‘O Alla, Ibgħat Id-​dawl Tiegħek’

“Ibgħat id-​dawl tiegħek u s-​sewwa tiegħek: huma jmexxuni.”​—SALM 43:3.

1. Jehovah kif jirrivela l-​iskopijiet tiegħu?

JEHOVAH juri konsiderazzjoni kbira fil-​mod kif jgħarraf l-​iskopijiet tiegħu lill-​qaddejja tiegħu. Minflok ma jirrivelalna l-​verità kollha f’daqqa u f’leħħa qawwija taʼ dawl li jagħmina, hu jdawwalna bil-​mod il-​mod u pass pass. Il-​vjaġġ tagħna tul il-​mogħdija tal-​ħajja jistaʼ jitqabbel maʼ mixja li wieħed joħroġ jagħmel f’mogħdija twila fil-​kampanja. Dan jibda fil-​għodu kmieni u bil-​kemm jibda jara fejn sejjer. Però hekk kif ix-​xemx tibda tielaʼ bil-​mod il-​mod fuq ix-​xefaq, hu jibda jiddistingwi xi ftit mill-​affarijiet li hemm madwaru. Il-​kumplament ikun jidher imċajpar. Imma kif tkompli titlaʼ x-​xemx, ikun jistaʼ jara iktar u iktar fil-​bogħod. L-​istess japplika għad-​dawl spiritwali li Alla jipprovdi. Hu jħallina nifhmu pass pass, ftit affarijiet kull darba. L-​Iben t’Alla, Ġesù Kristu, ipprovda tidwil spiritwali bl-​istess mod. Ejja nikkunsidraw kif Jehovah dawwal lill-​poplu tiegħu fl-​antik u kif jagħmel dan illum.

2. Jehovah kif ipprovda tidwil qabel il-​Kristjanità?

² Il-kompożituri taʼ Salm 43 x’aktarx li kienu wlied Koraħ. Bħala Leviti, huma kienu privileġġati li jgħallmu l-​Liġi t’Alla lin-​nies. (Malakija 2:7) M’għandniex xi ngħidu, Jehovah kien l-​Istruttur Grandjuż tagħhom, u huma ħarsu lejh bħala s-​Sors taʼ kull għerf. (Isaija 30:20) “Mulej, . . . ibgħat id-​dawl tiegħek u s-​sewwa tiegħek,” talab is-​salmista. “Huma jmexxuni.” (Salm 43:​1, 3) Dment li l-​Iżraelin kienu leali lejh, Jehovah għallimhom triqatu. Sekli wara, Jehovah ffavoriehom b’dawl u verità mill-​iktar straordinarji. Alla dan għamlu meta bagħat lil Ibnu fuq l-​art.

3. Il-​Lhud b’liema mod iġġarrbu bit-​tagħlim taʼ Ġesù?

³ Bħala l-​bniedem Ġesù Kristu, l-​Iben t’Alla kien id-​“dawl tad-​dinja.” (Ġwann 8:12) Hu għallem lin-​nies “ħafna ħwejjeġ bil-​parabboli”—ħwejjeġ ġodda. (Mark 4:2) Qal lil Ponzju Pilatu: “Is-​saltna tiegħi m’hijiex taʼ din id-​dinja.” (Ġwann 18:36) Din kienet idea ġdida għal wieħed Ruman u ċertament għal-​Lhud nazzjonalistiċi, għax dawn kienu jaħsbu li l-​Messija kien se jumilja lill-​Imperu Ruman u jirrestawra lil Iżrael għall-​glorja li kellu qabel. Ġesù kien qed jirrifletti dawl mingħand Jehovah, imma kliemu m’għoġobhomx lill-​mexxejja reliġjużi, li “għalihom kienet aktar għażiża l-​glorja tal-​bnedmin mill-​glorja taʼ Alla.” (Ġwann 12:​42, 43) Ħafna min-​nies għażlu li jibqgħu mqabbdin mat-​tradizzjonijiet umani tagħhom milli jaċċettaw dawl spiritwali u verità mingħand Alla.​—Salm 43:3; Mattew 13:15.

4. Kif nafu li d-​dixxipli taʼ Ġesù kellhom ikomplu jikbru fil-​fehma?

⁴ Madankollu, xi rġiel u nisa taʼ qalb onesta ħaddnuha bil-​ferħ il-​verità li għallem Ġesù. Huma għamlu progress mgħaġġel fil-​fehma tagħhom dwar l-​iskopijiet t’Alla. Iżda, hekk kif qorob tmiem il-​ħajja fuq l-​art taʼ l-​Għalliem tagħhom, kien għad baqgħalhom ħafna x’jitgħallmu. Ġesù qalilhom: “Baqagħli ħafna ħwejjeġ x’ngħidilkom, imma għalissa ma tifilħux għalihom.” (Ġwann 16:12) Iva, id-​dixxipli kellhom ikomplu jikbru fil-​fehma tal-​verità t’Alla.

Id-​Dawl Jibqaʼ Jiddi

5. Liema mistoqsija qamet fl-​ewwel seklu, u min kellu r-​responsabbiltà li jsolviha?

⁵ Wara l-​mewt u l-​irxoxt taʼ Ġesù, dawl mingħand Alla idda iżjed bil-​qawwi minn qabel. Permezz taʼ viżjoni mogħtija lil Pietru, Jehovah rrivela li Ġentili mhux ċirkonċiżi setgħu, minn dak in-​nhar ’il quddiem, isiru segwaċi taʼ Kristu. (Atti 10:​9-​17) X’rivelazzjoni dik! Xorta waħda, iktar tard qamet mistoqsija: Kien Jehovah jirrikjedi li dawn il-​Ġentili jiġu ċirkonċiżi wara li jsiru Kristjani? Din il-​mistoqsija ma twiġbitx fil-​viżjoni, u l-​kwistjoni saret suġġett taʼ diskussjoni taħraq fost il-​Kristjani. Riedet tissolva biex l-​unità prezzjuża tagħhom ma tiġix mhedda. Għalhekk, f’Ġerusalemm, “l-​appostli u l-​presbiteri ltaqgħu flimkien biex jaraw din il-​kwistjoni.”—Atti 15:​1, 2, 6.

6. L-​appostli u l-​irġiel ixjeħ liema proċedura segwew meta kkunsidraw il-​kwistjoni taċ-​ċirkonċiżjoni?

⁶ Kif setgħu dawk preżenti f’din il-​laqgħa jiddeterminaw x’kienet ir-​rieda t’Alla għall-​Ġentili li jemmnu? Jehovah ma bagħatx xi anġlu biex jippresiedi fuq id-​diskussjonijiet, u lanqas ma ffavorixxa lil dawk preżenti b’xi viżjoni. Xorta waħda, l-​appostli u l-​irġiel ixjeħ ma tħallewx kompletament mingħajr direzzjoni. Huma kkunsidraw ix-​xiehda taʼ ċerti Kristjani Lhud li kienu raw kif Alla kien beda jittratta maʼ nies tal-​ġnus, billi ferraʼ l-​ispirtu qaddis tiegħu fuq Ġentili mhux ċirkonċiżi. Fittxew ukoll fl-​Iskrittura għall-​gwida. Bħala riżultat, id-​dixxiplu Ġakbu għamel rakkomandazzjoni bbażata fuq vers mill-​Bibbja li jitfaʼ dawl fuq il-​kwistjoni. Hekk kif irriflettew fuq l-​evidenza, ir-​rieda t’Alla ċċarat. Nies mill-​ġnus ma kellhomx għalfejn jiġu ċirkonċiżi biex igawdu l-​approvazzjoni taʼ Jehovah. L-​appostli u l-​irġiel ixjeħ ma damux ma niżżlu d-​deċiżjoni bil-​miktub sabiex il-​Kristjani sħabhom setgħu jiġu gwidati permezz tagħha.​—Atti 15:​12-​29; 16:4.

7. Il-​Kristjani taʼ l-​ewwel seklu b’liema mod kienu progressivi?

⁷ Kuntrarju għall-​mexxejja reliġjużi Lhud, li baqgħu jżommu mat-​tradizzjonijiet taʼ missirijiethom, il-​biċċa l-​kbira mill-​Kristjani Lhud ferħu meta rċivew din il-​fehma ġdida straordinarja dwar l-​iskop t’Alla rigward in-​nies tal-​ġnus, avolja biex jaċċettawha kien ikollhom ibiddlu l-​opinjoni tagħhom rigward il-​Ġentili in ġenerali. Jehovah bierek l-​ispirtu umli tagħhom, u l-​kongregazzjonijiet “kienu jitwettqu fil-​fidi u jiżdiedu fl-​għadd kuljum.”​—Atti 15:31; 16:5.

8. (a) Kif nafu li iżjed dawl setaʼ jiġi mistenni wara tmiem l-​ewwel seklu? (b) Liema mistoqsijiet pertinenti se nikkunsidraw?

⁸ Dawl spiritwali kompla jiddi tul l-​ewwel seklu kollu. Imma lill-​Kristjani bikrin Jehovah ma rrivelalhomx kull aspett taʼ l-​iskopijiet tiegħu. L-​appostlu Pawlu qal lill-​kredenti sħabu taʼ l-​ewwel seklu: “Bħalissa naraw bħallikieku f’mera [tal-metall], mċajpar.” (1 Korintin 13:12) Din il-​mera ma kinitx tirrifletti ċar. Mela għall-​ewwel, il-​fehma taʼ dawl spiritwali kellha tkun limitata. Wara l-​mewt taʼ l-​appostli, id-​dawl tbaxxa għal xi żmien, imma fi żminijiet reċenti l-​għarfien Skritturali sar abbundanti. (Danjel 12:4) Jehovah kif idawwal lill-​poplu tiegħu llum? U kif għandna nwieġbu meta hu jiftħilna l-​fehma tagħna fl-​Iskrittura?

Id-​Dawl Jitqawwa Pass Pass

9. L-​Istudenti tal-​Bibbja bikrin liema metodu uniku u effettiv taʼ studju tal-​Bibbja wżaw?

⁹ Fiż-żmien modern l-​ewwel raġġ veru taʼ dawl beda jidher fl-​aħħar snin tas-​seklu 19 hekk kif grupp taʼ rġiel u nisa Kristjani bdew studju serju taʼ l-​Iskrittura. Huma żviluppaw metodu prattiku għall-​istudju tal-​Bibbja. Xi ħadd kien iqajjem mistoqsija; imbagħad il-​grupp kien janalizza t-​testi Skritturali relatati kollha. Meta xi vers Bibliku kien donnu jikkontradixxi vers ieħor, dawn il-​Kristjani sinċieri kienu jipprovaw iġibuhom fi qbil. Kuntrarju għall-​mexxejja reliġjużi taʼ żmienhom, l-​Istudenti tal-​Bibbja (bħalma kienu magħrufin dak iż-​żmien ix-​Xhieda taʼ Jehovah) kienu determinati li jħallu l-​Iskrittura Mqaddsa, mhux it-​tradizzjoni jew id-​domma magħmula mill-​bniedem, tkun il-​gwida tagħhom. Wara li kienu jikkunsidraw l-​evidenza Skritturali li kellhom għad-​dispożizzjoni tagħhom, huma kienu jniżżlu bil-​miktub il-​konklużjonijiet li jaslu għalihom. B’dan il-​mod ġiet iċċarata l-​fehma tagħhom dwar ħafna duttrini bażiċi tal-​Bibbja.

10. Charles Taze Russell liema kotba bħala għajnuna utli għall-​istudju tal-​Bibbja kiteb?

¹⁰ Fost l-​Istudenti tal-​Bibbja spikka Charles Taze Russell. Hu kiteb serje taʼ sitt kotba bħala għajnuna utli għall-​istudju tal-​Bibbja intitolati Studies in the Scriptures. Ħuna Russell ried jikteb is-​sebaʼ volum, li kien se jagħti spjegazzjoni tal-​kotba Bibliċi taʼ Eżekjel u Apokalissi. “Meta nsib tarf,” hu qal, “nikteb is-​Sebaʼ Volum.” Madankollu, żied: “Jekk il-​Mulej jagħtih lil xi ħaddieħor, dan jistaʼ jiktbu hu.”

11. X’konnessjoni hemm bejn il-​waqt addattat u l-​fehma tagħna dwar l-​iskopijiet t’Alla?

¹¹ L-istqarrija t’hawn fuq minn C. T. Russell turi fattur importanti fl-​abbiltà tagħna biex nifhmu ċerti passaġġi mill-​Bibbja—il-​waqt addattat. Ħuna Russell kien jaf li hu ma setax iġiegħel id-​dawl jiddi fuq il-​ktieb taʼ l-​Apokalissi daqs kemm bniedem ansjuż biex joħroġ jimxi jistaʼ jġiegħel lix-​xemx titlaʼ qabel il-​waqt.

Irrivelat—Imma meta Jkun il-​Waqt t’Alla

12. (a) Il-​profezija tal-​Bibbja meta tinftiehem l-​aħjar? (b) Liema eżempju juri li l-​abbiltà tagħna biex nifhmu l-​profezija tal-​Bibbja tiddependi fuq l-​orarju t’Alla? (Ara n-​nota taʼ taħt.)

¹² Sewwa sew bħalma kien biss wara l-​mewt u l-​irxoxt taʼ Ġesù li l-​appostli fehmu ħafna mill-​profeziji rigward il-​Messija, il-​Kristjani llum jifhmu l-​profezija tal-​Bibbja sa l-​iċken dettall biss wara li din titwettaq. (Luqa 24:​15, 27; Atti 1:​15-​21; 4:​26, 27) L-​Apokalissi hu ktieb profetiku, u għalhekk għandna nistennew li nifhmuh b’mod l-​iktar ċar x’ħin jitwettqu l-​ġrajjiet li jiddeskrivi. Per eżempju, C. T. Russell ma setax jifhem b’mod korrett is-​sinjifikat tal-​bhima simbolika taʼ lewn aħmar dagħmieni li tissemma f’Apokalissi 17:​9-11, ladarba l-​organizzazzjonijiet rappreżentati mill-​bhima, jiġifieri, il-​Lega tan-​Nazzjonijiet u l-​Ġnus Magħquda, ma bdewx jeżistu ħlief wara mewtu.a

13. Xi drabi x’jiġri meta jintafaʼ dawl fuq xi suġġett Bibliku?

¹³ Meta l-​Kristjani bikrin saru jafu li Ġentili mhux ċirkonċiżi setgħu jsiru kredenti bħalhom, din il-​bidla qajmet mistoqsija ġdida rigward il-​ħtieġa għal nies tal-​ġnus li jkunu ċirkonċiżi. Dan qanqal lill-​appostli u l-​irġiel ixjeħ biex jeżaminaw mill-​ġdid il-​kwistjoni kollha dwar iċ-​ċirkonċiżjoni. Dan il-​mudell għadu jiġi segwit illum. Leħħa qawwija taʼ dawl fuq xi suġġett Bibliku xi drabi twassal lill-​qaddejja midlukin t’Alla, “l-​ilsir leali u diskret,” biex jeżaminaw mill-​ġdid suġġetti relatati, kif juri l-​eżempju reċenti li ġej.​—Mattew 24:​45, NW.

14-16. Aġġustament tal-​ħarsa tagħna rigward it-​tempju spiritwali kif effettwa l-​fehma tagħna dwar Eżekjel kapitli 40 sa 48?

¹⁴ Fl-1971 ġiet pubblikata spjegazzjoni tal-​profezija taʼ Eżekjel fil-​ktieb “The Nations Shall Know That I Am Jehovah”​—How? Kapitlu minn dan il-​ktieb iddiskuta fil-​qosor il-​viżjoni taʼ Eżekjel dwar tempju. (Eżekjel, kapitli 40-​48) Dak iż-​żmien, l-​attenzjoni kienet iffokata dwar kif il-​viżjoni tat-​tempju taʼ Eżekjel kienet se titwettaq fid-​dinja l-​ġdida.​—2 Pietru 3:​13.

¹⁵ Madankollu, żewġ artikli pubblikati fil-​Watchtower taʼ l-​1 taʼ Diċembru, 1972, effettwaw il-​fehma tagħna dwar il-​viżjoni taʼ Eżekjel. Dawn iddiskutew it-​tempju spiritwali deskritt mill-​appostlu Pawlu f’Lhud kapitlu 10. The Watchtower spjega li l-​post Qaddis u l-​bitħa taʼ ġewwa tat-​tempju spiritwali huma marbutin mal-​kundizzjoni tal-​midlukin waqt li qegħdin fuq l-​art. Meta xi snin wara ġew reveduti kapitli 40 sa 48 taʼ Eżekjel, deher biċ-​ċar li sewwa sew bħalma t-​tempju spiritwali qed jopera llum, hekk it-​tempju li Eżekjel ra fil-​viżjoni wkoll irid ikun qed jiffunzjona llum. Dan għala?

¹⁶ Fil-viżjoni taʼ Eżekjel, jidhru qassisin għaddejjin fil-​btieħi tat-​tempju waqt li jaqdu lit-​tribujiet mhux saċerdotali. Jidher ċar li dawn il-​qassisin jirrappreżentaw lis-​“saċerdozju rjali,” il-​qaddejja midlukin taʼ Jehovah. (1 Pietru 2:9) Madankollu, dawn m’humiex se jkunu qed jaqdu fil-​bitħa tat-​tempju, li tirrappreżenta l-​art, matul ir-​Renju t’Elf Sena taʼ Kristu. (Apokalissi 20:4) Matul il-​parti l-​kbira taʼ dak il-​perijodu, jekk mhux matulu kollu, il-​midlukin se jkunu qed jaqdu lil Alla fil-​post l-​Iktar Qaddis tat-​tempju spiritwali, “fis-​sema stess.” (Lhud 9:24) Ladarba jidhru qassisin għaddejjin ’l hawn u ’l hinn fil-​btieħi tat-​tempju taʼ Eżekjel, din il-​viżjoni bilfors li qed titwettaq illum, waqt li xi wħud mill-​midlukin għadhom hawn fuq l-​art. Għaldaqstant, il-​ħarġa taʼ l-​1 taʼ Marzu, 1999, taʼ din ir-​rivista kkunsidrat ħarsa reveduta dwar dan is-​suġġett. B’hekk, saħansitra sa tmiem is-​seklu 20, inxteħet dawl spiritwali fuq il-​profezija taʼ Eżekjel.

Kun Lest li Tirranġa l-​Ħarsa Tiegħek

17. Minn mindu sirt taf il-​verità, liema aġġustamenti għamilt fil-​mod taʼ kif kont taħsibha dwar ċerti affarijiet, u kif ibbenefikajt minn dan?

¹⁷ Kulmin jixtieq jasal għall-​għarfien tal-​verità jrid ikun lest li ‘ijassar kull ħsieb għall-​ubbidjenza lil Kristu.’ (2 Korintin 10:5) Dan mhux dejjem faċli, speċjalment jekk tkun ilek taħsibha b’mod differenti għal tul taʼ żmien. Per eżempju, qabel ma tgħallimt il-​verità, forsi kont tieħu gost tiċċelebra ċerti btajjel reliġjużi mal-​familja tiegħek. Wara li bdejt tistudja l-​Bibbja, int irrealizzajt li dawn iċ-​ċelebrazzjonijiet huma attwalment taʼ oriġini pagana. Għall-​ewwel, forsi bdejt ittellaʼ u tniżżel dwar jekk għandekx tapplika dak li kont qed titgħallem. Madankollu, fl-​aħħar mill-​aħħar l-​imħabba għal Alla rebħet fuq is-​sentiment reliġjuż, u ma bqajtx tieħu sehem f’ċelebrazzjonijiet li ma jogħġbux lil Alla. Jehovah żgur li bierek id-​deċiżjoni tiegħek!​—Qabbel Lhud 11:25.

18. Kif għandna nirreaġixxu meta tiġi ċċarata l-​fehma tagħna dwar xi verità mill-​Bibbja?

¹⁸ Dejjem nibbenefikaw meta nagħmlu l-​affarijiet skond ma jrid Alla. (Isaija 48:​17, 18) Għalhekk meta tiġi ċċarata l-​ħarsa tagħna rigward xi silta mill-​Bibbja, ejja nifirħu li l-​verità qed tavanza ’l quddiem! Tassew, li nibqgħu niġu mdawlin jikkonferma li ninsabu fit-​triq it-​tajba. Hija “triq it-​tajbin” li “bħal dawl iż-​żerniq” ‘titqawwa sal-​milja tal-​jum.’ (Proverbji 4:18) Veru, fil-​preżent naraw xi aspetti taʼ l-​iskop t’Alla “mċajprin.” Imma meta jasal il-​waqt t’Alla, naraw il-​verità fil-​ġmiel kollu tagħha, dment li saqajna baqgħu mħawlin fis-​sod fit-​“triq.” Sadattant, jalla nithennew bil-​veritajiet li Jehovah ċċaralna, waqt li nistennew tidwil fuq dawk li għadna ma nifhmuhomx ċari.

19. Liema hu mod wieħed kif nuru li nħobbu l-​verità?

¹⁹ Kif nistgħu nuru b’mod prattiku mħabbitna għad-​dawl? Mod wieħed huwa billi naqraw il-​Kelma t’Alla regolarment—kuljum jekk jistaʼ jkun. Qed issegwi programm regulari taʼ qari tal-​Bibbja? Ir-​rivisti It-​Torri taʼ l-​Għassa u Stenbaħ! ukoll ifornuna b’abbundanza taʼ ikel spiritwali bnin. Ikkunsidra wkoll il-​kotba, browxers, u pubblikazzjonijiet oħrajn li tħejjew għall-​benefiċċju tagħna. U xi ngħidu dwar ir-​rapporti inkuraġġanti dwar l-​attivitajiet taʼ l-​ippridkar tas-​Saltna li jiġu pubblikati fil-​Yearbook of Jehovah’s Witnesses?

20. X’konnessjoni hemm bejn dawl u verità mingħand Jehovah u l-​attendenza tagħna għal-​laqgħat Kristjani?

²⁰ Iva, Jehovah weġibha b’mod taʼ l-​għaġeb it-​talba magħmula f’Salm 43:3. Fi tmiem dan il-​vers, naqraw: “[Jalla d-​dawl u s-​sewwa tiegħek] iwassluni sa l-​għolja mqaddsa tiegħek u sa l-​għerejjex tiegħek.” Tħares int ’il quddiem biex tqim lil Jehovah, flimkien maʼ kotra kbira t’oħrajn? L-​istruzzjoni spiritwali preżentata fil-​laqgħat tagħna hija mod importanti li bih Jehovah jipprovdi tidwil illum. X’nistgħu nagħmlu biex inkabbru l-​apprezzament tagħna għal-​laqgħat Kristjani? Nistidnuk tikkunsidra dan is-​suġġett bit-​talb fl-​artiklu li jmiss.

[Nota taʼ taħt]

Taf Twieġeb?

• Jehovah għala jirrivela l-​iskopijiet tiegħu pass pass?

• L-​appostli u l-​irġiel ixjeħ f’Ġerusalemm kif solvewha l-​kwistjoni dwar iċ-​ċirkonċiżjoni?

• L-​Istudenti tal-​Bibbja bikrin liema metodu taʼ studju tal-​Bibbja adottaw, u dan għala kien uniku?

• Uri kif id-​dawl spiritwali jiġi rivelat meta jasal il-​waqt t’Alla.

[Stampa f’paġna 12]

Charles Taze Russell kien jaf li d-​dawl kien se jiddi fuq il-​ktieb taʼ l-​Apokalissi meta jasal il-​waqt t’Alla