Ieqfu Sħaħ u b’Konvinzjoni Soda

Uħud Kuraġġużi li Jżommu l-​Integrità Jittrijonfaw fuq il-​Persekuzzjoni tan-​Nazi

“KUN għaref, ibni, u ferraħli qalbi, biex inkun nistaʼ nwieġeb lil min jgħajjarni.” (Proverbji 27:11) Din l-​istedina mill-​qalb turi li l-​ħlejjaq intelliġenti t’Alla jistgħu jferrħu qalb Jehovah billi jibqgħu jżommu l-​fedeltà u l-​lealtà tagħhom lejh. (Sofonija 3:17) Madankollu, Satana, il-​wieħed li qed jgħajjar lil Jehovah, huwa determinat li jkisser l-​integrità taʼ dawk li jaqdu lil Jehovah.—Ġob 1:​10, 11.

Satana wera korla kbira lejn in-​nies taʼ Jehovah, b’mod speċjali minn mindu twaddab ’il barra mis-​smewwiet lejn il-​viċinanzi taʼ l-​art kmieni fis-​seklu 20. (Apokalissi 12:​10, 12) Minkejja dan, il-​Kristjani veri waqfu “sħaħ u b’konvinzjoni soda” u żammew l-​integrità tagħhom lejn Alla. (Kolossin 4:​12, NW) Ejja nikkunsidraw fil-​qosor eżempju wieħed li jispikka taʼ wħud li żammew l-​integrità—dak tax-​Xhieda taʼ Jehovah fil-​Ġermanja qabel u matul it-​Tieni Gwerra Dinjija.

Attività Żeluża Twassal għal Provi taʼ Integrità

Fis-​snin għoxrin u kmieni fis-​snin tletin, il-​Bibelforscher, bħalma kienu magħrufin ix-​Xhieda taʼ Jehovah fil-​Ġermanja dak iż-​żmien, qassmu ammonti kbar taʼ letteratura bbażata fuq il-​Bibbja. Bejn l-​1919 u l-​1933, huma ħallew medja taʼ tmien kotba, fuljetti, jew rivisti maʼ kull familja fil-​Ġermanja.

Dik il-​ħabta, il-​Ġermanja kellha wieħed mill-​akbar gruppi taʼ segwaċi midlukin taʼ Kristu. Fil-​fatt, mit-​83,941 persuna mid-​dinja kollha li ħadu sehem fl-​Ikla taʼ Fil-​Għaxija tal-​Mulej fl-​1933, kważi 30 fil-​mija minnhom kienu jgħixu fil-​Ġermanja. Ftit żmien wara, dawn ix-​Xhieda Ġermaniżi kellhom jgħaddu minn provi ibsin ħafna taʼ integrità. (Apokalissi 12:17; 14:12) Għall-​ewwel bdew jingħataw is-​sensja, jitkeċċew mill-​iskejjel, u jsirulhom tfittxijiet għal għarrieda fid-​djar. Imbagħad, fi żmien qasir, bdew jiġu msawtin, arrestati, u mitfugħin il-​ħabs. (L-1 Stampa) Minħabba f’hekk, fis-​snin li wasslu għat-​Tieni Gwerra Dinjija, minn 5 sa 10 fil-​mija taʼ dawk miżmumin fil-​kampijiet tal-​konċentrament kienu Xhieda taʼ Jehovah.

Għala n-​Nazi Ppersegwitaw lix-​Xhieda

Iżda x-​Xhieda taʼ Jehovah għala qanqlu r-​rabja tar-​reġim Nazista? Fil-​ktieb tiegħu Hitler​—1889-​1936: Hubris, il-​professur taʼ l-​istorja Ian Kershaw jinnota li x-​Xhieda saru l-​mira tal-​persekuzzjoni għax ma ridux “li jkunu l-​propjetà taʼ l-​istat Nazista għalkollox.”

Il-ktieb Betrayal​—German Churches and the Holocaust, editjat mill-​professur taʼ l-​istorja Robert P. Ericksen u l-​professoressa taʼ l-​istudji Lhudin Susannah Heschel, spjega li x-​Xhieda ‘rrifjutaw li jieħdu sehem fil-​vjolenza jew fl-​użu tal-​forza militari. Ix-​Xhieda kienu jemmnu fin-​newtralità politika, li kienet tfisser li la kienu se jivvotaw lil Hitler u lanqas ma kienu se jfaħħruh billi jgħidu Heil Hitler.’ Il-​ktieb ikompli li dan qanqal ir-​rabja tan-​Nazi u poġġa lix-​Xhieda f’pożizzjoni kritika għax “is-​Soċjaliżmu Nazzjonali qatt ma kien se jittollera rifjut bħal dan.”

Protesta mad-​Dinja Kollha u Attakk Sfrenat

Fid-​9 taʼ Frar, 1934, Joseph F. Rutherford, li dak iż-​żmien kien minn taʼ quddiemnett fix-​xogħol, bagħat ittra taʼ protesta lil Hitler. Din intbagħtet permezz taʼ messaġġier speċjali bħala risposta għall-​intolleranza minn Hitler. (It-2 Stampa) Wara dan, fis-​7 t’Ottubru, 1934, ix-​Xhieda taʼ Jehovah minn 50 pajjiż, inkluż il-​Ġermanja, bagħtu madwar 20,000 ittra u telegramma taʼ protesta lil Hitler.

Ir-reazzjoni tan-​Nazi kienet li komplew iħarrxu l-​persekuzzjoni tagħhom. Fl-​1 t’April, 1935, ix-​Xhieda ġew projbiti mal-​pajjiż kollu. Fit-​28 t’Awissu, 1936, il-​Gestapo taw bidu għal attakk sfrenat kontrihom. Madankollu, ix-​Xhieda “komplew iqassmu l-​fuljetti u baqgħu jħaddnu l-​fidi tagħhom,” jinnota Betrayal​—German Churches and the Holocaust.

Per eżempju, fit-​12 taʼ Diċembru, 1936, xi 3,500 Xhud qassmu għaxriet t’eluf taʼ kopji stampati tar-​riżoluzzjoni li saret dwar it-​trattament aħrax li kienu qed isofru. Dan sar taħt imnieħer il-​Gestapo. Dwar din il-​kampanja, It-​Torri taʼ l-​Għassa qal: “Għall-​ħaddiema leali, din kienet rebħa kbira taʼ ferħ liema bħalu waqt li kienet daqqa taʼ ħarta kbira għall-​għadu.”—Rumani 9:17.

Il-​Persekuzzjoni Tisfaxxa fix-​Xejn!

In-​Nazi komplew bit-​tfittxija tagħhom għax-​Xhieda taʼ Jehovah. Sa l-​1939, sitt elef minnhom kienu ġew mitfugħin il-​ħabs, u eluf minnhom kienu ntbagħtu f’kampijiet tal-​konċentrament. (It-3 Stampa) X’kienet is-​sitwazzjoni meta ntemmet it-​Tieni Gwerra Dinjija? Madwar 2,000 Xhud li kienu l-​ħabs mietu. Fosthom kien hemm iktar minn 250 li nqatlu. “Minkejja l-​inkwiet,” kitbu l-​Professuri Ericksen u Heschel, “fil-​biċċa l-​kbira, ix-​Xhieda taʼ Jehovah baqgħu jħaddnu l-​fidi tagħhom.” Għalhekk, meta waqaʼ r-​reġim taʼ Hitler, ’il fuq minn elf Xhud ħarġu rebbiħin mill-​kampijiet.​—Ir-​4 Stampa; Atti 5:​38, 39; Rumani 8:​35-​37.

X’kien li ta lin-​nies taʼ Jehovah l-​qawwa biex jissaportu l-​persekuzzjoni? Adolphe Arnold, wieħed minn dawk li rnexxielhom isalvaw mill-​kamp tal-​konċentrament, jispjega: “Jehovah jarak saħansitra meta ma tkunx tiflaħ iktar, jaf minn xiex tkun għaddej, u jagħtik il-​qawwa li jkollok bżonn biex tegħleb is-​sitwazzjoni u tibqaʼ leali. L-​id t’Alla m’hijiex daqshekk qasira.”

Kemm japplika tajjeb il-​kliem tal-​profeta Sofonija għal dawn il-​Kristjani leali! Hu ddikjara: “Il-​Mulej, Alla tiegħek, qiegħed f’nofsok, gwerrier li jsalva; minħabba fik jithenna b’hena kbir.” (Sofonija 3:17) Illum, jalla l-​adoraturi kollha taʼ dak Alla veru jimitaw il-​fidi taʼ dawn ix-​Xhieda leali li żammew l-​integrità tagħhom minkejja l-​persekuzzjoni tan-​Nazi. B’dan il-​mod jistgħu jferrħu qalb Jehovah huma wkoll.—Filippin 1:​12-14.

[Sors tal-​Istampa f’paġna 8]

Państwowe Muzeum Oświȩcim-Brzezinka, bil-​korteżija taʼ l-​USHMM Photo Archives