Il-Valuri Morali Jaqbdu t-Triq għan-Niżla
“DAWN l-affarijiet qatt ma kienu jigru qabel,” ikkummenta Helmut Schmidt, li qabel kien il-kanċillier tal-Ġermanja. Hu kien qed jesprimi d-dispjaċir tiegħu minħabba l-każi reċenti taʼ diżonesta grassa min-naħa taʼ xi uffiċjali pubbliċi, li kienu qajmu għagħa kbira fil-pajjiż. “Minħabba r-regħba li hawn, il-livelli morali spiċċaw,” qal hu.
Huma ħafna li jaqblu miegħu. Il-livelli morali li huma bbażati fuq il-Kelma t’Alla, il-Bibbja, kienu aċċettati minn ħafna nies għal żmien twil bħala gwida dwar x’inhu tajjeb u x’inhu ħażin—iżda llum qed jingħataw il-ġenb. Dan qed jiġri saħansitra f’pajjiżi li suppost huma Kristjani.
Il-Moralità tal-Bibbja Għadha Tgħodd għal-Lum?
Il-moralità li hi bbażata fuq it-tagħlim tal-Bibbja tinkludi l-onestà u l-integrità. Minkejja dan, il-qerq, il-korruzzjoni, u l-frodi narawhom kulfejn indawru wiċċna. Il-ġurnal The Times taʼ Londra jirrapporta li xi ditektivs “jingħad li daħħlu fil-but sa £100,000 [Lm66,000] kull darba biex jittraffikaw mill-ġdid id-drogi li jkunu ġew konfiskati mill-pulizija jew biex jaħbu l-evidenza kontra dawk li jmexxu d-dinja tal-kriminalità.” Fl-Awstrija, jingħad li hi ħaġa komuni li wieħed iqarraq bil-kumpaniji taʼ l-assigurazzjoni biex jakkwista somma flus. U fil-Ġermanja, id-dinja tax-xjenza baqgħet ixxokkjata meta xi riċerkaturi dan l-aħħar skoprew “wieħed mill-iktar każi taʼ frodi skandalużi fix-xjenza Ġermaniża.” Wieħed professur, li kien “jibbrilla fost il-ġenetisti Ġermaniżi,” ġie akkużat li kien iffalsifika jew ivvinta ħafna informazzjoni.
Il-moralità li hi bbażata fuq il-Bibbja tinkludi wkoll il-fedeltà fiż-żwieġ, li suppost huwa relazzjoni dejjiema. Imma numru li dejjem jiżdied taʼ koppji qegħdin jispiċċaw fil-qorti tad-divorzju. Il-gazzetta Kattolika Christ in der Gegenwart (Il-Kristjan tal-Lum) tirrapporta li “saħansitra fl-Isvizzera, li hi meqjusa bħala pajjiż ‘konservattiv,’ iż-żwiġijiet imfarrkin qed jiżdiedu dejjem iktar.” Fl-Olanda, 33 fil-mija taż-żwiġijiet kollha jispiċċaw f’divorzju. Waħda mara li osservat il-bidliet soċjali li seħħew fil-Ġermanja f’dawn l-aħħar snin kitbet hekk dwar it-tħassib tagħha: “Iż-żwieġ issa sar meqjus bħala xi ħaġa taʼ l-antik u m’għadux moda. Ħadd m’għadu jiżżewweġ bl-iskop li jqattaʼ ħajtu kollha maʼ dak li jkun.”
Min-naħa l-oħra, hemm miljuni taʼ nies li jqisu l-livelli morali li tgħallem il-Bibbja bħala taʼ min joqgħod fuqhom u li jgħoddu għall-ħajja li ngħixu llum. Koppja miżżewġa li jgħixu fuq il-fruntiera bejn l-Isvizzera u l-Ġermanja skoprew li meta bdew jitgħallmu jgħixu skond il-morali tal-Bibbja bdew iħossuhom iktar ferħanin. Għalihom, “hemm gwida waħda biss li tgħodd għal kull aspett tal-ħajja. Din il-gwida hija l-Bibbja.”
Int x’taħseb? Il-Bibbja tistaʼ tgħinna u tiggwidana permezz tal-prinċipji tagħha? Il-moralità bbażata fuq il-Bibbja tagħmel sens illum?