L-​Irxoxt taʼ Ġesù taħt il-​Lenti

“Nistaʼ ngħidilkom bla tlaqliq li waqt li nistgħu nkunu assolutament ċerti li Ġesù għex . . . , ma nistgħux bl-​istess ċertezza ngħidu li nafu li Alla qajmu mill-​imwiet.” Hekk stqarr l-​Arċisqof taʼ Canterbury, l-​ogħla awtorità taċ-​Church of England.

PAWLU, l-​appostlu Kristjan, ma kellux dubju dwar l-​irxoxt. F’kapitlu 15 taʼ l-​ewwel ittra ispirata tiegħu lil sħabu l-​Kristjani f’Korintu tal-​qedem, hu kiteb: “Qabel xejn, jien għallimtkom dak li tgħallimt jien, jiġifieri, li Kristu miet minħabba dnubietna, skond l-​Iskrittura; difnuh u qam mill-​imwiet fit-​tielet jum, skond l-​Iskrittura.”—1 Korintin 15:​3, 4.

Kienet il-​fidi fl-​irxoxt taʼ Ġesù Kristu li qanqlet lid-​dixxipli tiegħu biex jippridkaw l-​evanġelju fid-​dinja Griega-Rumana—“lill-​ħlejjaq kollha taħt is-​smewwiet.” (Kolossin 1:23) Fil-​fatt, l-​irxoxt taʼ Ġesù huwa l-​pedament stess tal-​fidi Kristjana.

Iżda mill-​bidunett kien hemm ħafna li ddubitaw u m’emmnux fl-​irxoxt taʼ Ġesù. Għal-​Lhud in ġenerali, kienet dagħwa li s-​segwaċi taʼ Ġesù jsostnu li dan ir-​raġel imsammar maʼ zokk kien il-​Messija. U għall-​biċċa l-​kbira mill-​Griegi li kellhom ċertu livell taʼ skola u li kienu jemmnu fl-​immortalità tar-​ruħ, l-​istess idea taʼ rxoxt kienet iddejjaqhom għall-​aħħar.—Atti 17:​32-34.

Uħud fi Żmienna li Jiddubitaw

Dan l-​aħħar, xi studjużi li jgħidu li huma Kristjani ppubblikaw kotba u artikli li fihom sostnew li l-​irxoxt taʼ Ġesù huwa ħrafa. B’hekk, dawn l-​istudjużi taw bidu għal dibattitu jaħraq dwar dan is-​suġġett. Fit-​tfittxija tagħhom għal “Ġesù storiku,” diversi studjużi jargumentaw li r-​rakkonti fl-​Evanġelju dwar il-​qabar vojt u dwar id-​dehriet taʼ Ġesù wara l-​irxoxt tiegħu m’huma xejn ħlief ħrafa. Skond ma jgħidu huma, din il-​ħrafa ġiet ivvintata żmien twil wara l-​mewt taʼ Ġesù sabiex tappoġġa lil dawk li jsostnu li hu għandu qawwa mis-​sema.

Per eżempju, ikkunsidra l-​ħarsa taʼ l-​istudjuż Ġermaniż Gerd Lüdemann, professur tat-​Testment il-​Ġdid u awtur tal-​ktieb What Really Happened to Jesus—A Historical Approach to the Resurrection. Hu jargumenta li l-​irxoxt taʼ Ġesù huwa “stqarrija vojta” li trid tiġi rifjutata minn kulmin għandu “ħarsa xjentifika lejn id-​dinja.”

Il-Professur Lüdemann isostni li dak li l-​appostlu Pietru ħaseb li kien Kristu rxoxtat kien biss viżjoni li rriżultat min-​niket u l-​ħtija li fnew lil Pietru minħabba li kien ċaħad lil Ġesù. U skond Lüdemann, il-​fatt li f’okkażjoni minnhom Ġesù deher lil iktar minn 500 kredent kien każ taʼ “estasi tal-​massa.” (1 Korintin 15:​5, 6) Fil-​qosor, ħafna studjużi jgħidu li r-​rakkonti tal-​Bibbja dwar Ġesù rxoxtat huma biss sensiela taʼ esperjenzi fil-​moħħ li pproduċew fid-​dixxipli sens imġedded taʼ fiduċja spiritwali fihom infushom u taʼ żelu missjunarju.

M’għandniex xi ngħidu, ħafna nies ma tantx jinteressaw ruħhom f’kontroversji intellettwali. Madankollu, ilkoll kemm aħna għandna ninteressaw ruħna f’diskussjoni dwar l-​irxoxt taʼ Ġesù. Għala? Għaliex, jekk ma ġiex irxoxtat, il-​Kristjanità tkun ibbażata fuq pedament falz. Mill-​banda l-​oħra, jekk l-​irxoxt taʼ Ġesù huwa tassew fatt taʼ l-​istorja, il-​Kristjanità tkun ibbażata fuq il-​verità. F’dawn iċ-​ċirkustanzi, mhux talli jiġu ġustifikati l-​istqarrijiet taʼ Kristu imma wkoll il-​wegħdi tiegħu. Iktar minn hekk, jekk hemm l-​irxoxt, il-​mewt ma tkunx ir-​rebbieħa l-​kbira imma għadu li jistaʼ jintgħeleb.—1 Korintin 15:55.

[Sors tal-​Istampa f’paġna 3]

Mis-​Self Pronouncing Edition of the Holy Bible, li fiha l-​verżjonijiet tal-​King James u tar-​Revised