Il-​Ħallieq Tiegħek—Tgħallem Dwar x’Tip taʼ Persuna Hu

“Jiena ngħaddi tjubiti kollha minn quddiemek, u ngħajjat l-​isem tiegħi ‘Jaħweh’ quddiemek.”—EŻODU 33:19.

1. Il-​Ħallieq għala jixraqlu li jiġi onorat?

L-​APPOSTLU Ġwanni, kittieb taʼ l-​aħħar ktieb tal-​Bibbja, iddokumenta din id-​dikjarazzjoni profonda dwar il-​Ħallieq: “Jistħoqqlok, Mulej Alla tagħna, li tilqaʼ l-​glorja u l-​ġieħ u s-​setgħa, għax int ħlaqt il-​ħlejjaq kollha, u huma kienu u nħolqu bir-​rieda tiegħek.” (Apokalissi 4:11) Bħalma stabbilixxa l-​artiklu preċedenti, is-​sejbiet tax-​xjenza moderna spiss iżidu raġunijiet biex wieħed jemmen f’Dak li ħalaq kollox.

2, 3. (a) In-​nies x’għandhom bżonn jitgħallmu dwar il-​Ħallieq? (b) Għala m’huwiex raġunevoli li tiltaqaʼ personalment mal-​Ħallieq?

² Daqs kemm huwa importanti li taċċetta li l-​Ħallieq jeżisti, daqshekk ieħor huwa importanti li tkun taf x’tip taʼ persuna hu​—li hu persuna vera, b’personalità u modi li jiġbdu lin-​nies lejh. Minkejja sa liema punt għamilt dan, ma jkunx taʼ benefiċċju li ssir tafu aħjar? Dan ma jirrikjedix li tiltaqaʼ miegħu personalment, bħalma niltaqgħu maʼ bnedmin oħrajn.

³ Jehovah hu s-​Sors saħansitra tal-​kwiekeb, bix-​xemx tagħna li hija biss kewkba taʼ daqs medju. Qatt jgħaddilek minn moħħok li jkollok kuntatt fiżiku max-​xemx? Żgur li le! Il-​biċċa l-​kbira min-​nies joqogħdu attenti li lanqas biss iħarsu lejha jew jesponu l-​ġilda tagħhom għar-​raġġi qawwija tagħha għal żmien twil. It-​temperatura fiċ-​ċentru tagħha hija madwar 15,000,000 grad Celsius (27,000,000°F.). Kull sekonda, din il-​ħuġġieġa termonukleari tbiddel madwar erbaʼ miljun tunnellata taʼ materjal f’enerġija. Frazzjon żgħir biss minnha jasal fuq l-​art bħala sħana u dawl, imma dan l-​ammont isostni l-​ħajja kollha hawnhekk. Dawn il-​fatti bażiċi għandhom jimpressjonawna bil-​qawwa taʼ l-​għaġeb li għandu l-​Ħallieq. Isaija bix-​xieraq setaʼ jikteb dwar ‘is-​saħħa taʼ qawwiet il-​Ħallieq u l-​qawwa taʼ setgħetu.’—Isaija 40:26.

4.Mosè għal xiex staqsa, u Jehovah kif wieġbu?

⁴ Iżda, kont taf li xi ftit xhur wara li l-​Iżraeliti telqu mill-​Eġittu fl-​1513 Q.E.K., Mosè talab lill-​Ħallieq: “Ħallini, nitolbok, nara l-​glorja tiegħek”? (Eżodu 33:18) Jekk tiftakar li Alla hu s-​Sors saħansitra tax-​xemx, tistaʼ tifhem għala qal lil Mosè: “Int ma tistax tara ’l wiċċi, għax ebda bniedem ma jarani u jibqaʼ ħaj.” Il-​Ħallieq ippermetta lil Mosè li jsib moħba fuq il-​Muntanja Sinaj sakemm Hu ‘jgħaddi.’ Mosè mbagħad tħalla jara ‘dahar’ Alla, f’sens figurattiv, xi forma taʼ riflessjoni mill-​glorja, jew preżenza tal-​Ħallieq.—Eżodu 33:20-23; Ġwann 1:18.

5. Il-​Ħallieq b’liema mod issodisfa x-​xewqa taʼ Mosè, u b’hekk x’wera?

⁵ Ix-​xewqa taʼ Mosè li jsir jaf lill-​Ħallieq aħjar ġiet imwieġba. Billi evidentement tkellem permezz taʼ anġlu, Alla għadda minn ħdejn Mosè u ddikjara: “Jaħweh! Jaħweh! Alla li jagħder u jħenn; tqil biex jagħdab u kbir fit-​tjieba u l-​fedeltà. Iħares it-​tjieba għal elf ġenerazzjoni u jaħfer il-​ħażen, id-​dnub u l-​ħtija; imma ma jħalli xejn għaddej.” (Eżodu 34:6, 7) Dan juri li biex insiru nafu lill-​Ħallieq tagħna aħjar jinvolvi, mhux li naraw xi forma fiżika, imma li nsiru konxji b’mod iktar sħiħ taʼ x’tip taʼ persuna hu, fil-​personalità u l-​karatteristiċi tiegħu.

6.Is-sistema taʼ l-​immunità tagħna kif inhi meravilja?

⁶ Mod wieħed kif nistgħu nagħmlu dan huwa billi nagħrfu l-​kwalitajiet t’Alla minn dak li ħalaq. Ikkunsidra s-​sistema taʼ l-​immunità tiegħek. F’ħarġa dwar l-​immunità, Scientific American qalet: “Minn qabel it-​twelid sal-​mewt, is-​sistema taʼ l-​immunità tkun fi stat taʼ allarm kontinwu. Eżerċtu varjat taʼ molekuli u ċelloli . . . jipproteġuna kontra l-​parassiti u l-​patoġeni. Mingħajr dawn id-​difiżi, il-​bnedmin ma jistgħux jibqgħu ħajjin.” X’inhu s-​sors taʼ din is-​sistema? Artiklu f’dik ir-​rivista qal: “L-​eżerċtu meraviljuż taʼ ċelloli li jaħdmu id f’id b’sengħa kbira u li jiddefendu l-​ġisem minn invażuri bħal mikrobi u virus jiżviluppaw minn ftit ċelloli tal-​bidu li jidhru l-​ewwel darba madwar disaʼ ġimgħat wara l-​konċepiment.” Mara tqila tgħaddi xi ftit immunità lit-​tarbija li tkun qed tiżviluppa f’ġufha. Iktar tard, permezz tal-​ħalib taʼ sidirha, hi tipprovdi wkoll ċelloli taʼ l-​immunità u kimiċi taʼ benefiċċju għat-​tarbija tagħha.

7. X’nistgħu nikkunsidraw dwar is-​sistema taʼ l-​immunità tagħna, li jwassalna għal liema konklużjoni?

⁷ Għandek raġuni valida li tikkonkludi li s-​sistema taʼ l-​immunità li għandek tisboq kwalunkwe ħaġa li l-​mediċina moderna tistaʼ tipprovdi. Għaldaqstant, staqsi lilek innifsek, ‘Dan x’jissuġġerixxi dwar Dak li oriġinaha u pprovdieha?’ Din is-​sistema, li ‘tidher l-​ewwel darba madwar disaʼ ġimgħat wara l-​konċepiment’ u li tkun lesta biex tipproteġi tarbija tat-​twelid, ċertament li tirrifletti għerf u dehen. Iżda nistgħu aħna nifhmu ferm iżjed dwar il-​Ħallieq minn din is-​sistema? Il-​biċċa l-​kbira minna x’nikkonkludu dwar Albert Schweitzer u oħrajn li ddedikaw ħajjithom biex jipprovdu kura medika għan-​nies inqas privileġġati? Aħna normalment nattribwixxu kwalitajiet tajbin lil uħud bħal dawn li jħobbu u jagħdru lill-​proxxmu. Bl-​istess mod, x’nistgħu nikkonkludu dwar il-​Ħallieq tagħna, li jipprovdi sistema taʼ l-​immunità kemm lis-​sinjur kif ukoll lill-​fqir? Jidher ċar li hu jaf iħobb, hu imparzjali, jaf jagħder u ġust. M’huwiex dan konsistenti mad-​deskrizzjoni dwar il-​Ħallieq li semaʼ Mosè?

Jirrivela x’Tip taʼ Persuna Hu

8.Jehovah b’liema mod speċjali jirrivela lilu nnifsu lilna?

⁸ Iżda hemm mod ieħor kif nistgħu nsiru nafu lill-​Ħallieq tagħna aħjar​—permezz tal-​Bibbja. Dan huwa partikolarment importanti peress li hemm affarijiet dwaru li x-​xjenza u l-​univers ma jistgħux jirrivelaw affattu u affarijiet oħrajn li huma ferm iżjed ċari fil-​Bibbja. Eżempju taʼ dan hu l-​isem persunali tal-​Ħallieq. Il-​Bibbja biss tirrivela isem il-​Ħallieq u s-​sinjifikat tiegħu. F’manuskritti Ebrej tal-​Bibbja, ismu jidher madwar 7,000 darba bħala erbaʼ konsonanti li jistgħu jiġu spelluti YHWH jew JHVH, u l-​pronunzja komuni tagħhom bl-​Ingliż hija Jehovah.—Eżodu 3:15; 6:3.

9. X’ifisser l-​isem persunali tal-​Ħallieq, u x’nistgħu nikkonkludu minn dan?

⁹ Biex aħna naslu li nsiru nafu lill-​Ħallieq aħjar, irridu napprezzaw li dan m’huwiex sempliċement xi “l-​Ewwel Kawża” astratta jew espressjoni vaga bħal “Jiena Hu.” Dan jurih l-​isem persunali tiegħu. Huwa forma taʼ verb Ebrew li jfisser “isir” jew “juri li hu.”a (Qabbel Ġenesi 27:29; Koħèlet 11:3.) Isem Alla jissinjifika “Hu Jikkaġuna li Jsir” u jenfasizza li hu jifforma skop u jaġixxi fuqu. Billi nkunu nafu u nużaw ismu, aħna nistgħu napprezzaw aħjar li hu jwettaq l-​wegħdi li jagħmel u jwassal b’mod attiv l-​iskop tiegħu sat-​tmiem.

10. Liema dehen importanti nistgħu niksbu mir-​rakkont storiku taʼ Ġenesi?

¹⁰ Il-​Bibbja hija s-​sors t’għarfien dwar l-​iskopijiet u l-​personalità t’Alla. Ir-​rakkont storiku f’Ġenesi jirrivela li f’xi żmien l-​umanità kienet fil-​paċi m’Alla u kellha l-​prospett taʼ ħajja twila u sinjifikanti. (Ġenesi 1:28; 2:7-9) Konsistenti mas-​sinjifikat taʼ ismu, nistgħu nkunu żguri li Jehovah se jtemm is-​sofferenza u l-​frustrazzjoni li l-​bnedmin tant ilhom jiffaċċjaw. Naqraw dwar it-​twettiq taʼ l-​iskop tiegħu: “Il-​ħolqien jinsab taħt il-​frugħa – mhux minn rajh, imma minħabba Alla li xeħtu taħtha – bit-​tama li l-​ħlejjaq huma wkoll għad . . . jiksbu l-​ħelsien tal-​glorja taʼ wlied Alla.”—Rumani 8:20, 21.

11. Għala għandna nikkunsidraw rakkonti Bibliċi, u liema dettalji fih rakkont minnhom?

¹¹ Il-​Bibbja tistaʼ tgħinna wkoll insiru nafu lill-​Ħallieq tagħna aħjar għaliex din tirrivela l-​azzjonijiet u r-​reazzjonijiet tiegħu meta ttratta maʼ Iżrael tal-​qedem. Ikkunsidra eżempju li jinvolvi lil Eliżew u lil Nagħman, il-​kap taʼ l-​armata ostili Sirjana. Waqt li taqra dan ir-​rakkont fit-​2 Slaten kapitlu 5, se tara li tifla Iżraelita fil-​jasar insistiet li l-​ġdiem taʼ Nagħman setaʼ jitfejjaq bl-​għajnuna taʼ Eliżew f’Iżrael. Nagħman mar hemmhekk jistenna li Eliżew ixejjer idejh b’xi ritwal mistiku taʼ fejqan. Minflok, Eliżew qal lis-​Sirjan biex jinħasel fix-​Xmara Ġordan. Għalkemm dawk taʼ taħtu kellhom jikkonvinċuh biex jobdi, meta Nagħman għamel dan, fieq. Nagħman ippreżenta għotjiet taʼ valur, li Eliżew irrifjuta. Iktar tard wieħed kollega mar bil-​moħbi għand Nagħman u permezz taʼ gidba kiseb xi affarijiet taʼ valur. Id-​diżonestà tiegħu wasslitu biex jintlaqat bil-​ġdiem. Dan huwa rakkont uman u affaxxinanti​—wieħed li nistgħu nitgħallmu minnu.

12. Liema konklużjonijiet nistgħu niġbdu dwar il-​Ħallieq mir-​rakkont taʼ Eliżew u Nagħman?

¹² Ir-​rakkont juri, b’mod li jiġbdek, li l-​Ħallieq Grandjuż taʼ l-​univers m’huwiex daqstant fl-​għoli li ma jinnotax b’favur tifla ċkejkna, xi ħaġa li hija f’kuntrast kbir għal dak li normalment isir f’ħafna kulturi llum. Dan jagħti prova wkoll li l-​Ħallieq ma jiffavorix biss lil xi razza jew ġens wieħed. (Atti 10:34, 35) Huwa interessanti li minflok ma jistenna li jintuża xi kliem stramb biex wieħed jidħaq bin-​nies​—xi ħaġa komuni mal-​“faith-healers” tal-​passat u tal-​preżent—​il-Ħallieq wera għerf meraviljuż. Kien jaf ifejqu l-​ġdiem. Wera wkoll dehen u ġustizzja f’li ma jippermettix il-​qerq jirnexxi. Għal darb’oħra, m’huwiex dan konsistenti mal-​personalità taʼ Jehovah li Mosè semaʼ dwarha? Għalkemm dan ir-​rakkont Bibliku huwa qasir, kemm nistgħu nisiltu minnu dwar x’tip taʼ persuna hu l-​Ħallieq tagħna!—Salm 33:5; 37:28.

13. Agħti eżempju taʼ kif nistgħu nisiltu lezzjonijiet imprezzabbli minn rakkonti Bibliċi.

¹³ Rakkonti oħrajn dwar l-​azzjonijiet ingrati taʼ Iżrael u l-​mod kif Alla rreaġixxa juru li Jehovah verament jimpurtah mill-​bnedmin. Il-​Bibbja tgħid li l-​Iżraeliti ġarrbuh għal darba wara l-​oħra, billi ġagħluh iħossu mnikket u mweġġaʼ. (Salm 78:40, 41) Għaldaqstant, il-​Ħallieq iħoss, u jimpurtah minn dak li jagħmlu l-​bnedmin. Hemm ħafna x’nitgħallmu wkoll minn rakkonti dwar individwi magħrufin. Meta David intgħażel biex ikun sultan taʼ Iżrael, Alla qal lil Samwel: “Għax il-​Mulej ma jarax bħalma jara l-​bniedem, dak biss li jidher fl-​għajn, imma l-​qalb.” (1 Samwel 16:7) Iva, il-​Ħallieq jara x’aħna minn ġewwa, mhux kif nidhru minn barra. Kemm huwa taʼ sodisfazzjon dan!

14. Hekk kif naqraw l-​Iskrittura Ebrajka, x’nistgħu nagħmlu taʼ benefiċċju?

¹⁴ Disgħa u tletin mill-​kotba tal-​Bibbja nkitbu qabel ma Ġesù ġie fuq l-​art, u jkun taʼ vantaġġ għalina jekk naqrawhom. Dan mhux biex sempliċement nitgħallmu rakkonti jew ġrajjiet storiċi tal-​Bibbja. Jekk verament irridu nitgħallmu dwar x’tip taʼ persuna hu l-​Ħallieq tagħna, għandna nimmeditaw fuq dawn ir-​rakkonti, forsi billi naħsbu, ‘Dan l-​episodju x’jikxef dwar il-​personalità tiegħu? Liema minn fost il-​kwalitajiet tiegħu jispikkaw hawn?’b Dan jistaʼ jgħin saħansitra lil nies xettiċi jaraw li l-​Bibbja bilfors li għandha oriġini divina, u b’hekk dan iservi taʼ pedament għalihom biex ikunu jistgħu jsiru jafu aħjar lill-​Awtur tagħha taʼ mħabba.

Għalliem Kbir Jgħinna Nsiru Nafu l-​Ħallieq

15. Dak li għamel u għallem Ġesù għala għandu jkun istruttiv?

¹⁵ Nammettu li nies li jiddubitaw l-​eżistenza tal-​Ħallieq jew li l-​ħarsa tagħhom dwar Alla hija vaga, forsi ftit li xejn jafu dwar il-​Bibbja. Għandu mnejn li ltqajt maʼ xi individwi li ma kinux jafu jekk Mosè kienx jgħix qabel jew wara Mattew u li kważi ma jafu xejn dwar dak li għamel jew għallem Ġesù. Din ħasra għaliex nistgħu nitgħallmu ferm dwar il-​Ħallieq mill-​Għalliem il-​Kbir, Ġesù. Billi kellu relazzjoni mill-​qrib m’Alla, hu setaʼ jirrivelalna x’tip taʼ persuna hu l-​Ħallieq tagħna. (Ġwann 1:18; 2 Korintin 4:6; Lhud 1:3) U hekk għamel. Fil-​fatt hu darba qal: “Min ra lili ra lill-​Missier.”—Ġwann 14:9.

16. L-​azzjoni reċiproka taʼ Ġesù maʼ mara Samaritana x’turi?

¹⁶ Ikkunsidra dan l-​eżempju. Darba minnhom meta kien għajjien għax kien ivvjaġġa ħafna, Ġesù tkellem maʼ mara Samaritana ħdejn Sikar. Hu qasam magħha veritajiet profondi, li jiċċentraw fuq il-​ħtieġa li ‘naduraw lill-​Missier fl-​ispirtu u l-​verità.’ Il-​Lhud taʼ dik l-​era kienu jiskartawhom lis-​Samaritani. B’kuntrast, Ġesù rrifletta kemm Jehovah hu dispost li jaċċetta rġiel u nisa sinċieri mill-​ġnus kollha, saħansitra bħalma nnotajna mill-​inċident dwar Eliżew u Nagħman. Dan għandu jiżgurana li Jehovah ma jirrikorrix għall-​ostilità reliġjuża intolleranti tant komuni fid-​dinja llum. Nistgħu ninnotaw ukoll il-​fatt li Ġesù kien lest li jgħallem mara, u f’dan il-​każ waħda li kienet tgħix maʼ raġel li ma kienx żewġha. Minflok ma kkundannaha, Ġesù stmaha bid-​dinjità, b’mod li setaʼ tassew jgħinha. Wara dan, Samaritani oħrajn taw widen għal Ġesù u kkonkludew: “Sirna nafu li dan tassew hu s-​salvatur tad-​dinja.”—Ġwann 4:2-30, 39-42; 1 Slaten 8:41-43; Mattew 9:10-13.

17. Ir-​rakkont dwar l-​irxoxt taʼ Lazzru lejn liema konklużjoni jipponta?

¹⁷ Ejja nikkunsidraw eżempju ieħor dwar kif nistgħu nitgħallmu dwar il-​Ħallieq billi nsiru familjari maʼ dak li għamel u għallem Ġesù. Irrifletti dwar l-​okkażjoni meta miet Lazzru, il-​ħabib taʼ Ġesù. Ġesù kien diġà ta prova tal-​qawwa tiegħu li jġib il-​mejtin lura għall-​ħajja. (Luqa 7:11-17; 8:40-56) Iżda kif irreaġixxa meta ra lil Marija, oħt Lazzru, titnikket? Ġesù “ħass ruħu mqanqal u tħawwad ħafna.” Ma kienx indifferenti jew imkabbar; hu “beka.” (Ġwann 11:33-35) U din ma kinitx sempliċi turija taʼ emozzjoni. Ġesù ġie mqanqal għal azzjoni pożittiva​—irxoxta lil Lazzru. Tistaʼ timmaġina kemm dan għen lill-​appostli japprezzaw is-​sentimenti u l-​azzjonijiet tal-​Ħallieq. Dan għandu wkoll jgħin lilna, u lil oħrajn, nifhmu l-​personalità u t-​triqat tal-​Ħallieq.

18. In-​nies kif għandhom iħossuhom dwar li jistudjaw il-​Bibbja?

¹⁸ M’hemmx għalfejn tistħi tistudja l-​Bibbja u titgħallem iżjed dwar il-​Ħallieq tagħna. Il-​Bibbja m’hijiex xi ktieb antikwat. Wieħed li studjaha u sar ħabib mill-​qrib taʼ Ġesù kien Ġwanni. Iktar tard dan kiteb: “Imma nafu wkoll li l-​Iben taʼ Alla ġie u tana d-​dehen biex nagħrfu ’l Alla l-​veru. U aħna ninsabu f’Alla l-​veru, f’Ibnu Ġesù Kristu. Dan hu Alla l-​veru, u l-​ħajja taʼ dejjem.” (1 Ġwann 5:20) Osserva li jekk napplikaw id-​“dehen” biex niksbu għarfien dwar “Alla l-​veru,” il-​Ħallieq, dan jistaʼ jwassal għall-​“ħajja taʼ dejjem.”

Kif Tistaʼ Tgħin lil Oħrajn Jitgħallmu Dwaru?

19. Liema pass ittieħed biex jiġu megħjunin nies xettiċi?

¹⁹ Ħafna evidenza hija meħtieġa għal xi nies biex jemmnu li hemm Ħallieq li jagħder u li jimpurtah minna u biex japprezzaw x’tip taʼ persuna hu. Hemm miljuni kbar li għadhom xettiċi dwar il-​Ħallieq jew li l-​ħarsa tagħhom dwaru ma taqbilx maʼ dak li nsibu fil-​Bibbja. Kif tistaʼ tgħinhom? Fil-​konvenzjonijiet distrettwali u internazzjonali tax-​Xhieda taʼ Jehovah li nżammu fl-​1998/99, ħarġet f’ħafna lingwi għodda ġdida u effettiva​—il-​ktieb Is There a Creator Who Cares About You?

20, 21. (a) Il-​ktieb Creator kif jistaʼ jintuża b’suċċess? (b) Irrakkonta esperjenzi dwar kif il-​ktieb Creator diġà wera li kien effettiv.

²⁰ Din hija pubblikazzjoni li se tkabbar il-​fidi tiegħek stess fil-​Ħallieq tagħna u l-​apprezzament tiegħek għall-​personalità tiegħu u triqatu. Din għala hija ħaġa ċerta? Għax Is There a Creator Who Cares About You? tfassal apposta għal dan l-​għan. Tema li tibqaʼ għaddejja matul il-​ktieb kollu hija “What Can Add Meaning to Your Life?” (X’Jistaʼ Jagħti Iktar Sinjifikat lil Ħajtek?) Il-​kontenut huwa preżentat b’mod li anki nies taʼ edukazzjoni konsiderevoli se jsibuh affaxxinanti. Madankollu, dan jolqot sentimenti li lkoll kemm aħna għandna. Fih materjal affaxxinanti u persważiv għal qarrejja li jiddubitaw l-​eżistenza tal-​Ħallieq. Il-​ktieb ma jassumix li l-​qarrej jemmen f’Ħallieq. Dawk li huma xettiċi se jiġu attirati mill-​użu taʼ skoperti u konċetti xjentifiċi reċenti. Dawn il-​fatti se jsaħħu saħansitra l-​fidi taʼ dawk li jemmnu f’Alla.

²¹ Meta wieħed jistudja dan il-​ktieb il-​ġdid, se jara li partijiet minnu jippreżentaw ħarsa ġenerali taʼ ġrajjiet storiċi tal-​Bibbja b’mod li jenfasizza aspetti mill-​personalità t’Alla, u b’hekk il-​qarrej jiġi megħjun isir jaf lil Alla aħjar. Ħafna li diġà qrawh ikkummentaw dwar kif dan kien minnu fil-​każ tagħhom. (Ara l-​artiklu li jmiss, paġni 25-6.) Jalla dan ukoll ikun minnu dwarek hekk kif issir familjari mal-​ktieb u tużah biex tgħin lil oħrajn isiru jafu aħjar lill-​Ħallieq tagħhom.

[Noti taʼ taħt]

Innotajt?

◻ Mosè kif sar jaf lil Jehovah aħjar fuq il-​Muntanja Sinaj?

◻ Li nistudjaw il-​Bibbja għala huwa t’għajnuna biex insiru nafu x’tip taʼ persuna hu Alla?

◻ Hekk kif naqraw il-​Bibbja, x’nistgħu nagħmlu biex nersqu eqreb lejn il-​Ħallieq tagħna?

◻ B’liema mod qed tippjana li tagħmel użu mill-​ktieb Creator?

[Stampa f’paġna 20]

Is-​sistema tagħna taʼ l-​immunità x’tissuġġerixxi dwar il-​Ħallieq tagħna?

[Stampa f’paġna 21]

Sezzjoni mir-​Rombli tal-​Baħar il-​Mejjet, bit-​Tetragramma (Isem Alla bl-​Ebrajk) immarkata

[Sors]

Courtesy of the Shrine of the Book, Israel Museum, Jerusalem

[Stampa f’paġna 23]

X’nistgħu nitgħallmu mill-​mod kif Ġesù rreaġixxa għan-​niket taʼ Marija?