Proklamaturi tas-​Saltna Jirrapportaw

L-​Indja​—“Magħqudin Għalkemm Differenti”

“MAGĦQUDIN Għalkemm Differenti” hija frażi popolari li tintuża biex tiddeskrivi l-​ħidma nazzjonali li qed issir fl-​Indja biex din tingħaqad. M’hijiex xi biċċa xogħol ħafifa li tinkiseb l-​għaqda f’pajjiż kbir bħal dan fejn hemm differenza kbira fil-​kultura, fil-​lingwa, fir-​reliġjon, fl-​oriġini etnika, fl-​ilbies, u fl-​ikel. Madankollu, għaqda bħal din tistaʼ taraha fl-​uffiċċju taʼ l-​amministrazzjoni tax-​Xhieda taʼ Jehovah fl-​Indja. Din l-​għaqda hi possibbli avolja l-​volontieri li jgħixu u jaħdmu flimkien hemmhekk ġejjin minn ħafna stati u territorji taʼ l-​unjoni u jitkellmu b’għadd taʼ lingwi differenti.

• Niltaqgħu maʼ Rajrani, tfajla mill-​Punġab, fil-​majjistral estrem taʼ l-​Indja. Meta Rajrani kienet l-​iskola, waħda minn sħabha tal-​klassi bdiet tistudja l-​Bibbja max-​Xhieda taʼ Jehovah. Din it-​tfajla pprovat tħajjar lil Rajrani fil-​Bibbja. Peress li l-​Ingliż taʼ seħbitha kien daqsxejn limitat u f’dak iż-​żmien It-​Torri taʼ l-​Għassa ma kienx isir bil-​Punġabi, hi talbet l-​għajnuna taʼ Rajrani biex tittraduċilha l-​kontenut tar-​rivista. Dak li Rajrani qrat f’It-Torri taʼ l-​Għassa tant beda jeffettwaha li, minkejja l-​oppożizzjoni mill-​ġenituri tagħha, hi baqgħet miexja ’l quddiem sakemm waslet biex iddedikat ħajjitha lil Alla Jehovah. Filwaqt li llum taqdi fil-​Betel taʼ l-​Indja, hi tagħmel dik l-​istess ħaġa li fetħitilha għajnejha għall-​verità. Hi tittraduċi l-​pubblikazzjonijiet Kristjani fil-​Punġabi!

• Ejja niltaqgħu wkoll maʼ Bijoe, li ġej mill-​istat taʼ Kerala, fil-​lbiċ taʼ l-​Indja. Bijoe tkeċċa mill-​iskola sekondarja talli ħa waqfa newtrali matul ċerimonji nazzjonalistiċi. Wara kawża fil-​qorti li ħadet fit-​tul u li ntemmet b’rebħa storika għall-​qima pura, Bijoe reġaʼ lura l-​iskola.a Hu kompla l-​iskola u daħal l-​università. Madankollu, l-​atmosfera immorali li kien hemm bdiet iddejjaqlu l-​kuxjenza, u għalhekk waqaf jattendi wara ftit ġimgħat. Issa wara li qattaʼ għaxar snin ġo Betel, hu jħoss li bbenefika iktar bħala membru tal-​familja varjata imma magħquda taʼ Betel milli kieku baqaʼ jipprova jikseb edukazzjoni għolja.

• Norma u Lily għandhom ’il fuq minn 70 sena u ilhom romol għal diversi snin. Kull waħda minnhom qattgħet iktar minn 40 sena fil-​ministeru full-time. Lily ilha taħdem fil-​fergħa għal dawn l-​aħħar 20 sena bħala traduttriċi fil-​lingwa tat-​Tamil. Norma ġiet f’Betel 13-il sena ilu wara li tilfet lil żewġha. Minbarra li huma taʼ eżempju bħala ħaddiema biżlin u onesti, huma jinfluwenzaw għat-​tajjeb l-​għaqda tal-​familja taʼ Betel kollha. Iħobbu jduru b’min jiġi jżurhom, u jieħdu pjaċir bil-​kumpanija taʼ membri iżgħar mill-​familja, filwaqt li jaqsmu magħhom il-​ferħ li ġabulhom is-​snin twal taʼ ħajja Kristjana. U ż-​żgħażagħ ipattulhom billi jistidnuhom fil-​kmamar tagħhom għall-​kumpanija u jagħtuhom daqqa t’id fejn ikun hemm bżonn. Verament eżempji mill-​aħjar!

Wara li għelbu d-​differenzi li jġibu l-​ġlied u n-​nuqqas taʼ qbil f’ħafna postijiet, dawn il-​volontieri jaħdmu flimkien bil-​ferħ biex jaqdu lill-​oħrajn bħala membri tal-​familja magħquda taʼ Betel fl-​Indja.​—Salm 133:1.

[Nota taʼ taħt]

[Sors tal-​Istampa f’paġna 8]

Fl-​isfond: Mountain High Maps® Copyright © 1997 Digital Wisdom, Inc.