Għala l-​Umanità Għandha Bżonn Wieħed li Jgħinha

‘JIEN kont persekutur żeblieħi,’ ammetta wieħed raġel li qabel kien kburi u vjolenti, dagħaj abbużiv li kien jhedded u jattakka bla ħniena taʼ xejn lis-​segwaċi taʼ Ġesù Kristu li kellhom il-​biżaʼ t’Alla. “Iżda,” stqarr hu mimli gratitudni, “sibt il-​ħniena.” Għalkemm mhux faċli li temminha, dan il-​persekutur estremament vjolenti sar l-​appostlu leali Kristjan Pawlu.—1 Timotju 1:​12-16; Atti 9:​1-19.

Mhux kulħadd għamel l-​istess affarijiet li għamel Pawlu. Madankollu, ilkoll kemm aħna nonqsu li nilħqu l-​livelli t’Alla. Għala? Għaliex “kollha dinbu u ċċaħħdu mill-​glorja taʼ Alla.” (Rumani 3:23) Iktar minn hekk, huwa faċli ħafna li nħallu d-​disperazzjoni tegħlibna, forsi billi nħossu li aħna ħżiena wisq biex nirċievu l-​ħniena t’Alla. Waqt li kien qed jimmedita fuq it-​tendenza midinba tiegħu, Pawlu nnifsu esklama: “Msejken bniedem li jien! Min se jeħlisni minn dan il-​ġisem tal-​mewt?” Biex iwieġeb il-​mistoqsija tiegħu stess, hu kiteb: “Niżżi ħajr lil Alla permezz taʼ Ġesù Kristu Sidna!”—Rumani 7:​24, 25.

Kif jistaʼ Ħallieq mimli tjieba jkollu relazzjonijiet maʼ midinbin? (Salm 5:5 [5:​4, NW]) Innota li Pawlu qal: “Niżżi ħajr lil Alla permezz taʼ Ġesù Kristu Sidna.” (Korsiv tagħna.) Individwu ieħor li rċieva ħniena mingħand Alla spjega: “Jekk xi ħadd jidneb, aħna għandna Difensur quddiem il-​Missier, lil Ġesù Kristu, il-​ġust. U hu jħallas għal dnubietna, mhux għal tagħna biss, iżda wkoll għal dawk tad-​dinja kollha.”—1 Ġwann 2:​1, 2.

Ġesù Kristu għala jissejjaħ “Difensur quddiem il-​Missier”? U Ġesù kif ‘iħallas’ għad-​dnubiet?

Għala Neħtieġu Difensur

Ġesù ġie fid-​dinja “biex jagħti ħajtu b’fidwa għall-​kotra.” (Mattew 20:28) Fidwa hija meta jitħallas prezz biex jinxtara lura, jew biex jinġieb lura, il-​ħelsien taʼ xi ħadd jew xi ħaġa. Il-​forma tal-​verb tal-​kelma Ebrajka tradotta “fidwa” ġġorr l-​idea taʼ li tgħatti d-​dnubiet jew tpatti għalihom. (Salm 78:​38, NW) Il-​kelma Griega, bħal dik li nsibu f’Mattew 20:​28, kienet użata b’mod partikulari biex tirreferi għall-​prezz li kien jitħallas biex jifdu lill-​priġunieri tal-​gwerra jew biex jeħilsu lill-​ilsiera. Biex il-​ħtiġijiet tal-​ġustizzja jiġu sodisfati, tingħata xi ħaġa bi tpartit maʼ oħra taʼ l-​istess valur.

L-umanità waqgħet fil-​jasar minħabba li l-​ewwel bniedem irribella kontra Alla. Bħalma jurina Ġenesi kapitlu 3, dak il-​bniedem perfett—Adam—għażel li jkun diżubbidjenti lejn Alla Jehovah. Billi għamel hekk, hu biegħ lilu nnifsu kif ukoll lid-​dixxendenti tiegħu, li kienu għadhom ma twildux, għall-​jasar tad-​dnub u l-​mewt. B’hekk, Adam tilef kemm għalih innifsu kif ukoll għal nislu kollu r-​rigal taʼ ħajja umana perfetta.—Rumani 5:​12, 18, 19; 7:14.

F’Iżrael tal-​qedem, Alla għamel arranġament biex is-​sagrifiċċji taʼ l-​annimali jpattu għad-​dnubiet tan-​nies, jew jgħattuhom. (Levitiku 1:4; 4:​20, 35) Fil-​fatt, il-​ħajja taʼ l-​annimal sagrifikat kienet tingħata flok dik tal-​midneb. (Levitiku 17:11) B’hekk, “jum l-​espjazzjoni” setaʼ jintqal ukoll li kien “jum il-​ħlas tal-​fidwa.”—Levitiku 23:​26-28.

Madankollu, ladarba l-​annimali huma inferjuri għall-​bniedem, “ma jistax ikun li d-​demm tal-​gniedes u tal-​mogħoż ineħħi d-​dnubiet [kompletament].” (Lhud 10:​1-4) Biex sagrifiċċju jkollu valur suffiċjenti biex ipatti għad-​dnubiet, jew ineħħihom, għal dejjem, ried ikollu l-​istess valur taʼ dak li tilef Adam. Il-​miżien tal-​ġustizzja kellu bżonn taʼ bniedem perfett (Ġesù Kristu) biex jagħmel tajjeb b’mod preċiż għal dak li kien tilef bniedem perfett ieħor (Adam). Ħajja umana perfetta biss setgħet tħallas il-​prezz tal-​fidwa biex tifdi lin-​nisel taʼ Adam mill-​jasar li l-​ewwel missier tagħhom kien tefagħhom fih. Li jkun hemm “ħajja b’ħajja” kien se jissodisfa l-​ħtiġijiet tal-​vera ġustizzja.—Eżodu 21:​23-25.

Meta Adam dineb u ġie kundannat għall-​mewt, nislu, li kien għadu ġewwa fih bħala żerriegħa, miet miegħu. Il-​bniedem perfett Ġesù, ‘l-​aħħar Adam,’ ma fformax familja minn jeddu. (1 Korintin 15:45) Meta miet bħala sagrifiċċju uman perfett, ġewwa fih kellu nisel mhux imwieled. Għalhekk, jistaʼ jingħad li r-​razza umana li kellu ġewwa fih u li setgħet tnisslet minnu mietet miegħu. Ġesù ħa l-​familja midinba u moribonda taʼ Adam bħallikieku kienet tiegħu stess. Hu ċeda d-​dritt li jkollu familja tiegħu stess. Billi ssagrifika l-​ħajja umana u perfetta tiegħu, Ġesù reġaʼ xtara l-​umanità kollha li tnisslet minn Adam biex b’hekk din setgħet issir il-​familja Tiegħu, u Hu sar għalihom “Missier għal dejjem.”—Isaija 9:​5, 6 [9:​6, 7, NW]).

Il-prezz tal-​fidwa li ħallas Ġesù fetaħ it-​triq għall-​umanità ubbidjenti biex tirċievi l-​ħniena t’Alla u tikseb il-​ħajja taʼ dejjem. Għalhekk, l-​appostlu Pawlu kiteb: “Il-​ħlas tad-​dnub hu l-​mewt, imma d-​don li tana Alla huwa l-​ħajja taʼ dejjem fi Kristu Ġesù Sidna.” (Rumani 6:23) Ma nistgħux ma nitqanqlux biex infaħħru lil Jehovah għall-​imħabba u l-​mogħdrija li wera f’li jipprovdi l-​prezz tal-​fidwa, minkejja li dan sewa ferm, kemm għalih kif ukoll għal Ibnu l-​għażiż. (Ġwann 3:16) U Ġesù ċertament li wera li kien “Difensur quddiem il-​Missier” meta ġie rxoxtat għall-​ħajja fis-​sema u ppreżenta l-​valur tas-​sagrifiċċju tiegħu li ħallas bħala prezz għall-​fidwa lil Alla fis-​smewwiet.a (Lhud 9:​11, 12, 24; 1 Pietru 3:18) Imma issa Ġesù kif qed juri li qed jgħinna fis-​sema?

[Nota taʼ taħt]

[Stampa f’paġna 4]

Il-​ħajja umana u perfetta taʼ Ġesù saret il-​prezz tal-​fidwa għal nisel Adam