ir-​renju tiegħu ma kienx paċifiku. Darba minnhom, is-​Sirja u s-​saltna taʼ Iżrael tat-​tramuntana ngħaqdu fi gwerra kontrih, u “qalbu u qalb il-​poplu triegħdu.” (Isaija 7:1, 2) Madankollu, meta Jehovah offra l-​appoġġ tiegħu u stieden lil Aħaż biex jipprovah, Aħaż irrifjuta assolutament! (Isaija 7:10-12) Bħala riżultat, Ġuda tilfet il-​gwerra u sofriet telfiet kbar.—2 Kronaki 28:1-8.

¹² Filwaqt li Aħaż irrifjuta li jipprova lil Jehovah, hu ma ddejjaqx jitlob l-​għajnuna mingħand is-​sultan taʼ l-​Assirja. Xorta waħda, Ġuda baqgħet issofri minn idejn il-​ġirien tagħha. Meta l-​Assirja wkoll daret kontra Aħaż u ‘iktar għakksitu,’ is-​sultan beda “joffri s-​sagrifiċċji lill-​allat taʼ Damasku, taʼ dawk li kienu ħarbtuh, għax kien jgħid: ‘L-​allat tas-​slaten taʼ Aram [Sirja, NW], lil dawn kienu jgħinuhom, għalhekk jien noffrilhom is-​sagrifiċċji, ħalli jgħinuni.’”—2 Kronaki 28:20, 23.

13. Aħaż x’wera billi dar lejn l-​allat tas-​Sirja?

¹³ Wara xi żmien, Jehovah kien jgħid lil Iżrael: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi. Li kieku tajt widen għall-​kmandamenti tiegħi, kien ikun bħal xmara sliemek, u sedqek bħal mewġ tal-​baħar.” (Isaija 48:17, 18) Billi dar lejn l-​allat tas-​Sirja, Aħaż wera kemm kien ’il bogħod milli ‘jaqbad it-​triq fejn kellu jimxi.’ Hu kien ġie żvijat għalkollox bil-​mod kif kienu jaħsbuha l-​ġnus, billi fittex is-​sorsi foloz tagħhom għas-​sigurtà minflok lil Jehovah.

14. Aħaż għala ma kellu ebda skuża meta dar lejn l-​allat foloz?

¹⁴ L-​allat tal-​ġnus, inkluż dawk tas-​Sirja, kienu ilhom li ġew ipprovati bħala “idoli” bla siwi. (Isaija 2:8) Iktar kmieni, matul ir-​renju tas-​Sultan David, is-​superjorità taʼ Jehovah fuq l-​allat tas-​Sirja ntweriet b’mod ċar meta s-​Sirjani saru qaddejja taʼ David. (1 Kronaki 18:5, 6) Jehovah waħdu, “Alla fuq l-​allat, u sid fuq is-​sidien, Alla kbir, qawwi u tal-​biżaʼ,” jistaʼ jagħti sigurtà vera. (Dewteronomju 10:17) Iżda Aħaż ta dahru lil Jehovah u fittex l-​allat tal-​ġnus għas-​sigurtà. Ir-​riżultat kien diżastruż għal Ġuda.—2 Kronaki 28:24, 25.

Il-​Lhud maʼ Ġeremija fl-​Eġittu

15. Il-​Lhud fl-​Eġittu fi żmien Ġeremija b’liema mod dinbu?

¹⁵ Minħabba n-​nuqqas estrem taʼ lealtà tal-​poplu tiegħu, fis-​sena 607 Q.E.K., Jehovah ħalla lill-​Babiloniżi jeqirdu lil Ġerusalemm u t-​tempju tagħha. Il-​biċċa l-​kbira mill-​ġens sfaw eżiljati lejn Babilonja. Iżda xi wħud tħallew f’Ġuda, fosthom il-​profeta Ġeremija. Meta l-​Gvernatur Gedalija ġie assassinat, dan il-​grupp ħarab lejn l-​Eġittu u ħadu lil Ġeremija magħhom. (2 Slaten 25:22-26; Ġeremija 43:5-7) Hemmhekk, bdew jissagrifikaw lil allat foloz. Ġeremija pprova jirraġuna mal-​Lhud żleali, imma huma kienu rashom iebsa. Irrifjutaw li jduru lejn Jehovah u insistew li kellhom jibqgħu jagħmlu sagrifiċċji maħruqa lis-​“sultana tas-​smewwiet.” Għala? Għaliex hekk kienu jagħmlu huma u missirijiethom ‘fil-​bliet taʼ Ġuda u fit-​toroq taʼ Ġerusalemm, meta kienu mxebbgħin bil-​ħobż u kienu qegħdin tajjeb, u ħsara ma rawx.’ (Ġeremija 44:16, 17) Il-​Lhud argumentaw ukoll: “Minn mindu waqafna milli naħarqu l-​inċens lis-​sultana tas-​smewwiet, u nsawwbulha l-​libazzjonijiet, naqasna kollox, u ntemmejna bix-​xabla u l-​pesta.”​—Ġeremija 44:18.

16. Il-​Lhud fl-​Eġittu għala kienu żbaljati għalkollox fir-​raġunar tagħhom?

¹⁶ Kemm jinsa l-​bniedem fejn irid! X’kienu l-​fatti? Il-​Lhud tassew li kienu ssagrifikaw lil allat foloz fl-​art li Jehovah kien tahom. Xi drabi, bħal fi żmien Aħaż, huma sofrew minħabba din l-​apostasija. Madankollu, Jehovah kien “tqil biex jagħdab” mal-​poplu li kien f’patt miegħu. (Eżodu 34:6; Salm 86:15) Hu bagħat lill-​profeti tiegħu biex iħeġġuhom jindmu. Xi drabi, meta s-​sultan kien leali, Jehovah bierku, u n-​nies ibbenefikaw minn din il-​barka, avolja l-​biċċa l-​kbira minnhom kienu żleali. (2 Kronaki 20:29-33; 27:1-6) Kemm kienu żbaljati dawk il-​Lhud fl-​Eġittu meta qalu li jekk kienu gawdew xi prosperità f’art twelidhom din kienet ġiet mill-​allat foloz tagħhom!

17. Ġuda għala tilfet l-​art u t-​tempju tagħha?

¹⁷ Qabel is-​sena 607 Q.E.K., Jehovah kien ħeġġeġ lin-​nies taʼ Ġuda: “Isimgħu minn kliemi, u jiena nkun Alla tagħkom, u intom tkunu l-​poplu tiegħi, u imxu fit-​triq kollha li qiegħed nordnalkom, għall-​ġid tagħkom.” (Ġeremija 7:23) Il-​Lhud tilfu t-​tempju tagħhom u arthom preċiżament għaliex irrifjutaw li jimxu ‘fit-​triq kollha li Jehovah kien ordnalhom.’ Ejja nkunu żguri li nevitaw dan l-​iżball fatali.

Jehovah Jbierek lil Dawk li Jimxu fit-​Triq Tiegħu

18. Dawk li jimxu fit-​triq taʼ Jehovah x’iridu jagħmlu?

¹⁸ Illum, bħal fil-​passat, li nimxu fit-​triq taʼ Jehovah jirrikjedi lealtà​—determinazzjoni li naqdu lilu biss. Jirrikjedi fiduċja​—fidi sħiħa li l-​wegħdi taʼ Jehovah huma taʼ min joqgħod fuqhom u li dawn se jseħħu. Li nimxu fit-​triq taʼ Jehovah jirrikjedi ubbidjenza​—li nsegwu l-​liġijiet tiegħu mingħajr ma niżvijaw u nżommu l-​livelli għoljin tiegħu. “Ġust hu l-​Mulej, u jħobb il-​ġustizzja; wiċċu jdawwar lejn min hu sewwa.”—Salm 11:7.

19. Ħafna liema allat iqimu llum, u b’liema riżultati?

¹⁹ Aħaż fittex lill-​allat tas-​Sirja għas-​sigurtà. L-​Iżraeliti fl-​Eġittu ttamaw li s-​“sultana tas-​smewwiet,” alla mara li kienet meqjuma estensivament fil-​Lvant Nofsani tal-​qedem, kienet se ġġibilhom prosperità materjali. Illum, ħafna allat m’humiex idoli litterali. Ġesù wissa kontra li naqdu “lill-​flus” minflok lil Jehovah. (Mattew 6:24) L-​appostlu Pawlu tkellem dwar “[i]r-rebgħa, li hi idolatrija.” (Kolossin 3:5) Tkellem ukoll dwar dawk li “alla tagħhom hu żaqqhom.” (Filippin 3:19) Iva, il-​flus u l-​affarijiet materjali huma fost l-​allat ewlenin meqjumin illum. Fir-​realtà, il-​biċċa l-​kbira​—inkluż ħafna li huma membri taʼ xi reliġjon jew oħra—​‘jqegħdu t-​tama tagħhom f’għana li ma tistax torbot fuqu.’ (1 Timotju 6:17) Ħafna jaħdmu iebes ferm biex jaqdu lil dawn l-​allat, u xi wħud jaħsdu benefiċċji​—jgħixu fl-​aqwa djar, igawdu affarijiet li jiswew ħafna flus, u jieklu ikel bix-​xabaʼ. Madankollu, mhux kulħadd igawdi din l-​abbundanza. U saħansitra dawk li jgawduha, maż-​żmien isibu li dawn l-​affarijiet m’humiex sodisfaċenti fihom infushom. Huma inċerti, temporanji, u ma jissodisfawx il-​bżonnijiet spiritwali.—Mattew 5:3.

20. Liema bilanċ għandna bżonn inżommu?

²⁰ Veru, irridu nkunu prattiċi waqt li qed ngħixu matul dawn l-​aħħar jiem taʼ din is-​sistema taʼ affarijiet. Jeħtieġ li nieħdu passi raġunevoli biex nipprovdu materjalment għall-​familji tagħna. Imma jekk inpoġġu valur akbar fuq livell għoli t’għajxien, il-​ġiri wara l-​flus, jew affarijiet bħal dawn milli fuq li naqdu lil Alla, inkunu waqajna f’għamla taʼ idolatrija u ma nkunux bqajna nimxu fit-​triq taʼ Jehovah. (1 Timotju 6:​9, 10) Iżda, xi ngħidu meta niltaqgħu maʼ problemi taʼ saħħa, taʼ finanzi, jew problemi oħrajn? Ejja ma nkunux bħal dawk il-​Lhud fl-​Eġittu li qalu li l-​problemi tagħhom ġew minħabba li kienu jaqdu lil Alla. Pjuttost, ejja nipprovawh lil Jehovah, xi ħaġa li Aħaż naqas li jagħmel. Dur lealment lejn Alla Jehovah għall-​gwida. Applika bil-​fiduċja l-​gwida tiegħu, u itlob għas-​saħħa u l-​għerf biex tiffaċċja kull sitwazzjoni. Imbagħad, stenna fiduċjuż għall-​barka taʼ Jehovah.

21. Liema barkiet jiġu għand dawk li jimxu fit-​triq taʼ Jehovah?

²¹ Matul il-​korsa taʼ l-​istorja taʼ Iżrael, Jehovah bierek bil-​kbir lil dawk li mxew fit-​triq tiegħu. Is-​Sultan David kanta: “Mexxini, Mulej, fis-​sewwa tiegħek minħabba l-​għedewwa tiegħi.” (Salm 5:9 [5:8, NW]) Lilu, Jehovah ta rebħiet militari fuq ġnus ġirien li iktar tard kienu taʼ theddida għal Aħaż. Taħt Salamun, Iżrael tbierek bil-​paċi u l-​prosperità li l-​Lhud fl-​Eġittu iktar tard ixxennqu għalihom. Lil Ħeżekija, bin Aħaż, Jehovah saħansitra tah rebħa fuq l-​Assirja li kienet ferm setgħana. (Isaija 59:1) Iva, id Jehovah ma qsaritx lejn dawk leali lejh, li ma waqfux “fi triq il-​ħatjin,” imma li l-​għaxqa tagħhom kienet fil-​liġi t’Alla. (Salm 1:1, 2) Dan għadu japplika. Iżda, kif nistgħu aħna llum inkunu ċerti li qegħdin nimxu fit-​triq taʼ Jehovah? Dan se jiġi diskuss fl-​artiklu li jmiss.

Tiftakar Int?

◻ Liema kwalitajiet huma vitali jekk irridu nimxu fit-​triq taʼ Jehovah?

◻ Ir-​raġunar taʼ Aħaż għala kien falz?

◻ X’kien hemm żbaljat fir-​raġunar tal-​Lhud fl-​Eġittu?

◻ Kif nistgħu nsaħħu d-​determinazzjoni tagħna li nimxu fit-​triq taʼ Jehovah?

[Stampa f’paġna 13]

Aħaż fittex lill-​allat tas-​Sirja minflok lil Jehovah