Żmien “it-​Tiġdid” Jinsab fil-​Qrib!

Ftit qabel ma Ġesù talaʼ s-​sema, xi wħud mid-​dixxipli leali tiegħu staqsewh: “Mulej, hu dan iż-​żmien li fih int se terġaʼ twaqqaf is-​Saltna taʼ Iżrael?” It-​tweġiba taʼ Ġesù tat wieħed x’jifhem li kellu jgħaddi ċertu żmien qabel ma tiġi s-​Saltna. Matul dak iż-​żmien, is-​segwaċi tiegħu kien se jkollhom xogħol kbir x’jagħmlu. Kellhom ikunu xhieda taʼ Ġesù “f’Ġerusalemm, fil-​Lhudija kollha u s-​Samarija u sa truf l-​art.”—Atti 1:​6-8.

Dan l-​inkarigu ma setax jitwettaq fi kwistjoni taʼ ftit ġranet, ġimgħat, jew xhur. Minkejja dan, id-​dixxipli mill-​ewwel bdew jippridkaw. Imma ma tilfux l-​interess fis-​suġġett tat-​tiġdid. L-​appostlu Pietru tkellem dwar dan it-​tiġdid quddiem folla mdaqqsa miġbura f’Ġerusalemm, meta qalilhom: “Indmu . . . u erġgħu lura minn dnubietkom biex jinħafrulkom. Hekk jiġu żminijiet taʼ mistrieħ mingħand il-​Mulej, u jibagħtilkom il-​Messija li għażlilkom, li hu Ġesù, li għalissa għandu jibqaʼ fis-​sema sa ma jseħħ it-​tiġdid kollu li fl-​imgħoddi semma Alla b’fomm il-​profeti qaddisa tiegħu.”—Korsiv tagħna; Atti 3:​19-21.

Dak it-​“tiġdid” kellu jagħti bidu għal “żminijiet taʼ mistrieħ” mingħand Jehovah. It-​tiġdid imbassar kellu jiġi f’żewġ stadji. L-​ewwel, kellu jkun hemm tiġdid spiritwali rifreskanti, li qed iseħħ bħalissa. Imbagħad għandha tiġi stabbilita ġenna letterali fuq l-​art.

Jibda Żmien it-​Tiġdid

Bħalma qal l-​appostlu Pietru lil dik il-​folla f’Ġerusalemm, ‘Ġesù kellu jibqaʼ fis-​sema.’ Hekk ġara sa l-​1914, meta Ġesù ħa l-​poter irjali u beda jsaltan bħala s-​Sultan maħtur. Pietru bassar li f’dak iż-​żmien Jehovah kellu ‘jibgħat’ lil Ibnu fis-​sens li Hu kellu jħalli lil Ġesù jwettaq l-​irwol tiegħu bħala l-​figura ċentrali fl-​iskopijiet t’Alla. Dik il-​ġrajja l-​Bibbja tiddeskriviha b’lingwaġġ simboliku: “U hi [l-organizzazzjoni t’Alla fis-​sema] wildet iben, tifel [is-Saltna t’Alla f’idejn Ġesù Kristu], li kien għad irid jirgħa l-​ġnus b’xettru tal-​ħadid.”—Apokalissi 12:5.

Imma l-​ġnus ma kellhom l-​ebda intenzjoni li jbaxxu rashom għall-​ħakma taʼ Kristu. Mhux talli hekk, talli ħaduha qatta bla ħabel kontra s-​sudditi leali tiegħu fuq l-​art, li llum huma magħrufin bħala x-​Xhieda taʼ Jehovah. Bħall-​appostli qabilhom, ix-​Xhieda ħadu fuq spallejhom bla tnikkir taʼ xejn “ix-​xogħol taʼ li jagħtu xiehda dwar Ġesù.” (Apokalissi 12:​17, NW) L-​oppożizzjoni għax-​xogħol taʼ dawn il-​Kristjani sinċieri xegħlet kontrihom f’pajjiż wara l-​ieħor. Fl-​1918, xi membri responsabbli li kienu jaħdmu fil-​kwartieri ġenerali tal-​Watch Tower Society fi Brooklyn, New York, ittellgħu l-​qorti fuq akkużi foloz u ġew sentenzjati bla ħtija għal żmien twil il-​ħabs. Għal xi żmien kien donnu li x-​xogħol taʼ għoti taʼ xiehda “sa truf l-​art” fi żmienna kien se jfalli.—Apokalissi 11:​7-10.

Madankollu, fl-​1919, il-​membri li kienu jaħdmu fil-​kwartieri ġenerali ġew meħlusin mill-​ħabs u iktar tard ġew dikjarati innoċenti minn kull akkuża falza li kienet inġiebet kontrihom. Ma tilfux ħin biex jerġgħu jibdew ix-​xogħol taʼ tiġdid spiritwali. Minn dak iż-​żmien ’l hawn, in-​nies taʼ Jehovah qegħdin igawdu prosperità spiritwali li qatt ma kien hawn bħalha.

Inbdiet kampanja estensiva biex nies minn kull ġens jiġu mgħallmin iħarsu dak kollu li Ġesù ordna lis-​segwaċi tiegħu biex jagħmlu. (Mattew 28:20) Kemm kienet ħaġa sabiħa li tara lil xi wħud, li darba kienu juru karatteristiċi annimaleski, ibiddlu l-​ħarsa tagħhom! Dawn neżgħu l-​personalità l-​qadima, li rawmet fihom affarijiet ħżiena bħal “korla,” “dagħa,” u “kliem mhux xieraq,” u libsu l-​personalità l-​ġdida, ‘li tiġġedded dejjem skond ix-​xbieha taʼ Alla li ħalaqha.’ F’sens spiritwali, kliem il-​profeta Isaija qed jitwettaq saħansitra issa: “Il-​lupu [bniedem li kien xi darba juri karatteristiċi bħal taʼ lupu] jibda jgħix mal-​ħaruf [bniedem li juri li hu ġwejjed], il-​leopard mal-​gidi, u jirgħu flimkien l-​għoġol u ferħ l-​iljun.”—Kolossin 3: 8-10; Isaija 11:​6, 9.

Ġej Iktar Tiġdid Dalwaqt!

Minbarra t-​tiġdid li rriżulta f’ġenna spiritwali llum, qed joqrob b’pass mgħaġġel iż-​żmien meta din il-​pjaneta tagħna se ssir ġenna taʼ l-​art letterali. Kien hemm parti żgħira taʼ l-​art li kienet ġenna meta Jehovah qiegħed l-​ewwel antenati tagħna, Adam u Eva, fil-​ġnien taʼ Għeden. (Ġenesi 1:​29-31) Hu għalhekk li nistgħu ngħidu li l-​Ġenna taʼ l-​art se tiġġedded. Iżda qabel iseħħ dan, l-​art trid tinħeles minn kull reliġjon falza li tant tiddiżonorah lil Alla. L-​elementi politiċi taʼ did-dinja se jieħdu ħsieb din il-​ħaġa. (Apokalissi 17:​15-18) Imbagħad, se jinqerdu l-​elementi politiċi u kummerċjali, flimkien maʼ dawk li jappoġġawhom. Fl-​aħħarnett, Satana x-​Xitan u d-​demonji tiegħu, li huma l-​aħħar opponenti t’Alla li jkun għad fadal, se jiġu maqfulin għal elf sena. Daqshekk se jdum sejjer il-​proġett taʼ tiġdid. Matul dak iż-​żmien, “ħa jifirħu d-​deżert u l-​art maħruqa; ħa jifraħ ix-​xagħri u jwarrad, ħa jwarrad bħar-​ranġis.” (Isaija 35:1) L-​art kollha se tinħeles minn kull inkwiet. (Isaija 14:7) Saħansitra l-​miljuni taʼ nies li diġà mietu se jingħataw il-​ħajja mill-​ġdid fuq l-​art. Ilkoll se jgawdu l-​benefiċċji taʼ tiġdid li jiġu permezz tas-​sagrifiċċju li Ġesù ħallas biex fdiena. (Apokalissi 20:​12-15; 22:​1, 2) Ma se jkun hemm ħadd li jkun agħmi, trux, jew magħtub fuq l-​art. “Ħadd minn min jgħammar hemm ma jgħid: ‘Jien marid.’” (Isaija 33:24) Ftit wara li tintemm il-​Ħakma t’Elf Sena taʼ Kristu, Satana u d-​demonji tiegħu se jiġu meħlusin għal ftit taż-​żmien u se jaraw kif l-​iskop t’Alla għall-​art ikun twettaq sa dak il-​punt. Imbagħad, sa fl-​aħħar, se jinqerdu għal dejjem.—Apokalissi 20:​1-3.

Meta l-​art tilħaq tmiem l-​elf sena taʼ tiġdid, “kull ma jieħu nifs” se jfaħħar lil Jehovah, u dan se jagħmluh għall-​eternità kollha. (Salm 150:6) Se tkun int fosthom? Tistaʼ, jekk trid.