Fittex lil Jehovah Qabel Jum il-​Korla Tiegħu

“Fittxu l-​Mulej . . . Fittxu [“t-​tjieba,” “NW”], fittxu l-​umiltà: biex forsi f’jum il-​korla tal-​Mulej ikollkom fejn tistkennu.”—SOFONIJA 2:3.

1. X’kienet il-​qagħda spiritwali fl-​art taʼ Ġuda meta Sofonija beda x-​xogħol profetiku tiegħu?

SOFONIJA beda x-​xogħol profetiku tiegħu fi żmien kritiku fl-​istorja taʼ l-​art taʼ Ġuda. Il-​qagħda spiritwali tal-​ġens kienet imwegħra ferm. In-​nies kienu qegħdin imorru għand il-​qassisin pagani u għand l-​astroloġi għall-​pariri, minflok ma jafdaw f’Jehovah. Il-​qima lil Bagħal, b’riti tal-​fertilità, kienet imxerrda maʼ kullimkien. Il-​mexxejja ċivili, inkluż il-​prinċpijiet, in-​nobbli, u l-​imħallfin, kienu qed jgħakksu lil dawk li lilhom suppost kienu qed jipproteġu. (Sofonija 1:9; 3:3) Mhux taʼ b’xejn li Jehovah ddeċieda li jerfaʼ ‘idu’ fuq l-​art taʼ Ġuda u Ġerusalemm biex jeqridhom!—Sofonija 1:4.

2. X’tama kien hemm għall-​qaddejja leali t’Alla fl-​art taʼ Ġuda?

² Kienet kemm kienet ħażina s-​sitwazzjoni, kien hemm xaqq taʼ tama. Fuq it-​tron issa kien hemm Ġosija, bin Amon. Għalkemm kien għadu daqsxejn taʼ tifel, Ġosija kellu mħabba ġenwina għal Jehovah. Kieku dan is-​sultan il-​ġdid jerġaʼ jġib il-​qima pura f’Ġuda, kemm kien iqawwilhom qalbhom lil dawk il-​ftit li kienu qed jaqdu lill-​veru Alla lealment! Forsi oħrajn setgħu jitqanqlu jsegwu l-​eżempju tagħhom, u b’hekk jibqgħu ħajjin f’jum il-​korla taʼ Jehovah.

Ħtiġijiet biex Wieħed Jibqaʼ Ħaj

3, 4. Liema tliet ħtiġijiet iridu jitwettqu biex individwu jeħlisha ħafif “f’jum il-​korla tal-​Mulej”?

³ Setgħu tabilħaqq xi wħud jeħilsuha ħafif f’jum il-​korla taʼ Jehovah? Iva, basta jwettqu t-​tliet kundizzjonijiet imniżżlin f’Sofonija 2:​2, 3. Waqt li nkunu qed naqraw dawn il-​versi, ejja nieħdu nota speċjali taʼ dawn il-​ħtiġijiet. Sofonija kiteb: ‘Qabel ma tkunu misħuqin bħall-​karfa wara jum xogħol, qabel ma l-​korla mħeġġa tal-​Mulej tilħaqkom, qabel ma jum il-​korla tal-​Mulej jasal għal fuqkom, fittxu l-​Mulej ilkoll, intom, l-​umli taʼ l-​art, li tagħmlu ordnijietu; fittxu [“t-​tjieba,” NW], fittxu l-​umiltà: biex forsi f’jum il-​korla tal-​Mulej ikollkom fejn tistkennu.’

⁴ Mela, biex individwu jibqaʼ ħaj dan ried (1) ifittex lil Jehovah, (2) ifittex it-​tjieba, u (3) ifittex l-​umiltà. Dawn il-​ħtiġijiet għandhom ikunu taʼ interess kbir għalina llum. Għaliex? Għax sewwa sew bħalma l-​art taʼ Ġuda u Ġerusalemm kellhom iħabbtu wiċċhom maʼ jum taʼ rendikont fis-​sebaʼ seklu Q.E.K., il-​ġnus tal-​Kristjaneżmu u, fil-​fatt, in-​nies il-​ħżiena kollha jinsabu resqin lejn konfront dirett m’Alla Jehovah fit-​tribulazzjoni, jew id-​“diqa kbira,” li ġejja. (Mattew 24:21) Kulmin jixtieq ikollu fejn jistkenn dakinhar irid jieħu azzjoni deċiżiva issa. Kif? Billi jfittex lil Jehovah, ifittex it-​tjieba, u jfittex l-​umiltà qabel ma jkun tard wisq!

5. X’hemm involut f’li ‘nfittxu lil Jehovah’ llum?

⁵ Forsi tgħid: ‘Jiena qaddej t’Alla, dedikat u mgħammed, wieħed mix-​Xhieda taʼ Jehovah. Mhux diġà wettaqthom dawn il-​ħtiġijiet?’ Fil-​fatt, mhux biżżejjed li niddedikaw ruħna lil Jehovah. Hemm iktar involut. Iżrael kien ġens dedikat, iżda fi żmien Sofonija n-​nies taʼ Ġuda ma kinux qed jgħixu fi qbil maʼ dik id-​dedikazzjoni. Minħabba f’hekk, kien wasal iż-​żmien li l-​ġens jiġi mwarrab. Biex tkun qed ‘tfittex lil Jehovah’ llum jinvolvi li tikseb u żżomm relazzjoni persunali u mill-​qalb miegħu fi sħubija maʼ l-​organizzazzjoni li hu għandu fuq l-​art. Ifisser li ssir taf kif Alla jħares lejhom l-​affarijiet u tkun dejjem attent għal kif iħossu hu. Lil Jehovah nkunu qed infittxuh meta nistudjaw il-​Kelma tiegħu bir-​reqqa, nimmeditaw fuqha, u napplikaw il-​pariri tagħha f’ħajjitna. Hekk kif infittxu wkoll il-​gwida taʼ Jehovah b’talb ħerqan u nagħmlu dak li jqanqalna l-​ispirtu qaddis, ir-​relazzjoni tagħna miegħu se ssir iktar b’saħħitha u se nkunu iktar imqanqlin li naqduh ‘b’qalbna kollha, b’ruħna kollha u b’saħħitna kollha.’—Dewteronomju 6:5; Galatin 5:​22-25; Filippin 4:​6, 7; Apokalissi 4:11.

6. Kif ‘infittxu t-​tjieba,’ u dan għala huwa possibbli anki f’din id-​dinja?

⁶ It-​tieni ħtieġa msemmija f’Sofonija 2:3 hi li ‘nfittxu t-​tjieba.’ Il-​biċċa l-​kbira minna għamilna bidliet importanti f’ħajjitna biex stajna nikkwalifikaw għall-​magħmudija Kristjana. Madankollu, il-​livelli morali taʼ tjieba t’Alla rridu nkomplu nonorawhom tul ħajjitna kollha. Xi wħud li bdew tajjeb f’dan ir-​rigward ħallew lilhom infushom jiġu mtebbgħin mid-​dinja. Veru li mhux dejjem faċli tfittex it-​tjieba, waqt li aħna mdawrin b’nies li jqisu l-​immoralità sesswali, il-​gideb, u dnubiet oħra bħala xi ħaġa normali. Imma, jekk ikollna xewqa qawwija li rridu nogħġbu ’l Jehovah, inkunu nistgħu negħlbu kull tentazzjoni li tistaʼ tiġina biex infittxu l-​approvazzjoni tad-​dinja billi nipprovaw inkunu bħalha. Ftakar li l-​art taʼ Ġuda tilfet il-​favur t’Alla għax ipprovat tikkopja lill-​ġirien pagani tagħha. Minflok ma nimitaw lid-​dinja, ejja nkunu ‘nixbhu lil Alla,’ billi nrawmu fina l-​personalità l-​ġdida, il-​“bniedem il-​ġdid, maħluq skond Alla, fil-​ġustizzja u l-​qdusija tassew.”—Efesin 4:24; 5:1.

7. Kif ‘infittxu l-​umiltà’?

⁷ It-​tielet punt li jagħmel Sofonija 2:3 hu li, jekk irridu nsibu kenn f’jum il-​korla taʼ Jehovah, irridu ‘nfittxu l-​umiltà.’ Kuljum niltaqgħu u nitkellmu maʼ rġiel, nisa, u żgħażagħ li altru li m’humiex umlin. Għalihom, li tkun ġwejjed huwa difett. Lil min ibaxxi rasu għar-​rieda taʼ ħaddieħor iqisuh bħala li hu dgħajjef wisq. In-​nies huma stinati, egoisti, u taʼ rashom. Iriduha dejjem tgħaddi tagħhom u kulma jogħġobhom, jew li jħossu li għandhom “dritt” għalih, iriduh akkost taʼ kollox. X’ħasra jekk xi ftit minn dawn l-​attitudnijiet jibdew jeffettwaw lilna wkoll! Issa ż-​żmien li ‘nfittxu l-​umiltà.’ Kif? Billi nkunu sottomessi lejn Alla, naċċettaw id-​dixxiplina tiegħu bl-​umiltà kollha u naraw li dak li nagħmlu jkun fi qbil mar-​rieda tiegħu.

Għaliex “Forsi” Ningħataw Kenn?

8. X’inhu indikat bl-​użu tal-​kelma “forsi” f’Sofonija 2:3?

⁸ Innota li Sofonija 2:3 jgħid: “Forsi f’jum il-​korla tal-​Mulej ikollkom fejn tistkennu.” Sofonija għaliex juża l-​kelma “forsi” meta qed jindirizza lill-​“umli taʼ l-​art”? Veru li dawn l-​umlin kienu ħadu passi pożittivi, imma ma kienx hemm lok fejn wieħed jafda wisq fih innifsu. Kienu għadhom ma temmewx ħajjithom u baqgħu leali sa l-​aħħar. Setaʼ jagħti l-​każ li xi ħadd minnhom jaqaʼ fid-​dnub. L-​istess jgħodd għalina llum. Ġesù qal: “Min jibqaʼ jżomm sħiħ sa l-​aħħar, dan isalva.” (Mattew 24:13) Iva, is-​salvazzjoni tagħna f’jum il-​korla taʼ Jehovah tiddependi fuq jekk inkomplux nagħmlu dak li hu tajjeb f’għajnejh. Deċiż int li tibqaʼ tagħmel hekk?

9. Liema passi retti ħa s-​Sultan żagħżugħ Ġosija?

⁹ Milli jidher is-​Sultan Ġosija ġie mqanqal mill-​kliem taʼ Sofonija biex ‘ifittex lil Jehovah.’ L-​Iskrittura tgħid: “Fit-​tmien sena tas-​saltna tiegħu, meta kien għadu żagħżugħ [taʼ madwar 16-il sena], [Ġosija] beda jfittex lil Alla taʼ David, missieru.” (2 Kronaki 34:3) Ġosija baqaʼ wkoll ‘ifittex it-​tjieba,’ għax naqraw: “U fit-​tnax-il sena [meta Ġosija kellu madwar 20 sena] beda jnaddaf l-​art taʼ Ġuda u l-​belt taʼ Ġerusalemm mis-​santwarji u mix-​xbihat taʼ l-​Asera, mix-​xbihat minquxa, mill-​idoli mdewwba; u kisser l-​artali tal-​Bagħlim minn quddiemu.” (2 Kronaki 34:​3, 4) Ġosija ‘fittex l-​umiltà’ wkoll u aġixxa umilment biex jogħġob lil Jehovah billi naddaf il-​pajjiż mill-​idolatrija u minn prattiċi reliġjużi foloz oħra. Min jaf kemm ferħu l-​ġwejdin l-​oħra meta raw dawn l-​affarijiet iseħħu!

10. X’ġara fl-​art taʼ Ġuda fis-​sena 607 Q.E.K., u min ġie meħlus?

¹⁰ Kien hemm bosta Lhud li daru lura lejn Jehovah matul ir-​renju taʼ Ġosija. Iżda wara li miet is-​sultan ħafna reġgħu għal li kienu qabel u bdew jagħmlu affarijiet li lil Alla ma kienu jogħġbuh assolutament xejn. Bħalma kien iddikjara Jehovah li kellu jiġri, il-​Babiloniżi invadew l-​art taʼ Ġuda u qerdu lil Ġerusalemm, il-​belt kapitali tagħha, fis-​sena 607 Q.E.K. Iżda mhux kulħadd intilef. Il-​profeta Ġeremija, Għebed-melek l-​Etjopjan, id-​dixxendenti taʼ Ġonadab, u oħrajn li kienu leali lejn Alla kellhom fejn jistkennu f’jum il-​korla taʼ Jehovah.—Ġeremija 35:18, 19; 39:​11, 12, 15-18.

Għedewwa t’Alla, Iftħu Widnejkom!

11. Għala hija xi ħaġa taʼ sfida li tibqaʼ leali lejn Alla llum, imma l-​għedewwa tal-​poplu taʼ Jehovah x’jagħmlu sewwa li jqisu?

¹¹ Waqt li nistennew jum il-​korla taʼ Jehovah jiġi fuq din id-​dinja mill-​agħar, qegħdin ‘inħabbtu wiċċna maʼ kull xorta taʼ tiġrib.’ (Ġakbu 1:2) F’għadd taʼ pajjiżi li jgħidu li jgħożżu l-​libertà tar-​reliġjon, membri tal-​kleru li jaħdmu minn taħt użaw l-​influwenza li għandhom fuq l-​awtoritajiet sekulari biex iġibu persekuzzjoni qalila fuq il-​poplu t’Alla. Nies bla skrupli jaqilgħu gideb fuq ix-​Xhieda taʼ Jehovah u jittimbrawhom bħala “setta perikoluża.” Alla jaf tajjeb x’inhuma jagħmlu u mhux se jħallihielhom għaddejja lixxa. L-​għedewwa tiegħu jaqblilhom iqisu xi ġralhom xi wħud mill-​għedewwa tal-​poplu t’Alla fl-​imgħoddi, bħall-​Filistin. Il-​profezija tgħid: “Għax Gaża għad tkun ħerba, u Askalon deżert; Asdod titkeċċa ’l barra f’nofsinhar, Għekron titqaċċat.” Il-​bliet Filistin taʼ Gaża, Askalon, Asdod, u Għekron kienu se jinqerdu għalkollox.—Sofonija 2:​4-7.

12. X’sar mill-​Filistja, Mowab, u Għammon?

¹² Il-​profezija tissokta: “Smajt lil Mowab imaqdar, smajt iż-​żebliħ ukoll taʼ wlied Għammon, kif maqdru l-​poplu tiegħi u tkabbru kontra arthom.” (Sofonija 2:8) Veru li l-​Eġittu u l-​Etjopja kienu sofrew taħt idejn il-​Babiloniżi li invadewhom. Imma x’kien il-​ħaqq t’Alla kontra Mowab u Għammon, il-​ġnus dixxendenti taʼ Lot, in-​neputi t’Abraham? Jehovah bassar: “Bħal Sodoma jiġri lil Mowab, u bħal Gomorra lil ulied Għammon.” Kuntrarju għall-​antenati tagħhom, jiġifieri ż-​żewġ ulied bniet taʼ Lot li salvaw mill-​qerda li ġiet fuq Sodoma u Gomorra, l-​imkabbrin Mowab u Għammon ma kienx se jkollhom fejn jistkennu mill-​ħaqq t’Alla. (Sofonija 2:​9-​12; Ġenesi 19:​16, 23-​26, 36-​38) Illum, fejn hi l-​Filistja, u l-​bliet tagħha? U xi ngħidu għal Mowab u għal Għammon li darba kienu tant kburin? Tistaʼ tfittex kemm trid, għax ma ssibhomx.

13. Liema skoperta arkeoloġika saret f’Ninwè?

¹³ Fi żmien Sofonija, l-​Imperu Assirjan kien fl-​aqwa tiegħu. Biex jiddeskrivi parti mill-​palazz irjali li kien skopra fil-​belt taʼ Ninwè, il-​kapitali taʼ l-​Assirja, l-​arkeologu Austen Layard kiteb: “Is-​soqfa . . . kienu maqsumin kaxxi kaxxi, bi fjuri jew figuri t’annimali mpittrin fuqhom. Xi wħud kienu ingastati bl-​avorju u kull kaxxa kienet imdawra b’borduri u bi gwarniċi eleganti. It-​travi, u anki l-​ġnub tal-​kmamar, x’aktarx kienu indurati, jekk mhux miksija, bid-​deheb u l-​fidda; u x-​xogħol taʼ l-​injam kien magħmul minn l-​iktar injam rari, speċjalment miċ-​ċedru.” Madankollu, bħalma kien imbassar fil-​profezija taʼ Sofonija, l-​Assirja kellha tinqered u l-​belt kapitali tagħha, Ninwè, kellha ssir “art niexfa bħad-​deżert.”​—Sofonija 2:​13.

14. Il-​profezija taʼ Sofonija kif twettqet fuq Ninwè?

¹⁴ Laħqu għaddew biss 15-il sena minn meta Sofonija lissen dik il-​profezija u s-​setgħana Ninwè nqerdet, u l-​palazz irjali tagħha ġġarraf għalkollox. Iva, din il-​belt kburija nġiebet fix-​xejn u saret trab. Dan il-​kliem li ġej bassar b’mod ċar kemm kellha tkun kbira din il-​qerda: “Sa l-​pellikan u sa l-​qanfud jgħammru fil-​kapitelli [mwaqqgħin] tagħha; il-​barbaġann fit-​tieqa jsammaʼ leħnu, l-​għorab fuq l-​għatba, għaliex l-​injam taċ-​ċedru nqalaʼ minnha.” (Sofonija 2:​14, 15) Il-​bini grandjuż taʼ Ninwè kellu jkun tajjeb biss biex jgħixu fih il-​pellikani u l-​qniefed. Fit-​toroq ma kellhomx jibqgħu jinstemgħu iktar il-​ħsejjes tal-​kummerċjanti, l-​għajat tal-​gwerriera, u l-​kant reliġjuż tal-​qassisin. F’dawk it-​toroq li darba kienu miżgħudin bin-​nies, kienet se tinstemaʼ biss l-​għajta taʼ xi barbaġann, jew il-​ħoss tar-​riħ ivenven. Bl-​istess mod, jalla l-​għedewwa kollha t’Alla jintemmu!

15. X’nistgħu nitgħallmu minn dak li ġralhom il-​Filistja, Mowab, Għammon, u l-​Assirja?

¹⁵ X’nistgħu nitgħallmu minn dak li ġralhom il-​Filistja, Mowab, Għammon, u l-​Assirja? Nitgħallmu dan: Bħala l-​qaddejja taʼ Jehovah, m’għandniex għalfejn nibżgħu mill-​għedewwa tagħna. Alla jara x’inhuma jagħmlu dawk li jopponu lill-​poplu tiegħu. Jehovah aġixxa kontra l-​għedewwa tiegħu fil-​passat, u l-​ġudizzji tiegħu se jiġu fuq l-​art abitata kollha llum. Imma se jkun hemm min jibqaʼ ħaj: ‘folla kbira mill-​ġnus kollha.’ (Apokalissi 7:9) Int tistaʼ tkun fosthom, basta tkompli tfittex lil Jehovah, tfittex it-​tjieba, u tfittex l-​umiltà.

Ħażin Għalihom in-​Nies Ħżiena u Insolenti!

16. X’qalet il-​profezija taʼ Sofonija dwar il-​prinċpijiet u l-​mexxejja reliġjużi fl-​art taʼ Ġuda, u dan il-​kliem għala joqgħodlu tajjeb lill-​Kristjaneżmu?

¹⁶ Il-​profezija taʼ Sofonija tiffoka mill-​ġdid fuq l-​art taʼ Ġuda u fuq Ġerusalemm. Sofonija 3:​1, 2 jgħid: “Ħażin għaliha għar-​ras iebsa tagħha, għat-​tinġis tagħha, il-​belt li taħqar! Għas-​sejħa ma tatx widen, lanqas ma qagħdet għat-​twiddib li kellha; hi ma riditx tittama fil-​Mulej, lanqas ma resqet lejn Alla tagħha.” Xi traġedja li l-​poplu taʼ Jehovah ma tax kasu meta pprova jiddixxiplinah! Kienet tabilħaqq taʼ stmerrija l-​ħruxija tal-​prinċpijiet, tan-​nies nobbli, u taʼ l-​imħallfin. Sofonija jmaqdar bil-​qawwa l-​wiċċ tost tal-​mexxejja reliġjużi meta jgħid: “Fiergħa l-​profeti tagħha, nies qarrieqa; il-​qassisin tagħha s-​santwarju jipprofanaw, u jiksru l-​liġi.” (Sofonija 3:​3, 4) Kemm joqgħod preċiż dan il-​kliem għall-​profeti u l-​qassisin tal-​Kristjaneżmu llum! B’mod insolenti, huma neħħew l-​isem divin mit-​traduzzjonijiet tagħhom tal-​Bibbja u għallmu duttrini li jirrappreżentawh ħażin lil Dak li huma jgħidu li jqimu.

17. Kemm jekk in-​nies jisimgħu u kemm jekk le, għala għandna nkomplu niddikjaraw l-​aħbar tajba?

¹⁷ Għax kien jimpurtah minnhom, Jehovah wissa lill-​poplu tiegħu tal-​qedem dwar l-​azzjoni li kien wasal biex jieħu. Bagħat lill-​qaddejja tiegħu l-​profeti, lil Sofonija u Ġeremija fost oħrajn, biex iħeġġu lin-​nies biex jindmu. Iva, “Il-​Mulej ġust f’nofsha, ma jagħmel ebda ħażen; taʼ kull filgħodu jxandar il-​ġustizzja tiegħu, bħas-​sebħ hu ma jonqosx.” U x’kienet ir-​reazzjoni? “Imma l-​ħażin ma jaf b’ebda mistħija,” qal Sofonija. (Sofonija 3:5) Twissija simili qegħda tixxandar illum. Jekk int pubblikatur taʼ l-​aħbar tajba, int qed tieħu sehem f’dan ix-​xogħol taʼ twissija. Mela kompli ddikjara l-​aħbar tajba bla ma taqtaʼ xejn! Kemm jekk in-​nies jisimgħu u kemm jekk le, il-​ministeru tiegħek hu taʼ suċċess f’għajnejn Alla sakemm int qed tagħmlu lealment. M’hemm xejn x’iħammarlek wiċċek meta tagħmel ix-​xogħol t’Alla b’żelu.

18. Kif se jitwettaq Sofonija 3:6?

¹⁸ It-​twettiq tal-​ħaqq t’Alla mhux se jkun limitat għall-​qerda tal-​Kristjaneżmu. Jehovah jinkludi lill-​ġnus kollha fil-​kundanna tiegħu: “Jiena qaċċatt il-​ġnus, saru l-​gardjoli tagħhom ħerba waħda, ħarbatt it-​triqat tagħhom, bla ħadd ma jgħaddi minnhom; nqerdu bliethom.” (Sofonija 3:6) Dan il-​kliem tant hu taʼ min jorbot fuqu li Jehovah jitkellem bħallikieku l-​qerda diġà seħħet. X’sar minnhom il-​bliet tal-​Filistja, Mowab, u Għammon? U xi ngħidu għal Ninwè, il-​belt kapitali taʼ l-​Assirja? Il-​qerda tagħhom għandha sservi bħala eżempju taʼ twissija għall-​ġnus illum. Lil Alla ħadd ma jidħaq bih.

Ibqaʼ Fittex lil Jehovah

19. Liema mistoqsijiet li jġagħluk taħseb nistgħu nistaqsu?

¹⁹ Fi żmien Sofonija, il-​korla t’Alla xegħlet għal dawk il-​ħżiena li “ħassru għemilhom kollu.” (Sofonija 3:7) L-​istess se jiġri fi żmienna. Taraha int l-​evidenza li jum il-​korla taʼ Jehovah hu qrib? Qiegħed tkompli ‘tfittex lil Jehovah’ billi taqra l-​Kelma tiegħu regolarment, anzi kuljum? Qiegħed verament ‘tfittex it-​tjieba’ billi tgħix ħajja nadifa moralment fi qbil mal-​livelli t’Alla? U qiegħed int ‘tfittex l-​umiltà’ billi turi attitudni ġwejda u tkun sottomess lejn Alla u lejn it-​tħejjijiet tiegħu għas-​salvazzjoni?

20. Liema mistoqsijiet se nqisu fl-​aħħar artiklu minn din is-​serje dwar il-​profezija taʼ Sofonija?

²⁰ Jekk nibqgħu lealment infittxu lil Jehovah, it-​tjieba, u l-​umiltà, allura nistgħu nistennew li ngawdu ħafna barkiet minn issa stess, saħansitra f’dawn l-​aħħar jiem li huma taʼ prova għall-​fidi tagħna. (2 Timotju 3:​1-5; Proverbji 10:22) Imma nagħmlu tajjeb li nistaqsu, ‘B’liema modi aħna mberkin illum bħala l-​qaddejja taʼ Jehovah? U għall-​ġejjieni, liema barkiet tpoġġi l-​profezija taʼ Sofonija quddiem dawk li se jkollhom fejn jistkennu f’jum il-​korla taʼ Jehovah li riesaq b’tant għaġla?’

Int Kif Twieġeb?

• In-nies kif ‘ifittxu lil Jehovah’?

• X’inhu involut f’li wieħed ‘ifittex it-​tjieba’?

• Kif nistgħu ‘nfittxu l-​umiltà’?

• Għala għandna nibqgħu nfittxu lil Jehovah, it-​tjieba, u l-​umiltà?

[Stampa f’paġna 18]

Qiegħed int tfittex lil Jehovah permezz taʼ studju tal-​Bibbja u talb ħerqan?

[Stampa f’paġna 21]

Talli jkomplu jfittxu lil Jehovah, se jkun hemm folla kbira taʼ nies li se jibqgħu ħajjin f’jum il-​korla tiegħu