Dedikazzjoni taċ-​Ċentru Edukattiv tal-​Watchtower—Festa lil Jehovah

SA MILL-​eqdem żminijiet, il-​festi mimlijin ferħ kienu jagħmlu parti mill-​qima vera. Xi wħud mill-​festi li kienu jinżammu f’Iżrael tal-​qedem kienu jdumu ġranet sħaħ u kienu jattendu għalihom eluf kbar t’adoraturi taʼ Jehovah. L-​inawgurazzjoni tat-​tempju taʼ Salamun damet għaddejja sebat ijiem u kienet segwita mill-​Festa taʼ l-​Għerejjex li damet għaddejja ġimgħa sħiħa. Dan ipprovda opportunità lill-​Iżraeliti biex jirriflettu fuq il-​mod meraviljuż taʼ kif Jehovah kien tratta magħhom. Huma marru lura d-​dar “ferħana u qalbhom hienja għall-​ġid kollu li għamel il-​Mulej.”—1 Slaten 8:66.

Dak li ġara bejn is-​17 u t-​22 taʼ Mejju, 1999, fiċ-​Ċentru Edukattiv tal-​Watchtower f’Patterson, New York, fl-​Istati Uniti, fakkar lill-​viżitaturi f’dawk il-​festi mimlijin ferħ tal-​qedem. Din kienet ġimgħa t’attività speċjali ċentrata fuq id-​dedikazzjoni taʼ kumpless magħmul minn 28 binja li huwa disinjat biex jippromwovi l-​edukazzjoni Biblika madwar il-​globu. Saru provvedimenti biex il-​5,400 membru kollha taʼ l-​istaff tal-​kwartieri ġenerali fi Brooklyn, Wallkill, u Patterson ikunu jistgħu jaraw fid-​dettall il-​faċilitajiet taʼ Patterson matul dik il-​ġimgħa memorabbli. Fost il-​mistidnin kien hemm iktar minn 500 ruħ li qabel kienu membri taʼ l-​istaff u li kienu ħadu sehem fix-​xogħol tal-​bini taċ-​ċentru edukattiv. Kien hemm ukoll rappreżentanti minn 23 fergħa tal-​Watch Tower Society, u oħrajn mill-​kongregazzjonijiet tal-​qrib—total taʼ mill-​inqas 8,100 ruħ.

Esibizzjonijiet Jipprovdu Edukazzjoni waqt iż-​Żjara

Esibizzjonijiet speċjali, preżentazzjonijiet edukattivi fuq il-​vidjo, u żjajjar bir-​rotta indikata minn qabel biex jiggwidaw lil dak li jkun ġew irranġati sabiex il-​viżitaturi jsiru midħla taċ-​ċentru edukattiv. Fl-​entratura prinċipali, il-​viżitaturi mill-​ewwel laqathom mudell tat-​tempju skond l-​iskala li kien jeżisti f’Ġerusalemm matul il-​perijodu tal-​ministeru taʼ Ġesù fuq l-​art. Esibizzjonijiet oħrajn ġibdu l-​attenzjoni lejn l-​istorja bikrija taʼ l-​Iskola taʼ Gilgħad (Watchtower Bible School of Gilead), konvenzjonijiet storiċi, u laqgħat tal-​kongregazzjoni. Oħrajn urew l-​iżvilupp li qed isir fi żmienna rigward l-​istudji tal-​Bibbja fid-​djar u li qed jiġu kondotti kull ġimgħa bil-​miljuni, u x-​xogħol li qiegħed isir mid-​Dipartiment Legali ħalli t-​triq tibqaʼ miftuħa għal attività bħal din. Dan kollu qed isir biex jiġi obdut il-​kmand taʼ Ġesù.—Mattew 28:19, 20.

Fl-awditorju biswit, li jesaʼ faċilment 1,700 ruħ bil-​qegħda, dawk li kienu qed iżuru ċ-​ċentru matul il-​festi tad-​dedikazzjoni raw preżentazzjoni taʼ 33 minuta fuq vidjo intitolata “Mhux bil-​Qawwa—Bl-​Ispirtu Tiegħi!” Dan il-​vidjo wera kif inħoloq iċ-​Ċentru Edukattiv tal-​Watchtower. Fl-​intervisti li saru ssemmew każijiet li jindikaw biċ-​ċar id-​direzzjoni taʼ Jehovah fil-​kwistjoni u l-​mod kif bierek l-​isforzi sabiex dan il-​proġett li dam għaddej 15-il sena setaʼ jitlesta b’suċċess. Kien hemm eluf li ħadu sehem fix-​xogħol attwali tal-​bini. F’perijodu minnhom fl-​1994 kien hemm 526 ħaddiem fuq il-​post, inkluż 350 volontier full-time, 113-il ħaddiem temporanju, u 63 li kienu jiġu kuljum fuq il-​post biex jagħtu daqqa t’id. Ħafna oħrajn appoġġaw ix-​xogħol permezz tad-​donazzjonijiet. Ilkoll kemm huma jirrealizzaw li dan kollu qatt ma kien ikun possibbli mingħajr l-​ispirtu taʼ Jehovah.—Żakkarija 4:6.

Dawk li żaru l-​post setgħu jaraw li l-​iskop prinċipali tax-​xogħol li qiegħed isir fiċ-​ċentru edukattiv huwa l-​avvanz tat-​tagħlim divin. L-​esibizzjoni li hemm fl-​entratura għall-​Iskola taʼ Gilgħad, li tinsab fl-​ewwel sular tal-​bini taʼ l-​iskola, enfasizzat il-​wirt spiritwali u abbundanti u l-​istorja taʼ l-​iskola. Minn meta nżammet l-​ewwel klassi fl-​1943 fil-​kampus oriġinali taʼ l-​iskola f’South Lansing, New York, l-​Iskola taʼ Gilgħad ħarrġet iktar minn 7,000 student għas-​servizz missjunarju. Esibizzjonijiet fit-​tieni sular tal-​bini taʼ l-​iskola pprovdew xeni taʼ l-​Iskola għall-​Membri tal-​Kumitati tal-​Fergħa u l-​Iskola għall-​Indokraturi li Jivvjaġġaw. Iż-​żewġ skejjel isirulhom il-​lezzjonijiet hemmhekk. Minn meta bdiet f’Novembru taʼ l-​1995, l-​iskola tal-​fergħa pprovdiet tagħlim avanzat għal 360 membru tal-​Kumitati tal-​Fergħa minn 106 pajjiżi.

Waqt iż-​żjara, il-​viżitaturi mill-​ewwel irrealizzaw li ħafna drabi, setgħu jaraw iktar milli sempliċement esibizzjoni taʼ ritratti. Setgħu jibqgħu deħlin ġod-​diversi dipartimenti, iżuru l-​uffiċċji u postijiet oħra tax-​xogħol, u jieħdu idea iktar dettaljata tax-​xogħol li qiegħed isir. Taʼ interess speċjali waqt iż-​żjara kien hemm il-​binja tas-​Servizzi taʼ l-​Awdjo u tal-​Vidjo. X’faċilitajiet mill-​aqwa qed jintużaw hemmhekk sabiex tiġi avanzata l-​edukazzjoni Biblika! Permezz taʼ serje t’esibizzjonijiet informattivi u vidjos qosra, il-​viżitaturi ġew megħjunin jifhmu kif isiru r-​rikordings tal-​vuċijiet u kif jitħejjew il-​vidjos. Tgħallmu wkoll xi ħaġa dwar ir-​riċerka estensiva li hija involuta fit-​tħejjija taʼ l-​armar u l-​kostumi. Raw kif ix-​xeni tal-​palk jinbnew bl-​inqas spiża possibbli imma b’attenzjoni kbira għal kull dettall. Raw b’għajnejhom kif tintuża l-​mużika ħalli n-​nies iħossuhom li huma attwalment fix-​xena li jkunu qed jaraw. Mill-​1990 s’issa s-​Soċjetà pproduċiet għaxar vidjos f’41 lingwa, li jkopru varjetà taʼ temi Bibliċi, flimkien maʼ vidjos oħrajn għal dawk l-​uħud li jużaw il-​Lingwa Amerikana bis-​Sinjali.

Ħafna minn dawk li żaru l-​post marru fil-​Laboratorju tal-​Fotografija, fid-​Dipartiment taʼ l-​Arti, u fis-​Servizzi taʼ l-​Informazzjoni, fejn jiġu provduti taħriġ u għajnuna rigward kompjuters. Dawn żaru wkoll id-​Dipartiment tas-​Servizz, li josserva u jidderieġi l-​attività taʼ 11,242 kongregazzjoni u 572 indokratur li jivvjaġġa, u l-​Korrispondenza bil-​Kitba, fejn jiġu trattati madwar 14,000 mistoqsija fis-​sena. Dawn baqgħu impressjonati bir-​riċerka involuta fl-​ittri li jintbagħtu u t-​tħassib ġenwin muri lejn dawk li mill-​mistoqsijiet tagħhom tinduna li qegħdin jipprovaw ikampaw maʼ problemi serji.

Ħafna minn dawk li daru mal-​post żaru wkoll is-​Servizzi tat-​Traduzzjoni. Dawn baqgħu sorpriżi meta saru jafu li matul dawn l-​aħħar ħames snin, 102 lingwi oħrajn żdiedu man-​numru li bihom is-​Soċjetà tipprovdi letteratura Biblika. Madwar id-​dinja, mat-​80 fil-​mija tax-​Xhieda taʼ Jehovah jaqraw il-​pubblikazzjonijiet tas-​Soċjetà f’lingwi oħrajn barra l-​Ingliż. Biex jiġu sodisfati l-​ħtiġijiet tagħhom, hemm iktar minn 1,700 volontier li qed jaħdmu fil-​qasam tat-​traduzzjoni f’100 pajjiż differenti. Esibizzjonijiet urew It-​Torri taʼ l-​Għassa bil-​lingwi taʼ l-​Amerka taʼ Fuq u t’Isfel, taʼ l-​Ewropa, taʼ l-​Asja u taʼ l-​Afrika. Il-​viżitaturi setgħu jaraw it-​traduzzjoni tal-​Bibbja tan-​New World Translation fil-​31 lingwa li ġiet pubblikata. Tgħallmu li l-​pubblikazzjonijiet tal-​Watch Tower issa jinsabu disponibbli fi 332 lingwa u li l-​browxer Alla X’Jirrikjedi Minna? ġie pubblikat f’219 minn dawn il-​lingwi.

Il-viżitaturi li żaru d-​Dipartiment Legali ġew murijin id-​diversi oqsma t’attività li jinħtieġu attenzjoni legali madwar id-​dinja. Permezz taʼ vidjo, dawn raw smigħ attwali f’qorti fejn avukat Xhud kien qiegħed jiddefendi każ li jinvolvi t-​trasfużjoni tad-​demm. Dawn tgħallmu wkoll x’qed isir ħalli t-​triq tibqaʼ miftuħa għax-​xandir pubbliku taʼ l-​aħbar tajba. (Filippin 1:7) Inġibdet l-​attenzjoni lejn id-​deċiżjoni li ttieħdet f’Marzu taʼ din is-​sena minn qorti distrettwali federali, fejn il-​borough taʼ Oradell, fi New Jersey, l-​Istati Uniti, ġie ordnat ibiddel il-​liġijiet tiegħu sabiex ma jkomplix jimponi fuq ix-​Xhieda taʼ Jehovah l-​ħtieġa taʼ permessi u badges biex jieħdu sehem fil-​ministeru pubbliku tagħhom minn dar għal dar f’dik il-​komunità.

Il-viżitaturi raw ħafna iktar affarijiet milli ssemmew s’issa. Huma eżaminaw esibizzjonijiet taʼ bini fl-​Istabbiliment tal-​Precast u żaru l-​faċilitajiet konnessi maʼ l-​Ipproċessar tad-​Drenaġġ, l-​Impjant taʼ l-​Elettriku, il-​Faċilità konnessa mat-​Trattament taʼ l-​Ilma, u l-​għadd taʼ stabbilimenti taʼ manutenzjoni, minbarra affarijiet oħrajn. Kienet tassew opportunità unika!

Il-​Programm taʼ Dedikazzjoni Jenfasizza l-​Edukazzjoni Divina

Il-​programm innifsu tad-​dedikazzjoni nżamm l-​Erbgħa, 19 taʼ Mejju, u beda fl-​4:00 taʼ wara nofsinhar. Il-​ġemgħa ferriħija taʼ 6,929 ruħ kienet tinkludi membri taʼ l-​istaff tal-​kwartieri ġenerali, mistidnin tas-​Soċjetà, u 372 ruħ miġburin fil-​fergħa tal-​Kanada, li kienet konnettjata elettronikament.

In-nies fl-​udjenza tassew ħadu pjaċir jisimgħu l-​kliem inkuraġġanti taʼ merħba mingħand Milton.G.Henschel, il-​president tal-​Watch Tower Society. Imbagħad Theodore Jaracz, membru tal-​Ġemgħa li Tiggverna u chairman għall-​okkażjoni, introduċa lil William Malenfant. Fil-​preżentazzjoni tiegħu, “Punti Prinċipali mill-​Programm tal-​Bini,” hu intervista tliet aħwa li kellhom irwoli importanti fl-​iżvilupp, tfassil, u bini taċ-​Ċentru Edukattiv tal-​Watchtower. Waqt l-​intervisti ntqal li matul is-​snin tax-​xogħol attwali tal-​bini, iktar minn 8,700 ħaddiem temporanju kienu ġew bi spejjeż tagħhom stess biex jaħdmu fuq il-​proġett. X’testimonjanza mill-​aħjar taʼ l-​unità u l-​ġenerożità li jsiru possibbli permezz tat-​tagħlim divin!

Wara dan kien hemm simposju intitolat “Edukazzjoni Divina fuq Skala Globali.” Dan ġie preżentat minn erbaʼ membri tal-​Ġemgħa li Tiggverna. John E. Barr enfasizza l-​punt li l-​edukazzjoni divina għandha l-​bażi tagħha fil-​Kelma t’Alla, il-​Bibbja, li tinkuraġġixxi lill-​Kristjani biex ‘ikomplu jagħmlu frott taʼ kull għamil tajjeb u jikbru fil-​għarfa taʼ Alla.’ (Kolossin 1:10) Daniel Sydlik tkellem dwar kif l-​edukazzjoni divina hija organizzata b’mod teokratiku mill-​kap tal-​kongregazzjoni Kristjana, Ġesù Kristu, u minn hemm għal fuq kull membru tal-​fratellanza dinjija. (1 Korintin 12:12-27) L-​aħħar żewġ partijiet tas-​simposju, żviluppati minn Gerrit Lösch u Carey Barber, urew kif l-​edukazzjoni divina tikkwalifika lil ministri biex jilħqu lin-​nies taʼ kullimkien u jgħallmuhom sabiex huma wkoll ikunu jistgħu jimxu fit-​triq t’Alla.—Isaija 2:1-4; 2 Korintin 3:5.

Sabiex in-​nies fl-​udjenza jsiru midħla tad-​diversi skejjel li jiffunzjonaw f’dan iċ-​ċentru edukattiv, ġew kondotti intervisti u diskussjonijiet maʼ l-​għalliema kif ukoll m’oħrajn li huma involuti fit-​tmexxija taʼ l-​iskejjel. Hawnhekk intwera l-​irwol li għandha kull skola f’li twettaq il-​programm t’edukazzjoni divina fuq skala globali. Ħareġ il-​punt li l-​Iskola taʼ Gilgħad tiffoka fuq studju taʼ kull ktieb tal-​Bibbja, fuq l-​istorja fi żmienna tal-​poplu taʼ Jehovah, u fuq it-​tħejjija għas-​servizz missjunarju. L-​iskola tal-​fergħa tinvolvi studju dettaljat għall-​aħħar tal-​bosta oqsma t’attività li huma involuti fihom il-​membri tal-​Kumitat tal-​Fergħa. L-​Iskola għall-​Indokraturi li Jivvjaġġaw hija disinjata mhux biss biex tilħaq il-​bżonnijiet taʼ l-​aħwa li jivvjaġġaw, imma wkoll biex tgħammarhom ħalli jipprovdu x-​xorta taʼ għajnuna spiritwali li tkun tistaʼ tibbenefika speċjalment lill-​kongregazzjonijiet.

Biex jagħlaq il-​programm mill-​isbaħ, Lloyd Barry tal-​Ġemgħa li Tiggverna ta t-​taħdita tad-​dedikazzjoni bis-​suġġett “Nibnu Flimkien mal-​Ħallieq Grandjuż Tagħna.” Hu ħareġ il-​punt li l-​Ħallieq, Jehovah, jitgħaxxaq bil-​ħolqien kollu tiegħu u jistidinna biex nifirħu miegħu. (Isaija 65:18) Peress li “dak li jibni kollox hu Alla,” il-​kredtu aħħari għal dan il-​bini kollu jingħata lil Alla Jehovah. (Lhud 3:4) Wara li esprima dawn il-​ħsibijiet, il-​kelliem qal talba mill-​qalb u ddedika ċ-​Ċentru Edukattiv tal-​Watchtower lil Jehovah, il-​Ħallieq Grandjuż tagħna.a

M’hemm l-​ebda dubju li dawk li attendew se jibqgħu jiftakru għal żmien twil il-​festi li seħħew matul il-​ġimgħa kollha. Għala ma tirranġax biex iżżur iċ-​Ċentru Edukattiv tal-​Watchtower? Aħna ċerti li żjara bħal din se ssibha taʼ inkuraġġiment għalik hekk kif tagħmel sforz biex titgħallem iktar dwar il-​Ħallieq tagħna kollu mħabba u tgħix fi qbil mal-​livelli taʼ tjieba tiegħu.

[Nota taʼ taħt]

[Stampi f’paġna 10]

Awditorju ppakkjat u l-​kamra taʼ l-​ikel mimlija nies li ma kienx hemm post għalihom

[Stampi f’paġna 10]

Iż-​żjajjar kienu tassew xi ħaġa ferriħija